Psalms (Tehilim): Psalms (Tehilim) Chapter 99

Tanach (Hebrew): Psalms (Tehilim) Chapter 99

‎1 ‏יְהוָ֣ה מָ֭לָךְ יִרְגְּז֣וּ עַמִּ֑ים יֹשֵׁ֥ב כְּ֝רוּבִ֗ים תָּנ֥וּט הָאָֽרֶץ׃ ‎2 ‏יְ֭הוָה בְּצִיּ֣וֹן גָּד֑וֹל וְרָ֥ם ה֝֗וּא עַל־כָּל־הָֽעַמִּֽים׃ ‎3 ‏יוֹד֣וּ שִׁ֭מְךָ גָּד֥וֹל וְנוֹרָ֗א קָד֥וֹשׁ הֽוּא׃ ‎4 ‏וְעֹ֥ז מֶלֶךְ֮ מִשְׁפָּ֪ט אָ֫הֵ֥ב אַ֭תָּה כּוֹנַ֣נְתָּ מֵישָׁרִ֑ים מִשְׁפָּ֥ט וּ֝צְדָקָ֗ה בְּיַעֲקֹ֤ב׀ אַתָּ֬ה עָשִֽׂיתָ׃ ‎5 ‏רֽוֹמְמ֡וּ יְה֘וָ֤ה אֱלֹהֵ֗ינוּ וְֽ֭הִשְׁתַּחֲווּ לַהֲדֹ֥ם רַגְלָ֗יו קָד֥וֹשׁ הֽוּא׃ ‎6 ‏מֹ֘שֶׁ֤ה וְאַהֲרֹ֨ן׀ בְּֽכֹהֲנָ֗יו וּ֭שְׁמוּאֵל בְּקֹרְאֵ֣י שְׁמ֑וֹ קֹרִ֥אים אֶל־יְ֝הוָ֗ה וְה֣וּא יַעֲנֵֽם׃ ‎7 ‏בְּעַמּ֣וּד עָ֭נָן יְדַבֵּ֣ר אֲלֵיהֶ֑ם שָׁמְר֥וּ עֵ֝דֹתָ֗יו וְחֹ֣ק נָֽתַן־לָֽמוֹ׃ ‎8 ‏יְהוָ֣ה אֱלֹהֵינוּ֮ אַתָּ֪ה עֲנִ֫יתָ֥ם אֵ֣ל נֹ֭שֵׂא הָיִ֣יתָ לָהֶ֑ם וְ֝נֹקֵ֗ם עַל־עֲלִילוֹתָֽם׃ ‎9 ‏רֽוֹמְמ֡וּ יְה֘וָ֤ה אֱלֹהֵ֗ינוּ וְ֭הִֽשְׁתַּחֲווּ לְהַ֣ר קָדְשׁ֑וֹ כִּֽי־קָ֝ד֗וֹשׁ יְהוָ֥ה אֱלֹהֵֽינוּ׃

1 yəhwâ mālāḵə yirəgəzû ‘ammîm yōšēḇ kərûḇîm tānûṭ hā’āreṣ: 2 yəhwâ bəṣîywōn gāḏwōl wərām hû’ ‘al-kāl-hā‘ammîm: 3 ywōḏû šiməḵā gāḏwōl wənwōrā’ qāḏwōš hû’: 4 wə‘ōz meleḵə mišəpāṭ ’âēḇ ’atâ kwōnanətā mêšārîm mišəpāṭ ûṣəḏāqâ bəya‘ăqōḇ| ’atâ ‘āśîṯā: 5 rwōməmû yəhwâ ’ĕlōhênû wəhišətaḥăwû lahăḏōm raḡəlāyw qāḏwōš hû’: 6 mōšeh wə’ahărōn| bəḵōhănāyw ûšəmû’ēl bəqōrə’ê šəmwō qōri’ym ’el-yəhwâ wəhû’ ya‘ănēm: 7 bə‘ammûḏ ‘ānān yəḏabēr ’ălêhem šāmərû ‘ēḏōṯāyw wəḥōq nāṯan-lāmwō: 8 yəhwâ ’ĕlōhênû ’atâ ‘ănîṯām ’ēl nōśē’ hāyîṯā lâem wənōqēm ‘al-‘ălîlwōṯām: 9 rwōməmû yəhwâ ’ĕlōhênû wəhišətaḥăwû ləhar qāḏəšwō kî-qāḏwōš yəhwâ ’ĕlōhênû: