Psalms (Tehilim): Psalms (Tehilim) Chapter 114

Tanach (Hebrew): Psalms (Tehilim) Chapter 114

‎1 ‏בְּצֵ֣את יִ֭שְׂרָאֵל מִמִּצְרָ֑יִם בֵּ֥ית יַ֝עֲקֹ֗ב מֵעַ֥ם לֹעֵֽז׃ ‎2 ‏הָיְתָ֣ה יְהוּדָ֣ה לְקָדְשׁ֑וֹ יִ֝שְׂרָאֵ֗ל מַמְשְׁלוֹתָֽיו׃ ‎3 ‏הַיָּ֣ם רָ֭אָה וַיָּנֹ֑ס הַ֝יַּרְדֵּ֗ן יִסֹּ֥ב לְאָחֽוֹר׃ ‎4 ‏הֶֽ֭הָרִים רָקְד֣וּ כְאֵילִ֑ים גְּ֝בָע֗וֹת כִּבְנֵי־צֹֽאן׃ ‎5 ‏מַה־לְּךָ֣ הַ֭יָּם כִּ֣י תָנ֑וּס הַ֝יַּרְדֵּ֗ן תִּסֹּ֥ב לְאָחֽוֹר׃ ‎6 ‏הֶֽ֭הָרִים תִּרְקְד֣וּ כְאֵילִ֑ים גְּ֝בָע֗וֹת כִּבְנֵי־צֹֽאן׃ ‎7 ‏מִלִּפְנֵ֣י אָ֭דוֹן ח֣וּלִי אָ֑רֶץ מִ֝לִּפְנֵ֗י אֱל֣וֹהַּ יַעֲקֹֽב׃ ‎8 ‏הַהֹפְכִ֣י הַצּ֣וּר אֲגַם־מָ֑יִם חַ֝לָּמִ֗ישׁ לְמַעְיְנוֹ־מָֽיִם׃

1 bəṣē’ṯ yiśərā’ēl mimmiṣərāyim bêṯ ya‘ăqōḇ mē‘am lō‘ēz: 2 hāyəṯâ yəhûḏâ ləqāḏəšwō yiśərā’ēl maməšəlwōṯāyw: 3 hayyām rā’â wayyānōs hayyarədēn yissōḇ lə’āḥwōr: 4 hehārîm rāqəḏû ḵə’êlîm gəḇā‘wōṯ kiḇənê-ṣō’n: 5 mah-lləḵā hayyām kî ṯānûs hayyarədēn tissōḇ lə’āḥwōr: 6 hehārîm tirəqəḏû ḵə’êlîm gəḇā‘wōṯ kiḇənê-ṣō’n: 7 millifənê ’āḏwōn ḥûlî ’āreṣ millifənê ’ĕlwōhha ya‘ăqōḇ: 8 hahōfəḵî haṣṣûr ’ăḡam-māyim ḥallāmîš ləma‘əyənwō-māyim: