Psalms (Tehilim): Psalms (Tehilim) Chapter 81

Tanach (Hebrew): Psalms (Tehilim) Chapter 81

‎1 ‏לַמְנַצֵּ֬חַ׀ עַֽל־הַגִּתִּ֬ית לְאָסָֽף׃ ‎2 ‏הַ֭רְנִינוּ לֵאלֹהִ֣ים עוּזֵּ֑נוּ הָ֝רִ֗יעוּ לֵאלֹהֵ֥י יַעֲקֹֽב׃ ‎3 ‏שְֽׂאוּ־זִ֭מְרָה וּתְנוּ־תֹ֑ף כִּנּ֖וֹר נָעִ֣ים עִם־נָֽבֶל׃ ‎4 ‏תִּקְע֣וּ בַחֹ֣דֶשׁ שׁוֹפָ֑ר בַּ֝כֵּ֗סֶה לְי֣וֹם חַגֵּֽנוּ׃ ‎5 ‏כִּ֤י חֹ֣ק לְיִשְׂרָאֵ֣ל ה֑וּא מִ֝שְׁפָּ֗ט לֵאלֹהֵ֥י יַעֲקֹֽב׃ ‎6 ‏עֵ֤דוּת׀ בִּֽיה֘וֹסֵ֤ף שָׂמ֗וֹ בְּ֭צֵאתוֹ עַל־אֶ֣רֶץ מִצְרָ֑יִם שְׂפַ֖ת לֹא־יָדַ֣עְתִּי אֶשְׁמָֽע׃ ‎7 ‏הֲסִיר֣וֹתִי מִסֵּ֣בֶל שִׁכְמ֑וֹ כַּ֝פָּ֗יו מִדּ֥וּד תַּעֲבֹֽרְנָה׃ ‎8 ‏בַּצָּרָ֥ה קָרָ֗אתָ וָאֲחַ֫לְּצֶ֥ךָּ אֶ֭עֶנְךָ בְּסֵ֣תֶר רַ֑עַם אֶבְחָֽנְךָ֨ עַל־מֵ֖י מְרִיבָ֣ה סֶֽלָה׃ ‎9 ‏שְׁמַ֣ע עַ֭מִּי וְאָעִ֣ידָה בָּ֑ךְ יִ֝שְׂרָאֵ֗ל אִם־תִּֽשְׁמַֽע־לִֽי׃ ‎10 ‏לֹֽא־יִהְיֶ֣ה בְ֭ךָ אֵ֣ל זָ֑ר וְלֹ֥א תִ֝שְׁתַּחֲוֶ֗ה לְאֵ֣ל נֵכָֽר׃ ‎11 ‏אָנֹכִ֨י׀ יְה֘וָ֤ה אֱלֹהֶ֗יךָ הַֽ֭מַּעַלְךָ מֵאֶ֣רֶץ מִצְרָ֑יִם הַרְחֶב־פִּ֝֗יךָ וַאֲמַלְאֵֽהוּ׃ ‎12 ‏וְלֹא־שָׁמַ֣ע עַמִּ֣י לְקוֹלִ֑י וְ֝יִשְׂרָאֵ֗ל לֹא־אָ֥בָה לִֽי׃ ‎13 ‏וָֽ֭אֲשַׁלְּחֵהוּ בִּשְׁרִיר֣וּת לִבָּ֑ם יֵ֝לְכ֗וּ בְּֽמוֹעֲצוֹתֵיהֶֽם׃ ‎14 ‏ל֗וּ עַ֭מִּי שֹׁמֵ֣עַֽ לִ֑י יִ֝שְׂרָאֵ֗ל בִּדְרָכַ֥י יְהַלֵּֽכוּ׃ ‎15 ‏כִּ֭מְעַט אוֹיְבֵיהֶ֣ם אַכְנִ֑יעַ וְעַ֥ל צָ֝רֵיהֶ֗ם אָשִׁ֥יב יָדִֽי׃ ‎16 ‏מְשַׂנְאֵ֣י יְ֭הוָה יְכַֽחֲשׁוּ־ל֑וֹ וִיהִ֖י עִתָּ֣ם לְעוֹלָֽם׃ ‎17 ‏וַֽ֭יַּאֲכִילֵהוּ מֵחֵ֣לֶב חִטָּ֑ה וּ֝מִצּ֗וּר דְּבַ֣שׁ אַשְׂבִּיעֶֽךָ׃

1 lamənaṣṣēḥa| ‘al-hagitîṯ lə’āsāf: 2 harənînû lē’lōhîm ‘ûzzēnû hārî‘û lē’lōhê ya‘ăqōḇ: 3 śə’û-zimərâ ûṯənû-ṯōf kinnwōr nā‘îm ‘im-nāḇel: 4 tiqə‘û ḇaḥōḏeš šwōfār bakēseh ləywōm ḥagēnû: 5 kî ḥōq ləyiśərā’ēl hû’ mišəpāṭ lē’lōhê ya‘ăqōḇ: 6 ‘ēḏûṯ| bîhwōsēf śāmwō bəṣē’ṯwō ‘al-’ereṣ miṣərāyim śəfaṯ lō’-yāḏa‘ətî ’ešəmā‘: 7 hăsîrwōṯî missēḇel šiḵəmwō kapāyw midûḏ ta‘ăḇōrənâ: 8 baṣṣārâ qārā’ṯā wā’ăḥalləṣeḵḵā ’e‘enəḵā bəsēṯer ra‘am ’eḇəḥānəḵā ‘al-mê mərîḇâ selâ: 9 šəma‘ ‘ammî wə’ā‘îḏâ bāḵə yiśərā’ēl ’im-tišəma‘-lî: 10 lō’-yihəyeh ḇəḵā ’ēl zār wəlō’ ṯišətaḥăweh lə’ēl nēḵār: 11 ’ānōḵî| yəhwâ ’ĕlōheyḵā hamma‘aləḵā mē’ereṣ miṣərāyim harəḥeḇ-pîḵā wa’ămalə’ēhû: 12 wəlō’-šāma‘ ‘ammî ləqwōlî wəyiśərā’ēl lō’-’āḇâ lî: 13 wā’ăšalləḥēhû bišərîrûṯ libām yēləḵû bəmwō‘ăṣwōṯêhem: 14 lû ‘ammî šōmē‘a lî yiśərā’ēl biḏərāḵay yəhallēḵû: 15 kimə‘aṭ ’wōyəḇêhem ’aḵənî‘a wə‘al ṣārêhem ’āšîḇ yāḏî: 16 məśanə’ê yəhwâ yəḵaḥăšû-lwō wîhî ‘itām lə‘wōlām: 17 wayya’ăḵîlēhû mēḥēleḇ ḥiṭṭâ ûmiṣṣûr dəḇaš ’aśəbî‘eḵā: