Psalms (Tehilim): Psalms (Tehilim) Chapter 90

Tanach (Hebrew): Psalms (Tehilim) Chapter 90

‎1 ‏תְּפִלָּה֮ לְמֹשֶׁ֪ה אִֽישׁ־הָאֱלֹ֫הִ֥ים אֲ‍ֽדֹנָ֗י מָע֣וֹן אַ֭תָּה הָיִ֥יתָ לָּ֗נוּ בְּדֹ֣ר וָדֹֽר׃ ‎2 ‏בְּטֶ֤רֶם׀ הָ֘רִ֤ים יֻלָּ֗דוּ וַתְּח֣וֹלֵֽל אֶ֣רֶץ וְתֵבֵ֑ל וּֽמֵעוֹלָ֥ם עַד־ע֝וֹלָ֗ם אַתָּ֥ה אֵֽל׃ ‎3 ‏תָּשֵׁ֣ב אֱ֭נוֹשׁ עַד־דַּכָּ֑א וַ֝תֹּ֗אמֶר שׁ֣וּבוּ בְנֵי־אָדָֽם׃ ‎4 ‏כִּ֤י אֶ֪לֶף שָׁנִ֡ים בְּֽעֵינֶ֗יךָ כְּי֣וֹם אֶ֭תְמוֹל כִּ֣י יַעֲבֹ֑ר וְאַשְׁמוּרָ֥ה בַלָּֽיְלָה׃ ‎5 ‏זְ֭רַמְתָּם שֵׁנָ֣ה יִהְי֑וּ בַּ֝בֹּ֗קֶר כֶּחָצִ֥יר יַחֲלֹֽף׃ ‎6 ‏בַּ֭בֹּקֶר יָצִ֣יץ וְחָלָ֑ף לָ֝עֶ֗רֶב יְמוֹלֵ֥ל וְיָבֵֽשׁ׃ ‎7 ‏כִּֽי־כָלִ֥ינוּ בְאַפֶּ֑ךָ וּֽבַחֲמָתְךָ֥ נִבְהָֽלְנוּ׃ ‎8 ‏שת שַׁתָּ֣ה עֲוֹנֹתֵ֣ינוּ לְנֶגְדֶּ֑ךָ עֲ֝לֻמֵ֗נוּ לִמְא֥וֹר פָּנֶֽיךָ׃ ‎9 ‏כִּ֣י כָל־יָ֭מֵינוּ פָּנ֣וּ בְעֶבְרָתֶ֑ךָ כִּלִּ֖ינוּ שָׁנֵ֣ינוּ כְמוֹ־הֶֽגֶה׃ ‎10 ‏יְמֵֽי־שְׁנוֹתֵ֨ינוּ בָהֶ֥ם שִׁבְעִ֪ים שָׁנָ֡ה וְאִ֤ם בִּגְבוּרֹ֨ת׀ שְׁמ֘וֹנִ֤ים שָׁנָ֗ה וְ֭רָהְבָּם עָמָ֣ל וָאָ֑וֶן כִּי־גָ֥ז חִ֝֗ישׁ וַנָּעֻֽפָה׃ ‎11 ‏מִֽי־י֭וֹדֵעַ עֹ֣ז אַפֶּ֑ךָ וּ֝כְיִרְאָתְךָ֗ עֶבְרָתֶֽךָ׃ ‎12 ‏לִמְנ֣וֹת יָ֭מֵינוּ כֵּ֣ן הוֹדַ֑ע וְ֝נָבִ֗א לְבַ֣ב חָכְמָֽה׃ ‎13 ‏שׁוּבָ֣ה יְ֭הוָה עַד־מָתָ֑י וְ֝הִנָּחֵ֗ם עַל־עֲבָדֶֽיךָ׃ ‎14 ‏שַׂבְּעֵ֣נוּ בַבֹּ֣קֶר חַסְדֶּ֑ךָ וּֽנְרַנְּנָ֥ה וְ֝נִשְׂמְחָ֗ה בְּכָל־יָמֵֽינוּ׃ ‎15 ‏שַׂ֭מְּחֵנוּ כִּימ֣וֹת עִנִּיתָ֑נוּ שְׁ֝נ֗וֹת רָאִ֥ינוּ רָעָֽה׃ ‎16 ‏יֵרָאֶ֣ה אֶל־עֲבָדֶ֣יךָ פָעֳלֶ֑ךָ וַ֝הֲדָרְךָ֗ עַל־בְּנֵיהֶֽם׃ ‎17 ‏וִיהִ֤י׀ נֹ֤עַם אֲדֹנָ֥י אֱלֹהֵ֗ינוּ עָ֫לֵ֥ינוּ וּמַעֲשֵׂ֣ה יָ֭דֵינוּ כּוֹנְנָ֥ה עָלֵ֑ינוּ וּֽמַעֲשֵׂ֥ה יָ֝דֵ֗ינוּ כּוֹנְנֵֽהוּ׃

1 təfillâ ləmōšeh ’îš-hā’ĕlōhîm ’ă‍ḏōnāy mā‘wōn ’atâ hāyîṯā llānû bəḏōr wāḏōr: 2 bəṭerem| hārîm yullāḏû watəḥwōlēl ’ereṣ wəṯēḇēl ûmē‘wōlām ‘aḏ-‘wōlām ’atâ ’ēl: 3 tāšēḇ ’ĕnwōš ‘aḏ-dakā’ watō’mer šûḇû ḇənê-’āḏām: 4 kî ’elef šānîm bə‘êneyḵā kəywōm ’eṯəmwōl kî ya‘ăḇōr wə’ašəmûrâ ḇallāyəlâ: 5 zəramətām šēnâ yihəyû babōqer keḥāṣîr yaḥălōf: 6 babōqer yāṣîṣ wəḥālāf lā‘ereḇ yəmwōlēl wəyāḇēš: 7 kî-ḵālînû ḇə’apeḵā ûḇaḥămāṯəḵā niḇəhālənû: 8 šatā šatâ ‘ăwōnōṯênû ləneḡədeḵā ‘ălumēnû limə’wōr pāneyḵā: 9 kî ḵāl-yāmênû pānû ḇə‘eḇərāṯeḵā killînû šānênû ḵəmwō-heḡeh: 10 yəmê-šənwōṯênû ḇâem šiḇə‘îm šānâ wə’im biḡəḇûrōṯ| šəmwōnîm šānâ wərâəbām ‘āmāl wā’āwen kî-ḡāz ḥîš wannā‘ufâ: 11 mî-ywōḏē‘a ‘ōz ’apeḵā ûḵəyirə’āṯəḵā ‘eḇərāṯeḵā: 12 limənwōṯ yāmênû kēn hwōḏa‘ wənāḇi’ ləḇaḇ ḥāḵəmâ: 13 šûḇâ yəhwâ ‘aḏ-māṯāy wəhinnāḥēm ‘al-‘ăḇāḏeyḵā: 14 śabə‘ēnû ḇabōqer ḥasədeḵā ûnərannənâ wəniśəməḥâ bəḵāl-yāmênû: 15 śamməḥēnû kîmwōṯ ‘innîṯānû šənwōṯ rā’înû rā‘â: 16 yērā’eh ’el-‘ăḇāḏeyḵā fā‘ŏleḵā wahăḏārəḵā ‘al-bənêhem: 17 wîhî| nō‘am ’ăḏōnāy ’ĕlōhênû ‘ālênû ûma‘ăśēh yāḏênû kwōnənâ ‘ālênû ûma‘ăśēh yāḏênû kwōnənēhû: