Psalms (Tehilim): Psalms (Tehilim) Chapter 9

Tanach (Hebrew): Psalms (Tehilim) Chapter 9

‎1 ‏לַ֭מְנַצֵּחַ עַלְמ֥וּת לַבֵּ֗ן מִזְמ֥וֹר לְדָוִֽד׃ ‎2 ‏אוֹדֶ֣ה יְ֭הוָה בְּכָל־לִבִּ֑י אֲ֝סַפְּרָ֗ה כָּל־נִפְלְאוֹתֶֽיךָ׃ ‎3 ‏אֶשְׂמְחָ֣ה וְאֶעֶלְצָ֣ה בָ֑ךְ אֲזַמְּרָ֖ה שִׁמְךָ֣ עֶלְיֽוֹן׃ ‎4 ‏בְּשׁוּב־אוֹיְבַ֥י אָח֑וֹר יִכָּשְׁל֥וּ וְ֝יֹאבְד֗וּ מִפָּנֶֽיךָ׃ ‎5 ‏כִּֽי־עָ֭שִׂיתָ מִשְׁפָּטִ֣י וְדִינִ֑י יָשַׁ֥בְתָּ לְ֝כִסֵּ֗א שׁוֹפֵ֥ט צֶֽדֶק׃ ‎6 ‏גָּעַ֣רְתָּ ג֭וֹיִם אִבַּ֣דְתָּ רָשָׁ֑ע שְׁמָ֥ם מָ֝חִ֗יתָ לְעוֹלָ֥ם וָעֶֽד׃ ‎7 ‏הָֽאוֹיֵ֨ב׀ תַּ֥מּוּ חֳרָב֗וֹת לָ֫נֶ֥צַח וְעָרִ֥ים נָתַ֑שְׁתָּ אָבַ֖ד זִכְרָ֣ם הֵֽמָּה׃ ‎8 ‏וַֽ֭יהוָה לְעוֹלָ֣ם יֵשֵׁ֑ב כּוֹנֵ֖ן לַמִּשְׁפָּ֣ט כִּסְאֽוֹ׃ ‎9 ‏וְה֗וּא יִשְׁפֹּֽט־תֵּבֵ֥ל בְּצֶ֑דֶק יָדִ֥ין לְ֝אֻמִּ֗ים בְּמֵישָׁרִֽים׃ ‎10 ‏וִ֘יהִ֤י יְהוָ֣ה מִשְׂגָּ֣ב לַדָּ֑ךְ מִ֝שְׂגָּ֗ב לְעִתּ֥וֹת בַּצָּרָֽה׃ ‎11 ‏וְיִבְטְח֣וּ בְ֭ךָ יוֹדְעֵ֣י שְׁמֶ֑ךָ כִּ֤י לֹֽא־עָזַ֖בְתָּ דֹרְשֶׁ֣יךָ יְהוָֽה׃ ‎12 ‏זַמְּר֗וּ לַ֭יהוָה יֹשֵׁ֣ב צִיּ֑וֹן הַגִּ֥ידוּ בָ֝עַמִּ֗ים עֲלִֽילוֹתָֽיו׃ ‎13 ‏כִּֽי־דֹרֵ֣שׁ דָּ֭מִים אוֹתָ֣ם זָכָ֑ר לֹֽא־שָׁ֝כַ֗ח צַעֲקַ֥ת עניים עֲנָוִֽים׃ ‎14 ‏חָֽנְנֵ֬נִי יְהוָ֗ה רְאֵ֣ה עָ֭נְיִי מִשֹּׂנְאָ֑י מְ֝רוֹמְמִ֗י מִשַּׁ֥עֲרֵי מָֽוֶת׃ ‎15 ‏לְמַ֥עַן אֲסַפְּרָ֗ה כָּֽל־תְּהִלָּ֫תֶ֥יךָ בְּשַֽׁעֲרֵ֥י בַת־צִיּ֑וֹן אָ֝גִ֗ילָה בִּישׁוּעָתֶֽךָ׃ ‎16 ‏טָבְע֣וּ ג֭וֹיִם בְּשַׁ֣חַת עָשׂ֑וּ בְּרֶֽשֶׁת־ז֥וּ טָ֝מָ֗נוּ נִלְכְּדָ֥ה רַגְלָֽם׃ ‎17 ‏נ֤וֹדַ֨ע׀ יְהוָה֮ מִשְׁפָּ֪ט עָ֫שָׂ֥ה בְּפֹ֣עַל כַּ֭פָּיו נוֹקֵ֣שׁ רָשָׁ֑ע הִגָּי֥וֹן סֶֽלָה׃ ‎18 ‏יָשׁ֣וּבוּ רְשָׁעִ֣ים לִשְׁא֑וֹלָה כָּל־גּ֝וֹיִ֗ם שְׁכֵחֵ֥י אֱלֹהִֽים׃ ‎19 ‏כִּ֤י לֹ֣א לָ֭נֶצַח יִשָּׁכַ֣ח אֶבְי֑וֹן תִּקְוַ֥ת ענוים עֲ֝נִיִּ֗ים תֹּאבַ֥ד לָעַֽד׃ ‎20 ‏קוּמָ֣ה יְ֭הוָה אַל־יָעֹ֣ז אֱנ֑וֹשׁ יִשָּׁפְט֥וּ ג֝וֹיִ֗ם עַל־פָּנֶֽיךָ׃ ‎21 ‏שִׁ֘יתָ֤ה יְהוָ֨ה׀ מוֹרָ֗ה לָ֫הֶ֥ם יֵדְע֥וּ גוֹיִ֑ם אֱנ֖וֹשׁ הֵ֣מָּה סֶּֽלָה׃

1 lamənaṣṣēḥa ‘aləmûṯ labēn mizəmwōr ləḏāwiḏ: 2 ’wōḏeh yəhwâ bəḵāl-libî ’ăsapərâ kāl-nifələ’wōṯeyḵā: 3 ’eśəməḥâ wə’e‘eləṣâ ḇāḵə ’ăzammərâ šiməḵā ‘eləywōn: 4 bəšûḇ-’wōyəḇay ’āḥwōr yikāšəlû wəyō’ḇəḏû mipāneyḵā: 5 kî-‘āśîṯā mišəpāṭî wəḏînî yāšaḇətā ləḵissē’ šwōfēṭ ṣeḏeq: 6 gā‘arətā ḡwōyim ’ibaḏətā rāšā‘ šəmām māḥîṯā lə‘wōlām wā‘eḏ: 7 hā’wōyēḇ| tammû ḥŏrāḇwōṯ lāneṣaḥ wə‘ārîm nāṯašətā ’āḇaḏ ziḵərām hēmmâ: 8 wayhwâ lə‘wōlām yēšēḇ kwōnēn lammišəpāṭ kisə’wō: 9 wəhû’ yišəpōṭ-tēḇēl bəṣeḏeq yāḏîn lə’ummîm bəmêšārîm: 10 wîhî yəhwâ miśəgāḇ ladāḵə miśəgāḇ lə‘itwōṯ baṣṣārâ: 11 wəyiḇəṭəḥû ḇəḵā ywōḏə‘ê šəmeḵā kî lō’-‘āzaḇətā ḏōrəšeyḵā yəhwâ: 12 zammərû layhwâ yōšēḇ ṣîywōn hagîḏû ḇā‘ammîm ‘ălîlwōṯāyw: 13 kî-ḏōrēš dāmîm ’wōṯām zāḵār lō’-šāḵaḥ ṣa‘ăqaṯ ‘ănîyîm ‘ănāwîm: 14 ḥānənēnî yəhwâ rə’ēh ‘ānəyî miśśōnə’āy mərwōməmî mišša‘ărê māweṯ: 15 ləma‘an ’ăsapərâ kāl-təhillāṯeyḵā bəša‘ărê ḇaṯ-ṣîywōn ’āḡîlâ bîšû‘āṯeḵā: 16 ṭāḇə‘û ḡwōyim bəšaḥaṯ ‘āśû bərešeṯ-zû ṭāmānû niləkəḏâ raḡəlām: 17 nwōḏa‘| yəhwâ mišəpāṭ ‘āśâ bəfō‘al kapāyw nwōqēš rāšā‘ higāywōn selâ: 18 yāšûḇû rəšā‘îm lišə’wōlâ kāl-gwōyim šəḵēḥê ’ĕlōhîm: 19 kî lō’ lāneṣaḥ yiššāḵaḥ ’eḇəywōn tiqəwaṯ ‘ănāwîm ‘ănîyîm tō’ḇaḏ lā‘aḏ: 20 qûmâ yəhwâ ’al-yā‘ōz ’ĕnwōš yiššāfəṭû ḡwōyim ‘al-pāneyḵā: 21 šîṯâ yəhwâ| mwōrâ lâem yēḏə‘û ḡwōyim ’ĕnwōš hēmmâ sselâ: