Deuteronomy (Devarim): Deuteronomy (Devarim) Chapter 16

Tanach (Hebrew): Deuteronomy (Devarim) Chapter 16

‎1 ‏שָׁמוֹר֙ אֶת־חֹ֣דֶשׁ הָאָבִ֔יב וְעָשִׂ֣יתָ פֶּ֔סַח לַיהוָ֖ה אֱלֹהֶ֑יךָ כִּ֞י בְּחֹ֣דֶשׁ הָֽאָבִ֗יב הוֹצִ֨יאֲךָ֜ יְהוָ֧ה אֱלֹהֶ֛יךָ מִמִּצְרַ֖יִם לָֽיְלָה׃ ‎2 ‏וְזָבַ֥חְתָּ פֶּ֛סַח לַיהוָ֥ה אֱלֹהֶ֖יךָ צֹ֣אן וּבָקָ֑ר בַּמָּקוֹם֙ אֲשֶׁר־יִבְחַ֣ר יְהוָ֔ה לְשַׁכֵּ֥ן שְׁמ֖וֹ שָֽׁם׃ ‎3 ‏לֹא־תֹאכַ֤ל עָלָיו֙ חָמֵ֔ץ שִׁבְעַ֥ת יָמִ֛ים תֹּֽאכַל־עָלָ֥יו מַצּ֖וֹת לֶ֣חֶם עֹ֑נִי כִּ֣י בְחִפָּז֗וֹן יָצָ֙אתָ֙ מֵאֶ֣רֶץ מִצְרַ֔יִם לְמַ֣עַן תִּזְכֹּ֗ר אֶת־י֤וֹם צֵֽאתְךָ֙ מֵאֶ֣רֶץ מִצְרַ֔יִם כֹּ֖ל יְמֵ֥י חַיֶּֽיךָ׃ ‎4 ‏וְלֹֽא־יֵרָאֶ֨ה לְךָ֥ שְׂאֹ֛ר בְּכָל־גְּבֻלְךָ֖ שִׁבְעַ֣ת יָמִ֑ים וְלֹא־יָלִ֣ין מִן־הַבָּשָׂ֗ר אֲשֶׁ֨ר תִּזְבַּ֥ח בָּעֶ֛רֶב בַּיּ֥וֹם הָרִאשׁ֖וֹן לַבֹּֽקֶר׃ ‎5 ‏לֹ֥א תוּכַ֖ל לִזְבֹּ֣חַ אֶת־הַפָּ֑סַח בְּאַחַ֣ד שְׁעָרֶ֔יךָ אֲשֶׁר־יְהוָ֥ה אֱלֹהֶ֖יךָ נֹתֵ֥ן לָֽךְ׃ ‎6 ‏כִּ֠י אִֽם־אֶל־הַמָּק֞וֹם אֲשֶׁר־יִבְחַ֨ר יְהוָ֤ה אֱלֹהֶ֙יךָ֙ לְשַׁכֵּ֣ן שְׁמ֔וֹ שָׁ֛ם תִּזְבַּ֥ח אֶת־הַפֶּ֖סַח בָּעָ֑רֶב כְּב֣וֹא הַשֶּׁ֔מֶשׁ מוֹעֵ֖ד צֵֽאתְךָ֥ מִמִּצְרָֽיִם׃ ‎7 ‏וּבִשַּׁלְתָּ֙ וְאָ֣כַלְתָּ֔ בַּמָּק֕וֹם אֲשֶׁ֥ר יִבְחַ֛ר יְהוָ֥ה אֱלֹהֶ֖יךָ בּ֑וֹ וּפָנִ֣יתָ בַבֹּ֔קֶר וְהָלַכְתָּ֖ לְאֹהָלֶֽיךָ׃ ‎8 ‏שֵׁ֥שֶׁת יָמִ֖ים תֹּאכַ֣ל מַצּ֑וֹת וּבַיּ֣וֹם הַשְּׁבִיעִ֗י עֲצֶ֙רֶת֙ לַיהוָ֣ה אֱלֹהֶ֔יךָ לֹ֥א תַעֲשֶׂ֖ה מְלָאכָֽה׃ ס ‎9 ‏שִׁבְעָ֥ה שָׁבֻעֹ֖ת תִּסְפָּר־לָ֑ךְ מֵהָחֵ֤ל חֶרְמֵשׁ֙ בַּקָּמָ֔ה תָּחֵ֣ל לִסְפֹּ֔ר שִׁבְעָ֖ה שָׁבֻעֽוֹת׃ ‎10 ‏וְעָשִׂ֜יתָ חַ֤ג שָׁבֻעוֹת֙ לַיהוָ֣ה אֱלֹהֶ֔יךָ מִסַּ֛ת נִדְבַ֥ת יָדְךָ֖ אֲשֶׁ֣ר תִּתֵּ֑ן כַּאֲשֶׁ֥ר יְבָרֶכְךָ֖ יְהוָ֥ה אֱלֹהֶֽיךָ׃ ‎11 ‏וְשָׂמַחְתָּ֞ לִפְנֵ֣י׀ יְהוָ֣ה אֱלֹהֶ֗יךָ אַתָּ֨ה וּבִנְךָ֣ וּבִתֶּךָ֮ וְעַבְדְּךָ֣ וַאֲמָתֶךָ֒ וְהַלֵּוִי֙ אֲשֶׁ֣ר בִּשְׁעָרֶ֔יךָ וְהַגֵּ֛ר וְהַיָּת֥וֹם וְהָאַלְמָנָ֖ה אֲשֶׁ֣ר בְּקִרְבֶּ֑ךָ בַּמָּק֗וֹם אֲשֶׁ֤ר יִבְחַר֙ יְהוָ֣ה אֱלֹהֶ֔יךָ לְשַׁכֵּ֥ן שְׁמ֖וֹ שָֽׁם׃ ‎12 ‏וְזָ֣כַרְתָּ֔ כִּי־עֶ֥בֶד הָיִ֖יתָ בְּמִצְרָ֑יִם וְשָׁמַרְתָּ֣ וְעָשִׂ֔יתָ אֶת־הַֽחֻקִּ֖ים הָאֵֽלֶּה׃ פ ‎13 ‏חַ֧ג הַסֻּכֹּ֛ת תַּעֲשֶׂ֥ה לְךָ֖ שִׁבְעַ֣ת יָמִ֑ים בְּאָ֨סְפְּךָ֔ מִֽגָּרְנְךָ֖ וּמִיִּקְבֶֽךָ׃ ‎14 ‏וְשָׂמַחְתָּ֖ בְּחַגֶּ֑ךָ אַתָּ֨ה וּבִנְךָ֤ וּבִתֶּ֙ךָ֙ וְעַבְדְּךָ֣ וַאֲמָתֶ֔ךָ וְהַלֵּוִ֗י וְהַגֵּ֛ר וְהַיָּת֥וֹם וְהָאַלְמָנָ֖ה אֲשֶׁ֥ר בִּשְׁעָרֶֽיךָ׃ ‎15 ‏שִׁבְעַ֣ת יָמִ֗ים תָּחֹג֙ לַיהוָ֣ה אֱלֹהֶ֔יךָ בַּמָּק֖וֹם אֲשֶׁר־יִבְחַ֣ר יְהוָ֑ה כִּ֣י יְבָרֶכְךָ֞ יְהוָ֣ה אֱלֹהֶ֗יךָ בְּכֹ֤ל תְּבוּאָֽתְךָ֙ וּבְכֹל֙ מַעֲשֵׂ֣ה יָדֶ֔יךָ וְהָיִ֖יתָ אַ֥ךְ שָׂמֵֽחַ׃ ‎16 ‏שָׁל֣וֹשׁ פְּעָמִ֣ים׀ בַּשָּׁנָ֡ה יֵרָאֶ֨ה כָל־זְכוּרְךָ֜ אֶת־פְּנֵ֣י׀ יְהוָ֣ה אֱלֹהֶ֗יךָ בַּמָּקוֹם֙ אֲשֶׁ֣ר יִבְחָ֔ר בְּחַ֧ג הַמַּצּ֛וֹת וּבְחַ֥ג הַשָּׁבֻע֖וֹת וּבְחַ֣ג הַסֻּכּ֑וֹת וְלֹ֧א יֵרָאֶ֛ה אֶת־פְּנֵ֥י יְהוָ֖ה רֵיקָֽם׃ ‎17 ‏אִ֖ישׁ כְּמַתְּנַ֣ת יָד֑וֹ כְּבִרְכַּ֛ת יְהוָ֥ה אֱלֹהֶ֖יךָ אֲשֶׁ֥ר נָֽתַן־לָֽךְ׃ ס ‎18 ‏שֹׁפְטִ֣ים וְשֹֽׁטְרִ֗ים תִּֽתֶּן־לְךָ֙ בְּכָל־שְׁעָרֶ֔יךָ אֲשֶׁ֨ר יְהוָ֧ה אֱלֹהֶ֛יךָ נֹתֵ֥ן לְךָ֖ לִשְׁבָטֶ֑יךָ וְשָׁפְט֥וּ אֶת־הָעָ֖ם מִשְׁפַּט־צֶֽדֶק׃ ‎19 ‏לֹא־תַטֶּ֣ה מִשְׁפָּ֔ט לֹ֥א תַכִּ֖יר פָּנִ֑ים וְלֹא־תִקַּ֣ח שֹׁ֔חַד כִּ֣י הַשֹּׁ֗חַד יְעַוֵּר֙ עֵינֵ֣י חֲכָמִ֔ים וִֽיסַלֵּ֖ף דִּבְרֵ֥י צַדִּיקִֽם׃ ‎20 ‏צֶ֥דֶק צֶ֖דֶק תִּרְדֹּ֑ף לְמַ֤עַן תִּֽחְיֶה֙ וְיָרַשְׁתָּ֣ אֶת־הָאָ֔רֶץ אֲשֶׁר־יְהוָ֥ה אֱלֹהֶ֖יךָ נֹתֵ֥ן לָֽךְ׃ ס ‎21 ‏לֹֽא־תִטַּ֥ע לְךָ֛ אֲשֵׁרָ֖ה כָּל־עֵ֑ץ אֵ֗צֶל מִזְבַּ֛ח יְהוָ֥ה אֱלֹהֶ֖יךָ אֲשֶׁ֥ר תַּעֲשֶׂה־לָּֽךְ׃ ס ‎22 ‏וְלֹֽא־תָקִ֥ים לְךָ֖ מַצֵּבָ֑ה אֲשֶׁ֥ר שָׂנֵ֖א יְהוָ֥ה אֱלֹהֶֽיךָ׃ ס

1 šāmwōr ’eṯ-ḥōḏeš hā’āḇîḇ wə‘āśîṯā pesaḥ layhwâ ’ĕlōheyḵā kî bəḥōḏeš hā’āḇîḇ hwōṣî’ăḵā yəhwâ ’ĕlōheyḵā mimmiṣərayim lāyəlâ: 2 wəzāḇaḥətā pesaḥ layhwâ ’ĕlōheyḵā ṣō’n ûḇāqār bammāqwōm ’ăšer-yiḇəḥar yəhwâ ləšakēn šəmwō šām: 3 lō’-ṯō’ḵal ‘ālāyw ḥāmēṣ šiḇə‘aṯ yāmîm tō’ḵal-‘ālāyw maṣṣwōṯ leḥem ‘ōnî kî ḇəḥipāzwōn yāṣā’ṯā mē’ereṣ miṣərayim ləma‘an tizəkōr ’eṯ-ywōm ṣē’ṯəḵā mē’ereṣ miṣərayim kōl yəmê ḥayyeyḵā: 4 wəlō’-yērā’eh ləḵā śə’ōr bəḵāl-gəḇuləḵā šiḇə‘aṯ yāmîm wəlō’-yālîn min-habāśār ’ăšer tizəbaḥ bā‘ereḇ bayywōm hāri’šwōn labōqer: 5 lō’ ṯûḵal lizəbōḥa ’eṯ-hapāsaḥ bə’aḥaḏ šə‘āreyḵā ’ăšer-yəhwâ ’ĕlōheyḵā nōṯēn lāḵə: 6 kî ’im-’el-hammāqwōm ’ăšer-yiḇəḥar yəhwâ ’ĕlōheyḵā ləšakēn šəmwō šām tizəbaḥ ’eṯ-hapesaḥ bā‘āreḇ kəḇwō’ haššemeš mwō‘ēḏ ṣē’ṯəḵā mimmiṣərāyim: 7 ûḇiššalətā wə’āḵalətā bammāqwōm ’ăšer yiḇəḥar yəhwâ ’ĕlōheyḵā bwō ûfānîṯā ḇabōqer wəhālaḵətā lə’ōhāleyḵā: 8 šēšeṯ yāmîm tō’ḵal maṣṣwōṯ ûḇayywōm haššəḇî‘î ‘ăṣereṯ layhwâ ’ĕlōheyḵā lō’ ṯa‘ăśeh məlā’ḵâ: s 9 šiḇə‘â šāḇu‘ōṯ tisəpār-lāḵə mēhāḥēl ḥerəmēš baqqāmâ tāḥēl lisəpōr šiḇə‘â šāḇu‘wōṯ: 10 wə‘āśîṯā ḥaḡ šāḇu‘wōṯ layhwâ ’ĕlōheyḵā missaṯ niḏəḇaṯ yāḏəḵā ’ăšer titēn ka’ăšer yəḇāreḵəḵā yəhwâ ’ĕlōheyḵā: 11 wəśāmaḥətā lifənê| yəhwâ ’ĕlōheyḵā ’atâ ûḇinəḵā ûḇiteḵā wə‘aḇədəḵā wa’ămāṯeḵā wəhallēwî ’ăšer bišə‘āreyḵā wəhagēr wəhayyāṯwōm wəhā’aləmānâ ’ăšer bəqirəbeḵā bammāqwōm ’ăšer yiḇəḥar yəhwâ ’ĕlōheyḵā ləšakēn šəmwō šām: 12 wəzāḵarətā kî-‘eḇeḏ hāyîṯā bəmiṣərāyim wəšāmarətā wə‘āśîṯā ’eṯ-haḥuqqîm hā’ēlleh: f 13 ḥaḡ hassukōṯ ta‘ăśeh ləḵā šiḇə‘aṯ yāmîm bə’āsəpəḵā migārənəḵā ûmîyiqəḇeḵā: 14 wəśāmaḥətā bəḥageḵā ’atâ ûḇinəḵā ûḇiteḵā wə‘aḇədəḵā wa’ămāṯeḵā wəhallēwî wəhagēr wəhayyāṯwōm wəhā’aləmānâ ’ăšer bišə‘āreyḵā: 15 šiḇə‘aṯ yāmîm tāḥōḡ layhwâ ’ĕlōheyḵā bammāqwōm ’ăšer-yiḇəḥar yəhwâ kî yəḇāreḵəḵā yəhwâ ’ĕlōheyḵā bəḵōl təḇû’āṯəḵā ûḇəḵōl ma‘ăśēh yāḏeyḵā wəhāyîṯā ’aḵə śāmēḥa: 16 šālwōš pə‘āmîm| baššānâ yērā’eh ḵāl-zəḵûrəḵā ’eṯ-pənê| yəhwâ ’ĕlōheyḵā bammāqwōm ’ăšer yiḇəḥār bəḥaḡ hammaṣṣwōṯ ûḇəḥaḡ haššāḇu‘wōṯ ûḇəḥaḡ hassukwōṯ wəlō’ yērā’eh ’eṯ-pənê yəhwâ rêqām: 17 ’îš kəmatənaṯ yāḏwō kəḇirəkaṯ yəhwâ ’ĕlōheyḵā ’ăšer nāṯan-lāḵə: s 18 šōfəṭîm wəšōṭərîm titen-ləḵā bəḵāl-šə‘āreyḵā ’ăšer yəhwâ ’ĕlōheyḵā nōṯēn ləḵā lišəḇāṭeyḵā wəšāfəṭû ’eṯ-hā‘ām mišəpaṭ-ṣeḏeq: 19 lō’-ṯaṭṭeh mišəpāṭ lō’ ṯakîr pānîm wəlō’-ṯiqqaḥ šōḥaḏ kî haššōḥaḏ yə‘aûēr ‘ênê ḥăḵāmîm wîsallēf diḇərê ṣadîqim: 20 ṣeḏeq ṣeḏeq tirədōf ləma‘an tiḥəyeh wəyārašətā ’eṯ-hā’āreṣ ’ăšer-yəhwâ ’ĕlōheyḵā nōṯēn lāḵə: s 21 lō’-ṯiṭṭa‘ ləḵā ’ăšērâ kāl-‘ēṣ ’ēṣel mizəbaḥ yəhwâ ’ĕlōheyḵā ’ăšer ta‘ăśeh-llāḵə: s 22 wəlō’-ṯāqîm ləḵā maṣṣēḇâ ’ăšer śānē’ yəhwâ ’ĕlōheyḵā: s