Psalms (Tehilim): Psalms (Tehilim) Chapter 4

Tanach (Hebrew): Psalms (Tehilim) Chapter 4

‎1 ‏לַמְנַצֵּ֥חַ בִּנְגִינ֗וֹת מִזְמ֥וֹר לְדָוִֽד׃ ‎2 ‏בְּקָרְאִ֡י עֲנֵ֤נִי׀ אֱלֹ֘הֵ֤י צִדְקִ֗י בַּ֭צָּר הִרְחַ֣בְתָּ לִּ֑י חָ֝נֵּ֗נִי וּשְׁמַ֥ע תְּפִלָּתִֽי׃ ‎3 ‏בְּנֵ֥י אִ֡ישׁ עַד־מֶ֬ה כְבוֹדִ֣י לִ֭כְלִמָּה תֶּאֱהָב֣וּן רִ֑יק תְּבַקְשׁ֖וּ כָזָ֣ב סֶֽלָה׃ ‎4 ‏וּדְע֗וּ כִּֽי־הִפְלָ֣ה יְ֭הוָה חָסִ֣יד ל֑וֹ יְהוָ֥ה יִ֝שְׁמַ֗ע בְּקָרְאִ֥י אֵלָֽיו׃ ‎5 ‏רִגְז֗וּ וְֽאַל־תֶּ֫חֱטָ֥אוּ אִמְר֣וּ בִ֭לְבַבְכֶם עַֽל־מִשְׁכַּבְכֶ֗ם וְדֹ֣מּוּ סֶֽלָה׃ ‎6 ‏זִבְח֥וּ זִבְחֵי־צֶ֑דֶק וּ֝בִטְח֗וּ אֶל־יְהוָֽה׃ ‎7 ‏רַבִּ֥ים אֹמְרִים֮ מִֽי־יַרְאֵ֪נוּ֫ ט֥וֹב נְֽסָה־עָ֭לֵינוּ א֨וֹר פָּנֶ֬יךָ יְהוָֽה׃ ‎8 ‏נָתַ֣תָּה שִׂמְחָ֣ה בְלִבִּ֑י מֵעֵ֬ת דְּגָנָ֖ם וְתִֽירוֹשָׁ֣ם רָֽבּוּ׃ ‎9 ‏בְּשָׁל֣וֹם יַחְדָּו֮ אֶשְׁכְּבָ֪ה וְאִ֫ישָׁ֥ן כִּֽי־אַתָּ֣ה יְהוָ֣ה לְבָדָ֑ד לָ֝בֶ֗טַח תּוֹשִׁיבֵֽנִי׃

1 lamənaṣṣēḥa binəḡînwōṯ mizəmwōr ləḏāwiḏ: 2 bəqārə’î ‘ănēnî| ’ĕlōhê ṣiḏəqî baṣṣār hirəḥaḇətā llî ḥānnēnî ûšəma‘ təfillāṯî: 3 bənê ’îš ‘aḏ-meh ḵəḇwōḏî liḵəlimmâ te’ĕhāḇûn rîq təḇaqəšû ḵāzāḇ selâ: 4 ûḏə‘û kî-hifəlâ yəhwâ ḥāsîḏ lwō yəhwâ yišəma‘ bəqārə’î ’ēlāyw: 5 riḡəzû wə’al-teḥĕṭā’û ’imərû ḇiləḇaḇəḵem ‘al-mišəkaḇəḵem wəḏōmmû selâ: 6 ziḇəḥû ziḇəḥê-ṣeḏeq ûḇiṭəḥû ’el-yəhwâ: 7 rabîm ’ōmərîm mî-yarə’ēnû ṭwōḇ nəsâ-‘ālênû ’wōr pāneyḵā yəhwâ: 8 nāṯatâ śiməḥâ ḇəlibî mē‘ēṯ dəḡānām wəṯîrwōšām rābû: 9 bəšālwōm yaḥədāw ’ešəkəḇâ wə’îšān kî-’atâ yəhwâ ləḇāḏāḏ lāḇeṭaḥ twōšîḇēnî: