Micah (Mikhah): Micah (Mikhah) Chapter 1

Tanach (Hebrew): Micah (Mikhah) Chapter 1

‎1 ‏דְּבַר־יְהוָ֣ה׀ אֲשֶׁ֣ר הָיָ֗ה אֶל־מִיכָה֙ הַמֹּ֣רַשְׁתִּ֔י בִּימֵ֥י יוֹתָ֛ם אָחָ֥ז יְחִזְקִיָּ֖ה מַלְכֵ֣י יְהוּדָ֑ה אֲשֶׁר־חָזָ֥ה עַל־שֹׁמְר֖וֹן וִירֽוּשָׁלִָֽם׃ ‎2 ‏שִׁמְעוּ֙ עַמִּ֣ים כֻּלָּ֔ם הַקְשִׁ֖יבִי אֶ֣רֶץ וּמְלֹאָ֑הּ וִיהִי֩ אֲדֹנָ֨י יְהוִ֤ה בָּכֶם֙ לְעֵ֔ד אֲדֹנָ֖י מֵהֵיכַ֥ל קָדְשֽׁוֹ׃ ‎3 ‏כִּֽי־הִנֵּ֥ה יְהוָ֖ה יֹצֵ֣א מִמְּקוֹמ֑וֹ וְיָרַ֥ד וְדָרַ֖ךְ עַל־במותי בָּ֥מֳתֵי אָֽרֶץ׃ ‎4 ‏וְנָמַ֤סּוּ הֶֽהָרִים֙ תַּחְתָּ֔יו וְהָעֲמָקִ֖ים יִתְבַּקָּ֑עוּ כַּדּוֹנַג֙ מִפְּנֵ֣י הָאֵ֔שׁ כְּמַ֖יִם מֻגָּרִ֥ים בְּמוֹרָֽד׃ ‎5 ‏בְּפֶ֤שַׁע יַֽעֲקֹב֙ כָּל־זֹ֔את וּבְחַטֹּ֖אות בֵּ֣ית יִשְׂרָאֵ֑ל מִֽי־פֶ֣שַׁע יַעֲקֹ֗ב הֲלוֹא֙ שֹֽׁמְר֔וֹן וּמִי֙ בָּמ֣וֹת יְהוּדָ֔ה הֲל֖וֹא יְרוּשָׁלִָֽם׃ ‎6 ‏וְשַׂמְתִּ֥י שֹׁמְר֛וֹן לְעִ֥י הַשָּׂדֶ֖ה לְמַטָּ֣עֵי כָ֑רֶם וְהִגַּרְתִּ֤י לַגַּי֙ אֲבָנֶ֔יהָ וִיסֹדֶ֖יהָ אֲגַלֶּֽה׃ ‎7 ‏וְכָל־פְּסִילֶ֣יהָ יֻכַּ֗תּוּ וְכָל־אֶתְנַנֶּ֙יהָ֙ יִשָּׂרְפ֣וּ בָאֵ֔שׁ וְכָל־עֲצַבֶּ֖יהָ אָשִׂ֣ים שְׁמָמָ֑ה כִּ֠י מֵאֶתְנַ֤ן זוֹנָה֙ קִבָּ֔צָה וְעַד־אֶתְנַ֥ן זוֹנָ֖ה יָשֽׁוּבוּ׃ ‎8 ‏עַל־זֹאת֙ אֶסְפְּדָ֣ה וְאֵילִ֔ילָה אֵילְכָ֥ה שילל שׁוֹלָ֖ל וְעָר֑וֹם אֶעֱשֶׂ֤ה מִסְפֵּד֙ כַּתַּנִּ֔ים וְאֵ֖בֶל כִּבְנ֥וֹת יַעֲנָֽה׃ ‎9 ‏כִּ֥י אֲנוּשָׁ֖ה מַכּוֹתֶ֑יהָ כִּי־בָ֙אָה֙ עַד־יְהוּדָ֔ה נָגַ֛ע עַד־שַׁ֥עַר עַמִּ֖י עַד־יְרוּשָׁלִָֽם׃ ‎10 ‏בְּגַת֙ אַל־תַּגִּ֔ידוּ בָּכ֖וֹ אַל־תִּבְכּ֑וּ בְּבֵ֣ית לְעַפְרָ֔ה עָפָ֖ר התפלשתי הִתְפַּלָּֽשִׁי׃ ‎11 ‏עִבְרִ֥י לָכֶ֛ם יוֹשֶׁ֥בֶת שָׁפִ֖יר עֶרְיָה־בֹ֑שֶׁת לֹ֤א יָֽצְאָה֙ יוֹשֶׁ֣בֶת צַֽאֲנָ֔ן מִסְפַּד֙ בֵּ֣ית הָאֵ֔צֶל יִקַּ֥ח מִכֶּ֖ם עֶמְדָּתֽוֹ׃ ‎12 ‏כִּֽי־חָ֥לָֽה לְט֖וֹב יוֹשֶׁ֣בֶת מָר֑וֹת כִּֽי־יָ֤רַד רָע֙ מֵאֵ֣ת יְהוָ֔ה לְשַׁ֖עַר יְרוּשָׁלִָֽם׃ ‎13 ‏רְתֹ֧ם הַמֶּרְכָּבָ֛ה לָרֶ֖כֶשׁ יוֹשֶׁ֣בֶת לָכִ֑ישׁ רֵאשִׁ֨ית חַטָּ֥את הִיא֙ לְבַת־צִיּ֔וֹן כִּי־בָ֥ךְ נִמְצְא֖וּ פִּשְׁעֵ֥י יִשְׂרָאֵֽל׃ ‎14 ‏לָכֵן֙ תִּתְּנִ֣י שִׁלּוּחִ֔ים עַ֖ל מוֹרֶ֣שֶׁת גַּ֑ת בָּתֵּ֤י אַכְזִיב֙ לְאַכְזָ֔ב לְמַלְכֵ֖י יִשְׂרָאֵֽל׃ ‎15 ‏עֹ֗ד הַיֹּרֵשׁ֙ אָ֣בִי לָ֔ךְ יוֹשֶׁ֖בֶת מָֽרֵשָׁ֑ה עַד־עֲדֻלָּ֥ם יָב֖וֹא כְּב֥וֹד יִשְׂרָאֵֽל׃ ‎16 ‏קָרְחִ֣י וָגֹ֔זִּי עַל־בְּנֵ֖י תַּעֲנוּגָ֑יִךְ הַרְחִ֤בִי קָרְחָתֵךְ֙ כַּנֶּ֔שֶׁר כִּ֥י גָל֖וּ מִמֵּֽךְ׃ ס

1 dəḇar-yəhwâ| ’ăšer hāyâ ’el-mîḵâ hammōrašətî bîmê ywōṯām ’āḥāz yəḥizəqîyâ maləḵê yəhûḏâ ’ăšer-ḥāzâ ‘al-šōmərwōn wîrûšālāim: 2 šimə‘û ‘ammîm kullām haqəšîḇî ’ereṣ ûməlō’āh wîhî ’ăḏōnāy yəhwih bāḵem lə‘ēḏ ’ăḏōnāy mēhêḵal qāḏəšwō: 3 kî-hinnēh yəhwâ yōṣē’ mimməqwōmwō wəyāraḏ wəḏāraḵə ‘al-bāmwōṯê bāmŏṯê ’āreṣ: 4 wənāmassû hehārîm taḥətāyw wəhā‘ămāqîm yiṯəbaqqā‘û kadwōnaḡ mipənê hā’ēš kəmayim mugārîm bəmwōrāḏ: 5 bəfeša‘ ya‘ăqōḇ kāl-zō’ṯ ûḇəḥaṭṭō’wṯ bêṯ yiśərā’ēl mî-feša‘ ya‘ăqōḇ hălwō’ šōmərwōn ûmî bāmwōṯ yəhûḏâ hălwō’ yərûšālāim: 6 wəśamətî šōmərwōn lə‘î haśśāḏeh ləmaṭṭā‘ê ḵārem wəhigarətî lagay ’ăḇāneyhā wîsōḏeyhā ’ăḡalleh: 7 wəḵāl-pəsîleyhā yukatû wəḵāl-’eṯənanneyhā yiśśārəfû ḇā’ēš wəḵāl-‘ăṣabeyhā ’āśîm šəmāmâ kî mē’eṯənan zwōnâ qibāṣâ wə‘aḏ-’eṯənan zwōnâ yāšûḇû: 8 ‘al-zō’ṯ ’esəpəḏâ wə’êlîlâ ’êləḵâ šêlāl šwōlāl wə‘ārwōm ’e‘ĕśeh misəpēḏ katannîm wə’ēḇel kiḇənwōṯ ya‘ănâ: 9 kî ’ănûšâ makwōṯeyhā kî-ḇā’â ‘aḏ-yəhûḏâ nāḡa‘ ‘aḏ-ša‘ar ‘ammî ‘aḏ-yərûšālāim: 10 bəḡaṯ ’al-tagîḏû bāḵwō ’al-tiḇəkû bəḇêṯ lə‘afərâ ‘āfār hiṯəpallāšətî hiṯəpallāšî: 11 ‘iḇərî lāḵem ywōšeḇeṯ šāfîr ‘erəyâ-ḇōšeṯ lō’ yāṣə’â ywōšeḇeṯ ṣa’ănān misəpaḏ bêṯ hā’ēṣel yiqqaḥ mikem ‘emədāṯwō: 12 kî-ḥālâ ləṭwōḇ ywōšeḇeṯ mārwōṯ kî-yāraḏ rā‘ mē’ēṯ yəhwâ ləša‘ar yərûšālāim: 13 rəṯōm hammerəkāḇâ lāreḵeš ywōšeḇeṯ lāḵîš rē’šîṯ ḥaṭṭā’ṯ hî’ ləḇaṯ-ṣîywōn kî-ḇāḵə niməṣə’û pišə‘ê yiśərā’ēl: 14 lāḵēn titənî šillûḥîm ‘al mwōrešeṯ gaṯ bātê ’aḵəzîḇ lə’aḵəzāḇ ləmaləḵê yiśərā’ēl: 15 ‘ōḏ hayyōrēš ’āḇî lāḵə ywōšeḇeṯ mārēšâ ‘aḏ-‘ăḏullām yāḇwō’ kəḇwōḏ yiśərā’ēl: 16 qārəḥî wāḡōzzî ‘al-bənê ta‘ănûḡāyiḵə harəḥiḇî qārəḥāṯēḵə kannešer kî ḡālû mimmēḵə: s