Song of Solomon (Shir Hashirim): Song of Solomon (Shir Hashirim) Chapter 1

Tanach (Hebrew): Song of Solomon (Shir Hashirim) Chapter 1

‎1 ‏שִׁ֥יר הַשִּׁירִ֖ים אֲשֶׁ֥ר לִשְׁלֹמֹֽה׃ ‎2 ‏יִשָּׁקֵ֙נִי֙ מִנְּשִׁיק֣וֹת פִּ֔יהוּ כִּֽי־טוֹבִ֥ים דֹּדֶ֖יךָ מִיָּֽיִן׃ ‎3 ‏לְרֵ֙יחַ֙ שְׁמָנֶ֣יךָ טוֹבִ֔ים שֶׁ֖מֶן תּוּרַ֣ק שְׁמֶ֑ךָ עַל־כֵּ֖ן עֲלָמ֥וֹת אֲהֵבֽוּךָ׃ ‎4 ‏מָשְׁכֵ֖נִי אַחֲרֶ֣יךָ נָּר֑וּצָה הֱבִיאַ֨נִי הַמֶּ֜לֶךְ חֲדָרָ֗יו נָגִ֤ילָה וְנִשְׂמְחָה֙ בָּ֔ךְ נַזְכִּ֤ירָה דֹדֶ֙יךָ֙ מִיַּ֔יִן מֵישָׁרִ֖ים אֲהֵבֽוּךָ׃ ס ‎5 ‏שְׁחוֹרָ֤ה אֲנִי֙ וְֽנָאוָ֔ה בְּנ֖וֹת יְרוּשָׁלִָ֑ם כְּאָהֳלֵ֣י קֵדָ֔ר כִּירִיע֖וֹת שְׁלֹמֹֽה׃ ‎6 ‏אַל־תִּרְא֙וּנִי֙ שֶׁאֲנִ֣י שְׁחַרְחֹ֔רֶת שֶׁשֱּׁזָפַ֖תְנִי הַשָּׁ֑מֶשׁ בְּנֵ֧י אִמִּ֣י נִֽחֲרוּ־בִ֗י שָׂמֻ֙נִי֙ נֹטֵרָ֣ה אֶת־הַכְּרָמִ֔ים כַּרְמִ֥י שֶׁלִּ֖י לֹ֥א נָטָֽרְתִּי׃ ‎7 ‏הַגִּ֣ידָה לִּ֗י שֶׁ֤אָהֲבָה֙ נַפְשִׁ֔י אֵיכָ֣ה תִרְעֶ֔ה אֵיכָ֖ה תַּרְבִּ֣יץ בַּֽצָּהֳרָ֑יִם שַׁלָּמָ֤ה אֶֽהְיֶה֙ כְּעֹ֣טְיָ֔ה עַ֖ל עֶדְרֵ֥י חֲבֵרֶֽיךָ׃ ‎8 ‏אִם־לֹ֤א תֵדְעִי֙ לָ֔ךְ הַיָּפָ֖ה בַּנָּשִׁ֑ים צְֽאִי־לָ֞ךְ בְּעִקְבֵ֣י הַצֹּ֗אן וּרְעִי֙ אֶת־גְּדִיֹּתַ֔יִךְ עַ֖ל מִשְׁכְּנ֥וֹת הָרֹעִֽים׃ ס ‎9 ‏לְסֻסָתִי֙ בְּרִכְבֵ֣י פַרְעֹ֔ה דִּמִּיתִ֖יךְ רַעְיָתִֽי׃ ‎10 ‏נָאו֤וּ לְחָיַ֙יִךְ֙ בַּתֹּרִ֔ים צַוָּארֵ֖ךְ בַּחֲרוּזִֽים׃ ‎11 ‏תּוֹרֵ֤י זָהָב֙ נַעֲשֶׂה־לָּ֔ךְ עִ֖ם נְקֻדּ֥וֹת הַכָּֽסֶף׃ ‎12 ‏עַד־שֶׁ֤הַמֶּ֙לֶךְ֙ בִּמְסִבּ֔וֹ נִרְדִּ֖י נָתַ֥ן רֵיחֽוֹ׃ ‎13 ‏צְר֨וֹר הַמֹּ֤ר׀ דּוֹדִי֙ לִ֔י בֵּ֥ין שָׁדַ֖י יָלִֽין׃ ‎14 ‏אֶשְׁכֹּ֨ל הַכֹּ֤פֶר׀ דּוֹדִי֙ לִ֔י בְּכַרְמֵ֖י עֵ֥ין גֶּֽדִי׃ ס ‎15 ‏הִנָּ֤ךְ יָפָה֙ רַעְיָתִ֔י הִנָּ֥ךְ יָפָ֖ה עֵינַ֥יִךְ יוֹנִֽים׃ ‎16 ‏הִנְּךָ֙ יָפֶ֤ה דוֹדִי֙ אַ֣ף נָעִ֔ים אַף־עַרְשֵׂ֖נוּ רַעֲנָנָֽה׃ ‎17 ‏קֹר֤וֹת בָּתֵּ֙ינוּ֙ אֲרָזִ֔ים רחיטנו רַהִיטֵ֖נוּ בְּרוֹתִֽים׃

1 šîr haššîrîm ’ăšer lišəlōmōh: 2 yiššāqēnî minnəšîqwōṯ pîhû kî-ṭwōḇîm dōḏeyḵā mîyāyin: 3 lərêḥa šəmāneyḵā ṭwōḇîm šemen tûraq šəmeḵā ‘al-kēn ‘ălāmwōṯ ’ăhēḇûḵā: 4 māšəḵēnî ’aḥăreyḵā nnārûṣâ hĕḇî’anî hammeleḵə ḥăḏārāyw nāḡîlâ wəniśəməḥâ bāḵə nazəkîrâ ḏōḏeyḵā mîyayin mêšārîm ’ăhēḇûḵā: s 5 šəḥwōrâ ’ănî wənā’wâ bənwōṯ yərûšālāim kə’âŏlê qēḏār kîrî‘wōṯ šəlōmōh: 6 ’al-tirə’ûnî še’ănî šəḥarəḥōreṯ šeššĕzāfaṯənî haššāmeš bənê ’immî niḥărû-ḇî śāmunî nōṭērâ ’eṯ-hakərāmîm karəmî šellî lō’ nāṭārətî: 7 hagîḏâ llî še’âăḇâ nafəšî ’êḵâ ṯirə‘eh ’êḵâ tarəbîṣ baṣṣâŏrāyim šallāmâ ’ehəyeh kə‘ōṭəyâ ‘al ‘eḏərê ḥăḇēreyḵā: 8 ’im-lō’ ṯēḏə‘î lāḵə hayyāfâ bannāšîm ṣə’î-lāḵə bə‘iqəḇê haṣṣō’n ûrə‘î ’eṯ-gəḏîyōṯayiḵə ‘al mišəkənwōṯ hārō‘îm: s 9 ləsusāṯî bəriḵəḇê farə‘ōh dimmîṯîḵə ra‘əyāṯî: 10 nā’wû ləḥāyayiḵə batōrîm ṣaûā’rēḵə baḥărûzîm: 11 twōrê zâāḇ na‘ăśeh-llāḵə ‘im nəqudwōṯ hakāsef: 12 ‘aḏ-šehammeleḵə biməsibwō nirədî nāṯan rêḥwō: 13 ṣərwōr hammōr| dwōḏî lî bên šāḏay yālîn: 14 ’ešəkōl hakōfer| dwōḏî lî bəḵarəmê ‘ên geḏî: s 15 hinnāḵə yāfâ ra‘əyāṯî hinnāḵə yāfâ ‘ênayiḵə ywōnîm: 16 hinnəḵā yāfeh ḏwōḏî ’af nā‘îm ’af-‘arəśēnû ra‘ănānâ: 17 qōrwōṯ bātênû ’ărāzîm raḥîṭēnû rahîṭēnû bərwōṯîm: