Job (Iyov): Job (Iyov) Chapter 16

Tanach (Hebrew): Job (Iyov) Chapter 16

‎1 ‏וַיַּ֥עַן אִיּ֗וֹב וַיֹּאמַֽר׃ ‎2 ‏שָׁמַ֣עְתִּי כְאֵ֣לֶּה רַבּ֑וֹת מְנַחֲמֵ֖י עָמָ֣ל כֻּלְּכֶֽם׃ ‎3 ‏הֲקֵ֥ץ לְדִבְרֵי־ר֑וּחַ א֥וֹ מַה־יַּ֝מְרִֽיצְךָ֗ כִּ֣י תַעֲנֶֽה׃ ‎4 ‏גַּ֤ם׀ אָנֹכִי֮ כָּכֶ֪ם אֲדַ֫בֵּ֥רָה ל֤וּ־יֵ֪שׁ נַפְשְׁכֶ֡ם תַּ֤חַת נַפְשִׁ֗י אַחְבִּ֣ירָה עֲלֵיכֶ֣ם בְּמִלִּ֑ים וְאָנִ֥יעָה עֲ֝לֵיכֶ֗ם בְּמ֣וֹ רֹאשִֽׁי׃ ‎5 ‏אֲאַמִּצְכֶ֥ם בְּמוֹ־פִ֑י וְנִ֖יד שְׂפָתַ֣י יַחְשֹֽׂךְ׃ ‎6 ‏אִֽם־אֲ֭דַבְּרָה לֹא־יֵחָשֵׂ֣ךְ כְּאֵבִ֑י וְ֝אַחְדְּלָ֗ה מַה־מִנִּ֥י יַהֲלֹֽךְ׃ ‎7 ‏אַךְ־עַתָּ֥ה הֶלְאָ֑נִי הֲ֝שִׁמּ֗וֹתָ כָּל־עֲדָתִֽי׃ ‎8 ‏וַֽ֭תִּקְמְטֵנִי לְעֵ֣ד הָיָ֑ה וַיָּ֥קָם בִּ֥י כַ֝חֲשִׁ֗י בְּפָנַ֥י יַעֲנֶֽה׃ ‎9 ‏אַפּ֤וֹ טָרַ֨ף׀ וַֽיִּשְׂטְמֵ֗נִי חָרַ֣ק עָלַ֣י בְּשִׁנָּ֑יו צָרִ֓י׀ יִלְט֖וֹשׁ עֵינָ֣יו לִֽי׃ ‎10 ‏פָּעֲר֬וּ עָלַ֨י׀ בְּפִיהֶ֗ם בְּ֭חֶרְפָּה הִכּ֣וּ לְחָיָ֑י יַ֝֗חַד עָלַ֥י יִתְמַלָּאֽוּן׃ ‎11 ‏יַסְגִּירֵ֣נִי אֵ֭ל אֶ֣ל עֲוִ֑יל וְעַל־יְדֵ֖י רְשָׁעִ֣ים יִרְטֵֽנִי׃ ‎12 ‏שָׁ֘לֵ֤ו הָיִ֨יתִי׀ וַֽיְפַרְפְּרֵ֗נִי וְאָחַ֣ז בְּ֭עָרְפִּי וַֽיְפַצְפְּצֵ֑נִי וַיְקִימֵ֥נִי ל֝֗וֹ לְמַטָּרָֽה׃ ‎13 ‏יָ֘סֹ֤בּוּ עָלַ֨י׀ רַבָּ֗יו יְפַלַּ֣ח כִּ֭לְיוֹתַי וְלֹ֣א יַחְמ֑וֹל יִשְׁפֹּ֥ךְ לָ֝אָ֗רֶץ מְרֵרָֽתִי׃ ‎14 ‏יִפְרְצֵ֣נִי פֶ֭רֶץ עַל־פְּנֵי־פָ֑רֶץ יָרֻ֖ץ עָלַ֣י כְּגִבּֽוֹר׃ ‎15 ‏שַׂ֣ק תָּ֭פַרְתִּי עֲלֵ֣י גִלְדִּ֑י וְעֹלַ֖לְתִּי בֶעָפָ֣ר קַרְנִֽי׃ ‎16 ‏פָּנַ֣י חמרמרה חֳ֭מַרְמְרוּ מִנִּי־בֶ֑כִי וְעַ֖ל עַפְעַפַּ֣י צַלְמָֽוֶת׃ ‎17 ‏עַ֭ל לֹא־חָמָ֣ס בְּכַפָּ֑י וּֽתְפִלָּתִ֥י זַכָּֽה׃ ‎18 ‏אֶ֭רֶץ אַל־תְּכַסִּ֣י דָמִ֑י וְֽאַל־יְהִ֥י מָ֝ק֗וֹם לְזַעֲקָתִֽי׃ ‎19 ‏גַּם־עַ֭תָּה הִנֵּה־בַשָּׁמַ֣יִם עֵדִ֑י וְ֝שָׂהֲדִ֗י בַּמְּרוֹמִֽים׃ ‎20 ‏מְלִיצַ֥י רֵעָ֑י אֶל־אֱ֝ל֗וֹהַ דָּלְפָ֥ה עֵינִֽי׃ ‎21 ‏וְיוֹכַ֣ח לְגֶ֣בֶר עִם־אֱל֑וֹהַּ וּֽבֶן־אָדָ֥ם לְרֵעֵֽהוּ׃ ‎22 ‏כִּֽי־שְׁנ֣וֹת מִסְפָּ֣ר יֶאֱתָ֑יוּ וְאֹ֖רַח לֹא־אָשׁ֣וּב אֶהֱלֹֽךְ׃

1 wayya‘an ’îywōḇ wayyō’mar: 2 šāma‘ətî ḵə’ēlleh rabwōṯ mənaḥămê ‘āmāl kulləḵem: 3 hăqēṣ ləḏiḇərê-rûḥa ’wō mah-yyamərîṣəḵā kî ṯa‘ăneh: 4 gam| ’ānōḵî kāḵem ’ăḏabērâ lû-yēš nafəšəḵem taḥaṯ nafəšî ’aḥəbîrâ ‘ălêḵem bəmillîm wə’ānî‘â ‘ălêḵem bəmwō rō’šî: 5 ’ă’ammiṣəḵem bəmwō-fî wənîḏ śəfāṯay yaḥəśōḵə: 6 ’im-’ăḏabərâ lō’-yēḥāśēḵə kə’ēḇî wə’aḥədəlâ mah-minnî yahălōḵə: 7 ’aḵə-‘atâ helə’ānî hăšimmwōṯā kāl-‘ăḏāṯî: 8 watiqəməṭēnî lə‘ēḏ hāyâ wayyāqām bî ḵaḥăšî bəfānay ya‘ăneh: 9 ’apwō ṭāraf| wayyiśəṭəmēnî ḥāraq ‘ālay bəšinnāyw ṣārî| yiləṭwōš ‘ênāyw lî: 10 pā‘ărû ‘ālay| bəfîhem bəḥerəpâ hikû ləḥāyāy yaḥaḏ ‘ālay yiṯəmallā’ûn: 11 yasəgîrēnî ’ēl ’el ‘ăwîl wə‘al-yəḏê rəšā‘îm yirəṭēnî: 12 šālēw hāyîṯî| wayəfarəpərēnî wə’āḥaz bə‘ārəpî wayəfaṣəpəṣēnî wayəqîmēnî lwō ləmaṭṭārâ: 13 yāsōbû ‘ālay| rabāyw yəfallaḥ kiləywōṯay wəlō’ yaḥəmwōl yišəpōḵə lā’āreṣ mərērāṯî: 14 yifərəṣēnî fereṣ ‘al-pənê-fāreṣ yāruṣ ‘ālay kəḡibwōr: 15 śaq tāfarətî ‘ălê ḡilədî wə‘ōlalətî ḇe‘āfār qarənî: 16 pānay ḥŏmarəmərâ ḥŏmarəmərû minnî-ḇeḵî wə‘al ‘afə‘apay ṣaləmāweṯ: 17 ‘al lō’-ḥāmās bəḵapāy ûṯəfillāṯî zakâ: 18 ’ereṣ ’al-təḵassî ḏāmî wə’al-yəhî māqwōm ləza‘ăqāṯî: 19 gam-‘atâ hinnēh-ḇaššāmayim ‘ēḏî wəśâăḏî bammərwōmîm: 20 məlîṣay rē‘āy ’el-’ĕlwōha dāləfâ ‘ênî: 21 wəywōḵaḥ ləḡeḇer ‘im-’ĕlwōhha ûḇen-’āḏām lərē‘ēhû: 22 kî-šənwōṯ misəpār ye’ĕṯāyû wə’ōraḥ lō’-’āšûḇ ’ehĕlōḵə: