Hosea (Hoshea): Hosea (Hoshea) Chapter 5

Tanach (Hebrew): Hosea (Hoshea) Chapter 5

‎1 ‏שִׁמְעוּ־זֹ֨את הַכֹּהֲנִ֜ים וְהַקְשִׁ֣יבוּ׀ בֵּ֣ית יִשְׂרָאֵ֗ל וּבֵ֤ית הַמֶּ֙לֶךְ֙ הַאֲזִ֔ינוּ כִּ֥י לָכֶ֖ם הַמִּשְׁפָּ֑ט כִּֽי־פַח֙ הֱיִיתֶ֣ם לְמִצְפָּ֔ה וְרֶ֖שֶׁת פְּרוּשָׂ֥ה עַל־תָּבֽוֹר׃ ‎2 ‏וְשַׁחֲטָ֥ה שֵׂטִ֖ים הֶעְמִ֑יקוּ וַאֲנִ֖י מוּסָ֥ר לְכֻלָּֽם׃ ‎3 ‏אֲנִי֙ יָדַ֣עְתִּי אֶפְרַ֔יִם וְיִשְׂרָאֵ֖ל לֹֽא־נִכְחַ֣ד מִמֶּ֑נִּי כִּ֤י עַתָּה֙ הִזְנֵ֣יתָ אֶפְרַ֔יִם נִטְמָ֖א יִשְׂרָאֵֽל׃ ‎4 ‏לֹ֤א יִתְּנוּ֙ מַ֣עַלְלֵיהֶ֔ם לָשׁ֖וּב אֶל־אֱלֹֽהֵיהֶ֑ם כִּ֣י ר֤וּחַ זְנוּנִים֙ בְּקִרְבָּ֔ם וְאֶת־יְהוָ֖ה לֹ֥א יָדָֽעוּ׃ ‎5 ‏וְעָנָ֥ה גְאֽוֹן־יִשְׂרָאֵ֖ל בְּפָנָ֑יו וְיִשְׂרָאֵ֣ל וְאֶפְרַ֗יִם יִכָּֽשְׁלוּ֙ בַּעֲוֹנָ֔ם כָּשַׁ֥ל גַּם־יְהוּדָ֖ה עִמָּֽם׃ ‎6 ‏בְּצֹאנָ֣ם וּבִבְקָרָ֗ם יֵֽלְכ֛וּ לְבַקֵּ֥שׁ אֶת־יְהוָ֖ה וְלֹ֣א יִמְצָ֑אוּ חָלַ֖ץ מֵהֶֽם׃ ‎7 ‏בַּיהוָ֣ה בָּגָ֔דוּ כִּֽי־בָנִ֥ים זָרִ֖ים יָלָ֑דוּ עַתָּ֛ה יֹאכְלֵ֥ם חֹ֖דֶשׁ אֶת־חֶלְקֵיהֶֽם׃ ס ‎8 ‏תִּקְע֤וּ שׁוֹפָר֙ בַּגִּבְעָ֔ה חֲצֹצְרָ֖ה בָּרָמָ֑ה הָרִ֙יעוּ֙ בֵּ֣ית אָ֔וֶן אַחֲרֶ֖יךָ בִּנְיָמִֽין׃ ‎9 ‏אֶפְרַ֙יִם֙ לְשַׁמָּ֣ה תִֽהְיֶ֔ה בְּי֖וֹם תּֽוֹכֵחָ֑ה בְּשִׁבְטֵי֙ יִשְׂרָאֵ֔ל הוֹדַ֖עְתִּי נֶאֱמָנָֽה׃ ‎10 ‏הָיוּ֙ שָׂרֵ֣י יְהוּדָ֔ה כְּמַסִּיגֵ֖י גְּב֑וּל עֲלֵיהֶ֕ם אֶשְׁפּ֥וֹךְ כַּמַּ֖יִם עֶבְרָתִֽי׃ ‎11 ‏עָשׁ֥וּק אֶפְרַ֖יִם רְצ֣וּץ מִשְׁפָּ֑ט כִּ֣י הוֹאִ֔יל הָלַ֖ךְ אַחֲרֵי־צָֽו׃ ‎12 ‏וַאֲנִ֥י כָעָ֖שׁ לְאֶפְרָ֑יִם וְכָרָקָ֖ב לְבֵ֥ית יְהוּדָֽה׃ ‎13 ‏וַיַּ֨רְא אֶפְרַ֜יִם אֶת־חָלְי֗וֹ וִֽיהוּדָה֙ אֶת־מְזֹר֔וֹ וַיֵּ֤לֶךְ אֶפְרַ֙יִם֙ אֶל־אַשּׁ֔וּר וַיִּשְׁלַ֖ח אֶל־מֶ֣לֶךְ יָרֵ֑ב וְה֗וּא לֹ֤א יוּכַל֙ לִרְפֹּ֣א לָכֶ֔ם וְלֹֽא־יִגְהֶ֥ה מִכֶּ֖ם מָזֽוֹר׃ ‎14 ‏כִּ֣י אָנֹכִ֤י כַשַּׁ֙חַל֙ לְאֶפְרַ֔יִם וְכַכְּפִ֖יר לְבֵ֣ית יְהוּדָ֑ה אֲנִ֨י אֲנִ֤י אֶטְרֹף֙ וְאֵלֵ֔ךְ אֶשָּׂ֖א וְאֵ֥ין מַצִּֽיל׃ ‎15 ‏אֵלֵ֤ךְ אָשׁ֙וּבָה֙ אֶל־מְקוֹמִ֔י עַ֥ד אֲשֶֽׁר־יֶאְשְׁמ֖וּ וּבִקְשׁ֣וּ פָנָ֑י בַּצַּ֥ר לָהֶ֖ם יְשַׁחֲרֻֽנְנִי׃

1 šimə‘û-zō’ṯ hakōhănîm wəhaqəšîḇû| bêṯ yiśərā’ēl ûḇêṯ hammeleḵə ha’ăzînû kî lāḵem hammišəpāṭ kî-faḥ hĕyîṯem ləmiṣəpâ wərešeṯ pərûśâ ‘al-tāḇwōr: 2 wəšaḥăṭâ śēṭîm he‘əmîqû wa’ănî mûsār ləḵullām: 3 ’ănî yāḏa‘ətî ’efərayim wəyiśərā’ēl lō’-niḵəḥaḏ mimmennî kî ‘atâ hizənêṯā ’efərayim niṭəmā’ yiśərā’ēl: 4 lō’ yitənû ma‘aləlêhem lāšûḇ ’el-’ĕlōhêhem kî rûḥa zənûnîm bəqirəbām wə’eṯ-yəhwâ lō’ yāḏā‘û: 5 wə‘ānâ ḡə’wōn-yiśərā’ēl bəfānāyw wəyiśərā’ēl wə’efərayim yikāšəlû ba‘ăwōnām kāšal gam-yəhûḏâ ‘immām: 6 bəṣō’nām ûḇiḇəqārām yēləḵû ləḇaqqēš ’eṯ-yəhwâ wəlō’ yiməṣā’û ḥālaṣ mēhem: 7 bayhwâ bāḡāḏû kî-ḇānîm zārîm yālāḏû ‘atâ yō’ḵəlēm ḥōḏeš ’eṯ-ḥeləqêhem: s 8 tiqə‘û šwōfār bagiḇə‘â ḥăṣōṣərâ bārāmâ hārî‘û bêṯ ’āwen ’aḥăreyḵā binəyāmîn: 9 ’efərayim ləšammâ ṯihəyeh bəywōm twōḵēḥâ bəšiḇəṭê yiśərā’ēl hwōḏa‘ətî ne’ĕmānâ: 10 hāyû śārê yəhûḏâ kəmassîḡê gəḇûl ‘ălêhem ’ešəpwōḵə kammayim ‘eḇərāṯî: 11 ‘āšûq ’efərayim rəṣûṣ mišəpāṭ kî hwō’îl hālaḵə ’aḥărê-ṣāw: 12 wa’ănî ḵā‘āš lə’efərāyim wəḵārāqāḇ ləḇêṯ yəhûḏâ: 13 wayyarə’ ’efərayim ’eṯ-ḥāləywō wîhûḏâ ’eṯ-məzōrwō wayyēleḵə ’efərayim ’el-’aššûr wayyišəlaḥ ’el-meleḵə yārēḇ wəhû’ lō’ yûḵal lirəpō’ lāḵem wəlō’-yiḡəheh mikem māzwōr: 14 kî ’ānōḵî ḵaššaḥal lə’efərayim wəḵakəfîr ləḇêṯ yəhûḏâ ’ănî ’ănî ’eṭərōf wə’ēlēḵə ’eśśā’ wə’ên maṣṣîl: 15 ’ēlēḵə ’āšûḇâ ’el-məqwōmî ‘aḏ ’ăšer-ye’əšəmû ûḇiqəšû fānāy baṣṣar lâem yəšaḥărunənî: