Psalms (Tehilim): Psalms (Tehilim) Chapter 98

Tanach (Hebrew): Psalms (Tehilim) Chapter 98

‎1 ‏מִזְמ֡וֹר שִׁ֤ירוּ לַֽיהוָ֨ה׀ שִׁ֣יר חָ֭דָשׁ כִּֽי־נִפְלָא֣וֹת עָשָׂ֑ה הוֹשִֽׁיעָה־לּ֥וֹ יְ֝מִינ֗וֹ וּזְר֥וֹעַ קָדְשֽׁוֹ׃ ‎2 ‏הוֹדִ֣יעַ יְ֭הוָה יְשׁוּעָת֑וֹ לְעֵינֵ֥י הַ֝גּוֹיִ֗ם גִּלָּ֥ה צִדְקָתֽוֹ׃ ‎3 ‏זָ֘כַ֤ר חַסְדּ֨וֹ׀ וֶֽאֱֽמוּנָתוֹ֮ לְבֵ֪ית יִשְׂרָ֫אֵ֥ל רָא֥וּ כָל־אַפְסֵי־אָ֑רֶץ אֵ֝֗ת יְשׁוּעַ֥ת אֱלֹהֵֽינוּ׃ ‎4 ‏הָרִ֣יעוּ לַֽ֭יהוָה כָּל־הָאָ֑רֶץ פִּצְח֖וּ וְרַנְּנ֣וּ וְזַמֵּֽרוּ׃ ‎5 ‏זַמְּר֣וּ לַיהוָ֣ה בְּכִנּ֑וֹר בְּ֝כִנּ֗וֹר וְק֣וֹל זִמְרָֽה׃ ‎6 ‏בַּ֭חֲצֹ֣צְרוֹת וְק֣וֹל שׁוֹפָ֑ר הָ֝רִ֗יעוּ לִפְנֵ֤י׀ הַמֶּ֬לֶךְ יְהוָֽה׃ ‎7 ‏יִרְעַ֣ם הַ֭יָּם וּמְלֹא֑וֹ תֵּ֝בֵ֗ל וְיֹ֣שְׁבֵי בָֽהּ׃ ‎8 ‏נְהָר֥וֹת יִמְחֲאוּ־כָ֑ף יַ֝֗חַד הָרִ֥ים יְרַנֵּֽנוּ׃ ‎9 ‏לִֽפְֽנֵי־יְהוָ֗ה כִּ֥י בָא֮ לִשְׁפֹּ֪ט הָ֫אָ֥רֶץ יִשְׁפֹּֽט־תֵּבֵ֥ל בְּצֶ֑דֶק וְ֝עַמִּ֗ים בְּמֵישָׁרִֽים׃

1 mizəmwōr šîrû layhwâ| šîr ḥāḏāš kî-nifəlā’wōṯ ‘āśâ hwōšî‘â-llwō yəmînwō ûzərwō‘a qāḏəšwō: 2 hwōḏî‘a yəhwâ yəšû‘āṯwō lə‘ênê hagwōyim gillâ ṣiḏəqāṯwō: 3 zāḵar ḥasədwō| we’ĕmûnāṯwō ləḇêṯ yiśərā’ēl rā’û ḵāl-’afəsê-’āreṣ ’ēṯ yəšû‘aṯ ’ĕlōhênû: 4 hārî‘û layhwâ kāl-hā’āreṣ piṣəḥû wərannənû wəzammērû: 5 zammərû layhwâ bəḵinnwōr bəḵinnwōr wəqwōl zimərâ: 6 baḥăṣōṣərwōṯ wəqwōl šwōfār hārî‘û lifənê| hammeleḵə yəhwâ: 7 yirə‘am hayyām ûməlō’wō tēḇēl wəyōšəḇê ḇāh: 8 nəhārwōṯ yiməḥă’û-ḵāf yaḥaḏ hārîm yərannēnû: 9 lifənê-yəhwâ kî ḇā’ lišəpōṭ hā’āreṣ yišəpōṭ-tēḇēl bəṣeḏeq wə‘ammîm bəmêšārîm: