Psalms (Tehilim): Psalms (Tehilim) Chapter 86

Tanach (Hebrew): Psalms (Tehilim) Chapter 86

‎1 ‏תְּפִלָּ֗ה לְדָ֫וִ֥ד הַטֵּֽה־יְהוָ֣ה אָזְנְךָ֣ עֲנֵ֑נִי כִּֽי־עָנִ֖י וְאֶבְי֣וֹן אָֽנִי׃ ‎2 ‏שָֽׁמְרָ֣ה נַפְשִׁי֮ כִּֽי־חָסִ֪יד אָ֥נִי הוֹשַׁ֣ע עַ֭בְדְּךָ אַתָּ֣ה אֱלֹהַ֑י הַבּוֹטֵ֥חַ אֵלֶֽיךָ׃ ‎3 ‏חָנֵּ֥נִי אֲדֹנָ֑י כִּ֥י אֵלֶ֥יךָ אֶ֝קְרָ֗א כָּל־הַיּֽוֹם׃ ‎4 ‏שַׂ֭מֵּחַ נֶ֣פֶשׁ עַבְדֶּ֑ךָ כִּ֥י אֵלֶ֥יךָ אֲ֝דֹנָ֗י נַפְשִׁ֥י אֶשָּֽׂא׃ ‎5 ‏כִּֽי־אַתָּ֣ה אֲ֭דֹנָי ט֣וֹב וְסַלָּ֑ח וְרַב־חֶ֝֗סֶד לְכָל־קֹרְאֶֽיךָ׃ ‎6 ‏הַאֲזִ֣ינָה יְ֭הוָה תְּפִלָּתִ֑י וְ֝הַקְשִׁ֗יבָה בְּק֣וֹל תַּחֲנוּנוֹתָֽי׃ ‎7 ‏בְּי֣וֹם צָ֭רָתִ֥י אֶקְרָאֶ֗ךָּ כִּ֣י תַעֲנֵֽנִי׃ ‎8 ‏אֵין־כָּמ֖וֹךָ בָאֱלֹהִ֥ים׀ אֲדֹנָ֗י וְאֵ֣ין כְּֽמַעֲשֶֽׂיךָ׃ ‎9 ‏כָּל־גּוֹיִ֤ם׀ אֲשֶׁ֥ר עָשִׂ֗יתָ יָב֤וֹאוּ׀ וְיִשְׁתַּחֲו֣וּ לְפָנֶ֣יךָ אֲדֹנָ֑י וִֽיכַבְּד֣וּ לִשְׁמֶֽךָ׃ ‎10 ‏כִּֽי־גָד֣וֹל אַ֭תָּה וְעֹשֵׂ֣ה נִפְלָא֑וֹת אַתָּ֖ה אֱלֹהִ֣ים לְבַדֶּֽךָ׃ ‎11 ‏ה֘וֹרֵ֤נִי יְהוָ֨ה׀ דַּרְכֶּ֗ךָ אֲהַלֵּ֥ךְ בַּאֲמִתֶּ֑ךָ יַחֵ֥ד לְ֝בָבִ֗י לְיִרְאָ֥ה שְׁמֶֽךָ׃ ‎12 ‏אוֹדְךָ֤׀ אֲדֹנָ֣י אֱ֭לֹהַי בְּכָל־לְבָבִ֑י וַאֲכַבְּדָ֖ה שִׁמְךָ֣ לְעוֹלָֽם׃ ‎13 ‏כִּֽי־חַ֭סְדְּךָ גָּד֣וֹל עָלָ֑י וְהִצַּ֥לְתָּ נַ֝פְשִׁ֗י מִשְּׁא֥וֹל תַּחְתִּיָּֽה׃ ‎14 ‏אֱלֹהִ֤ים׀ זֵ֘דִ֤ים קָֽמוּ־עָלַ֗י וַעֲדַ֣ת עָ֭רִיצִים בִּקְשׁ֣וּ נַפְשִׁ֑י וְלֹ֖א שָׂמ֣וּךָ לְנֶגְדָּֽם׃ ‎15 ‏וְאַתָּ֣ה אֲ֭דֹנָי אֵל־רַח֣וּם וְחַנּ֑וּן אֶ֥רֶךְ אַ֝פַּ֗יִם וְרַב־חֶ֥סֶד וֶאֱמֶֽת׃ ‎16 ‏פְּנֵ֥ה אֵלַ֗י וְחָ֫נֵּ֥נִי תְּנָֽה־עֻזְּךָ֥ לְעַבְדֶּ֑ךָ וְ֝הוֹשִׁ֗יעָה לְבֶן־אֲמָתֶֽךָ׃ ‎17 ‏עֲשֵֽׂה־עִמִּ֥י א֗וֹת לְט֫וֹבָ֥ה וְיִרְא֣וּ שֹׂנְאַ֣י וְיֵבֹ֑שׁוּ כִּֽי־אַתָּ֥ה יְ֝הוָ֗ה עֲזַרְתַּ֥נִי וְנִחַמְתָּֽנִי׃

1 təfillâ ləḏāwiḏ haṭṭēh-yəhwâ ’āzənəḵā ‘ănēnî kî-‘ānî wə’eḇəywōn ’ānî: 2 šāmərâ nafəšî kî-ḥāsîḏ ’ānî hwōša‘ ‘aḇədəḵā ’atâ ’ĕlōhay habwōṭēḥa ’ēleyḵā: 3 ḥānnēnî ’ăḏōnāy kî ’ēleyḵā ’eqərā’ kāl-hayywōm: 4 śammēḥa nefeš ‘aḇədeḵā kî ’ēleyḵā ’ăḏōnāy nafəšî ’eśśā’: 5 kî-’atâ ’ăḏōnāy ṭwōḇ wəsallāḥ wəraḇ-ḥeseḏ ləḵāl-qōrə’eyḵā: 6 ha’ăzînâ yəhwâ təfillāṯî wəhaqəšîḇâ bəqwōl taḥănûnwōṯāy: 7 bəywōm ṣārāṯî ’eqərā’eḵḵā kî ṯa‘ănēnî: 8 ’ên-kāmwōḵā ḇā’ĕlōhîm| ’ăḏōnāy wə’ên kəma‘ăśeyḵā: 9 kāl-gwōyim| ’ăšer ‘āśîṯā yāḇwō’û| wəyišətaḥăwû ləfāneyḵā ’ăḏōnāy wîḵabəḏû lišəmeḵā: 10 kî-ḡāḏwōl ’atâ wə‘ōśēh nifəlā’wōṯ ’atâ ’ĕlōhîm ləḇadeḵā: 11 hwōrēnî yəhwâ| darəkeḵā ’ăhallēḵə ba’ămiteḵā yaḥēḏ ləḇāḇî ləyirə’â šəmeḵā: 12 ’wōḏəḵā| ’ăḏōnāy ’ĕlōhay bəḵāl-ləḇāḇî wa’ăḵabəḏâ šiməḵā lə‘wōlām: 13 kî-ḥasədəḵā gāḏwōl ‘ālāy wəhiṣṣalətā nafəšî miššə’wōl taḥətîyâ: 14 ’ĕlōhîm| zēḏîm qāmû-‘ālay wa‘ăḏaṯ ‘ārîṣîm biqəšû nafəšî wəlō’ śāmûḵā ləneḡədām: 15 wə’atâ ’ăḏōnāy ’ēl-raḥûm wəḥannûn ’ereḵə ’apayim wəraḇ-ḥeseḏ we’ĕmeṯ: 16 pənēh ’ēlay wəḥānnēnî tənâ-‘uzzəḵā lə‘aḇədeḵā wəhwōšî‘â ləḇen-’ămāṯeḵā: 17 ‘ăśēh-‘immî ’wōṯ ləṭwōḇâ wəyirə’û śōnə’ay wəyēḇōšû kî-’atâ yəhwâ ‘ăzarətanî wəniḥamətānî: