Psalms (Tehilim): Psalms (Tehilim) Chapter 108

Tanach (Hebrew): Psalms (Tehilim) Chapter 108

‎1 ‏שִׁ֖יר מִזְמ֣וֹר לְדָוִֽד׃ ‎2 ‏נָכ֣וֹן לִבִּ֣י אֱלֹהִ֑ים אָשִׁ֥ירָה וַ֝אֲזַמְּרָ֗ה אַף־כְּבוֹדִֽי׃ ‎3 ‏ע֭וּרָֽה הַנֵּ֥בֶל וְכִנּ֗וֹר אָעִ֥ירָה שָּֽׁחַר׃ ‎4 ‏אוֹדְךָ֖ בָעַמִּ֥ים׀ יְהוָ֑ה וַ֝אֲזַמֶּרְךָ֗ בַּל־אֻמִּֽים׃ ‎5 ‏כִּֽי־גָד֣וֹל מֵֽעַל־שָׁמַ֣יִם חַסְדֶּ֑ךָ וְֽעַד־שְׁחָקִ֥ים אֲמִתֶּֽךָ׃ ‎6 ‏ר֣וּמָה עַל־שָׁמַ֣יִם אֱלֹהִ֑ים וְעַ֖ל כָּל־הָאָ֣רֶץ כְּבוֹדֶֽךָ׃ ‎7 ‏לְ֭מַעַן יֵחָלְצ֣וּן יְדִידֶ֑יךָ הוֹשִׁ֖יעָה יְמִֽינְךָ֣ וַעֲנֵֽנִי׃ ‎8 ‏אֱלֹהִ֤ים׀ דִּבֶּ֥ר בְּקָדְשׁ֗וֹ אֶעְלֹ֥זָה אֲחַלְּקָ֥ה שְׁכֶ֑ם וְעֵ֖מֶק סֻכּ֣וֹת אֲמַדֵּֽד׃ ‎9 ‏לִ֤י גִלְעָ֨ד׀ לִ֤י מְנַשֶּׁ֗ה וְ֭אֶפְרַיִם מָע֣וֹז רֹאשִׁ֑י יְ֝הוּדָ֗ה מְחֹקְקִֽי׃ ‎10 ‏מוֹאָ֤ב׀ סִ֬יר רַחְצִ֗י עַל־אֱ֭דוֹם אַשְׁלִ֣יךְ נַעֲלִ֑י עֲלֵֽי־פְ֝לֶ֗שֶׁת אֶתְרוֹעָֽע׃ ‎11 ‏מִ֣י יֹ֭בִלֵנִי עִ֣יר מִבְצָ֑ר מִ֖י נָחַ֣נִי עַד־אֱדֽוֹם׃ ‎12 ‏הֲלֹֽא־אֱלֹהִ֥ים זְנַחְתָּ֑נוּ וְֽלֹא־תֵצֵ֥א אֱ֝לֹהִ֗ים בְּצִבְאֹתֵֽינוּ׃ ‎13 ‏הָֽבָה־לָּ֣נוּ עֶזְרָ֣ת מִצָּ֑ר וְ֝שָׁ֗וְא תְּשׁוּעַ֥ת אָדָֽם׃ ‎14 ‏בֵּֽאלֹהִ֥ים נַעֲשֶׂה־חָ֑יִל וְ֝ה֗וּא יָב֥וּס צָרֵֽינוּ׃

1 šîr mizəmwōr ləḏāwiḏ: 2 nāḵwōn libî ’ĕlōhîm ’āšîrâ wa’ăzammərâ ’af-kəḇwōḏî: 3 ‘ûrâ hannēḇel wəḵinnwōr ’ā‘îrâ ššāḥar: 4 ’wōḏəḵā ḇā‘ammîm| yəhwâ wa’ăzammerəḵā bal-’ummîm: 5 kî-ḡāḏwōl mē‘al-šāmayim ḥasədeḵā wə‘aḏ-šəḥāqîm ’ămiteḵā: 6 rûmâ ‘al-šāmayim ’ĕlōhîm wə‘al kāl-hā’āreṣ kəḇwōḏeḵā: 7 ləma‘an yēḥāləṣûn yəḏîḏeyḵā hwōšî‘â yəmînəḵā wa‘ănēnî: 8 ’ĕlōhîm| diber bəqāḏəšwō ’e‘əlōzâ ’ăḥalləqâ šəḵem wə‘ēmeq sukwōṯ ’ămadēḏ: 9 lî ḡilə‘āḏ| lî mənaššeh wə’efərayim mā‘wōz rō’šî yəhûḏâ məḥōqəqî: 10 mwō’āḇ| sîr raḥəṣî ‘al-’ĕḏwōm ’ašəlîḵə na‘ălî ‘ălê-fəlešeṯ ’eṯərwō‘ā‘: 11 mî yōḇilēnî ‘îr miḇəṣār mî nāḥanî ‘aḏ-’ĕḏwōm: 12 hălō’-’ĕlōhîm zənaḥətānû wəlō’-ṯēṣē’ ’ĕlōhîm bəṣiḇə’ōṯênû: 13 hāḇâ-llānû ‘ezərāṯ miṣṣār wəšāwə’ təšû‘aṯ ’āḏām: 14 bē’lōhîm na‘ăśeh-ḥāyil wəhû’ yāḇûs ṣārênû: