Jeremiah (Yermiyah): Jeremiah (Yermiyah) Chapter 12

Tanach (Hebrew): Jeremiah (Yermiyah) Chapter 12

‎1 ‏צַדִּ֤יק אַתָּה֙ יְהוָ֔ה כִּ֥י אָרִ֖יב אֵלֶ֑יךָ אַ֤ךְ מִשְׁפָּטִים֙ אֲדַבֵּ֣ר אוֹתָ֔ךְ מַדּ֗וּעַ דֶּ֤רֶךְ רְשָׁעִים֙ צָלֵ֔חָה שָׁל֖וּ כָּל־בֹּ֥גְדֵי בָֽגֶד׃ ‎2 ‏נְטַעְתָּם֙ גַּם־שֹׁרָ֔שׁוּ יֵלְכ֖וּ גַּם־עָ֣שׂוּ פֶ֑רִי קָר֤וֹב אַתָּה֙ בְּפִיהֶ֔ם וְרָח֖וֹק מִכִּלְיוֹתֵיהֶֽם׃ ‎3 ‏וְאַתָּ֤ה יְהוָה֙ יְדַעְתָּ֔נִי תִּרְאֵ֕נִי וּבָחַנְתָּ֥ לִבִּ֖י אִתָּ֑ךְ הַתִּקֵם֙ כְּצֹ֣אן לְטִבְחָ֔ה וְהַקְדִּשֵׁ֖ם לְי֥וֹם הֲרֵגָֽה׃ ס ‎4 ‏עַד־מָתַי֙ תֶּאֱבַ֣ל הָאָ֔רֶץ וְעֵ֥שֶׂב כָּל־הַשָּׂדֶ֖ה יִיבָ֑שׁ מֵרָעַ֣ת יֹֽשְׁבֵי־בָ֗הּ סָפְתָ֤ה בְהֵמוֹת֙ וָע֔וֹף כִּ֣י אָמְר֔וּ לֹ֥א יִרְאֶ֖ה אֶת־אַחֲרִיתֵֽנוּ׃ ‎5 ‏כִּ֣י אֶת־רַגְלִ֥ים׀ רַ֙צְתָּה֙ וַיַּלְא֔וּךָ וְאֵ֥יךְ תְּתַֽחֲרֶ֖ה אֶת־הַסּוּסִ֑ים וּבְאֶ֤רֶץ שָׁלוֹם֙ אַתָּ֣ה בוֹטֵ֔חַ וְאֵ֥יךְ תַּעֲשֶׂ֖ה בִּגְא֥וֹן הַיַּרְדֵּֽן׃ ‎6 ‏כִּ֧י גַם־אַחֶ֣יךָ וּבֵית־אָבִ֗יךָ גַּם־הֵ֙מָּה֙ בָּ֣גְדוּ בָ֔ךְ גַּם־הֵ֛מָּה קָרְא֥וּ אַחֲרֶ֖יךָ מָלֵ֑א אַל־תַּאֲמֵ֣ן בָּ֔ם כִּֽי־יְדַבְּר֥וּ אֵלֶ֖יךָ טוֹבֽוֹת׃ ס ‎7 ‏עָזַ֙בְתִּי֙ אֶת־בֵּיתִ֔י נָטַ֖שְׁתִּי אֶת־נַחֲלָתִ֑י נָתַ֛תִּי אֶת־יְדִד֥וּת נַפְשִׁ֖י בְּכַ֥ף אֹיְבֶֽיהָ׃ ‎8 ‏הָיְתָה־לִּ֥י נַחֲלָתִ֖י כְּאַרְיֵ֣ה בַיָּ֑עַר נָתְנָ֥ה עָלַ֛י בְּקוֹלָ֖הּ עַל־כֵּ֥ן שְׂנֵאתִֽיהָ׃ ‎9 ‏הַעַ֨יִט צָב֤וּעַ נַחֲלָתִי֙ לִ֔י הַעַ֖יִט סָבִ֣יב עָלֶ֑יהָ לְכ֗וּ אִסְפ֛וּ כָּל־חַיַּ֥ת הַשָּׂדֶ֖ה הֵתָ֥יוּ לְאָכְלָֽה׃ ‎10 ‏רֹעִ֤ים רַבִּים֙ שִֽׁחֲת֣וּ כַרְמִ֔י בֹּסְס֖וּ אֶת־חֶלְקָתִ֑י נָֽתְנ֛וּ אֶת־חֶלְקַ֥ת חֶמְדָּתִ֖י לְמִדְבַּ֥ר שְׁמָמָֽה׃ ‎11 ‏שָׂמָהּ֙ לִשְׁמָמָ֔ה אָבְלָ֥ה עָלַ֖י שְׁמֵמָ֑ה נָשַׁ֙מָּה֙ כָּל־הָאָ֔רֶץ כִּ֛י אֵ֥ין אִ֖ישׁ שָׂ֥ם עַל־לֵֽב׃ ‎12 ‏עַֽל־כָּל־שְׁפָיִ֣ם בַּמִּדְבָּ֗ר בָּ֚אוּ שֹֽׁדְדִ֔ים כִּ֣י חֶ֤רֶב לַֽיהוָה֙ אֹֽכְלָ֔ה מִקְצֵה־אֶ֖רֶץ וְעַד־קְצֵ֣ה הָאָ֑רֶץ אֵ֥ין שָׁל֖וֹם לְכָל־בָּשָֽׂר׃ ס ‎13 ‏זָרְע֤וּ חִטִּים֙ וְקֹצִ֣ים קָצָ֔רוּ נֶחְל֖וּ לֹ֣א יוֹעִ֑לוּ וּבֹ֙שׁוּ֙ מִתְּבוּאֹ֣תֵיכֶ֔ם מֵחֲר֖וֹן אַף־יְהוָֽה׃ ס ‎14 ‏כֹּ֣ה׀ אָמַ֣ר יְהוָ֗ה עַל־כָּל־שְׁכֵנַי֙ הָֽרָעִ֔ים הַנֹּֽגְעִים֙ בַּֽנַּחֲלָ֔ה אֲשֶׁר־הִנְחַ֥לְתִּי אֶת־עַמִּ֖י אֶת־יִשְׂרָאֵ֑ל הִנְנִ֤י נֹֽתְשָׁם֙ מֵעַ֣ל אַדְמָתָ֔ם וְאֶת־בֵּ֥ית יְהוּדָ֖ה אֶתּ֥וֹשׁ מִתּוֹכָֽם׃ ‎15 ‏וְהָיָ֗ה אַֽחֲרֵי֙ נָתְשִׁ֣י אוֹתָ֔ם אָשׁ֖וּב וְרִֽחַמְתִּ֑ים וַהֲשִׁבֹתִ֛ים אִ֥ישׁ לְנַחֲלָת֖וֹ וְאִ֥ישׁ לְאַרְצֽוֹ׃ ‎16 ‏וְהָיָ֡ה אִם־לָמֹ֣ד יִלְמְדוּ֩ אֶת־דַּֽרְכֵ֨י עַמִּ֜י לְהִשָּׁבֵ֤עַ בִּשְׁמִי֙ חַי־יְהוָ֔ה כַּאֲשֶׁ֤ר לִמְּדוּ֙ אֶת־עַמִּ֔י לְהִשָּׁבֵ֖עַ בַּבָּ֑עַל וְנִבְנ֖וּ בְּת֥וֹךְ עַמִּֽי׃ ‎17 ‏וְאִ֖ם לֹ֣א יִשְׁמָ֑עוּ וְנָ֨תַשְׁתִּ֜י אֶת־הַגּ֥וֹי הַה֛וּא נָת֥וֹשׁ וְאַבֵּ֖ד נְאֻם־יְהוָֽה׃ ס

1 ṣadîq ’atâ yəhwâ kî ’ārîḇ ’ēleyḵā ’aḵə mišəpāṭîm ’ăḏabēr ’wōṯāḵə madû‘a dereḵə rəšā‘îm ṣālēḥâ šālû kāl-bōḡəḏê ḇāḡeḏ: 2 nəṭa‘ətām gam-šōrāšû yēləḵû gam-‘āśû ferî qārwōḇ ’atâ bəfîhem wərāḥwōq mikiləywōṯêhem: 3 wə’atâ yəhwâ yəḏa‘ətānî tirə’ēnî ûḇāḥanətā libî ’itāḵə hatiqēm kəṣō’n ləṭiḇəḥâ wəhaqədišēm ləywōm hărēḡâ: s 4 ‘aḏ-māṯay te’ĕḇal hā’āreṣ wə‘ēśeḇ kāl-haśśāḏeh yîḇāš mērā‘aṯ yōšəḇê-ḇāh sāfəṯâ ḇəhēmwōṯ wā‘wōf kî ’āmərû lō’ yirə’eh ’eṯ-’aḥărîṯēnû: 5 kî ’eṯ-raḡəlîm| raṣətâ wayyalə’ûḵā wə’êḵə təṯaḥăreh ’eṯ-hassûsîm ûḇə’ereṣ šālwōm ’atâ ḇwōṭēḥa wə’êḵə ta‘ăśeh biḡə’wōn hayyarədēn: 6 kî ḡam-’aḥeyḵā ûḇêṯ-’āḇîḵā gam-hēmmâ bāḡəḏû ḇāḵə gam-hēmmâ qārə’û ’aḥăreyḵā mālē’ ’al-ta’ămēn bām kî-yəḏabərû ’ēleyḵā ṭwōḇwōṯ: s 7 ‘āzaḇətî ’eṯ-bêṯî nāṭašətî ’eṯ-naḥălāṯî nāṯatî ’eṯ-yəḏiḏûṯ nafəšî bəḵaf ’ōyəḇeyhā: 8 hāyəṯâ-llî naḥălāṯî kə’arəyēh ḇayyā‘ar nāṯənâ ‘ālay bəqwōlāh ‘al-kēn śənē’ṯîhā: 9 ha‘ayiṭ ṣāḇû‘a naḥălāṯî lî ha‘ayiṭ sāḇîḇ ‘āleyhā ləḵû ’isəfû kāl-ḥayyaṯ haśśāḏeh hēṯāyû lə’āḵəlâ: 10 rō‘îm rabîm šiḥăṯû ḵarəmî bōsəsû ’eṯ-ḥeləqāṯî nāṯənû ’eṯ-ḥeləqaṯ ḥemədāṯî ləmiḏəbar šəmāmâ: 11 śāmāh lišəmāmâ ’āḇəlâ ‘ālay šəmēmâ nāšammâ kāl-hā’āreṣ kî ’ên ’îš śām ‘al-lēḇ: 12 ‘al-kāl-šəfāyim bammiḏəbār bā’û šōḏəḏîm kî ḥereḇ layhwâ ’ōḵəlâ miqəṣēh-’ereṣ wə‘aḏ-qəṣēh hā’āreṣ ’ên šālwōm ləḵāl-bāśār: s 13 zārə‘û ḥiṭṭîm wəqōṣîm qāṣārû neḥəlû lō’ ywō‘ilû ûḇōšû mitəḇû’ōṯêḵem mēḥărwōn ’af-yəhwâ: s 14 kōh| ’āmar yəhwâ ‘al-kāl-šəḵēnay hārā‘îm hannōḡə‘îm bannaḥălâ ’ăšer-hinəḥalətî ’eṯ-‘ammî ’eṯ-yiśərā’ēl hinənî nōṯəšām mē‘al ’aḏəmāṯām wə’eṯ-bêṯ yəhûḏâ ’etwōš mitwōḵām: 15 wəhāyâ ’aḥărê nāṯəšî ’wōṯām ’āšûḇ wəriḥamətîm wahăšiḇōṯîm ’îš lənaḥălāṯwō wə’îš lə’arəṣwō: 16 wəhāyâ ’im-lāmōḏ yiləməḏû ’eṯ-darəḵê ‘ammî ləhiššāḇē‘a bišəmî ḥay-yəhwâ ka’ăšer limməḏû ’eṯ-‘ammî ləhiššāḇē‘a babā‘al wəniḇənû bəṯwōḵə ‘ammî: 17 wə’im lō’ yišəmā‘û wənāṯašətî ’eṯ-hagwōy hahû’ nāṯwōš wə’abēḏ nə’um-yəhwâ: s