Song of Solomon (Shir Hashirim): Song of Solomon (Shir Hashirim) Chapter 8

Tanach (Hebrew): Song of Solomon (Shir Hashirim) Chapter 8

‎1 ‏מִ֤י יִתֶּנְךָ֙ כְּאָ֣ח לִ֔י יוֹנֵ֖ק שְׁדֵ֣י אִמִּ֑י אֶֽמְצָאֲךָ֤ בַחוּץ֙ אֶשָּׁ֣קְךָ֔ גַּ֖ם לֹא־יָב֥וּזוּ לִֽי׃ ‎2 ‏אֶנְהָֽגֲךָ֗ אֲבִֽיאֲךָ֛ אֶל־בֵּ֥ית אִמִּ֖י תְּלַמְּדֵ֑נִי אַשְׁקְךָ֙ מִיַּ֣יִן הָרֶ֔קַח מֵעֲסִ֖יס רִמֹּנִֽי׃ ‎3 ‏שְׂמֹאלוֹ֙ תַּ֣חַת רֹאשִׁ֔י וִֽימִינ֖וֹ תְּחַבְּקֵֽנִי׃ ‎4 ‏הִשְׁבַּ֥עְתִּי אֶתְכֶ֖ם בְּנ֣וֹת יְרוּשָׁלִָ֑ם מַה־תָּעִ֧ירוּ׀ וּֽמַה־תְּעֹֽרְר֛וּ אֶת־הָאַהֲבָ֖ה עַ֥ד שֶׁתֶּחְפָּֽץ׃ ס ‎5 ‏מִ֣י זֹ֗את עֹלָה֙ מִן־הַמִּדְבָּ֔ר מִתְרַפֶּ֖קֶת עַל־דּוֹדָ֑הּ תַּ֤חַת הַתַּפּ֙וּחַ֙ עֽוֹרַרְתִּ֔יךָ שָׁ֚מָּה חִבְּלַ֣תְךָ אִמֶּ֔ךָ שָׁ֖מָּה חִבְּלָ֥ה יְלָדַֽתְךָ׃ ‎6 ‏שִׂימֵ֨נִי כַֽחוֹתָ֜ם עַל־לִבֶּ֗ךָ כַּֽחוֹתָם֙ עַל־זְרוֹעֶ֔ךָ כִּֽי־עַזָּ֤ה כַמָּ֙וֶת֙ אַהֲבָ֔ה קָשָׁ֥ה כִשְׁא֖וֹל קִנְאָ֑ה רְשָׁפֶ֕יהָ רִשְׁפֵּ֕י אֵ֖שׁ שַׁלְהֶ֥בֶתְיָֽה׃ ‎7 ‏מַ֣יִם רַבִּ֗ים לֹ֤א יֽוּכְלוּ֙ לְכַבּ֣וֹת אֶת־הָֽאַהֲבָ֔ה וּנְהָר֖וֹת לֹ֣א יִשְׁטְפ֑וּהָ אִם־יִתֵּ֨ן אִ֜ישׁ אֶת־כָּל־ה֤וֹן בֵּיתוֹ֙ בָּאַהֲבָ֔ה בּ֖וֹז יָב֥וּזוּ לֽוֹ׃ ס ‎8 ‏אָח֥וֹת לָ֙נוּ֙ קְטַנָּ֔ה וְשָׁדַ֖יִם אֵ֣ין לָ֑הּ מַֽה־נַּעֲשֶׂה֙ לַאֲחֹתֵ֔נוּ בַּיּ֖וֹם שֶׁיְּדֻבַּר־בָּֽהּ׃ ‎9 ‏אִם־חוֹמָ֣ה הִ֔יא נִבְנֶ֥ה עָלֶ֖יהָ טִ֣ירַת כָּ֑סֶף וְאִם־דֶּ֣לֶת הִ֔יא נָצ֥וּר עָלֶ֖יהָ ל֥וּחַ אָֽרֶז׃ ‎10 ‏אֲנִ֣י חוֹמָ֔ה וְשָׁדַ֖י כַּמִּגְדָּל֑וֹת אָ֛ז הָיִ֥יתִי בְעֵינָ֖יו כְּמוֹצְאֵ֥ת שָׁלֽוֹם׃ פ ‎11 ‏כֶּ֣רֶם הָיָ֤ה לִשְׁלֹמֹה֙ בְּבַ֣עַל הָמ֔וֹן נָתַ֥ן אֶת־הַכֶּ֖רֶם לַנֹּטְרִ֑ים אִ֛ישׁ יָבִ֥א בְּפִרְי֖וֹ אֶ֥לֶף כָּֽסֶף׃ ‎12 ‏כַּרְמִ֥י שֶׁלִּ֖י לְפָנָ֑י הָאֶ֤לֶף לְךָ֙ שְׁלֹמֹ֔ה וּמָאתַ֖יִם לְנֹטְרִ֥ים אֶת־פִּרְיֽוֹ׃ ‎13 ‏הַיּוֹשֶׁ֣בֶת בַּגַּנִּ֗ים חֲבֵרִ֛ים מַקְשִׁיבִ֥ים לְקוֹלֵ֖ךְ הַשְׁמִיעִֽינִי׃ ‎14 ‏בְּרַ֣ח׀ דּוֹדִ֗י וּֽדְמֵה־לְךָ֤ לִצְבִי֙ א֚וֹ לְעֹ֣פֶר הָֽאַיָּלִ֔ים עַ֖ל הָרֵ֥י בְשָׂמִֽים׃

1 mî yitenəḵā kə’āḥ lî ywōnēq šəḏê ’immî ’eməṣā’ăḵā ḇaḥûṣ ’eššāqəḵā gam lō’-yāḇûzû lî: 2 ’enəhāḡăḵā ’ăḇî’ăḵā ’el-bêṯ ’immî təlamməḏēnî ’ašəqəḵā mîyayin hāreqaḥ mē‘ăsîs rimmōnî: 3 śəmō’lwō taḥaṯ rō’šî wîmînwō təḥabəqēnî: 4 hišəba‘ətî ’eṯəḵem bənwōṯ yərûšālāim mah-tā‘îrû| ûmah-tə‘ōrərû ’eṯ-hā’ahăḇâ ‘aḏ šeteḥəpāṣ: s 5 mî zō’ṯ ‘ōlâ min-hammiḏəbār miṯərapeqeṯ ‘al-dwōḏāh taḥaṯ hatapûḥa ‘wōrarətîḵā šāmmâ ḥibəlaṯəḵā ’immeḵā šāmmâ ḥibəlâ yəlāḏaṯəḵā: 6 śîmēnî ḵaḥwōṯām ‘al-libeḵā kaḥwōṯām ‘al-zərwō‘eḵā kî-‘azzâ ḵammāweṯ ’ahăḇâ qāšâ ḵišə’wōl qinə’â rəšāfeyhā rišəpê ’ēš šaləheḇeṯəyâ: 7 mayim rabîm lō’ yûḵəlû ləḵabwōṯ ’eṯ-hā’ahăḇâ ûnəhārwōṯ lō’ yišəṭəfûhā ’im-yitēn ’îš ’eṯ-kāl-hwōn bêṯwō bā’ahăḇâ bwōz yāḇûzû lwō: s 8 ’āḥwōṯ lānû qəṭannâ wəšāḏayim ’ên lāh mah-nna‘ăśeh la’ăḥōṯēnû bayywōm šeyyəḏubar-bāh: 9 ’im-ḥwōmâ hî’ niḇəneh ‘āleyhā ṭîraṯ kāsef wə’im-deleṯ hî’ nāṣûr ‘āleyhā lûḥa ’ārez: 10 ’ănî ḥwōmâ wəšāḏay kammiḡədālwōṯ ’āz hāyîṯî ḇə‘ênāyw kəmwōṣə’ēṯ šālwōm: f 11 kerem hāyâ lišəlōmōh bəḇa‘al hāmwōn nāṯan ’eṯ-hakerem lannōṭərîm ’îš yāḇi’ bəfirəywō ’elef kāsef: 12 karəmî šellî ləfānāy hā’elef ləḵā šəlōmōh ûmā’ṯayim lənōṭərîm ’eṯ-pirəywō: 13 hayywōšeḇeṯ bagannîm ḥăḇērîm maqəšîḇîm ləqwōlēḵə hašəmî‘înî: 14 bəraḥ| dwōḏî ûḏəmēh-ləḵā liṣəḇî ’wō lə‘ōfer hā’ayyālîm ‘al hārê ḇəśāmîm: