2 Chronicles (2 Divrey Yamim): 2 Chronicles (2 Divrey Yamim) Chapter 21

Tanach (Hebrew): 2 Chronicles (2 Divrey Yamim) Chapter 21

‎1 ‏וַיִּשְׁכַּ֤ב יְהֽוֹשָׁפָט֙ עִם־אֲבֹתָ֔יו וַיִּקָּבֵ֥ר עִם־אֲבֹתָ֖יו בְּעִ֣יר דָּוִ֑יד וַיִּמְלֹ֛ךְ יְהוֹרָ֥ם בְּנ֖וֹ תַּחְתָּֽיו׃ ‎2 ‏וְלֽוֹ־אַחִ֞ים בְּנֵ֣י יְהוֹשָׁפָ֗ט עֲזַרְיָ֤ה וִֽיחִיאֵל֙ וּזְכַרְיָ֣הוּ וַעֲזַרְיָ֔הוּ וּמִיכָאֵ֖ל וּשְׁפַטְיָ֑הוּ כָּל־אֵ֕לֶּה בְּנֵ֥י יְהוֹשָׁפָ֖ט מֶ֥לֶךְ־יִשְׂרָאֵֽל׃ ‎3 ‏וַיִּתֵּ֣ן לָהֶ֣ם׀ אֲ֠בִיהֶם מַתָּנ֨וֹת רַבּ֜וֹת לְכֶ֤סֶף וּלְזָהָב֙ וּלְמִגְדָּנ֔וֹת עִם־עָרֵ֥י מְצֻר֖וֹת בִּֽיהוּדָ֑ה וְאֶת־הַמַּמְלָכָ֛ה נָתַ֥ן לִֽיהוֹרָ֖ם כִּי־ה֥וּא הַבְּכֽוֹר׃ פ ‎4 ‏וַיָּ֨קָם יְהוֹרָ֜ם עַל־מַמְלֶ֤כַת אָבִיו֙ וַיִּתְחַזַּ֔ק וַיַּהֲרֹ֥ג אֶת־כָּל־אֶחָ֖יו בֶּחָ֑רֶב וְגַ֖ם מִשָּׂרֵ֥י יִשְׂרָאֵֽל׃ ‎5 ‏בֶּן־שְׁלֹשִׁ֥ים וּשְׁתַּ֛יִם שָׁנָ֖ה יְהוֹרָ֣ם בְּמָלְכ֑וֹ וּשְׁמוֹנֶ֣ה שָׁנִ֔ים מָלַ֖ךְ בִּירוּשָׁלִָֽם׃ ‎6 ‏וַיֵּ֜לֶךְ בְּדֶ֣רֶךְ׀ מַלְכֵ֣י יִשְׂרָאֵ֗ל כַּאֲשֶׁ֤ר עָשׂוּ֙ בֵּ֣ית אַחְאָ֔ב כִּ֚י בַּת־אַחְאָ֔ב הָ֥יְתָה לּ֖וֹ אִשָּׁ֑ה וַיַּ֥עַשׂ הָרַ֖ע בְּעֵינֵ֥י יְהוָֽה׃ ‎7 ‏וְלֹא־אָבָ֣ה יְהוָ֗ה לְהַשְׁחִית֙ אֶת־בֵּ֣ית דָּוִ֔יד לְמַ֣עַן הַבְּרִ֔ית אֲשֶׁ֥ר כָּרַ֖ת לְדָוִ֑יד וְכַאֲשֶׁ֣ר אָמַ֗ר לָתֵ֨ת ל֥וֹ נִ֛יר וּלְבָנָ֖יו כָּל־הַיָּמִֽים׃ ‎8 ‏בְּיָמָיו֙ פָּשַׁ֣ע אֱד֔וֹם מִתַּ֖חַת יַד־יְהוּדָ֑ה וַיַּמְלִ֥יכוּ עֲלֵיהֶ֖ם מֶֽלֶךְ׃ ‎9 ‏וַיַּֽעֲבֹ֤ר יְהוֹרָם֙ עִם־שָׂרָ֔יו וְכָל־הָרֶ֖כֶב עִמּ֑וֹ וַיְהִי֙ קָ֣ם לַ֔יְלָה וַיַּ֗ךְ אֶת־אֱדוֹם֙ הַסּוֹבֵ֣ב אֵלָ֔יו וְאֵ֖ת שָׂרֵ֥י הָרָֽכֶב׃ ‎10 ‏וַיִּפְשַׁ֨ע אֱד֜וֹם מִתַּ֣חַת יַד־יְהוּדָ֗ה עַ֚ד הַיּ֣וֹם הַזֶּ֔ה אָ֣ז תִּפְשַׁ֥ע לִבְנָ֛ה בָּעֵ֥ת הַהִ֖יא מִתַּ֣חַת יָד֑וֹ כִּ֣י עָזַ֔ב אֶת־יְהוָ֖ה אֱלֹהֵ֥י אֲבֹתָֽיו׃ ‎11 ‏גַּם־ה֥וּא עָשָֽׂה־בָמ֖וֹת בְּהָרֵ֣י יְהוּדָ֑ה וַיֶּ֙זֶן֙ אֶת־יֹשְׁבֵ֣י יְרוּשָׁלִַ֔ם וַיַּדַּ֖ח אֶת־יְהוּדָֽה׃ פ ‎12 ‏וַיָּבֹ֤א אֵלָיו֙ מִכְתָּ֔ב מֵֽאֵלִיָּ֥הוּ הַנָּבִ֖יא לֵאמֹ֑ר כֹּ֣ה׀ אָמַ֣ר יְהוָ֗ה אֱלֹהֵי֙ דָּוִ֣יד אָבִ֔יךָ תַּ֗חַת אֲשֶׁ֤ר לֹֽא־הָלַ֙כְתָּ֙ בְּדַרְכֵי֙ יְהוֹשָׁפָ֣ט אָבִ֔יךָ וּבְדַרְכֵ֖י אָסָ֥א מֶֽלֶךְ־יְהוּדָֽה׃ ‎13 ‏וַתֵּ֗לֶךְ בְּדֶ֙רֶךְ֙ מַלְכֵ֣י יִשְׂרָאֵ֔ל וַתַּזְנֶ֤ה אֶת־יְהוּדָה֙ וְאֶת־יֹשְׁבֵ֣י יְרוּשָׁלִַ֔ם כְּהַזְנ֖וֹת בֵּ֣ית אַחְאָ֑ב וְגַ֨ם אֶת־אַחֶ֧יךָ בֵית־אָבִ֛יךָ הַטּוֹבִ֥ים מִמְּךָ֖ הָרָֽגְתָּ׃ ‎14 ‏הִנֵּ֣ה יְהוָ֗ה נֹגֵ֛ף מַגֵּפָ֥ה גְדוֹלָ֖ה בְּעַמֶּ֑ךָ וּבְבָנֶ֥יךָ וּבְנָשֶׁ֖יךָ וּבְכָל־רְכוּשֶֽׁךָ׃ ‎15 ‏וְאַתָּ֛ה בָּחֳלָיִ֥ים רַבִּ֖ים בְּמַחֲלֵ֣ה מֵעֶ֑יךָ עַד־יֵצְא֤וּ מֵעֶ֙יךָ֙ מִן־הַחֹ֔לִי יָמִ֖ים עַל־יָמִֽים׃ ‎16 ‏וַיָּ֨עַר יְהוָ֜ה עַל־יְהוֹרָ֗ם אֵ֣ת ר֤וּחַ הַפְּלִשְׁתִּים֙ וְהָ֣עַרְבִ֔ים אֲשֶׁ֖ר עַל־יַ֥ד כּוּשִֽׁים׃ ‎17 ‏וַיַּעֲל֤וּ בִֽיהוּדָה֙ וַיִּבְקָע֔וּהָ וַיִּשְׁבּ֗וּ אֵ֤ת כָּל־הָרְכוּשׁ֙ הַנִּמְצָ֣א לְבֵית־הַמֶּ֔לֶךְ וְגַם־בָּנָ֖יו וְנָשָׁ֑יו וְלֹ֤א נִשְׁאַר־לוֹ֙ בֵּ֔ן כִּ֥י אִם־יְהוֹאָחָ֖ז קְטֹ֥ן בָּנָֽיו׃ ‎18 ‏וְאַחֲרֵ֖י כָּל־זֹ֑את נְגָפ֨וֹ יְהוָ֧ה׀ בְּמֵעָ֛יו לָחֳלִ֖י לְאֵ֥ין מַרְפֵּֽא׃ ‎19 ‏וַיְהִ֣י לְיָמִ֣ים׀ מִיָּמִ֡ים וּכְעֵת֩ צֵ֨את הַקֵּ֜ץ לְיָמִ֣ים שְׁנַ֗יִם יָצְא֤וּ מֵעָיו֙ עִם־חָלְי֔וֹ וַיָּ֖מָת בְּתַחֲלֻאִ֣ים רָעִ֑ים וְלֹא־עָ֨שׂוּ ל֥וֹ עַמּ֛וֹ שְׂרֵפָ֖ה כִּשְׂרֵפַ֥ת אֲבֹתָֽיו׃ ‎20 ‏בֶּן־שְׁלֹשִׁ֤ים וּשְׁתַּ֙יִם֙ הָיָ֣ה בְמָלְכ֔וֹ וּשְׁמוֹנֶ֣ה שָׁנִ֔ים מָלַ֖ךְ בִּירוּשָׁלִָ֑ם וַיֵּ֙לֶךְ֙ בְּלֹ֣א חֶמְדָּ֔ה וַֽיִּקְבְּרֻ֙הוּ֙ בְּעִ֣יר דָּוִ֔יד וְלֹ֖א בְּקִבְר֥וֹת הַמְּלָכִֽים׃

1 wayyišəkaḇ yəhwōšāfāṭ ‘im-’ăḇōṯāyw wayyiqqāḇēr ‘im-’ăḇōṯāyw bə‘îr dāwîḏ wayyiməlōḵə yəhwōrām bənwō taḥətāyw: 2 wəlwō-’aḥîm bənê yəhwōšāfāṭ ‘ăzarəyâ wîḥî’ēl ûzəḵarəyâû wa‘ăzarəyâû ûmîḵā’ēl ûšəfaṭəyâû kāl-’ēlleh bənê yəhwōšāfāṭ meleḵə-yiśərā’ēl: 3 wayyitēn lâem| ’ăḇîhem matānwōṯ rabwōṯ ləḵesef ûləzâāḇ ûləmiḡədānwōṯ ‘im-‘ārê məṣurwōṯ bîhûḏâ wə’eṯ-hammaməlāḵâ nāṯan lîhwōrām kî-hû’ habəḵwōr: f 4 wayyāqām yəhwōrām ‘al-maməleḵaṯ ’āḇîw wayyiṯəḥazzaq wayyahărōḡ ’eṯ-kāl-’eḥāyw beḥāreḇ wəḡam miśśārê yiśərā’ēl: 5 ben-šəlōšîm ûšətayim šānâ yəhwōrām bəmāləḵwō ûšəmwōneh šānîm mālaḵə bîrûšālāim: 6 wayyēleḵə bəḏereḵə| maləḵê yiśərā’ēl ka’ăšer ‘āśû bêṯ ’aḥə’āḇ kî baṯ-’aḥə’āḇ hāyəṯâ llwō ’iššâ wayya‘aś hāra‘ bə‘ênê yəhwâ: 7 wəlō’-’āḇâ yəhwâ ləhašəḥîṯ ’eṯ-bêṯ dāwîḏ ləma‘an habərîṯ ’ăšer kāraṯ ləḏāwîḏ wəḵa’ăšer ’āmar lāṯēṯ lwō nîr ûləḇānāyw kāl-hayyāmîm: 8 bəyāmāyw pāša‘ ’ĕḏwōm mitaḥaṯ yaḏ-yəhûḏâ wayyaməlîḵû ‘ălêhem meleḵə: 9 wayya‘ăḇōr yəhwōrām ‘im-śārāyw wəḵāl-hāreḵeḇ ‘immwō wayəhî qām layəlâ wayyaḵə ’eṯ-’ĕḏwōm hasswōḇēḇ ’ēlāyw wə’ēṯ śārê hārāḵeḇ: 10 wayyifəša‘ ’ĕḏwōm mitaḥaṯ yaḏ-yəhûḏâ ‘aḏ hayywōm hazzeh ’āz tifəša‘ liḇənâ bā‘ēṯ hahî’ mitaḥaṯ yāḏwō kî ‘āzaḇ ’eṯ-yəhwâ ’ĕlōhê ’ăḇōṯāyw: 11 gam-hû’ ‘āśâ-ḇāmwōṯ bəhārê yəhûḏâ wayyezen ’eṯ-yōšəḇê yərûšālaim wayyadaḥ ’eṯ-yəhûḏâ: f 12 wayyāḇō’ ’ēlāyw miḵətāḇ mē’ēlîyâû hannāḇî’ lē’mōr kōh| ’āmar yəhwâ ’ĕlōhê dāwîḏ ’āḇîḵā taḥaṯ ’ăšer lō’-hālaḵətā bəḏarəḵê yəhwōšāfāṭ ’āḇîḵā ûḇəḏarəḵê ’āsā’ meleḵə-yəhûḏâ: 13 watēleḵə bəḏereḵə maləḵê yiśərā’ēl watazəneh ’eṯ-yəhûḏâ wə’eṯ-yōšəḇê yərûšālaim kəhazənwōṯ bêṯ ’aḥə’āḇ wəḡam ’eṯ-’aḥeyḵā ḇêṯ-’āḇîḵā haṭṭwōḇîm mimməḵā hārāḡətā: 14 hinnēh yəhwâ nōḡēf magēfâ ḡəḏwōlâ bə‘ammeḵā ûḇəḇāneyḵā ûḇənāšeyḵā ûḇəḵāl-rəḵûšeḵā: 15 wə’atâ bāḥŏlāyîm rabîm bəmaḥălēh mē‘eyḵā ‘aḏ-yēṣə’û mē‘eyḵā min-haḥōlî yāmîm ‘al-yāmîm: 16 wayyā‘ar yəhwâ ‘al-yəhwōrām ’ēṯ rûḥa hapəlišətîm wəhā‘arəḇîm ’ăšer ‘al-yaḏ kûšîm: 17 wayya‘ălû ḇîhûḏâ wayyiḇəqā‘ûhā wayyišəbû ’ēṯ kāl-hārəḵûš hanniməṣā’ ləḇêṯ-hammeleḵə wəḡam-bānāyw wənāšāyw wəlō’ nišə’ar-lwō bēn kî ’im-yəhwō’āḥāz qəṭōn bānāyw: 18 wə’aḥărê kāl-zō’ṯ nəḡāfwō yəhwâ| bəmē‘āyw lāḥŏlî lə’ên marəpē’: 19 wayəhî ləyāmîm| mîyāmîm ûḵə‘ēṯ ṣē’ṯ haqqēṣ ləyāmîm šənayim yāṣə’û mē‘āyw ‘im-ḥāləywō wayyāmāṯ bəṯaḥălu’îm rā‘îm wəlō’-‘āśû lwō ‘ammwō śərēfâ kiśərēfaṯ ’ăḇōṯāyw: 20 ben-šəlōšîm ûšətayim hāyâ ḇəmāləḵwō ûšəmwōneh šānîm mālaḵə bîrûšālāim wayyēleḵə bəlō’ ḥemədâ wayyiqəbəruhû bə‘îr dāwîḏ wəlō’ bəqiḇərwōṯ hamməlāḵîm: