Psalms (Tehilim): Psalms (Tehilim) Chapter 76

Tanach (Hebrew): Psalms (Tehilim) Chapter 76

‎1 ‏לַמְנַצֵּ֥חַ בִּנְגִינֹ֑ת מִזְמ֖וֹר לְאָסָ֣ף שִֽׁיר׃ ‎2 ‏נוֹדָ֣ע בִּֽיהוּדָ֣ה אֱלֹהִ֑ים בְּ֝יִשְׂרָאֵ֗ל גָּד֥וֹל שְׁמֽוֹ׃ ‎3 ‏וַיְהִ֣י בְשָׁלֵ֣ם סֻכּ֑וֹ וּמְע֖וֹנָת֣וֹ בְצִיּֽוֹן׃ ‎4 ‏שָׁ֭מָּה שִׁבַּ֣ר רִשְׁפֵי־קָ֑שֶׁת מָגֵ֬ן וְחֶ֖רֶב וּמִלְחָמָ֣ה סֶֽלָה׃ ‎5 ‏נָ֭אוֹר אַתָּ֥ה אַדִּ֗יר מֵֽהַרְרֵי־טָֽרֶף׃ ‎6 ‏אֶשְׁתּוֹלְל֨וּ׀ אַבִּ֣ירֵי לֵ֭ב נָמ֣וּ שְׁנָתָ֑ם וְלֹא־מָצְא֖וּ כָל־אַנְשֵׁי־חַ֣יִל יְדֵיהֶֽם׃ ‎7 ‏מִ֭גַּעֲרָ֣תְךָ אֱלֹהֵ֣י יַעֲקֹ֑ב נִ֝רְדָּ֗ם וְרֶ֣כֶב וָסֽוּס׃ ‎8 ‏אַתָּ֤ה׀ נ֥וֹרָא אַ֗תָּה וּמִֽי־יַעֲמֹ֥ד לְפָנֶ֗יךָ מֵאָ֥ז אַפֶּֽךָ׃ ‎9 ‏מִ֭שָּׁמַיִם הִשְׁמַ֣עְתָּ דִּ֑ין אֶ֖רֶץ יָֽרְאָ֣ה וְשָׁקָֽטָה׃ ‎10 ‏בְּקוּם־לַמִּשְׁפָּ֥ט אֱלֹהִ֑ים לְהוֹשִׁ֖יעַ כָּל־עַנְוֵי־אֶ֣רֶץ סֶֽלָה׃ ‎11 ‏כִּֽי־חֲמַ֣ת אָדָ֣ם תּוֹדֶ֑ךָּ שְׁאֵרִ֖ית חֵמֹ֣ת תַּחְגֹּֽר׃ ‎12 ‏נִֽדֲר֣וּ וְשַׁלְּמוּ֮ לַיהוָ֪ה אֱ‍ֽלֹהֵ֫יכֶ֥ם כָּל־סְבִיבָ֑יו יוֹבִ֥ילוּ שַׁ֝֗י לַמּוֹרָֽא׃ ‎13 ‏יִ֭בְצֹר ר֣וּחַ נְגִידִ֑ים נ֝וֹרָ֗א לְמַלְכֵי־אָֽרֶץ׃

1 lamənaṣṣēḥa binəḡînōṯ mizəmwōr lə’āsāf šîr: 2 nwōḏā‘ bîhûḏâ ’ĕlōhîm bəyiśərā’ēl gāḏwōl šəmwō: 3 wayəhî ḇəšālēm sukwō ûmə‘wōnāṯwō ḇəṣîywōn: 4 šāmmâ šibar rišəfê-qāšeṯ māḡēn wəḥereḇ ûmiləḥāmâ selâ: 5 nā’wōr ’atâ ’adîr mēharərê-ṭāref: 6 ’ešətwōləlû| ’abîrê lēḇ nāmû šənāṯām wəlō’-māṣə’û ḵāl-’anəšê-ḥayil yəḏêhem: 7 miga‘ărāṯəḵā ’ĕlōhê ya‘ăqōḇ nirədām wəreḵeḇ wāsûs: 8 ’atâ| nwōrā’ ’atâ ûmî-ya‘ămōḏ ləfāneyḵā mē’āz ’apeḵā: 9 miššāmayim hišəma‘ətā dîn ’ereṣ yārə’â wəšāqāṭâ: 10 bəqûm-lammišəpāṭ ’ĕlōhîm ləhwōšî‘a kāl-‘anəwê-’ereṣ selâ: 11 kî-ḥămaṯ ’āḏām twōḏeḵḵā šə’ērîṯ ḥēmōṯ taḥəgōr: 12 niḏărû wəšalləmû layhwâ ’ĕ‍lōhêḵem kāl-səḇîḇāyw ywōḇîlû šay lammwōrā’: 13 yiḇəṣōr rûḥa nəḡîḏîm nwōrā’ ləmaləḵê-’āreṣ: