Psalms (Tehilim): Psalms (Tehilim) Chapter 83

Tanach (Hebrew): Psalms (Tehilim) Chapter 83

‎1 ‏שִׁ֖יר מִזְמ֣וֹר לְאָסָֽף׃ ‎2 ‏אֱלֹהִ֥ים אַל־דֳּמִי־לָ֑ךְ אַל־תֶּחֱרַ֖שׁ וְאַל־תִּשְׁקֹ֣ט אֵֽל׃ ‎3 ‏כִּֽי־הִנֵּ֣ה א֭וֹיְבֶיךָ יֶהֱמָי֑וּן וּ֝מְשַׂנְאֶ֗יךָ נָ֣שְׂאוּ רֹֽאשׁ׃ ‎4 ‏עַֽל־עַ֭מְּךָ יַעֲרִ֣ימוּ ס֑וֹד וְ֝יִתְיָעֲצ֗וּ עַל־צְפוּנֶֽיךָ׃ ‎5 ‏אָמְר֗וּ לְ֭כוּ וְנַכְחִידֵ֣ם מִגּ֑וֹי וְלֹֽא־יִזָּכֵ֖ר שֵֽׁם־יִשְׂרָאֵ֣ל עֽוֹד׃ ‎6 ‏כִּ֤י נוֹעֲצ֣וּ לֵ֣ב יַחְדָּ֑ו עָ֝לֶ֗יךָ בְּרִ֣ית יִכְרֹֽתוּ׃ ‎7 ‏אָהֳלֵ֣י אֱ֭דוֹם וְיִשְׁמְעֵאלִ֗ים מוֹאָ֥ב וְהַגְרִֽים׃ ‎8 ‏גְּבָ֣ל וְ֭עַמּוֹן וַעֲמָלֵ֑ק פְּ֝לֶ֗שֶׁת עִם־יֹ֥שְׁבֵי צֽוֹר׃ ‎9 ‏גַּם־אַ֭שּׁוּר נִלְוָ֣ה עִמָּ֑ם הָ֤י֥וּ זְר֖וֹעַ לִבְנֵי־ל֣וֹט סֶֽלָה׃ ‎10 ‏עֲשֵֽׂה־לָהֶ֥ם כְּמִדְיָ֑ן כְּֽסִֽיסְרָ֥א כְ֝יָבִ֗ין בְּנַ֣חַל קִישֽׁוֹן׃ ‎11 ‏נִשְׁמְד֥וּ בְֽעֵין־דֹּ֑אר הָ֥יוּ דֹּ֝֗מֶן לָאֲדָמָֽה׃ ‎12 ‏שִׁיתֵ֣מוֹ נְ֭דִיבֵמוֹ כְּעֹרֵ֣ב וְכִזְאֵ֑ב וּֽכְזֶ֥בַח וּ֝כְצַלְמֻנָּ֗ע כָּל־נְסִיכֵֽמוֹ׃ ‎13 ‏אֲשֶׁ֣ר אָ֭מְרוּ נִ֣ירֲשָׁה לָּ֑נוּ אֵ֝֗ת נְא֣וֹת אֱלֹהִֽים׃ ‎14 ‏אֱ‍ֽלֹהַ֗י שִׁיתֵ֥מוֹ כַגַּלְגַּ֑ל כְּ֝קַ֗שׁ לִפְנֵי־רֽוּחַ׃ ‎15 ‏כְּאֵ֥שׁ תִּבְעַר־יָ֑עַר וּ֝כְלֶהָבָ֗ה תְּלַהֵ֥ט הָרִֽים׃ ‎16 ‏כֵּ֭ן תִּרְדְּפֵ֣ם בְּסַעֲרֶ֑ךָ וּבְסוּפָתְךָ֥ תְבַהֲלֵֽם׃ ‎17 ‏מַלֵּ֣א פְנֵיהֶ֣ם קָל֑וֹן וִֽיבַקְשׁ֖וּ שִׁמְךָ֣ יְהוָֽה׃ ‎18 ‏יֵבֹ֖שׁוּ וְיִבָּהֲל֥וּ עֲדֵי־עַ֗ד וְֽיַחְפְּר֥וּ וְיֹאבֵֽדוּ׃ ‎19 ‏וְֽיֵדְע֗וּ כִּֽי־אַתָּ֬ה שִׁמְךָ֣ יְהוָ֣ה לְבַדֶּ֑ךָ עֶ֝לְי֗וֹן עַל־כָּל־הָאָֽרֶץ׃

1 šîr mizəmwōr lə’āsāf: 2 ’ĕlōhîm ’al-dŏmî-lāḵə ’al-teḥĕraš wə’al-tišəqōṭ ’ēl: 3 kî-hinnēh ’wōyəḇeyḵā yehĕmāyûn ûməśanə’eyḵā nāśə’û rō’š: 4 ‘al-‘amməḵā ya‘ărîmû swōḏ wəyiṯəyā‘ăṣû ‘al-ṣəfûneyḵā: 5 ’āmərû ləḵû wənaḵəḥîḏēm migwōy wəlō’-yizzāḵēr šēm-yiśərā’ēl ‘wōḏ: 6 kî nwō‘ăṣû lēḇ yaḥədāw ‘āleyḵā bərîṯ yiḵərōṯû: 7 ’âŏlê ’ĕḏwōm wəyišəmə‘ē’lîm mwō’āḇ wəhaḡərîm: 8 gəḇāl wə‘ammwōn wa‘ămālēq pəlešeṯ ‘im-yōšəḇê ṣwōr: 9 gam-’aššûr niləwâ ‘immām hāyû zərwō‘a liḇənê-lwōṭ selâ: 10 ‘ăśēh-lâem kəmiḏəyān kəsîsərā’ ḵəyāḇîn bənaḥal qîšwōn: 11 nišəməḏû ḇə‘ên-dō’r hāyû dōmen lā’ăḏāmâ: 12 šîṯēmwō nəḏîḇēmwō kə‘ōrēḇ wəḵizə’ēḇ ûḵəzeḇaḥ ûḵəṣaləmunnā‘ kāl-nəsîḵēmwō: 13 ’ăšer ’āmərû nîrăšâ llānû ’ēṯ nə’wōṯ ’ĕlōhîm: 14 ’ĕ‍lōhay šîṯēmwō ḵagaləgal kəqaš lifənê-rûḥa: 15 kə’ēš tiḇə‘ar-yā‘ar ûḵəlehāḇâ təlahēṭ hārîm: 16 kēn tirədəfēm bəsa‘ăreḵā ûḇəsûfāṯəḵā ṯəḇahălēm: 17 mallē’ fənêhem qālwōn wîḇaqəšû šiməḵā yəhwâ: 18 yēḇōšû wəyibâălû ‘ăḏê-‘aḏ wəyaḥəpərû wəyō’ḇēḏû: 19 wəyēḏə‘û kî-’atâ šiməḵā yəhwâ ləḇadeḵā ‘eləywōn ‘al-kāl-hā’āreṣ: