Psalms (Tehilim): Psalms (Tehilim) Chapter 106

Tanach (Hebrew): Psalms (Tehilim) Chapter 106

‎1 ‏הַֽלְלוּיָ֨הּ׀ הוֹד֣וּ לַיהוָ֣ה כִּי־ט֑וֹב כִּ֖י לְעוֹלָ֣ם חַסְדּֽוֹ׃ ‎2 ‏מִ֗י יְ֭מַלֵּל גְּבוּר֣וֹת יְהוָ֑ה יַ֝שְׁמִ֗יעַ כָּל־תְּהִלָּתֽוֹ׃ ‎3 ‏אַ֭שְׁרֵי שֹׁמְרֵ֣י מִשְׁפָּ֑ט עֹשֵׂ֖ה צְדָקָ֣ה בְכָל־עֵֽת׃ ‎4 ‏זָכְרֵ֣נִי יְ֭הוָה בִּרְצ֣וֹן עַמֶּ֑ךָ פָּ֝קְדֵ֗נִי בִּישׁוּעָתֶֽךָ׃ ‎5 ‏לִרְא֤וֹת׀ בְּט֘וֹבַ֤ת בְּחִירֶ֗יךָ לִ֭שְׂמֹחַ בְּשִׂמְחַ֣ת גּוֹיֶ֑ךָ לְ֝הִתְהַלֵּ֗ל עִם־נַחֲלָתֶֽךָ׃ ‎6 ‏חָטָ֥אנוּ עִם־אֲבוֹתֵ֗ינוּ הֶעֱוִ֥ינוּ הִרְשָֽׁעְנוּ׃ ‎7 ‏אֲב֘וֹתֵ֤ינוּ בְמִצְרַ֨יִם׀ לֹא־הִשְׂכִּ֬ילוּ נִפְלְאוֹתֶ֗יךָ לֹ֣א זָ֭כְרוּ אֶת־רֹ֣ב חֲסָדֶ֑יךָ וַיַּמְר֖וּ עַל־יָ֣ם בְּיַם־סֽוּף׃ ‎8 ‏וַֽ֭יּוֹשִׁיעֵם לְמַ֣עַן שְׁמ֑וֹ לְ֝הוֹדִ֗יעַ אֶת־גְּבוּרָתֽוֹ׃ ‎9 ‏וַיִּגְעַ֣ר בְּיַם־ס֭וּף וַֽיֶּחֱרָ֑ב וַיּוֹלִיכֵ֥ם בַּ֝תְּהֹמ֗וֹת כַּמִּדְבָּֽר׃ ‎10 ‏וַֽ֭יּוֹשִׁיעֵם מִיַּ֣ד שׂוֹנֵ֑א וַ֝יִּגְאָלֵ֗ם מִיַּ֥ד אוֹיֵֽב׃ ‎11 ‏וַיְכַסּוּ־מַ֥יִם צָרֵיהֶ֑ם אֶחָ֥ד מֵ֝הֶ֗ם לֹ֣א נוֹתָֽר׃ ‎12 ‏וַיַּאֲמִ֥ינוּ בִדְבָרָ֑יו יָ֝שִׁ֗ירוּ תְּהִלָּתֽוֹ׃ ‎13 ‏מִֽ֭הֲרוּ שָׁכְח֣וּ מַעֲשָׂ֑יו לֹֽא־חִ֝כּ֗וּ לַעֲצָתֽוֹ׃ ‎14 ‏וַיִּתְאַוּ֣וּ תַ֭אֲוָה בַּמִּדְבָּ֑ר וַיְנַסּוּ־אֵ֝֗ל בִּֽישִׁימֽוֹן׃ ‎15 ‏וַיִּתֵּ֣ן לָ֭הֶם שֶׁאֱלָתָ֑ם וַיְשַׁלַּ֖ח רָז֣וֹן בְּנַפְשָֽׁם׃ ‎16 ‏וַיְקַנְא֣וּ לְ֭מֹשֶׁה בַּֽמַּחֲנֶ֑ה לְ֝אַהֲרֹ֗ן קְד֣וֹשׁ יְהוָֽה׃ ‎17 ‏תִּפְתַּח־אֶ֭רֶץ וַתִּבְלַ֣ע דָּתָ֑ן וַ֝תְּכַ֗ס עַל־עֲדַ֥ת אֲבִירָֽם׃ ‎18 ‏וַתִּבְעַר־אֵ֥שׁ בַּעֲדָתָ֑ם לֶ֝הָבָ֗ה תְּלַהֵ֥ט רְשָׁעִֽים׃ ‎19 ‏יַעֲשׂוּ־עֵ֥גֶל בְּחֹרֵ֑ב וַ֝יִּשְׁתַּחֲו֗וּ לְמַסֵּכָֽה׃ ‎20 ‏וַיָּמִ֥ירוּ אֶת־כְּבוֹדָ֑ם בְּתַבְנִ֥ית שׁ֝֗וֹר אֹכֵ֥ל עֵֽשֶׂב׃ ‎21 ‏שָׁ֭כְחוּ אֵ֣ל מוֹשִׁיעָ֑ם עֹשֶׂ֖ה גְדֹל֣וֹת בְּמִצְרָֽיִם׃ ‎22 ‏נִ֭פְלָאוֹת בְּאֶ֣רֶץ חָ֑ם נ֝וֹרָא֗וֹת עַל־יַם־סֽוּף׃ ‎23 ‏וַיֹּ֗אמֶר לְֽהַשְׁמִ֫ידָ֥ם לוּלֵ֡י מֹ֘שֶׁ֤ה בְחִיר֗וֹ עָמַ֣ד בַּפֶּ֣רֶץ לְפָנָ֑יו לְהָשִׁ֥יב חֲ֝מָת֗וֹ מֵֽהַשְׁחִֽית׃ ‎24 ‏וַֽ֭יִּמְאֲסוּ בְּאֶ֣רֶץ חֶמְדָּ֑ה לֹֽא־הֶ֝אֱמִ֗ינוּ לִדְבָרֽוֹ׃ ‎25 ‏וַיֵּרָגְנ֥וּ בְאָהֳלֵיהֶ֑ם לֹ֥א שָׁ֝מְע֗וּ בְּק֣וֹל יְהוָֽה׃ ‎26 ‏וַיִּשָּׂ֣א יָד֣וֹ לָהֶ֑ם לְהַפִּ֥יל א֝וֹתָ֗ם בַּמִּדְבָּֽר׃ ‎27 ‏וּלְהַפִּ֣יל זַ֭רְעָם בַּגּוֹיִ֑ם וּ֝לְזָרוֹתָ֗ם בָּאֲרָצֽוֹת׃ ‎28 ‏וַ֭יִּצָּ֣מְדוּ לְבַ֣עַל פְּע֑וֹר וַ֝יֹּאכְל֗וּ זִבְחֵ֥י מֵתִֽים׃ ‎29 ‏וַ֭יַּכְעִיסוּ בְּמַֽעַלְלֵיהֶ֑ם וַתִּפְרָץ־בָּ֝֗ם מַגֵּפָֽה׃ ‎30 ‏וַיַּעֲמֹ֣ד פִּֽ֭ינְחָס וַיְפַלֵּ֑ל וַ֝תֵּעָצַ֗ר הַמַּגֵּפָֽה׃ ‎31 ‏וַתֵּחָ֣שֶׁב ל֭וֹ לִצְדָקָ֑ה לְדֹ֥ר וָ֝דֹ֗ר עַד־עוֹלָֽם׃ ‎32 ‏וַ֭יַּקְצִיפוּ עַל־מֵ֥י מְרִיבָ֑ה וַיֵּ֥רַע לְ֝מֹשֶׁ֗ה בַּעֲבוּרָֽם׃ ‎33 ‏כִּֽי־הִמְר֥וּ אֶת־רוּח֑וֹ וַ֝יְבַטֵּ֗א בִּשְׂפָתָֽיו׃ ‎34 ‏לֹֽא־הִ֭שְׁמִידוּ אֶת־הָֽעַמִּ֑ים אֲשֶׁ֤ר אָמַ֖ר יְהוָ֣ה לָהֶֽם׃ ‎35 ‏וַיִּתְעָרְב֥וּ בַגּוֹיִ֑ם וַֽ֝יִּלְמְד֗וּ מַֽעֲשֵׂיהֶֽם׃ ‎36 ‏וַיַּעַבְד֥וּ אֶת־עֲצַבֵּיהֶ֑ם וַיִּהְי֖וּ לָהֶ֣ם לְמוֹקֵֽשׁ׃ ‎37 ‏וַיִּזְבְּח֣וּ אֶת־בְּ֭נֵיהֶם וְאֶת־בְּנֽוֹתֵיהֶ֗ם לַשֵּֽׁדִים׃ ‎38 ‏וַיִּֽשְׁפְּכ֨וּ דָ֪ם נָקִ֡י דַּם־בְּנֵ֘יהֶ֤ם וּֽבְנוֹתֵיהֶ֗ם אֲשֶׁ֣ר זִ֭בְּחוּ לַעֲצַבֵּ֣י כְנָ֑עַן וַתֶּחֱנַ֥ף הָ֝אָ֗רֶץ בַּדָּמִֽים׃ ‎39 ‏וַיִּטְמְא֥וּ בְמַעֲשֵׂיהֶ֑ם וַ֝יִּזְ֗נוּ בְּמַֽעַלְלֵיהֶֽם׃ ‎40 ‏וַיִּֽחַר־אַ֣ף יְהוָ֣ה בְּעַמּ֑וֹ וַ֝יְתָעֵ֗ב אֶת־נַחֲלָתֽוֹ׃ ‎41 ‏וַיִּתְּנֵ֥ם בְּיַד־גּוֹיִ֑ם וַֽיִּמְשְׁל֥וּ בָ֝הֶ֗ם שֹׂנְאֵיהֶֽם׃ ‎42 ‏וַיִּלְחָצ֥וּם אוֹיְבֵיהֶ֑ם וַ֝יִּכָּנְע֗וּ תַּ֣חַת יָדָֽם׃ ‎43 ‏פְּעָמִ֥ים רַבּ֗וֹת יַצִּ֫ילֵ֥ם וְ֭הֵמָּה יַמְר֣וּ בַעֲצָתָ֑ם וַ֝יָּמֹ֗כּוּ בַּעֲוֹנָֽם׃ ‎44 ‏וַ֭יַּרְא בַּצַּ֣ר לָהֶ֑ם בְּ֝שָׁמְע֗וֹ אֶת־רִנָּתָֽם׃ ‎45 ‏וַיִּזְכֹּ֣ר לָהֶ֣ם בְּרִית֑וֹ וַ֝יִּנָּחֵ֗ם כְּרֹ֣ב חסדו חֲסָדָֽיו׃ ‎46 ‏וַיִּתֵּ֣ן אוֹתָ֣ם לְרַחֲמִ֑ים לִ֝פְנֵ֛י כָּל־שׁוֹבֵיהֶֽם׃ ‎47 ‏הוֹשִׁיעֵ֨נוּ׀ יְה֘וָ֤ה אֱלֹהֵ֗ינוּ וְקַבְּצֵנוּ֮ מִֽן־הַגּ֫וֹיִ֥ם לְ֭הֹדוֹת לְשֵׁ֣ם קָדְשֶׁ֑ךָ לְ֝הִשְׁתַּבֵּ֗חַ בִּתְהִלָּתֶֽךָ׃ ‎48 ‏בָּר֤וּךְ־יְהוָ֨ה אֱלֹהֵ֪י יִשְׂרָאֵ֡ל מִן־הָ֤עוֹלָ֨ם׀ וְעַ֬ד הָעוֹלָ֗ם וְאָמַ֖ר כָּל־הָעָ֥ם אָמֵ֗ן הַֽלְלוּ־יָֽהּ׃

1 haləlûyāh| hwōḏû layhwâ kî-ṭwōḇ kî lə‘wōlām ḥasədwō: 2 mî yəmallēl gəḇûrwōṯ yəhwâ yašəmî‘a kāl-təhillāṯwō: 3 ’ašərê šōmərê mišəpāṭ ‘ōśēh ṣəḏāqâ ḇəḵāl-‘ēṯ: 4 zāḵərēnî yəhwâ birəṣwōn ‘ammeḵā pāqəḏēnî bîšû‘āṯeḵā: 5 lirə’wōṯ| bəṭwōḇaṯ bəḥîreyḵā liśəmōḥa bəśiməḥaṯ gwōyeḵā ləhiṯəhallēl ‘im-naḥălāṯeḵā: 6 ḥāṭā’nû ‘im-’ăḇwōṯênû he‘ĕwînû hirəšā‘ənû: 7 ’ăḇwōṯênû ḇəmiṣərayim| lō’-hiśəkîlû nifələ’wōṯeyḵā lō’ zāḵərû ’eṯ-rōḇ ḥăsāḏeyḵā wayyamərû ‘al-yām bəyam-sûf: 8 wayywōšî‘ēm ləma‘an šəmwō ləhwōḏî‘a ’eṯ-gəḇûrāṯwō: 9 wayyiḡə‘ar bəyam-sûf wayyeḥĕrāḇ wayywōlîḵēm batəhōmwōṯ kammiḏəbār: 10 wayywōšî‘ēm mîyaḏ śwōnē’ wayyiḡə’ālēm mîyaḏ ’wōyēḇ: 11 wayəḵassû-mayim ṣārêhem ’eḥāḏ mēhem lō’ nwōṯār: 12 wayya’ămînû ḇiḏəḇārāyw yāšîrû təhillāṯwō: 13 mihărû šāḵəḥû ma‘ăśāyw lō’-ḥikû la‘ăṣāṯwō: 14 wayyiṯə’aûû ṯa’ăwâ bammiḏəbār wayənassû-’ēl bîšîmwōn: 15 wayyitēn lâem še’ĕlāṯām wayəšallaḥ rāzwōn bənafəšām: 16 wayəqanə’û ləmōšeh bammaḥăneh lə’ahărōn qəḏwōš yəhwâ: 17 tifətaḥ-’ereṣ watiḇəla‘ dāṯān watəḵas ‘al-‘ăḏaṯ ’ăḇîrām: 18 watiḇə‘ar-’ēš ba‘ăḏāṯām lehāḇâ təlahēṭ rəšā‘îm: 19 ya‘ăśû-‘ēḡel bəḥōrēḇ wayyišətaḥăwû ləmassēḵâ: 20 wayyāmîrû ’eṯ-kəḇwōḏām bəṯaḇənîṯ šwōr ’ōḵēl ‘ēśeḇ: 21 šāḵəḥû ’ēl mwōšî‘ām ‘ōśeh ḡəḏōlwōṯ bəmiṣərāyim: 22 nifəlā’wōṯ bə’ereṣ ḥām nwōrā’wōṯ ‘al-yam-sûf: 23 wayyō’mer ləhašəmîḏām lûlê mōšeh ḇəḥîrwō ‘āmaḏ bapereṣ ləfānāyw ləhāšîḇ ḥămāṯwō mēhašəḥîṯ: 24 wayyimə’ăsû bə’ereṣ ḥemədâ lō’-he’ĕmînû liḏəḇārwō: 25 wayyērāḡənû ḇə’âŏlêhem lō’ šāmə‘û bəqwōl yəhwâ: 26 wayyiśśā’ yāḏwō lâem ləhapîl ’wōṯām bammiḏəbār: 27 ûləhapîl zarə‘ām bagwōyim ûləzārwōṯām bā’ărāṣwōṯ: 28 wayyiṣṣāməḏû ləḇa‘al pə‘wōr wayyō’ḵəlû ziḇəḥê mēṯîm: 29 wayyaḵə‘îsû bəma‘aləlêhem watifərāṣ-bām magēfâ: 30 wayya‘ămōḏ pînəḥās wayəfallēl watē‘āṣar hammagēfâ: 31 watēḥāšeḇ lwō liṣəḏāqâ ləḏōr wāḏōr ‘aḏ-‘wōlām: 32 wayyaqəṣîfû ‘al-mê mərîḇâ wayyēra‘ ləmōšeh ba‘ăḇûrām: 33 kî-himərû ’eṯ-rûḥwō wayəḇaṭṭē’ biśəfāṯāyw: 34 lō’-hišəmîḏû ’eṯ-hā‘ammîm ’ăšer ’āmar yəhwâ lâem: 35 wayyiṯə‘ārəḇû ḇagwōyim wayyiləməḏû ma‘ăśêhem: 36 wayya‘aḇəḏû ’eṯ-‘ăṣabêhem wayyihəyû lâem ləmwōqēš: 37 wayyizəbəḥû ’eṯ-bənêhem wə’eṯ-bənwōṯêhem laššēḏîm: 38 wayyišəpəḵû ḏām nāqî dam-bənêhem ûḇənwōṯêhem ’ăšer zibəḥû la‘ăṣabê ḵənā‘an wateḥĕnaf hā’āreṣ badāmîm: 39 wayyiṭəmə’û ḇəma‘ăśêhem wayyizənû bəma‘aləlêhem: 40 wayyiḥar-’af yəhwâ bə‘ammwō wayəṯā‘ēḇ ’eṯ-naḥălāṯwō: 41 wayyitənēm bəyaḏ-gwōyim wayyiməšəlû ḇâem śōnə’êhem: 42 wayyiləḥāṣûm ’wōyəḇêhem wayyikānə‘û taḥaṯ yāḏām: 43 pə‘āmîm rabwōṯ yaṣṣîlēm wəhēmmâ yamərû ḇa‘ăṣāṯām wayyāmōkû ba‘ăwōnām: 44 wayyarə’ baṣṣar lâem bəšāmə‘wō ’eṯ-rinnāṯām: 45 wayyizəkōr lâem bərîṯwō wayyinnāḥēm kərōḇ ḥasədwō ḥăsāḏāyw: 46 wayyitēn ’wōṯām ləraḥămîm lifənê kāl-šwōḇêhem: 47 hwōšî‘ēnû| yəhwâ ’ĕlōhênû wəqabəṣēnû min-hagwōyim ləhōḏwōṯ ləšēm qāḏəšeḵā ləhišətabēḥa biṯəhillāṯeḵā: 48 bārûḵə-yəhwâ ’ĕlōhê yiśərā’ēl min-hā‘wōlām| wə‘aḏ hā‘wōlām wə’āmar kāl-hā‘ām ’āmēn haləlû-yāh: