Hosea (Hoshea): Hosea… – The Tanach | Internet Sacred Text Archive

Tanach (Hebrew): Hosea (Hoshea) Chapter 7

‎1 ‏כְּרָפְאִ֣י לְיִשְׂרָאֵ֗ל וְנִגְלָ֞ה עֲוֹ֤ן אֶפְרַ֙יִם֙ וְרָע֣וֹת שֹֽׁמְר֔וֹן כִּ֥י פָעֲל֖וּ שָׁ֑קֶר וְגַנָּ֣ב יָב֔וֹא פָּשַׁ֥ט גְּד֖וּד בַּחֽוּץ׃ ‎2 ‏וּבַל־יֹֽאמְרוּ֙ לִלְבָבָ֔ם כָּל־רָעָתָ֖ם זָכָ֑רְתִּי עַתָּה֙ סְבָב֣וּם מַֽעַלְלֵיהֶ֔ם נֶ֥גֶד פָּנַ֖י הָיֽוּ׃ ‎3 ‏בְּרָעָתָ֖ם יְשַׂמְּחוּ־מֶ֑לֶךְ וּבְכַחֲשֵׁיהֶ֖ם שָׂרִֽים׃ ‎4 ‏כֻּלָּם֙ מְנָ֣אֲפִ֔ים כְּמ֣וֹ תַנּ֔וּר בֹּעֵ֖רָה מֵֽאֹפֶ֑ה יִשְׁבּ֣וֹת מֵעִ֔יר מִלּ֥וּשׁ בָּצֵ֖ק עַד־חֻמְצָתֽוֹ׃ ‎5 ‏י֣וֹם מַלְכֵּ֔נוּ הֶחֱל֥וּ שָׂרִ֖ים חֲמַ֣ת מִיָּ֑יִן מָשַׁ֥ךְ יָד֖וֹ אֶת־לֹצְצִֽים׃ ‎6 ‏כִּֽי־קֵרְב֧וּ כַתַּנּ֛וּר לִבָּ֖ם בְּאָרְבָּ֑ם כָּל־הַלַּ֙יְלָה֙ יָשֵׁ֣ן אֹֽפֵהֶ֔ם בֹּ֕קֶר ה֥וּא בֹעֵ֖ר כְּאֵ֥שׁ לֶהָבָֽה׃ ‎7 ‏כֻּלָּ֤ם יֵחַ֙מּוּ֙ כַּתַּנּ֔וּר וְאָכְל֖וּ אֶת־שֹֽׁפְטֵיהֶ֑ם כָּל־מַלְכֵיהֶ֣ם נָפָ֔לוּ אֵין־קֹרֵ֥א בָהֶ֖ם אֵלָֽי׃ ‎8 ‏אֶפְרַ֕יִם בָּעַמִּ֖ים ה֣וּא יִתְבּוֹלָ֑ל אֶפְרַ֛יִם הָיָ֥ה עֻגָ֖ה בְּלִ֥י הֲפוּכָֽה׃ ‎9 ‏אָכְל֤וּ זָרִים֙ כֹּח֔וֹ וְה֖וּא לֹ֣א יָדָ֑ע גַּם־שֵׂיבָה֙ זָ֣רְקָה בּ֔וֹ וְה֖וּא לֹ֥א יָדָֽע׃ ‎10 ‏וְעָנָ֥ה גְאֽוֹן־יִשְׂרָאֵ֖ל בְּפָנָ֑יו וְלֹֽא־שָׁ֙בוּ֙ אֶל־יְהוָ֣ה אֱלֹֽהֵיהֶ֔ם וְלֹ֥א בִקְשֻׁ֖הוּ בְּכָל־זֹֽאת׃ ‎11 ‏וַיְהִ֣י אֶפְרַ֔יִם כְּיוֹנָ֥ה פוֹתָ֖ה אֵ֣ין לֵ֑ב מִצְרַ֥יִם קָרָ֖אוּ אַשּׁ֥וּר הָלָֽכוּ׃ ‎12 ‏כַּאֲשֶׁ֣ר יֵלֵ֗כוּ אֶפְר֤וֹשׂ עֲלֵיהֶם֙ רִשְׁתִּ֔י כְּע֥וֹף הַשָּׁמַ֖יִם אֽוֹרִידֵ֑ם אַיְסִרֵ֕ם כְּשֵׁ֖מַע לַעֲדָתָֽם׃ ס ‎13 ‏א֤וֹי לָהֶם֙ כִּֽי־נָדְד֣וּ מִמֶּ֔נִּי שֹׁ֥ד לָהֶ֖ם כִּֽי־פָ֣שְׁעוּ בִ֑י וְאָנֹכִ֣י אֶפְדֵּ֔ם וְהֵ֕מָּה דִּבְּר֥וּ עָלַ֖י כְּזָבִֽים׃ ‎14 ‏וְלֹֽא־זָעֲק֤וּ אֵלַי֙ בְּלִבָּ֔ם כִּ֥י יְיֵלִ֖ילוּ עַל־מִשְׁכְּבוֹתָ֑ם עַל־דָּגָ֧ן וְתִיר֛וֹשׁ יִתְגּוֹרָ֖רוּ יָס֥וּרוּ בִֽי׃ ‎15 ‏וַאֲנִ֣י יִסַּ֔רְתִּי חִזַּ֖קְתִּי זְרֽוֹעֹתָ֑ם וְאֵלַ֖י יְחַשְּׁבוּ־רָֽע׃ ‎16 ‏יָשׁ֣וּבוּ׀ לֹ֣א עָ֗ל הָיוּ֙ כְּקֶ֣שֶׁת רְמִיָּ֔ה יִפְּל֥וּ בַחֶ֛רֶב שָׂרֵיהֶ֖ם מִזַּ֣עַם לְשׁוֹנָ֑ם ז֥וֹ לַעְגָּ֖ם בְּאֶ֥רֶץ מִצְרָֽיִם׃

1 kərāfə’î ləyiśərā’ēl wəniḡəlâ ‘ăwōn ’efərayim wərā‘wōṯ šōmərwōn kî fā‘ălû šāqer wəḡannāḇ yāḇwō’ pāšaṭ gəḏûḏ b^aḥûṣ:

2 ûḇal-yō’mərû liləḇāḇām kāl-rā‘āṯām zāḵārətî ‘atâ səḇāḇûm m^a‘aləlêhem neḡeḏ pānay hāyû:

3 bərā‘āṯām yəśamməḥû-meleḵə ûḇəḵ^aḥăšêhem śārîm:

4 kullām mənā’ăfîm kəmwō ṯannûr bō‘ērâ mē’ōfeh yišəbwōṯ mē‘îr millûš bāṣēq ‘aḏ-ḥuməṣāṯwō:

5 ywōm maləkēnû heḥĕlû śārîm ḥămaṯ mîyāyin māšaḵə yāḏwō ’eṯ-lōṣəṣîm:

6 kî-qērəḇû ḵatannûr libām bə’ārəbām kāl-hallayəlâ yāšēn ’ōfēhem bōqer hû’ ḇō‘ēr kə’ēš lehāḇâ:

7 kullām yēḥammû katannûr wə’āḵəlû ’eṯ-šōfəṭêhem kāl-maləḵêhem nāfālû ’ên-qōrē’ ḇâem ’ēlāy:

8 ’efərayim bā‘ammîm hû’ yiṯəbwōlāl ’efərayim hāyâ ‘uḡâ bəlî hăfûḵâ:

9 ’āḵəlû zārîm kōḥwō wəhû’ lō’ yāḏā‘ gam-śêḇâ zārəqâ bwō wəhû’ lō’ yāḏā‘:

10 wə‘ānâ ḡə’wōn-yiśərā’ēl bəfānāyw wəlō’-šāḇû ’el-yəhwâ ’ĕlōhêhem wəlō’ ḇiqəšuhû bəḵāl-zō’ṯ:

11 wayəhî ’efərayim kəywōnâ fwōṯâ ’ên lēḇ miṣərayim qārā’û ’aššûr hālāḵû:

12 ka’ăšer yēlēḵû ’efərwōś ‘ălêhem rišətî kə‘wōf haššāmayim ’wōrîḏēm ’ayəsirēm kəšēm^a‘ l^a‘ăḏāṯām: s

13 ’wōy lâem kî-nāḏəḏû mimmennî šōḏ lâem kî-fāšə‘û ḇî wə’ānōḵî ’efədēm wəhēmmâ dibərû ‘ālay kəzāḇîm:

14 wəlō’-zā‘ăqû ’ēlay bəlibām kî yəyēlîlû ‘al-mišəkəḇwōṯām ‘al-dāḡān wəṯîrwōš yiṯəgwōrārû yāsûrû ḇî:

15 wa’ănî yissarətî ḥizzaqətî zərwō‘ōṯām wə’ēlay yəḥaššəḇû-rā‘:

16 yāšûḇû| lō’ ‘āl hāyû kəqešeṯ rəmîyâ yipəlû ḇ^aḥereḇ śārêhem mizz^a‘am ləšwōnām zwō l^a‘əgām bə’ereṣ miṣərāyim:

Hosea (Hoshea): Hosea (Hoshea) Chapter 7

Tanach (Hebrew): Hosea (Hoshea) Chapter 7

Comments and social are coming soon