Psalms (Tehilim): Psalms (Tehilim) Chapter 3

Tanach (Hebrew): Psalms (Tehilim) Chapter 3

‎1 ‏מִזְמ֥וֹר לְדָוִ֑ד בְּ֝בָרְח֗וֹ מִפְּנֵ֤י׀ אַבְשָׁל֬וֹם בְּנֽוֹ׃ ‎2 ‏יְ֭הוָה מָֽה־רַבּ֣וּ צָרָ֑י רַ֝בִּ֗ים קָמִ֥ים עָלָֽי׃ ‎3 ‏רַבִּים֮ אֹמְרִ֪ים לְנַ֫פְשִׁ֥י אֵ֤ין יְֽשׁוּעָ֓תָה לּ֬וֹ בֵֽאלֹהִ֬ים סֶֽלָה׃ ‎4 ‏וְאַתָּ֣ה יְ֭הוָה מָגֵ֣ן בַּעֲדִ֑י כְּ֝בוֹדִ֗י וּמֵרִ֥ים רֹאשִֽׁי׃ ‎5 ‏ק֭וֹלִי אֶל־יְהוָ֣ה אֶקְרָ֑א וַיַּֽעֲנֵ֨נִי מֵהַ֖ר קָדְשׁ֣וֹ סֶֽלָה׃ ‎6 ‏אֲנִ֥י שָׁכַ֗בְתִּי וָֽאִ֫ישָׁ֥נָה הֱקִיצ֑וֹתִי כִּ֖י יְהוָ֣ה יִסְמְכֵֽנִי׃ ‎7 ‏לֹֽא־אִ֭ירָא מֵרִבְב֥וֹת עָ֑ם אֲשֶׁ֥ר סָ֝בִ֗יב שָׁ֣תוּ עָלָֽי׃ ‎8 ‏ק֘וּמָ֤ה יְהוָ֨ה׀ הוֹשִׁ֘יעֵ֤נִי אֱלֹהַ֗י כִּֽי־הִכִּ֣יתָ אֶת־כָּל־אֹיְבַ֣י לֶ֑חִי שִׁנֵּ֖י רְשָׁעִ֣ים שִׁבַּֽרְתָּ׃ ‎9 ‏לַיהוָ֥ה הַיְשׁוּעָ֑ה עַֽל־עַמְּךָ֖ בִרְכָתֶ֣ךָ סֶּֽלָה׃

1 mizəmwōr ləḏāwiḏ bəḇārəḥwō mipənê| ’aḇəšālwōm bənwō: 2 yəhwâ mâ-rabû ṣārāy rabîm qāmîm ‘ālāy: 3 rabîm ’ōmərîm lənafəšî ’ên yəšû‘āṯâ llwō ḇē’lōhîm selâ: 4 wə’atâ yəhwâ māḡēn ba‘ăḏî kəḇwōḏî ûmērîm rō’šî: 5 qwōlî ’el-yəhwâ ’eqərā’ wayya‘ănēnî mēhar qāḏəšwō selâ: 6 ’ănî šāḵaḇətî wā’îšānâ hĕqîṣwōṯî kî yəhwâ yisəməḵēnî: 7 lō’-’îrā’ mēriḇəḇwōṯ ‘ām ’ăšer sāḇîḇ šāṯû ‘ālāy: 8 qûmâ yəhwâ| hwōšî‘ēnî ’ĕlōhay kî-hikîṯā ’eṯ-kāl-’ōyəḇay leḥî šinnê rəšā‘îm šibarətā: 9 layhwâ hayəšû‘â ‘al-‘amməḵā ḇirəḵāṯeḵā sselâ: