‎1 ‏וַיְהִ֣י אַֽחֲרֵיכֵ֡ן בָּ֣אוּ בְנֵי־מוֹאָב֩ וּבְנֵ֨י עַמּ֜וֹן וְעִמָּהֶ֧ם׀ מֵֽהָעַמּוֹנִ֛ים עַל־יְהוֹשָׁפָ֖ט לַמִּלְחָמָֽה׃

‎2 ‏וַיָּבֹ֗אוּ וַיַּגִּ֤ידוּ לִֽיהוֹשָׁפָט֙ לֵאמֹ֔ר בָּ֣א עָלֶ֜יךָ הָמ֥וֹן רָ֛ב מֵעֵ֥בֶר לַיָּ֖ם מֵאֲרָ֑ם וְהִנָּם֙ בְּחַֽצְצ֣וֹן תָּמָ֔ר הִ֖יא עֵ֥ין גֶּֽדִי׃

‎3 ‏וַיִּרָ֕א וַיִּתֵּ֧ן יְהוֹשָׁפָ֛ט אֶת־פָּנָ֖יו לִדְר֣וֹשׁ לַיהוָ֑ה וַיִּקְרָא־צ֖וֹם עַל־כָּל־יְהוּדָֽה׃

‎4 ‏וַיִּקָּבְצ֣וּ יְהוּדָ֔ה לְבַקֵּ֖שׁ מֵֽיְהוָ֑ה גַּ֚ם מִכָּל־עָרֵ֣י יְהוּדָ֔ה בָּ֖אוּ לְבַקֵּ֥שׁ אֶת־יְהוָֽה׃

‎5 ‏וַיַּעֲמֹ֣ד יְהוֹשָׁפָ֗ט בִּקְהַ֧ל יְהוּדָ֛ה וִירוּשָׁלִַ֖ם בְּבֵ֣ית יְהוָ֑ה לִפְנֵ֖י הֶחָצֵ֥ר הַחֲדָשָֽׁה׃

‎6 ‏וַיֹּאמַ֗ר יְהוָ֞ה אֱלֹהֵ֤י אֲבֹתֵ֙ינוּ֙ הֲלֹ֨א אַתָּֽה־ה֤וּא אֱלֹהִים֙ בַּשָּׁמַ֔יִם וְאַתָּ֣ה מוֹשֵׁ֔ל בְּכֹ֖ל מַמְלְכ֣וֹת הַגּוֹיִ֑ם וּבְיָדְךָ֙ כֹּ֣חַ וּגְבוּרָ֔ה וְאֵ֥ין עִמְּךָ֖ לְהִתְיַצֵּֽב׃

‎7 ‏הֲלֹ֣א׀ אַתָּ֣ה אֱלֹהֵ֗ינוּ הוֹרַ֙שְׁתָּ֙ אֶת־יֹשְׁבֵי֙ הָאָ֣רֶץ הַזֹּ֔את מִלִּפְנֵ֖י עַמְּךָ֣ יִשְׂרָאֵ֑ל וַֽתִּתְּנָ֗הּ לְזֶ֛רַע אַבְרָהָ֥ם אֹֽהַבְךָ֖ לְעוֹלָֽם׃

‎8 ‏וַיֵּשְׁב֖וּ־בָ֑הּ וַיִּבְנ֨וּ לְךָ֧׀ בָּ֛הּ מִקְדָּ֖שׁ לְשִׁמְךָ֥ לֵאמֹֽר׃

‎9 ‏אִם־תָּב֨וֹא עָלֵ֜ינוּ רָעָ֗ה חֶרֶב֮ שְׁפוֹט֮ וְדֶ֣בֶר וְרָעָב֒ נַֽעַמְדָ֞ה לִפְנֵי֙ הַבַּ֤יִת הַזֶּה֙ וּלְפָנֶ֔יךָ כִּ֥י שִׁמְךָ֖ בַּבַּ֣יִת הַזֶּ֑ה וְנִזְעַ֥ק אֵלֶ֛יךָ מִצָּרָתֵ֖נוּ וְתִשְׁמַ֥ע וְתוֹשִֽׁיעַ׃

‎10 ‏וְעַתָּ֡ה הִנֵּה֩ בְנֵֽי־עַמּ֨וֹן וּמוֹאָ֜ב וְהַר־שֵׂעִ֗יר אֲ֠שֶׁר לֹֽא־נָתַ֤תָּה לְיִשְׂרָאֵל֙ לָב֣וֹא בָהֶ֔ם בְּבֹאָ֖ם מֵאֶ֣רֶץ מִצְרָ֑יִם כִּ֛י סָ֥רוּ מֵעֲלֵיהֶ֖ם וְלֹ֥א הִשְׁמִידֽוּם׃

‎11 ‏וְהִ֨נֵּה־הֵ֔ם גֹּמְלִ֖ים עָלֵ֑ינוּ לָבוֹא֙ לְגָ֣רְשֵׁ֔נוּ מִיְּרֻשָּׁתְךָ֖ אֲשֶׁ֥ר הֽוֹרַשְׁתָּֽנוּ׃

‎12 ‏אֱלֹהֵ֙ינוּ֙ הֲלֹ֣א תִשְׁפָּט־בָּ֔ם כִּ֣י אֵ֥ין בָּ֙נוּ֙ כֹּ֔חַ לִ֠פְנֵי הֶהָמ֥וֹן הָרָ֛ב הַזֶּ֖ה הַבָּ֣א עָלֵ֑ינוּ וַאֲנַ֗חְנוּ לֹ֤א נֵדַע֙ מַֽה־נַּעֲשֶׂ֔ה כִּ֥י עָלֶ֖יךָ עֵינֵֽינוּ׃

‎13 ‏וְכָ֨ל־יְהוּדָ֔ה עֹמְדִ֖ים לִפְנֵ֣י יְהוָ֑ה גַּם־טַפָּ֖ם נְשֵׁיהֶ֥ם וּבְנֵיהֶֽם׃ פ

‎14 ‏וְיַחֲזִיאֵ֡ל בֶּן־זְכַרְיָ֡הוּ בֶּן־בְּ֠נָיָה בֶּן־יְעִיאֵ֧ל בֶּן־מַתַּנְיָ֛ה הַלֵּוִ֖י מִן־בְּנֵ֣י אָסָ֑ף הָיְתָ֤ה עָלָיו֙ ר֣וּחַ יְהוָ֔ה בְּת֖וֹךְ הַקָּהָֽל׃

‎15 ‏וַיֹּ֗אמֶר הַקְשִׁ֤יבוּ כָל־יְהוּדָה֙ וְיֹשְׁבֵ֣י יְרוּשָׁלִַ֔ם וְהַמֶּ֖לֶךְ יְהוֹשָׁפָ֑ט כֹּֽה־אָמַ֨ר יְהוָ֜ה לָכֶ֗ם אַ֠תֶּם אַל־תִּֽירְא֤וּ וְאַל־תֵּחַ֙תּוּ֙ מִפְּנֵ֨י הֶהָמ֤וֹן הָרָב֙ הַזֶּ֔ה כִּ֣י לֹ֥א לָכֶ֛ם הַמִּלְחָמָ֖ה כִּ֥י לֵאלֹהִֽים׃

‎16 ‏מָחָר֙ רְד֣וּ עֲלֵיהֶ֔ם הִנָּ֥ם עֹלִ֖ים בְּמַעֲלֵ֣ה הַצִּ֑יץ וּמְצָאתֶ֤ם אֹתָם֙ בְּס֣וֹף הַנַּ֔חַל פְּנֵ֖י מִדְבַּ֥ר יְרוּאֵֽל׃

‎17 ‏לֹ֥א לָכֶ֖ם לְהִלָּחֵ֣ם בָּזֹ֑את הִתְיַצְּב֣וּ עִמְד֡וּ וּרְא֣וּ אֶת־יְשׁוּעַת֩ יְהוָ֨ה עִמָּכֶ֜ם יְהוּדָ֣ה וִֽירוּשָׁלִַ֗ם אַל־תִּֽירְאוּ֙ וְאַל־תֵּחַ֔תּוּ מָחָר֙ צְא֣וּ לִפְנֵיהֶ֔ם וַיהוָ֖ה עִמָּכֶֽם׃

‎18 ‏וַיִּקֹּ֧ד יְהוֹשָׁפָ֛ט אַפַּ֖יִם אָ֑רְצָה וְכָל־יְהוּדָ֞ה וְיֹשְׁבֵ֣י יְרוּשָׁלִַ֗ם נָֽפְלוּ֙ לִפְנֵ֣י יְהוָ֔ה לְהִֽשְׁתַּחֲוֹ֖ת לַיהוָֽה׃

‎19 ‏וַיָּקֻ֧מוּ הַלְוִיִּ֛ם מִן־בְּנֵ֥י הַקְּהָתִ֖ים וּמִן־בְּנֵ֣י הַקָּרְחִ֑ים לְהַלֵּ֗ל לַיהוָה֙ אֱלֹהֵ֣י יִשְׂרָאֵ֔ל בְּק֥וֹל גָּד֖וֹל לְמָֽעְלָה׃

‎20 ‏וַיַּשְׁכִּ֣ימוּ בַבֹּ֔קֶר וַיֵּצְא֖וּ לְמִדְבַּ֣ר תְּק֑וֹעַ וּבְצֵאתָ֞ם עָמַ֣ד יְהוֹשָׁפָ֗ט וַיֹּ֙אמֶר֙ שְׁמָע֗וּנִי יְהוּדָה֙ וְיֹשְׁבֵ֣י יְרוּשָׁלִַ֔ם הַאֲמִ֜ינוּ בַּיהוָ֤ה אֱלֹהֵיכֶם֙ וְתֵ֣אָמֵ֔נוּ הַאֲמִ֥ינוּ בִנְבִיאָ֖יו וְהַצְלִֽיחוּ׃

‎21 ‏וַיִּוָּעַץ֙ אֶל־הָעָ֔ם וַיַּעֲמֵ֤ד מְשֹֽׁרֲרִים֙ לַיהוָ֔ה וּֽמְהַֽלְלִ֖ים לְהַדְרַת־קֹ֑דֶשׁ בְּצֵאת֙ לִפְנֵ֣י הֶֽחָל֔וּץ וְאֹֽמְרִים֙ הוֹד֣וּ לַיהוָ֔ה כִּ֥י לְעוֹלָ֖ם חַסְדּֽוֹ׃

‎22 ‏וּבְעֵת֩ הֵחֵ֨לּוּ בְרִנָּ֜ה וּתְהִלָּ֗ה נָתַ֣ן יְהוָ֣ה׀ מְ֠אָֽרְבִים עַל־בְּנֵ֨י עַמּ֜וֹן מוֹאָ֧ב וְהַר־שֵׂעִ֛יר הַבָּאִ֥ים לִֽיהוּדָ֖ה וַיִּנָּגֵֽפוּ׃

‎23 ‏וַ֠יַּֽעַמְדוּ בְּנֵ֨י עַמּ֧וֹן וּמוֹאָ֛ב עַל־יֹשְׁבֵ֥י הַר־שֵׂעִ֖יר לְהַחֲרִ֣ים וּלְהַשְׁמִ֑יד וּכְכַלּוֹתָם֙ בְּיוֹשְׁבֵ֣י שֵׂעִ֔יר עָזְר֥וּ אִישׁ־בְּרֵעֵ֖הוּ לְמַשְׁחִֽית׃

‎24 ‏וִֽיהוּדָ֛ה בָּ֥א עַל־הַמִּצְפֶּ֖ה לַמִּדְבָּ֑ר וַיִּפְנוּ֙ אֶל־הֶ֣הָמ֔וֹן וְהִנָּ֧ם פְּגָרִ֛ים נֹפְלִ֥ים אַ֖רְצָה וְאֵ֥ין פְּלֵיטָֽה׃

‎25 ‏וַיָּבֹ֨א יְהוֹשָׁפָ֣ט וְעַמּוֹ֮ לָבֹ֣ז אֶת־שְׁלָלָם֒ וַיִּמְצְאוּ֩ בָהֶ֨ם לָרֹ֜ב וּרְכ֤וּשׁ וּפְגָרִים֙ וּכְלֵ֣י חֲמֻד֔וֹת וַיְנַצְּל֥וּ לָהֶ֖ם לְאֵ֣ין מַשָּׂ֑א וַיִּֽהְי֞וּ יָמִ֧ים שְׁלוֹשָׁ֛ה בֹּזְזִ֥ים אֶת־הַשָּׁלָ֖ל כִּ֥י רַב־הֽוּא׃

‎26 ‏וּבַיּ֣וֹם הָרְבִעִ֗י נִקְהֲלוּ֙ לְעֵ֣מֶק בְּרָכָ֔ה כִּי־שָׁ֖ם בֵּרֲכ֣וּ אֶת־יְהוָ֑ה עַל־כֵּ֡ן קָֽרְא֞וּ אֶת־שֵׁ֨ם הַמָּק֥וֹם הַה֛וּא עֵ֥מֶק בְּרָכָ֖ה עַד־הַיּֽוֹם׃

‎27 ‏וַ֠יָּשֻׁבוּ כָּל־אִ֨ישׁ יְהוּדָ֤ה וִֽירוּשָׁלִַ֙ם֙ וִֽיהוֹשָׁפָ֣ט בְּרֹאשָׁ֔ם לָשׁ֥וּב אֶל־יְרוּשָׁלִַ֖ם בְּשִׂמְחָ֑ה כִּֽי־שִׂמְּחָ֥ם יְהוָ֖ה מֵֽאוֹיְבֵיהֶֽם׃

‎28 ‏וַיָּבֹ֙אוּ֙ יְר֣וּשָׁלִַ֔ם בִּנְבָלִ֥ים וּבְכִנֹּר֖וֹת וּבַחֲצֹצְר֑וֹת אֶל־בֵּ֖ית יְהוָֽה׃

‎29 ‏וַיְהִי֙ פַּ֣חַד אֱלֹהִ֔ים עַ֖ל כָּל־מַמְלְכ֣וֹת הָאֲרָצ֑וֹת בְּשָׁמְעָ֕ם כִּ֚י נִלְחַ֣ם יְהוָ֔ה עִ֖ם אוֹיְבֵ֥י יִשְׂרָאֵֽל׃

‎30 ‏וַתִּשְׁקֹ֖ט מַלְכ֣וּת יְהוֹשָׁפָ֑ט וַיָּ֧נַֽח ל֦וֹ אֱלֹהָ֖יו מִסָּבִֽיב׃ פ

‎31 ‏וַיִּמְלֹ֥ךְ יְהוֹשָׁפָ֖ט עַל־יְהוּדָ֑ה בֶּן־שְׁלֹשִׁים֩ וְחָמֵ֨שׁ שָׁנָ֜ה בְּמָלְכ֗וֹ וְעֶשְׂרִ֨ים וְחָמֵ֤שׁ שָׁנָה֙ מָלַ֣ךְ בִּֽירוּשָׁלִַ֔ם וְשֵׁ֣ם אִמּ֔וֹ עֲזוּבָ֖ה בַּת־שִׁלְחִֽי׃

‎32 ‏וַיֵּ֗לֶךְ בְּדֶ֛רֶךְ אָבִ֥יו אָסָ֖א וְלֹא־סָ֣ר מִמֶּ֑נָּה לַעֲשׂ֥וֹת הַיָּשָׁ֖ר בְּעֵינֵ֥י יְהוָֽה׃

‎33 ‏אַ֥ךְ הַבָּמ֖וֹת לֹא־סָ֑רוּ וְע֤וֹד הָעָם֙ לֹא־הֵכִ֣ינוּ לְבָבָ֔ם לֵאלֹהֵ֖י אֲבֹתֵיהֶֽם׃

‎34 ‏וְיֶ֙תֶר֙ דִּבְרֵ֣י יְהוֹשָׁפָ֔ט הָרִאשֹׁנִ֖ים וְהָאַחֲרֹנִ֑ים הִנָּ֣ם כְּתוּבִ֗ים בְּדִבְרֵי֙ יֵה֣וּא בֶן־חֲנָ֔נִי אֲשֶׁ֣ר הֹֽעֲלָ֔ה עַל־סֵ֖פֶר מַלְכֵ֥י יִשְׂרָאֵֽל׃

‎35 ‏וְאַחֲרֵיכֵ֗ן אֶתְחַבַּר֙ יְהוֹשָׁפָ֣ט מֶֽלֶךְ־יְהוּדָ֔ה עִ֖ם אֲחַזְיָ֣ה מֶֽלֶךְ־יִשְׂרָאֵ֑ל ה֖וּא הִרְשִׁ֥יעַ לַעֲשֽׂוֹת׃

‎36 ‏וַיְחַבְּרֵ֣הוּ עִמּ֔וֹ לַעֲשׂ֥וֹת אֳנִיּ֖וֹת לָלֶ֣כֶת תַּרְשִׁ֑ישׁ וַיַּעֲשׂ֥וּ אֳנִיּ֖וֹת בְּעֶצְי֥וֹן גָּֽבֶר׃

‎37 ‏וַיִּתְנַבֵּ֞א אֱלִיעֶ֤זֶר בֶּן־דֹּדָוָ֙הוּ֙ מִמָּ֣רֵשָׁ֔ה עַל־יְהוֹשָׁפָ֖ט לֵאמֹ֑ר כְּהִֽתְחַבֶּרְךָ֣ עִם־אֲחַזְיָ֗הוּ פָּרַ֤ץ יְהוָה֙ אֶֽת־מַעֲשֶׂ֔יךָ וַיִּשָּׁבְר֣וּ אֳנִיּ֔וֹת וְלֹ֥א עָצְר֖וּ לָלֶ֥כֶת אֶל־תַּרְשִֽׁישׁ׃

1 wayəhî ’^aḥărêḵēn bā’û ḇənê-mwō’āḇ ûḇənê ‘ammwōn wə‘immâem| mēhā‘ammwōnîm ‘al-yəhwōšāfāṭ lammiləḥāmâ:

2 wayyāḇō’û wayyagîḏû lîhwōšāfāṭ lē’mōr bā’ ‘āleyḵā hāmwōn rāḇ mē‘ēḇer layyām mē’ărām wəhinnām bəḥaṣəṣwōn tāmār hî’ ‘ên geḏî:

3 wayyirā’ wayyitēn yəhwōšāfāṭ ’eṯ-pānāyw liḏərwōš layhwâ wayyiqərā’-ṣwōm ‘al-kāl-yəhûḏâ:

4 wayyiqqāḇəṣû yəhûḏâ ləḇaqqēš mêəhwâ gam mikāl-‘ārê yəhûḏâ bā’û ləḇaqqēš ’eṯ-yəhwâ:

5 wayy^a‘ămōḏ yəhwōšāfāṭ biqəhal yəhûḏâ wîrûšālaim bəḇêṯ yəhwâ lifənê heḥāṣēr h^aḥăḏāšâ:

6 wayyō’mar yəhwâ ’ĕlōhê ’ăḇōṯênû hălō’ ’atâ-hû’ ’ĕlōhîm baššāmayim wə’atâ mwōšēl bəḵōl mamələḵwōṯ hagwōyim ûḇəyāḏəḵā kōḥa ûḡəḇûrâ wə’ên ‘imməḵā ləhiṯəyaṣṣēḇ:

7 hălō’| ’atâ ’ĕlōhênû hwōrašətā ’eṯ-yōšəḇê hā’āreṣ hazzō’ṯ millifənê ‘amməḵā yiśərā’ēl watitənāh ləzer^a‘ ’aḇərâām ’ōhaḇəḵā lə‘wōlām:

8 wayyēšəḇû-ḇāh wayyiḇənû ləḵā| bāh miqədāš ləšiməḵā lē’mōr:

9 ’im-tāḇwō’ ‘ālênû rā‘â ḥereḇ šəfwōṭ wəḏeḇer wərā‘āḇ n^a‘aməḏâ lifənê habayiṯ hazzeh ûləfāneyḵā kî šiməḵā babayiṯ hazzeh wənizə‘aq ’ēleyḵā miṣṣārāṯēnû wəṯišəm^a‘ wəṯwōšî‘a:

10 wə‘atâ hinnēh ḇənê-‘ammwōn ûmwō’āḇ wəhar-śē‘îr ’ăšer lō’-nāṯatâ ləyiśərā’ēl lāḇwō’ ḇâem bəḇō’ām mē’ereṣ miṣərāyim kî sārû mē‘ălêhem wəlō’ hišəmîḏûm:

11 wəhinnēh-hēm gōməlîm ‘ālênû lāḇwō’ ləḡārəšēnû mîyəruššāṯəḵā ’ăšer hwōrašətānû:

12 ’ĕlōhênû hălō’ ṯišəpāṭ-bām kî ’ên bānû kōḥa lifənê hehāmwōn hārāḇ hazzeh habā’ ‘ālênû wa’ăn^aḥənû lō’ nēḏ^a‘ mah-nn^a‘ăśeh kî ‘āleyḵā ‘ênênû:

13 wəḵāl-yəhûḏâ ‘ōməḏîm lifənê yəhwâ gam-ṭapām nəšêhem ûḇənêhem: f

14 wəy^aḥăzî’ēl ben-zəḵarəyâû ben-bənāyâ ben-yə‘î’ēl ben-matanəyâ hallēwî min-bənê ’āsāf hāyəṯâ ‘ālāyw rûḥa yəhwâ bəṯwōḵə haqqâāl:

15 wayyō’mer haqəšîḇû ḵāl-yəhûḏâ wəyōšəḇê yərûšālaim wəhammeleḵə yəhwōšāfāṭ kōh-’āmar yəhwâ lāḵem ’atem ’al-tîrə’û wə’al-tēḥatû mipənê hehāmwōn hārāḇ hazzeh kî lō’ lāḵem hammiləḥāmâ kî lē’lōhîm:

16 māḥār rəḏû ‘ălêhem hinnām ‘ōlîm bəm^a‘ălēh haṣṣîṣ ûməṣā’ṯem ’ōṯām bəswōf hann^aḥal pənê miḏəbar yərû’ēl:

17 lō’ lāḵem ləhillāḥēm bāzō’ṯ hiṯəyaṣṣəḇû ‘iməḏû ûrə’û ’eṯ-yəšû‘aṯ yəhwâ ‘immāḵem yəhûḏâ wîrûšālaim ’al-tîrə’û wə’al-tēḥatû māḥār ṣə’û lifənêhem wayhwâ ‘immāḵem:

18 wayyiqqōḏ yəhwōšāfāṭ ’apayim ’ārəṣâ wəḵāl-yəhûḏâ wəyōšəḇê yərûšālaim nāfəlû lifənê yəhwâ ləhišət^aḥăwōṯ layhwâ:

19 wayyāqumû haləwîyim min-bənê haqqəhāṯîm ûmin-bənê haqqārəḥîm ləhallēl layhwâ ’ĕlōhê yiśərā’ēl bəqwōl gāḏwōl ləmā‘əlâ:

20 wayyašəkîmû ḇabōqer wayyēṣə’û ləmiḏəbar təqwō‘a ûḇəṣē’ṯām ‘āmaḏ yəhwōšāfāṭ wayyō’mer šəmā‘ûnî yəhûḏâ wəyōšəḇê yərûšālaim ha’ămînû bayhwâ ’ĕlōhêḵem wəṯē’āmēnû ha’ămînû ḇinəḇî’āyw wəhaṣəlîḥû:

21 wayyiûā‘aṣ ’el-hā‘ām wayy^a‘ămēḏ məšōrărîm layhwâ ûməhaləlîm ləhaḏəraṯ-qōḏeš bəṣē’ṯ lifənê heḥālûṣ wə’ōmərîm hwōḏû layhwâ kî lə‘wōlām ḥasədwō:

22 ûḇə‘ēṯ hēḥēllû ḇərinnâ ûṯəhillâ nāṯan yəhwâ| mə’ārəḇîm ‘al-bənê ‘ammwōn mwō’āḇ wəhar-śē‘îr habā’îm lîhûḏâ wayyinnāḡēfû:

23 wayy^a‘aməḏû bənê ‘ammwōn ûmwō’āḇ ‘al-yōšəḇê har-śē‘îr ləh^aḥărîm ûləhašəmîḏ ûḵəḵallwōṯām bəywōšəḇê śē‘îr ‘āzərû ’îš-bərē‘ēhû ləmašəḥîṯ:

24 wîhûḏâ bā’ ‘al-hammiṣəpeh lammiḏəbār wayyifənû ’el-hehāmwōn wəhinnām pəḡārîm nōfəlîm ’arəṣâ wə’ên pəlêṭâ:

25 wayyāḇō’ yəhwōšāfāṭ wə‘ammwō lāḇōz ’eṯ-šəlālām wayyiməṣə’û ḇâem lārōḇ ûrəḵûš ûfəḡārîm ûḵəlê ḥămuḏwōṯ wayənaṣṣəlû lâem lə’ên maśśā’ wayyihəyû yāmîm šəlwōšâ bōzəzîm ’eṯ-haššālāl kî raḇ-hû’:

26 ûḇayywōm hārəḇi‘î niqəhălû lə‘ēmeq bərāḵâ kî-šām bērăḵû ’eṯ-yəhwâ ‘al-kēn qārə’û ’eṯ-šēm hammāqwōm hahû’ ‘ēmeq bərāḵâ ‘aḏ-hayywōm:

27 wayyāšuḇû kāl-’îš yəhûḏâ wîrûšālaim wîhwōšāfāṭ bərō’šām lāšûḇ ’el-yərûšālaim bəśiməḥâ kî-śimməḥām yəhwâ mē’wōyəḇêhem:

28 wayyāḇō’û yərûšālaim binəḇālîm ûḇəḵinnōrwōṯ ûḇ^aḥăṣōṣərwōṯ ’el-bêṯ yəhwâ:

29 wayəhî p^aḥaḏ ’ĕlōhîm ‘al kāl-mamələḵwōṯ hā’ărāṣwōṯ bəšāmə‘ām kî niləḥam yəhwâ ‘im ’wōyəḇê yiśərā’ēl:

30 watišəqōṭ maləḵûṯ yəhwōšāfāṭ wayyān^aḥ lwō ’ĕlōhāyw missāḇîḇ: f

31 wayyiməlōḵə yəhwōšāfāṭ ‘al-yəhûḏâ ben-šəlōšîm wəḥāmēš šānâ bəmāləḵwō wə‘eśərîm wəḥāmēš šānâ mālaḵə bîrûšālaim wəšēm ’immwō ‘ăzûḇâ baṯ-šiləḥî:

32 wayyēleḵə bəḏereḵə ’āḇîw ’āsā’ wəlō’-sār mimmennâ l^a‘ăśwōṯ hayyāšār bə‘ênê yəhwâ:

33 ’aḵə habāmwōṯ lō’-sārû wə‘wōḏ hā‘ām lō’-hēḵînû ləḇāḇām lē’lōhê ’ăḇōṯêhem:

34 wəyeṯer diḇərê yəhwōšāfāṭ hāri’šōnîm wəhā’^aḥărōnîm hinnām kəṯûḇîm bəḏiḇərê yēhû’ ḇen-ḥănānî ’ăšer hō‘ălâ ‘al-sēfer maləḵê yiśərā’ēl:

35 wə’^aḥărêḵēn ’eṯəḥabar yəhwōšāfāṭ meleḵə-yəhûḏâ ‘im ’ăḥazəyâ meleḵə-yiśərā’ēl hû’ hirəšî‘a l^a‘ăśwōṯ:

36 wayəḥabərēhû ‘immwō l^a‘ăśwōṯ ’ŏnîywōṯ lāleḵeṯ tarəšîš wayy^a‘ăśû ’ŏnîywōṯ bə‘eṣəywōn gāḇer:

37 wayyiṯənabē’ ’ĕlî‘ezer ben-dōḏāwâû mimmārēšâ ‘al-yəhwōšāfāṭ lē’mōr kəhiṯəḥaberəḵā ‘im-’ăḥazəyâû pāraṣ yəhwâ ’eṯ-m^a‘ăśeyḵā wayyiššāḇərû ’ŏnîywōṯ wəlō’ ‘āṣərû lāleḵeṯ ’el-tarəšîš: