Psalms (Tehilim): Psalms (Tehilim) Chapter 96

Tanach (Hebrew): Psalms (Tehilim) Chapter 96

‎1 ‏שִׁ֣ירוּ לַ֭יהוָה שִׁ֣יר חָדָ֑שׁ שִׁ֥ירוּ לַ֝יהוָ֗ה כָּל־הָאָֽרֶץ׃ ‎2 ‏שִׁ֣ירוּ לַ֭יהוָה בָּרֲכ֣וּ שְׁמ֑וֹ בַּשְּׂר֥וּ מִיּֽוֹם־לְ֝י֗וֹם יְשׁוּעָתֽוֹ׃ ‎3 ‏סַפְּר֣וּ בַגּוֹיִ֣ם כְּבוֹד֑וֹ בְּכָל־הָֽ֝עַמִּ֗ים נִפְלְאוֹתָֽיו׃ ‎4 ‏כִּ֥י גָ֘ד֤וֹל יְהוָ֣ה וּמְהֻלָּ֣ל מְאֹ֑ד נוֹרָ֥א ה֝֗וּא עַל־כָּל־אֱלֹהִֽים׃ ‎5 ‏כִּ֤י׀ כָּל־אֱלֹהֵ֣י הָעַמִּ֣ים אֱלִילִ֑ים וַֽ֝יהוָ֗ה שָׁמַ֥יִם עָשָֽׂה׃ ‎6 ‏הוֹד־וְהָדָ֥ר לְפָנָ֑יו עֹ֥ז וְ֝תִפְאֶ֗רֶת בְּמִקְדָּשֽׁוֹ׃ ‎7 ‏הָב֣וּ לַ֭יהוָה מִשְׁפְּח֣וֹת עַמִּ֑ים הָב֥וּ לַ֝יהוָ֗ה כָּב֥וֹד וָעֹֽז׃ ‎8 ‏הָב֣וּ לַ֭יהוָה כְּב֣וֹד שְׁמ֑וֹ שְׂאֽוּ־מִ֝נְחָ֗ה וּבֹ֥אוּ לְחַצְרוֹתָֽיו׃ ‎9 ‏הִשְׁתַּחֲו֣וּ לַ֭יהוָה בְּהַדְרַת־קֹ֑דֶשׁ חִ֥ילוּ מִ֝פָּנָ֗יו כָּל־הָאָֽרֶץ׃ ‎10 ‏אִמְר֤וּ בַגּוֹיִ֨ם׀ יְה֘וָ֤ה מָלָ֗ךְ אַף־תִּכּ֣וֹן תֵּ֭בֵל בַּל־תִּמּ֑וֹט יָדִ֥ין עַ֝מִּ֗ים בְּמֵישָׁרִֽים׃ ‎11 ‏יִשְׂמְח֣וּ הַ֭שָּׁמַיִם וְתָגֵ֣ל הָאָ֑רֶץ יִֽרְעַ֥ם הַ֝יָּ֗ם וּמְלֹאֽוֹ׃ ‎12 ‏יַעֲלֹ֣ז שָׂ֭דַי וְכָל־אֲשֶׁר־בּ֑וֹ אָ֥ז יְ֝רַנְּנ֗וּ כָּל־עֲצֵי־יָֽעַר׃ ‎13 ‏לִפְנֵ֤י יְהוָ֨ה׀ כִּ֬י בָ֗א כִּ֥י בָא֮ לִשְׁפֹּ֪ט הָ֫אָ֥רֶץ יִשְׁפֹּֽט־תֵּבֵ֥ל בְּצֶ֑דֶק וְ֝עַמִּ֗ים בֶּאֱמוּנָתֽוֹ׃

1 šîrû layhwâ šîr ḥāḏāš šîrû layhwâ kāl-hā’āreṣ: 2 šîrû layhwâ bārăḵû šəmwō baśśərû mîywōm-ləywōm yəšû‘āṯwō: 3 sapərû ḇagwōyim kəḇwōḏwō bəḵāl-hā‘ammîm nifələ’wōṯāyw: 4 kî ḡāḏwōl yəhwâ ûməhullāl mə’ōḏ nwōrā’ hû’ ‘al-kāl-’ĕlōhîm: 5 kî| kāl-’ĕlōhê hā‘ammîm ’ĕlîlîm wayhwâ šāmayim ‘āśâ: 6 hwōḏ-wəhāḏār ləfānāyw ‘ōz wəṯifə’ereṯ bəmiqədāšwō: 7 hāḇû layhwâ mišəpəḥwōṯ ‘ammîm hāḇû layhwâ kāḇwōḏ wā‘ōz: 8 hāḇû layhwâ kəḇwōḏ šəmwō śə’û-minəḥâ ûḇō’û ləḥaṣərwōṯāyw: 9 hišətaḥăwû layhwâ bəhaḏəraṯ-qōḏeš ḥîlû mipānāyw kāl-hā’āreṣ: 10 ’imərû ḇagwōyim| yəhwâ mālāḵə ’af-tikwōn tēḇēl bal-timmwōṭ yāḏîn ‘ammîm bəmêšārîm: 11 yiśəməḥû haššāmayim wəṯāḡēl hā’āreṣ yirə‘am hayyām ûməlō’wō: 12 ya‘ălōz śāḏay wəḵāl-’ăšer-bwō ’āz yərannənû kāl-‘ăṣê-yā‘ar: 13 lifənê yəhwâ| kî ḇā’ kî ḇā’ lišəpōṭ hā’āreṣ yišəpōṭ-tēḇēl bəṣeḏeq wə‘ammîm be’ĕmûnāṯwō: