Deuteronomy (Devarim): Deuteronomy (Devarim) Chapter 15

Tanach (Hebrew): Deuteronomy (Devarim) Chapter 15

‎1 ‏מִקֵּ֥ץ שֶֽׁבַע־שָׁנִ֖ים תַּעֲשֶׂ֥ה שְׁמִטָּֽה׃ ‎2 ‏וְזֶה֮ דְּבַ֣ר הַשְּׁמִטָּה֒ שָׁמ֗וֹט כָּל־בַּ֙עַל֙ מַשֵּׁ֣ה יָד֔וֹ אֲשֶׁ֥ר יַשֶּׁ֖ה בְּרֵעֵ֑הוּ לֹֽא־יִגֹּ֤שׂ אֶת־רֵעֵ֙הוּ֙ וְאֶת־אָחִ֔יו כִּֽי־קָרָ֥א שְׁמִטָּ֖ה לַֽיהוָֽה׃ ‎3 ‏אֶת־הַנָּכְרִ֖י תִּגֹּ֑שׂ וַאֲשֶׁ֨ר יִהְיֶ֥ה לְךָ֛ אֶת־אָחִ֖יךָ תַּשְׁמֵ֥ט יָדֶֽךָ׃ ‎4 ‏אֶ֕פֶס כִּ֛י לֹ֥א יִֽהְיֶה־בְּךָ֖ אֶבְי֑וֹן כִּֽי־בָרֵ֤ךְ יְבָֽרֶכְךָ֙ יְהוָ֔ה בָּאָ֕רֶץ אֲשֶׁר֙ יְהוָ֣ה אֱלֹהֶ֔יךָ נֹֽתֵן־לְךָ֥ נַחֲלָ֖ה לְרִשְׁתָּֽהּ׃ ‎5 ‏רַ֚ק אִם־שָׁמ֣וֹעַ תִּשְׁמַ֔ע בְּק֖וֹל יְהוָ֣ה אֱלֹהֶ֑יךָ לִשְׁמֹ֤ר לַעֲשׂוֹת֙ אֶת־כָּל־הַמִּצְוָ֣ה הַזֹּ֔את אֲשֶׁ֛ר אָנֹכִ֥י מְצַוְּךָ֖ הַיּֽוֹם׃ ‎6 ‏כִּֽי־יְהוָ֤ה אֱלֹהֶ֙יךָ֙ בֵּֽרַכְךָ֔ כַּאֲשֶׁ֖ר דִּבֶּר־לָ֑ךְ וְהַֽעֲבַטְתָּ֞ גּוֹיִ֣ם רַבִּ֗ים וְאַתָּה֙ לֹ֣א תַעֲבֹ֔ט וּמָֽשַׁלְתָּ֙ בְּגוֹיִ֣ם רַבִּ֔ים וּבְךָ֖ לֹ֥א יִמְשֹֽׁלוּ׃ ס ‎7 ‏כִּֽי־יִהְיֶה֩ בְךָ֨ אֶבְי֜וֹן מֵאַחַ֤ד אַחֶ֙יךָ֙ בְּאַחַ֣ד שְׁעָרֶ֔יךָ בְּאַ֨רְצְךָ֔ אֲשֶׁר־יְהוָ֥ה אֱלֹהֶ֖יךָ נֹתֵ֣ן לָ֑ךְ לֹ֧א תְאַמֵּ֣ץ אֶת־לְבָבְךָ֗ וְלֹ֤א תִקְפֹּץ֙ אֶת־יָ֣דְךָ֔ מֵאָחִ֖יךָ הָאֶבְיֽוֹן׃ ‎8 ‏כִּֽי־פָתֹ֧חַ תִּפְתַּ֛ח אֶת־יָדְךָ֖ ל֑וֹ וְהַעֲבֵט֙ תַּעֲבִיטֶ֔נּוּ דֵּ֚י מַחְסֹר֔וֹ אֲשֶׁ֥ר יֶחְסַ֖ר לֽוֹ׃ ‎9 ‏הִשָּׁ֣מֶר לְךָ֡ פֶּן־יִהְיֶ֣ה דָבָר֩ עִם־לְבָבְךָ֨ בְלִיַּ֜עַל לֵאמֹ֗ר קָֽרְבָ֣ה שְׁנַֽת־הַשֶּׁבַע֮ שְׁנַ֣ת הַשְּׁמִטָּה֒ וְרָעָ֣ה עֵֽינְךָ֗ בְּאָחִ֙יךָ֙ הָֽאֶבְי֔וֹן וְלֹ֥א תִתֵּ֖ן ל֑וֹ וְקָרָ֤א עָלֶ֙יךָ֙ אֶל־יְהוָ֔ה וְהָיָ֥ה בְךָ֖ חֵֽטְא׃ ‎10 ‏נָת֤וֹן תִּתֵּן֙ ל֔וֹ וְלֹא־יֵרַ֥ע לְבָבְךָ֖ בְּתִתְּךָ֣ ל֑וֹ כִּ֞י בִּגְלַ֣ל׀ הַדָּבָ֣ר הַזֶּ֗ה יְבָרֶכְךָ֙ יְהוָ֣ה אֱלֹהֶ֔יךָ בְּכָֽל־מַעֲשֶׂ֔ךָ וּבְכֹ֖ל מִשְׁלַ֥ח יָדֶֽךָ׃ ‎11 ‏כִּ֛י לֹא־יֶחְדַּ֥ל אֶבְי֖וֹן מִקֶּ֣רֶב הָאָ֑רֶץ עַל־כֵּ֞ן אָנֹכִ֤י מְצַוְּךָ֙ לֵאמֹ֔ר פָּ֠תֹחַ תִּפְתַּ֨ח אֶת־יָדְךָ֜ לְאָחִ֧יךָ לַעֲנִיֶּ֛ךָ וּלְאֶבְיֹנְךָ֖ בְּאַרְצֶֽךָ׃ ס ‎12 ‏כִּֽי־יִמָּכֵ֨ר לְךָ֜ אָחִ֣יךָ הָֽעִבְרִ֗י א֚וֹ הָֽעִבְרִיָּ֔ה וַעֲבָֽדְךָ֖ שֵׁ֣שׁ שָׁנִ֑ים וּבַשָּׁנָה֙ הַשְּׁבִיעִ֔ת תְּשַׁלְּחֶ֥נּוּ חָפְשִׁ֖י מֵעִמָּֽךְ׃ ‎13 ‏וְכִֽי־תְשַׁלְּחֶ֥נּוּ חָפְשִׁ֖י מֵֽעִמָּ֑ךְ לֹ֥א תְשַׁלְּחֶ֖נּוּ רֵיקָֽם׃ ‎14 ‏הַעֲנֵ֤יק תַּעֲנִיק֙ ל֔וֹ מִצֹּ֣אנְךָ֔ וּמִֽגָּרְנְךָ֖ וּמִיִּקְבֶ֑ךָ אֲשֶׁ֧ר בֵּרַכְךָ֛ יְהוָ֥ה אֱלֹהֶ֖יךָ תִּתֶּן־לֽוֹ׃ ‎15 ‏וְזָכַרְתָּ֗ כִּ֣י עֶ֤בֶד הָיִ֙יתָ֙ בְּאֶ֣רֶץ מִצְרַ֔יִם וַֽיִּפְדְּךָ֖ יְהוָ֣ה אֱלֹהֶ֑יךָ עַל־כֵּ֞ן אָנֹכִ֧י מְצַוְּךָ֛ אֶת־הַדָּבָ֥ר הַזֶּ֖ה הַיּֽוֹם׃ ‎16 ‏וְהָיָה֙ כִּֽי־יֹאמַ֣ר אֵלֶ֔יךָ לֹ֥א אֵצֵ֖א מֵעִמָּ֑ךְ כִּ֤י אֲהֵֽבְךָ֙ וְאֶת־בֵּיתֶ֔ךָ כִּי־ט֥וֹב ל֖וֹ עִמָּֽךְ׃ ‎17 ‏וְלָקַחְתָּ֣ אֶת־הַמַּרְצֵ֗עַ וְנָתַתָּ֤ה בְאָזְנוֹ֙ וּבַדֶּ֔לֶת וְהָיָ֥ה לְךָ֖ עֶ֣בֶד עוֹלָ֑ם וְאַ֥ף לַאֲמָתְךָ֖ תַּעֲשֶׂה־כֵּֽן׃ ‎18 ‏לֹא־יִקְשֶׁ֣ה בְעֵינֶ֗ךָ בְּשַׁלֵּֽחֲךָ֙ אֹת֤וֹ חָפְשִׁי֙ מֵֽעִמָּ֔ךְ כִּ֗י מִשְׁנֶה֙ שְׂכַ֣ר שָׂכִ֔יר עֲבָֽדְךָ֖ שֵׁ֣שׁ שָׁנִ֑ים וּבֵֽרַכְךָ֙ יְהוָ֣ה אֱלֹהֶ֔יךָ בְּכֹ֖ל אֲשֶׁ֥ר תַּעֲשֶֽׂה׃ פ ‎19 ‏כָּֽל־הַבְּכ֡וֹר אֲשֶׁר֩ יִוָּלֵ֨ד בִּבְקָרְךָ֤ וּבְצֹֽאנְךָ֙ הַזָּכָ֔ר תַּקְדִּ֖ישׁ לַיהוָ֣ה אֱלֹהֶ֑יךָ לֹ֤א תַעֲבֹד֙ בִּבְכֹ֣ר שׁוֹרֶ֔ךָ וְלֹ֥א תָגֹ֖ז בְּכ֥וֹר צֹאנֶֽךָ׃ ‎20 ‏לִפְנֵי֩ יְהוָ֨ה אֱלֹהֶ֤יךָ תֹאכֲלֶ֙נּוּ֙ שָׁנָ֣ה בְשָׁנָ֔ה בַּמָּק֖וֹם אֲשֶׁר־יִבְחַ֣ר יְהוָ֑ה אַתָּ֖ה וּבֵיתֶֽךָ׃ ‎21 ‏וְכִֽי־יִהְיֶ֨ה ב֜וֹ מ֗וּם פִּסֵּ֙חַ֙ א֣וֹ עִוֵּ֔ר כֹּ֖ל מ֣וּם רָ֑ע לֹ֣א תִזְבָּחֶ֔נּוּ לַיהוָ֖ה אֱלֹהֶֽיךָ׃ ‎22 ‏בִּשְׁעָרֶ֖יךָ תֹּאכֲלֶ֑נּוּ הַטָּמֵ֤א וְהַטָּהוֹר֙ יַחְדָּ֔ו כַּצְּבִ֖י וְכָאַיָּֽל׃ ‎23 ‏רַ֥ק אֶת־דָּמ֖וֹ לֹ֣א תֹאכֵ֑ל עַל־הָאָ֥רֶץ תִּשְׁפְּכֶ֖נּוּ כַּמָּֽיִם׃ פ

1 miqqēṣ šeḇa‘-šānîm ta‘ăśeh šəmiṭṭâ: 2 wəzeh dəḇar haššəmiṭṭâ šāmwōṭ kāl-ba‘al maššēh yāḏwō ’ăšer yaššeh bərē‘ēhû lō’-yigōś ’eṯ-rē‘ēhû wə’eṯ-’āḥîw kî-qārā’ šəmiṭṭâ layhwâ: 3 ’eṯ-hannāḵərî tigōś wa’ăšer yihəyeh ləḵā ’eṯ-’āḥîḵā tašəmēṭ yāḏeḵā: 4 ’efes kî lō’ yihəyeh-bəḵā ’eḇəywōn kî-ḇārēḵə yəḇāreḵəḵā yəhwâ bā’āreṣ ’ăšer yəhwâ ’ĕlōheyḵā nōṯēn-ləḵā naḥălâ lərišətāh: 5 raq ’im-šāmwō‘a tišəma‘ bəqwōl yəhwâ ’ĕlōheyḵā lišəmōr la‘ăśwōṯ ’eṯ-kāl-hammiṣəwâ hazzō’ṯ ’ăšer ’ānōḵî məṣaûəḵā hayywōm: 6 kî-yəhwâ ’ĕlōheyḵā bēraḵəḵā ka’ăšer diber-lāḵə wəha‘ăḇaṭətā gwōyim rabîm wə’atâ lō’ ṯa‘ăḇōṭ ûmāšalətā bəḡwōyim rabîm ûḇəḵā lō’ yiməšōlû: s 7 kî-yihəyeh ḇəḵā ’eḇəywōn mē’aḥaḏ ’aḥeyḵā bə’aḥaḏ šə‘āreyḵā bə’arəṣəḵā ’ăšer-yəhwâ ’ĕlōheyḵā nōṯēn lāḵə lō’ ṯə’ammēṣ ’eṯ-ləḇāḇəḵā wəlō’ ṯiqəpōṣ ’eṯ-yāḏəḵā mē’āḥîḵā hā’eḇəywōn: 8 kî-fāṯōḥa tifətaḥ ’eṯ-yāḏəḵā lwō wəha‘ăḇēṭ ta‘ăḇîṭennû dê maḥəsōrwō ’ăšer yeḥəsar lwō: 9 hiššāmer ləḵā pen-yihəyeh ḏāḇār ‘im-ləḇāḇəḵā ḇəlîya‘al lē’mōr qārəḇâ šənaṯ-haššeḇa‘ šənaṯ haššəmiṭṭâ wərā‘â ‘ênəḵā bə’āḥîḵā hā’eḇəywōn wəlō’ ṯitēn lwō wəqārā’ ‘āleyḵā ’el-yəhwâ wəhāyâ ḇəḵā ḥēṭə’: 10 nāṯwōn titēn lwō wəlō’-yēra‘ ləḇāḇəḵā bəṯitəḵā lwō kî biḡəlal| hadāḇār hazzeh yəḇāreḵəḵā yəhwâ ’ĕlōheyḵā bəḵāl-ma‘ăśeḵā ûḇəḵōl mišəlaḥ yāḏeḵā: 11 kî lō’-yeḥədal ’eḇəywōn miqqereḇ hā’āreṣ ‘al-kēn ’ānōḵî məṣaûəḵā lē’mōr pāṯōḥa tifətaḥ ’eṯ-yāḏəḵā lə’āḥîḵā la‘ănîyeḵā ûlə’eḇəyōnəḵā bə’arəṣeḵā: s 12 kî-yimmāḵēr ləḵā ’āḥîḵā hā‘iḇərî ’wō hā‘iḇərîyâ wa‘ăḇāḏəḵā šēš šānîm ûḇaššānâ haššəḇî‘iṯ təšalləḥennû ḥāfəšî mē‘immāḵə: 13 wəḵî-ṯəšalləḥennû ḥāfəšî mē‘immāḵə lō’ ṯəšalləḥennû rêqām: 14 ha‘ănêq ta‘ănîq lwō miṣṣō’nəḵā ûmigārənəḵā ûmîyiqəḇeḵā ’ăšer bēraḵəḵā yəhwâ ’ĕlōheyḵā titen-lwō: 15 wəzāḵarətā kî ‘eḇeḏ hāyîṯā bə’ereṣ miṣərayim wayyifədəḵā yəhwâ ’ĕlōheyḵā ‘al-kēn ’ānōḵî məṣaûəḵā ’eṯ-hadāḇār hazzeh hayywōm: 16 wəhāyâ kî-yō’mar ’ēleyḵā lō’ ’ēṣē’ mē‘immāḵə kî ’ăhēḇəḵā wə’eṯ-bêṯeḵā kî-ṭwōḇ lwō ‘immāḵə: 17 wəlāqaḥətā ’eṯ-hammarəṣē‘a wənāṯatâ ḇə’āzənwō ûḇadeleṯ wəhāyâ ləḵā ‘eḇeḏ ‘wōlām wə’af la’ămāṯəḵā ta‘ăśeh-kēn: 18 lō’-yiqəšeh ḇə‘êneḵā bəšallēḥăḵā ’ōṯwō ḥāfəšî mē‘immāḵə kî mišəneh śəḵar śāḵîr ‘ăḇāḏəḵā šēš šānîm ûḇēraḵəḵā yəhwâ ’ĕlōheyḵā bəḵōl ’ăšer ta‘ăśeh: f 19 kāl-habəḵwōr ’ăšer yiûālēḏ biḇəqārəḵā ûḇəṣō’nəḵā hazzāḵār taqədîš layhwâ ’ĕlōheyḵā lō’ ṯa‘ăḇōḏ biḇəḵōr šwōreḵā wəlō’ ṯāḡōz bəḵwōr ṣō’neḵā: 20 lifənê yəhwâ ’ĕlōheyḵā ṯō’ḵălennû šānâ ḇəšānâ bammāqwōm ’ăšer-yiḇəḥar yəhwâ ’atâ ûḇêṯeḵā: 21 wəḵî-yihəyeh ḇwō mûm pissēḥa ’wō ‘iûēr kōl mûm rā‘ lō’ ṯizəbāḥennû layhwâ ’ĕlōheyḵā: 22 bišə‘āreyḵā tō’ḵălennû haṭṭāmē’ wəhaṭṭâwōr yaḥədāw kaṣṣəḇî wəḵā’ayyāl: 23 raq ’eṯ-dāmwō lō’ ṯō’ḵēl ‘al-hā’āreṣ tišəpəḵennû kammāyim: f