Ecclesiastes (Qohelet): Ecclesiastes (Qohelet) Chapter 9

Tanach (Hebrew): Ecclesiastes (Qohelet) Chapter 9

‎1 ‏כִּ֣י אֶת־כָּל־זֶ֞ה נָתַ֤תִּי אֶל־לִבִּי֙ וְלָב֣וּר אֶת־כָּל־זֶ֔ה אֲשֶׁ֨ר הַצַּדִּיקִ֧ים וְהַחֲכָמִ֛ים וַעֲבָדֵיהֶ֖ם בְּיַ֣ד הָאֱלֹהִ֑ים גַּֽם־אַהֲבָ֣ה גַם־שִׂנְאָ֗ה אֵ֤ין יוֹדֵ֙עַ֙ הָֽאָדָ֔ם הַכֹּ֖ל לִפְנֵיהֶֽם׃ ‎2 ‏הַכֹּ֞ל כַּאֲשֶׁ֣ר לַכֹּ֗ל מִקְרֶ֨ה אֶחָ֜ד לַצַּדִּ֤יק וְלָרָשָׁע֙ לַטּוֹב֙ וְלַטָּה֣וֹר וְלַטָּמֵ֔א וְלַזֹּבֵ֔חַ וְלַאֲשֶׁ֖ר אֵינֶ֣נּוּ זֹבֵ֑חַ כַּטּוֹב֙ כַּֽחֹטֶ֔א הַנִּשְׁבָּ֕ע כַּאֲשֶׁ֖ר שְׁבוּעָ֥ה יָרֵֽא׃ ‎3 ‏זֶ֣ה׀ רָ֗ע בְּכֹ֤ל אֲשֶֽׁר־נַעֲשָׂה֙ תַּ֣חַת הַשֶּׁ֔מֶשׁ כִּֽי־מִקְרֶ֥ה אֶחָ֖ד לַכֹּ֑ל וְגַ֣ם לֵ֣ב בְּֽנֵי־הָ֠אָדָם מָלֵא־רָ֨ע וְהוֹלֵל֤וֹת בִּלְבָבָם֙ בְּחַיֵּיהֶ֔ם וְאַחֲרָ֖יו אֶל־הַמֵּתִֽים׃ ‎4 ‏כִּי־מִי֙ אֲשֶׁ֣ר יבחר יְחֻבַּ֔ר אֶ֥ל כָּל־הַחַיִּ֖ים יֵ֣שׁ בִּטָּח֑וֹן כִּֽי־לְכֶ֤לֶב חַי֙ ה֣וּא ט֔וֹב מִן־הָאַרְיֵ֖ה הַמֵּֽת׃ ‎5 ‏כִּ֧י הַֽחַיִּ֛ים יוֹדְעִ֖ים שֶׁיָּמֻ֑תוּ וְהַמֵּתִ֞ים אֵינָ֧ם יוֹדְעִ֣ים מְא֗וּמָה וְאֵֽין־ע֤וֹד לָהֶם֙ שָׂכָ֔ר כִּ֥י נִשְׁכַּ֖ח זִכְרָֽם׃ ‎6 ‏גַּ֣ם אַהֲבָתָ֧ם גַּם־שִׂנְאָתָ֛ם גַּם־קִנְאָתָ֖ם כְּבָ֣ר אָבָ֑דָה וְחֵ֨לֶק אֵין־לָהֶ֥ם עוֹד֙ לְעוֹלָ֔ם בְּכֹ֥ל אֲשֶֽׁר־נַעֲשָׂ֖ה תַּ֥חַת הַשָּֽׁמֶשׁ׃ ‎7 ‏לֵ֣ךְ אֱכֹ֤ל בְּשִׂמְחָה֙ לַחְמֶ֔ךָ וּֽשֲׁתֵ֥ה בְלֶב־ט֖וֹב יֵינֶ֑ךָ כִּ֣י כְבָ֔ר רָצָ֥ה הָאֱלֹהִ֖ים אֶֽת־מַעֲשֶֽׂיךָ׃ ‎8 ‏בְּכָל־עֵ֕ת יִהְי֥וּ בְגָדֶ֖יךָ לְבָנִ֑ים וְשֶׁ֖מֶן עַל־רֹאשְׁךָ֥ אַל־יֶחְסָֽר׃ ‎9 ‏רְאֵ֨ה חַיִּ֜ים עִם־אִשָּׁ֣ה אֲשֶׁר־אָהַ֗בְתָּ כָּל־יְמֵי֙ חַיֵּ֣י הֶבְלֶ֔ךָ אֲשֶׁ֤ר נָֽתַן־לְךָ֙ תַּ֣חַת הַשֶּׁ֔מֶשׁ כֹּ֖ל יְמֵ֣י הֶבְלֶ֑ךָ כִּ֣י ה֤וּא חֶלְקְךָ֙ בַּֽחַיִּ֔ים וּבַעֲמָ֣לְךָ֔ אֲשֶׁר־אַתָּ֥ה עָמֵ֖ל תַּ֥חַת הַשָּֽׁמֶשׁ׃ ‎10 ‏כֹּ֠ל אֲשֶׁ֨ר תִּמְצָ֧א יָֽדְךָ֛ לַעֲשׂ֥וֹת בְּכֹחֲךָ֖ עֲשֵׂ֑ה כִּי֩ אֵ֨ין מַעֲשֶׂ֤ה וְחֶשְׁבּוֹן֙ וְדַ֣עַת וְחָכְמָ֔ה בִּשְׁא֕וֹל אֲשֶׁ֥ר אַתָּ֖ה הֹלֵ֥ךְ שָֽׁמָּה׃ ס ‎11 ‏שַׁ֜בְתִּי וְרָאֹ֣ה תַֽחַת־הַשֶּׁ֗מֶשׁ כִּ֣י לֹא֩ לַקַּלִּ֨ים הַמֵּר֜וֹץ וְלֹ֧א לַגִּבּוֹרִ֣ים הַמִּלְחָמָ֗ה וְ֠גַם לֹ֣א לַחֲכָמִ֥ים לֶ֙חֶם֙ וְגַ֨ם לֹ֤א לַנְּבֹנִים֙ עֹ֔שֶׁר וְגַ֛ם לֹ֥א לַיֹּדְעִ֖ים חֵ֑ן כִּי־עֵ֥ת וָפֶ֖גַע יִקְרֶ֥ה אֶת־כֻּלָּֽם׃ ‎12 ‏כִּ֡י גַּם֩ לֹֽא־יֵדַ֨ע הָאָדָ֜ם אֶת־עִתּ֗וֹ כַּדָּגִים֙ שֶׁנֶּֽאֱחָזִים֙ בִּמְצוֹדָ֣ה רָעָ֔ה וְכַ֨צִּפֳּרִ֔ים הָאֲחֻז֖וֹת בַּפָּ֑ח כָּהֵ֗ם יֽוּקָשִׁים֙ בְּנֵ֣י הָֽאָדָ֔ם לְעֵ֣ת רָעָ֔ה כְּשֶׁתִּפּ֥וֹל עֲלֵיהֶ֖ם פִּתְאֹֽם׃ ‎13 ‏גַּם־זֹ֛ה רָאִ֥יתִי חָכְמָ֖ה תַּ֣חַת הַשָּׁ֑מֶשׁ וּגְדוֹלָ֥ה הִ֖יא אֵלָֽי׃ ‎14 ‏עִ֣יר קְטַנָּ֔ה וַאֲנָשִׁ֥ים בָּ֖הּ מְעָ֑ט וּבָֽא־אֵלֶ֜יהָ מֶ֤לֶךְ גָּדוֹל֙ וְסָבַ֣ב אֹתָ֔הּ וּבָנָ֥ה עָלֶ֖יהָ מְצוֹדִ֥ים גְּדֹלִֽים׃ ‎15 ‏וּמָ֣צָא בָ֗הּ אִ֤ישׁ מִסְכֵּן֙ חָכָ֔ם וּמִלַּט־ה֥וּא אֶת־הָעִ֖יר בְּחָכְמָת֑וֹ וְאָדָם֙ לֹ֣א זָכַ֔ר אֶת־הָאִ֥ישׁ הַמִּסְכֵּ֖ן הַהֽוּא׃ ‎16 ‏וְאָמַ֣רְתִּי אָ֔נִי טוֹבָ֥ה חָכְמָ֖ה מִגְּבוּרָ֑ה וְחָכְמַ֤ת הַמִּסְכֵּן֙ בְּזוּיָ֔ה וּדְבָרָ֖יו אֵינָ֥ם נִשְׁמָעִֽים׃ ‎17 ‏דִּבְרֵ֣י חֲכָמִ֔ים בְּנַ֖חַת נִשְׁמָעִ֑ים מִזַּעֲקַ֥ת מוֹשֵׁ֖ל בַּכְּסִילִֽים׃ ‎18 ‏טוֹבָ֥ה חָכְמָ֖ה מִכְּלֵ֣י קְרָ֑ב וְחוֹטֶ֣א אֶחָ֔ד יְאַבֵּ֥ד טוֹבָ֥ה הַרְבֵּֽה׃

1 kî ’eṯ-kāl-zeh nāṯatî ’el-libî wəlāḇûr ’eṯ-kāl-zeh ’ăšer haṣṣadîqîm wəhaḥăḵāmîm wa‘ăḇāḏêhem bəyaḏ hā’ĕlōhîm gam-’ahăḇâ ḡam-śinə’â ’ên ywōḏē‘a hā’āḏām hakōl lifənêhem: 2 hakōl ka’ăšer lakōl miqəreh ’eḥāḏ laṣṣadîq wəlārāšā‘ laṭṭwōḇ wəlaṭṭâwōr wəlaṭṭāmē’ wəlazzōḇēḥa wəla’ăšer ’ênennû zōḇēḥa kaṭṭwōḇ kaḥōṭe’ hannišəbā‘ ka’ăšer šəḇû‘â yārē’: 3 zeh| rā‘ bəḵōl ’ăšer-na‘ăśâ taḥaṯ haššemeš kî-miqəreh ’eḥāḏ lakōl wəḡam lēḇ bənê-hā’āḏām mālē’-rā‘ wəhwōlēlwōṯ biləḇāḇām bəḥayyêhem wə’aḥărāyw ’el-hammēṯîm: 4 kî-mî ’ăšer yibāḥēr yəḥubar ’el kāl-haḥayyîm yēš biṭṭāḥwōn kî-ləḵeleḇ ḥay hû’ ṭwōḇ min-hā’arəyēh hammēṯ: 5 kî haḥayyîm ywōḏə‘îm šeyyāmuṯû wəhammēṯîm ’ênām ywōḏə‘îm mə’ûmâ wə’ên-‘wōḏ lâem śāḵār kî nišəkaḥ ziḵərām: 6 gam ’ahăḇāṯām gam-śinə’āṯām gam-qinə’āṯām kəḇār ’āḇāḏâ wəḥēleq ’ên-lâem ‘wōḏ lə‘wōlām bəḵōl ’ăšer-na‘ăśâ taḥaṯ haššāmeš: 7 lēḵə ’ĕḵōl bəśiməḥâ laḥəmeḵā ûšăṯēh ḇəleḇ-ṭwōḇ yêneḵā kî ḵəḇār rāṣâ hā’ĕlōhîm ’eṯ-ma‘ăśeyḵā: 8 bəḵāl-‘ēṯ yihəyû ḇəḡāḏeyḵā ləḇānîm wəšemen ‘al-rō’šəḵā ’al-yeḥəsār: 9 rə’ēh ḥayyîm ‘im-’iššâ ’ăšer-’âaḇətā kāl-yəmê ḥayyê heḇəleḵā ’ăšer nāṯan-ləḵā taḥaṯ haššemeš kōl yəmê heḇəleḵā kî hû’ ḥeləqəḵā baḥayyîm ûḇa‘ămāləḵā ’ăšer-’atâ ‘āmēl taḥaṯ haššāmeš: 10 kōl ’ăšer timəṣā’ yāḏəḵā la‘ăśwōṯ bəḵōḥăḵā ‘ăśēh kî ’ên ma‘ăśeh wəḥešəbwōn wəḏa‘aṯ wəḥāḵəmâ bišə’wōl ’ăšer ’atâ hōlēḵə šāmmâ: s 11 šaḇətî wərā’ōh ṯaḥaṯ-haššemeš kî lō’ laqqallîm hammērwōṣ wəlō’ lagibwōrîm hammiləḥāmâ wəḡam lō’ laḥăḵāmîm leḥem wəḡam lō’ lannəḇōnîm ‘ōšer wəḡam lō’ layyōḏə‘îm ḥēn kî-‘ēṯ wāfeḡa‘ yiqəreh ’eṯ-kullām: 12 kî gam lō’-yēḏa‘ hā’āḏām ’eṯ-‘itwō kadāḡîm šenne’ĕḥāzîm biməṣwōḏâ rā‘â wəḵaṣṣipŏrîm hā’ăḥuzwōṯ bapāḥ kâēm yûqāšîm bənê hā’āḏām lə‘ēṯ rā‘â kəšetipwōl ‘ălêhem piṯə’ōm: 13 gam-zōh rā’îṯî ḥāḵəmâ taḥaṯ haššāmeš ûḡəḏwōlâ hî’ ’ēlāy: 14 ‘îr qəṭannâ wa’ănāšîm bāh mə‘āṭ ûḇā’-’ēleyhā meleḵə gāḏwōl wəsāḇaḇ ’ōṯāh ûḇānâ ‘āleyhā məṣwōḏîm gəḏōlîm: 15 ûmāṣā’ ḇāh ’îš misəkēn ḥāḵām ûmillaṭ-hû’ ’eṯ-hā‘îr bəḥāḵəmāṯwō wə’āḏām lō’ zāḵar ’eṯ-hā’îš hammisəkēn hahû’: 16 wə’āmarətî ’ānî ṭwōḇâ ḥāḵəmâ migəḇûrâ wəḥāḵəmaṯ hammisəkēn bəzûyâ ûḏəḇārāyw ’ênām nišəmā‘îm: 17 diḇərê ḥăḵāmîm bənaḥaṯ nišəmā‘îm mizza‘ăqaṯ mwōšēl bakəsîlîm: 18 ṭwōḇâ ḥāḵəmâ mikəlê qərāḇ wəḥwōṭe’ ’eḥāḏ yə’abēḏ ṭwōḇâ harəbēh: