Psalms (Tehilim): Psalms (Tehilim) Chapter 88

Tanach (Hebrew): Psalms (Tehilim) Chapter 88

‎1 ‏שִׁ֥יר מִזְמ֗וֹר לִבְנֵ֫י קֹ֥רַח לַמְנַצֵּ֣חַ עַל־מָחֲלַ֣ת לְעַנּ֑וֹת מַ֝שְׂכִּ֗יל לְהֵימָ֥ן הָאֶזְרָחִֽי׃ ‎2 ‏יְ֭הוָה אֱלֹהֵ֣י יְשׁוּעָתִ֑י יוֹם־צָעַ֖קְתִּי בַלַּ֣יְלָה נֶגְדֶּֽךָ׃ ‎3 ‏תָּב֣וֹא לְ֭פָנֶיךָ תְּפִלָּתִ֑י הַטֵּֽה־אָ֝זְנְךָ֗ לְרִנָּתִֽי׃ ‎4 ‏כִּֽי־שָֽׂבְעָ֣ה בְרָע֣וֹת נַפְשִׁ֑י וְחַיַּ֗י לִשְׁא֥וֹל הִגִּֽיעוּ׃ ‎5 ‏נֶ֭חְשַׁבְתִּי עִם־י֣וֹרְדֵי ב֑וֹר הָ֝יִ֗יתִי כְּגֶ֣בֶר אֵֽין־אֱיָֽל׃ ‎6 ‏בַּמֵּתִ֗ים חָ֫פְשִׁ֥י כְּמ֤וֹ חֲלָלִ֨ים׀ שֹׁ֥כְבֵי קֶ֗בֶר אֲשֶׁ֤ר לֹ֣א זְכַרְתָּ֣ם ע֑וֹד וְ֝הֵ֗מָּה מִיָּדְךָ֥ נִגְזָֽרוּ׃ ‎7 ‏שַׁ֭תַּנִי בְּב֣וֹר תַּחְתִּיּ֑וֹת בְּ֝מַחֲשַׁכִּ֗ים בִּמְצֹלֽוֹת׃ ‎8 ‏עָ֭לַי סָמְכָ֣ה חֲמָתֶ֑ךָ וְכָל־מִ֝שְׁבָּרֶ֗יךָ עִנִּ֥יתָ סֶּֽלָה׃ ‎9 ‏הִרְחַ֥קְתָּ מְיֻדָּעַ֗י מִ֫מֶּ֥נִּי שַׁתַּ֣נִי תוֹעֵב֣וֹת לָ֑מוֹ כָּ֝לֻ֗א וְלֹ֣א אֵצֵֽא׃ ‎10 ‏עֵינִ֥י דָאֲבָ֗ה מִנִּ֫י עֹ֥נִי קְרָאתִ֣יךָ יְהוָ֣ה בְּכָל־י֑וֹם שִׁטַּ֖חְתִּי אֵלֶ֣יךָ כַפָּֽי׃ ‎11 ‏הֲלַמֵּתִ֥ים תַּעֲשֶׂה־פֶּ֑לֶא אִם־רְ֝פָאִ֗ים יָק֤וּמוּ׀ יוֹד֬וּךָ סֶּֽלָה׃ ‎12 ‏הַיְסֻפַּ֣ר בַּקֶּ֣בֶר חַסְדֶּ֑ךָ אֱ֝מֽוּנָתְךָ֗ בָּאֲבַדּֽוֹן׃ ‎13 ‏הֲיִוָּדַ֣ע בַּחֹ֣שֶׁךְ פִּלְאֶ֑ךָ וְ֝צִדְקָתְךָ֗ בְּאֶ֣רֶץ נְשִׁיָּֽה׃ ‎14 ‏וַאֲנִ֤י׀ אֵלֶ֣יךָ יְהוָ֣ה שִׁוַּ֑עְתִּי וּ֝בַבֹּ֗קֶר תְּֽפִלָּתִ֥י תְקַדְּמֶֽךָּ׃ ‎15 ‏לָמָ֣ה יְ֭הוָה תִּזְנַ֣ח נַפְשִׁ֑י תַּסְתִּ֖יר פָּנֶ֣יךָ מִמֶּֽנִּי׃ ‎16 ‏עָ֘נִ֤י אֲנִ֣י וְגוֵֹ֣עַ מִנֹּ֑עַר נָשָׂ֖אתִי אֵמֶ֣יךָ אָפֽוּנָה׃ ‎17 ‏עָ֭לַי עָבְר֣וּ חֲרוֹנֶ֑יךָ בִּ֝עוּתֶ֗יךָ צִמְּתוּתֻֽנִי׃ ‎18 ‏סַבּ֣וּנִי כַ֭מַּיִם כָּל־הַיּ֑וֹם הִקִּ֖יפוּ עָלַ֣י יָֽחַד׃ ‎19 ‏הִרְחַ֣קְתָּ מִ֭מֶּנִּי אֹהֵ֣ב וָרֵ֑עַ מְֽיֻדָּעַ֥י מַחְשָֽׁךְ׃

1 šîr mizəmwōr liḇənê qōraḥ lamənaṣṣēḥa ‘al-māḥălaṯ lə‘annwōṯ maśəkîl ləhêmān hā’ezərāḥî: 2 yəhwâ ’ĕlōhê yəšû‘āṯî ywōm-ṣā‘aqətî ḇallayəlâ neḡədeḵā: 3 tāḇwō’ ləfāneyḵā təfillāṯî haṭṭēh-’āzənəḵā lərinnāṯî: 4 kî-śāḇə‘â ḇərā‘wōṯ nafəšî wəḥayyay lišə’wōl higî‘û: 5 neḥəšaḇətî ‘im-ywōrəḏê ḇwōr hāyîṯî kəḡeḇer ’ên-’ĕyāl: 6 bammēṯîm ḥāfəšî kəmwō ḥălālîm| šōḵəḇê qeḇer ’ăšer lō’ zəḵarətām ‘wōḏ wəhēmmâ mîyāḏəḵā niḡəzārû: 7 šatanî bəḇwōr taḥətîywōṯ bəmaḥăšakîm biməṣōlwōṯ: 8 ‘ālay sāməḵâ ḥămāṯeḵā wəḵāl-mišəbāreyḵā ‘innîṯā sselâ: 9 hirəḥaqətā məyudā‘ay mimmennî šatanî ṯwō‘ēḇwōṯ lāmwō kālu’ wəlō’ ’ēṣē’: 10 ‘ênî ḏā’ăḇâ minnî ‘ōnî qərā’ṯîḵā yəhwâ bəḵāl-ywōm šiṭṭaḥətî ’ēleyḵā ḵapāy: 11 hălammēṯîm ta‘ăśeh-pele’ ’im-rəfā’îm yāqûmû| ywōḏûḵā sselâ: 12 hayəsupar baqqeḇer ḥasədeḵā ’ĕmûnāṯəḵā bā’ăḇadwōn: 13 hăyiûāḏa‘ baḥōšeḵə pilə’eḵā wəṣiḏəqāṯəḵā bə’ereṣ nəšîyâ: 14 wa’ănî| ’ēleyḵā yəhwâ šiûa‘ətî ûḇabōqer təfillāṯî ṯəqadəmeḵḵā: 15 lāmâ yəhwâ tizənaḥ nafəšî tasətîr pāneyḵā mimmennî: 16 ‘ānî ’ănî wəḡwōē‘a minnō‘ar nāśā’ṯî ’ēmeyḵā ’āfûnâ: 17 ‘ālay ‘āḇərû ḥărwōneyḵā bi‘ûṯeyḵā ṣimməṯûṯunî: 18 sabûnî ḵammayim kāl-hayywōm hiqqîfû ‘ālay yāḥaḏ: 19 hirəḥaqətā mimmennî ’ōhēḇ wārē‘a məyudā‘ay maḥəšāḵə: