A Prayer

Verse Indeterminate Saxon

æla, drihten leof!      æla, dema god!
Geara me,      ece waldend.
Ic wat mine saule      synnum forwundod;
gehæl þu hy,      heofena drihten,

5

and gelacna þu hy,      lifes ealdor,
forþan ðu eðest miht      ealra læca
ðæra þe gewurde      side oððe wyde.
æla, frea beorhta,      folkes scippend!
Gemilsa þyn mod      me to gode,

10

sile þyne are      þynum earminge.
Se byð earming      þe on eorðan her
dæiges and nihtes      deofle campað
and hys willan wyrcð;      wa him þære mirigðe,
þonne he ða handlean      hafað and sceawað,

15

bute he þæs yfeles      ær geswyce.
Se byð eadig,      se þe on eorðan her
dæiges and nyhtes      drihtne hyræð
and a hys willan wyrcð;      wel hym þæs geweorkes,
ðonne he ða handlean      hafað and sceawað,

20

gyf he ealteawne      ende gedreogeð.
æla, leohtes leoht!      æla, lyfes wynn!
Getiþa me,      tireadig kyning,
þonne ic minre sawle      swegles bydde,
ece are.      þu eart eaðe, god,

25

hæfst and waldest     
ana ofer ealle      eorðan and heofonas
syddra gesceafta.      ðu eart soð meotod,
ana ofer ealle      eorðbugende,
swilce on heofonum up      þu eart hælend god.

30

Ne mæg þe aherian      hæleða ænig;
þeh us gesomnie      geond sidne grund,
men ofer moldan,      geond ealne middaneard,
ne mage we næfre asæcgan,      ne þæt soðe witan,
hu þu æðele eart,      ece drihten.

35

Ne þeah engla werod      up on heofenum
snotra tosomne      sæcgan ongunnon,
ne magon hy næfre areccean,      ne þæt gerim wytan,
hu þu mære eart,      mihtig drihten.
Ac is wunder mycel,      wealdend engla,

40

gif þu hit sylfa wast,      sigores ealdor,
hu þu mære eart,      mihtig and mægenstrang,
ealra kyninga kyning,      Crist lifiende,
ealra worulda scippend,      wealdend engla,
ealra dugeþa duguð,      drihten hælend.

45

ðu eart se æðela      þe on ærdagum
ealra femnena wyn      fægere akende
on Bethleem ðære byrig      beornum to frofre,
eallum to are      ylda bearnum,
þam þe gelyfað      on lyfiendne god

50

and on þæt ece leoht      uppe on roderum.
ðyn mægen ys swa mære,      mihtig drihten,
swa þæt ænig ne wat      eorðbuende
þa deopnesse      drihtnes mihta,
ne þæt ænig ne wat      engla hades

55

þa heahnisse      heofena kyninges.
Ic þe andette,      ælmihtig god,
þæt ic gelyfe on þe,      leofa hælend,
þæt þu eart se miccla      and se mægenstranga
and se eadmoda      ealra goda

60

and se ece kyning      ealra gesceafta,
and ic eom se litla for þe      and se lyðra man,
se her syngige      swiðe genehhe,
dæges and nihtes      do, swa ic ne sceolde,
hwile mid weorce,      hwile mid worde,

65

hwile mid geþohte,      þearle scyldi,
inwitniðas      oft and gelome.
Ac ic þe halsige nu,      heofena drihten,
and gebidde me to þe,      bearna selost,
þæt ðu gemilsige me,      mihtig drihten,

70

heofena heahkyning      and se halga gast,
and gefylste me,      fæder ælmihtig,
þæt ic þinne willan      gewyrcean mæge,
ær ic of þysum lænan      lyfe gehweorfe.
Ne forweorn þu me,      wuldres drihten,

75

ac getyþa me,      tyreadig kyning,
læt me mid englum      up siðian,
sittan on swegle,     
herian heofonas god      haligum reorde
a butan ende.      Amen.