Psalms (Tehilim): Psalms (Tehilim) Chapter 78

Tanach (Hebrew): Psalms (Tehilim) Chapter 78

‎1 ‏מַשְׂכִּ֗יל לְאָ֫סָ֥ף הַאֲזִ֣ינָה עַ֭מִּי תּוֹרָתִ֑י הַטּ֥וּ אָ֝זְנְכֶ֗ם לְאִמְרֵי־פִֽי׃ ‎2 ‏אֶפְתְּחָ֣ה בְמָשָׁ֣ל פִּ֑י אַבִּ֥יעָה חִ֝יד֗וֹת מִנִּי־קֶֽדֶם׃ ‎3 ‏אֲשֶׁ֣ר שָׁ֭מַעְנוּ וַנֵּדָעֵ֑ם וַ֝אֲבוֹתֵ֗ינוּ סִפְּרוּ־לָֽנוּ׃ ‎4 ‏לֹ֤א נְכַחֵ֨ד׀ מִבְּנֵיהֶ֗ם לְד֥וֹר אַחֲר֗וֹן מְֽ֭סַפְּרִים תְּהִלּ֣וֹת יְהוָ֑ה וֶעֱזוּז֥וֹ וְ֝נִפְלְאוֹתָ֗יו אֲשֶׁ֣ר עָשָֽׂה׃ ‎5 ‏וַיָּ֤קֶם עֵד֨וּת׀ בְּֽיַעֲקֹ֗ב וְתוֹרָה֮ שָׂ֤ם בְּיִשְׂרָ֫אֵ֥ל אֲשֶׁ֣ר צִ֭וָּה אֶת־אֲבוֹתֵ֑ינוּ לְ֝הוֹדִיעָ֗ם לִבְנֵיהֶֽם׃ ‎6 ‏לְמַ֤עַן יֵדְע֨וּ׀ דּ֣וֹר אַ֭חֲרוֹן בָּנִ֣ים יִוָּלֵ֑דוּ יָ֝קֻ֗מוּ וִֽיסַפְּר֥וּ לִבְנֵיהֶֽם׃ ‎7 ‏וְיָשִׂ֥ימוּ בֵֽאלֹהִ֗ים כִּ֫סְלָ֥ם וְלֹ֣א יִ֭שְׁכְּחוּ מַֽעַלְלֵי־אֵ֑ל וּמִצְוֹתָ֥יו יִנְצֹֽרוּ׃ ‎8 ‏וְלֹ֤א יִהְי֨וּ׀ כַּאֲבוֹתָ֗ם דּוֹר֮ סוֹרֵ֪ר וּמֹ֫רֶ֥ה דּ֭וֹר לֹא־הֵכִ֣ין לִבּ֑וֹ וְלֹא־נֶאֶמְנָ֖ה אֶת־אֵ֣ל רוּחֽוֹ׃ ‎9 ‏בְּֽנֵי־אֶפְרַ֗יִם נוֹשְׁקֵ֥י רוֹמֵי־קָ֑שֶׁת הָ֝פְכ֗וּ בְּי֣וֹם קְרָֽב׃ ‎10 ‏לֹ֣א שָׁ֭מְרוּ בְּרִ֣ית אֱלֹהִ֑ים וּ֝בְתוֹרָת֗וֹ מֵאֲנ֥וּ לָלֶֽכֶת׃ ‎11 ‏וַיִּשְׁכְּח֥וּ עֲלִילוֹתָ֑יו וְ֝נִפְלְאוֹתָ֗יו אֲשֶׁ֣ר הֶרְאָֽם׃ ‎12 ‏נֶ֣גֶד אֲ֭בוֹתָם עָ֣שָׂה פֶ֑לֶא בְּאֶ֖רֶץ מִצְרַ֣יִם שְׂדֵה־צֹֽעַן׃ ‎13 ‏בָּ֣קַע יָ֭ם וַיַּֽעֲבִירֵ֑ם וַֽיַּצֶּב־מַ֥יִם כְּמוֹ־נֵֽד׃ ‎14 ‏וַיַּנְחֵ֣ם בֶּעָנָ֣ן יוֹמָ֑ם וְכָל־הַ֝לַּ֗יְלָה בְּא֣וֹר אֵֽשׁ׃ ‎15 ‏יְבַקַּ֣ע צֻ֭רִים בַּמִּדְבָּ֑ר וַ֝יַּ֗שְׁקְ כִּתְהֹמ֥וֹת רַבָּֽה׃ ‎16 ‏וַיּוֹצִ֣א נוֹזְלִ֣ים מִסָּ֑לַע וַיּ֖וֹרֶד כַּנְּהָר֣וֹת מָֽיִם׃ ‎17 ‏וַיּוֹסִ֣יפוּ ע֖וֹד לַחֲטֹא־ל֑וֹ לַֽמְר֥וֹת עֶ֝לְי֗וֹן בַּצִּיָּֽה׃ ‎18 ‏וַיְנַסּוּ־אֵ֥ל בִּלְבָבָ֑ם לִֽשְׁאָל־אֹ֥כֶל לְנַפְשָֽׁם׃ ‎19 ‏וַֽיְדַבְּר֗וּ בֵּֽאלֹ֫הִ֥ים אָ֭מְרוּ הֲי֣וּכַל אֵ֑ל לַעֲרֹ֥ךְ שֻׁ֝לְחָ֗ן בַּמִּדְבָּֽר׃ ‎20 ‏הֵ֤ן הִכָּה־צ֨וּר׀ וַיָּז֣וּבוּ מַיִם֮ וּנְחָלִ֪ים יִ֫שְׁטֹ֥פוּ הֲגַם־לֶ֭חֶם י֣וּכַל תֵּ֑ת אִם־יָכִ֖ין שְׁאֵ֣ר לְעַמּֽוֹ׃ ‎21 ‏לָכֵ֤ן׀ שָׁמַ֥ע יְהוָ֗ה וַֽיִּתְעַבָּ֥ר וְ֭אֵשׁ נִשְּׂקָ֣ה בְיַעֲקֹ֑ב וְגַם־אַ֝֗ף עָלָ֥ה בְיִשְׂרָאֵֽל׃ ‎22 ‏כִּ֤י לֹ֣א הֶ֭אֱמִינוּ בֵּאלֹהִ֑ים וְלֹ֥א בָ֝טְח֗וּ בִּֽישׁוּעָתֽוֹ׃ ‎23 ‏וַיְצַ֣ו שְׁחָקִ֣ים מִמָּ֑עַל וְדַלְתֵ֖י שָׁמַ֣יִם פָּתָֽח׃ ‎24 ‏וַיַּמְטֵ֬ר עֲלֵיהֶ֣ם מָ֣ן לֶאֱכֹ֑ל וּדְגַן־שָׁ֝מַ֗יִם נָ֣תַן לָֽמוֹ׃ ‎25 ‏לֶ֣חֶם אַ֭בִּירִים אָ֣כַל אִ֑ישׁ צֵידָ֬ה שָׁלַ֖ח לָהֶ֣ם לָשֹֽׂבַע׃ ‎26 ‏יַסַּ֣ע קָ֭דִים בַּשָּׁמָ֑יִם וַיְנַהֵ֖ג בְּעֻזּ֣וֹ תֵימָֽן׃ ‎27 ‏וַיַּמְטֵ֬ר עֲלֵיהֶ֣ם כֶּעָפָ֣ר שְׁאֵ֑ר וּֽכְח֥וֹל יַ֝מִּ֗ים ע֣וֹף כָּנָֽף׃ ‎28 ‏וַ֭יַּפֵּל בְּקֶ֣רֶב מַחֲנֵ֑הוּ סָ֝בִ֗יב לְמִשְׁכְּנֹתָֽיו׃ ‎29 ‏וַיֹּאכְל֣וּ וַיִּשְׂבְּע֣וּ מְאֹ֑ד וְ֝תַֽאֲוָתָ֗ם יָבִ֥א לָהֶֽם׃ ‎30 ‏לֹא־זָר֥וּ מִתַּאֲוָתָ֑ם ע֝֗וֹד אָכְלָ֥ם בְּפִיהֶֽם׃ ‎31 ‏וְאַ֤ף אֱלֹהִ֨ים׀ עָ֘לָ֤ה בָהֶ֗ם וַֽ֭יַּהֲרֹג בְּמִשְׁמַנֵּיהֶ֑ם וּבַחוּרֵ֖י יִשְׂרָאֵ֣ל הִכְרִֽיעַ׃ ‎32 ‏בְּכָל־זֹ֭את חָֽטְאוּ־ע֑וֹד וְלֹֽא־הֶ֝אֱמִ֗ינוּ בְּנִפְלְאוֹתָֽיו׃ ‎33 ‏וַיְכַל־בַּהֶ֥בֶל יְמֵיהֶ֑ם וּ֝שְׁנוֹתָ֗ם בַּבֶּהָלָֽה׃ ‎34 ‏אִם־הֲרָגָ֥ם וּדְרָשׁ֑וּהוּ וְ֝שָׁ֗בוּ וְשִֽׁחֲרוּ־אֵֽל׃ ‎35 ‏וַֽ֭יִּזְכְּרוּ כִּֽי־אֱלֹהִ֣ים צוּרָ֑ם וְאֵ֥ל עֶ֝לְיוֹן גֹּאֲלָֽם׃ ‎36 ‏וַיְפַתּ֥וּהוּ בְּפִיהֶ֑ם וּ֝בִלְשׁוֹנָ֗ם יְכַזְּבוּ־לֽוֹ׃ ‎37 ‏וְ֭לִבָּם לֹא־נָכ֣וֹן עִמּ֑וֹ וְלֹ֥א נֶ֝אֶמְנ֗וּ בִּבְרִיתֽוֹ׃ ‎38 ‏וְה֤וּא רַח֨וּם׀ יְכַפֵּ֥ר עָוֹן֮ וְֽלֹא־יַ֫שְׁחִ֥ית וְ֭הִרְבָּה לְהָשִׁ֣יב אַפּ֑וֹ וְלֹֽא־יָ֝עִיר כָּל־חֲמָתֽוֹ׃ ‎39 ‏וַ֭יִּזְכֹּר כִּי־בָשָׂ֣ר הֵ֑מָּה ר֥וּחַ ה֝וֹלֵ֗ךְ וְלֹ֣א יָשֽׁוּב׃ ‎40 ‏כַּ֭מָּה יַמְר֣וּהוּ בַמִּדְבָּ֑ר יַ֝עֲצִיב֗וּהוּ בִּֽישִׁימֽוֹן׃ ‎41 ‏וַיָּשׁ֣וּבוּ וַיְנַסּ֣וּ אֵ֑ל וּקְד֖וֹשׁ יִשְׂרָאֵ֣ל הִתְווּ׃ ‎42 ‏לֹא־זָכְר֥וּ אֶת־יָד֑וֹ י֝֗וֹם אֲ‍ֽשֶׁר־פָּדָ֥ם מִנִּי־צָֽר׃ ‎43 ‏אֲשֶׁר־שָׂ֣ם בְּ֭מִצְרַיִם אֹֽתוֹתָ֑יו וּ֝מוֹפְתָ֗יו בִּשְׂדֵה־צֹֽעַן׃ ‎44 ‏וַיַּהֲפֹ֣ךְ לְ֭דָם יְאֹרֵיהֶ֑ם וְ֝נֹזְלֵיהֶ֗ם בַּל־יִשְׁתָּיֽוּן׃ ‎45 ‏יְשַׁלַּ֬ח בָּהֶ֣ם עָ֭רֹב וַיֹּאכְלֵ֑ם וּ֝צְפַרְדֵּ֗עַ וַתַּשְׁחִיתֵֽם׃ ‎46 ‏וַיִּתֵּ֣ן לֶחָסִ֣יל יְבוּלָ֑ם וִֽ֝יגִיעָ֗ם לָאַרְבֶּֽה׃ ‎47 ‏יַהֲרֹ֣ג בַּבָּרָ֣ד גַּפְנָ֑ם וְ֝שִׁקְמוֹתָ֗ם בַּֽחֲנָמַֽל׃ ‎48 ‏וַיַּסְגֵּ֣ר לַבָּרָ֣ד בְּעִירָ֑ם וּ֝מִקְנֵיהֶ֗ם לָרְשָׁפִֽים׃ ‎49 ‏יְשַׁלַּח־בָּ֨ם׀ חֲר֬וֹן אַפּ֗וֹ עֶבְרָ֣ה וָזַ֣עַם וְצָרָ֑ה מִ֝שְׁלַ֗חַת מַלְאֲכֵ֥י רָעִֽים׃ ‎50 ‏יְפַלֵּ֥ס נָתִ֗יב לְאַ֫פּ֥וֹ לֹא־חָשַׂ֣ךְ מִמָּ֣וֶת נַפְשָׁ֑ם וְ֝חַיָּתָ֗ם לַדֶּ֥בֶר הִסְגִּֽיר׃ ‎51 ‏וַיַּ֣ךְ כָּל־בְּכ֣וֹר בְּמִצְרָ֑יִם רֵאשִׁ֥ית א֝וֹנִ֗ים בְּאָהֳלֵי־חָֽם׃ ‎52 ‏וַיַּסַּ֣ע כַּצֹּ֣אן עַמּ֑וֹ וַֽיְנַהֲגֵ֥ם כַּ֝עֵ֗דֶר בַּמִּדְבָּֽר׃ ‎53 ‏וַיַּנְחֵ֣ם לָ֭בֶטַח וְלֹ֣א פָחָ֑דוּ וְאֶת־א֝וֹיְבֵיהֶ֗ם כִּסָּ֥ה הַיָּֽם׃ ‎54 ‏וַ֭יְבִיאֵם אֶל־גְּב֣וּל קָדְשׁ֑וֹ הַר־זֶ֝֗ה קָנְתָ֥ה יְמִינֽוֹ׃ ‎55 ‏וַיְגָ֤רֶשׁ מִפְּנֵיהֶ֨ם׀ גּוֹיִ֗ם וַֽ֭יַּפִּילֵם בְּחֶ֣בֶל נַחֲלָ֑ה וַיַּשְׁכֵּ֥ן בְּ֝אָהֳלֵיהֶ֗ם שִׁבְטֵ֥י יִשְׂרָאֵֽל׃ ‎56 ‏וַיְנַסּ֣וּ וַ֭יַּמְרוּ אֶת־אֱלֹהִ֣ים עֶלְי֑וֹן וְ֝עֵדוֹתָ֗יו לֹ֣א שָׁמָֽרוּ׃ ‎57 ‏וַיִּסֹּ֣גוּ וַֽ֭יִּבְגְּדוּ כַּאֲבוֹתָ֑ם נֶ֝הְפְּכ֗וּ כְּקֶ֣שֶׁת רְמִיָּֽה׃ ‎58 ‏וַיַּכְעִיס֥וּהוּ בְּבָמוֹתָ֑ם וּ֝בִפְסִילֵיהֶ֗ם יַקְנִיאֽוּהוּ׃ ‎59 ‏שָׁמַ֣ע אֱ֭לֹהִים וַֽיִּתְעַבָּ֑ר וַיִּמְאַ֥ס מְ֝אֹ֗ד בְּיִשְׂרָאֵֽל׃ ‎60 ‏וַ֭יִּטֹּשׁ מִשְׁכַּ֣ן שִׁל֑וֹ אֹ֝֗הֶל שִׁכֵּ֥ן בָּאָדָֽם׃ ‎61 ‏וַיִּתֵּ֣ן לַשְּׁבִ֣י עֻזּ֑וֹ וְֽתִפְאַרְתּ֥וֹ בְיַד־צָֽר׃ ‎62 ‏וַיַּסְגֵּ֣ר לַחֶ֣רֶב עַמּ֑וֹ וּ֝בְנַחֲלָת֗וֹ הִתְעַבָּֽר׃ ‎63 ‏בַּחוּרָ֥יו אָֽכְלָה־אֵ֑שׁ וּ֝בְתוּלֹתָ֗יו לֹ֣א הוּלָּֽלוּ׃ ‎64 ‏כֹּ֭הֲנָיו בַּחֶ֣רֶב נָפָ֑לוּ וְ֝אַלְמְנֹתָ֗יו לֹ֣א תִבְכֶּֽינָה׃ ‎65 ‏וַיִּקַ֖ץ כְּיָשֵׁ֥ן׀ אֲדֹנָ֑י כְּ֝גִבּ֗וֹר מִתְרוֹנֵ֥ן מִיָּֽיִן׃ ‎66 ‏וַיַּךְ־צָרָ֥יו אָח֑וֹר חֶרְפַּ֥ת ע֝וֹלָ֗ם נָ֣תַן לָֽמוֹ׃ ‎67 ‏וַ֭יִּמְאַס בְּאֹ֣הֶל יוֹסֵ֑ף וּֽבְשֵׁ֥בֶט אֶ֝פְרַ֗יִם לֹ֣א בָחָֽר׃ ‎68 ‏וַ֭יִּבְחַר אֶת־שֵׁ֣בֶט יְהוּדָ֑ה אֶֽת־הַ֥ר צִ֝יּ֗וֹן אֲשֶׁ֣ר אָהֵֽב׃ ‎69 ‏וַיִּ֣בֶן כְּמוֹ־רָ֭מִים מִקְדָּשׁ֑וֹ כְּ֝אֶ֗רֶץ יְסָדָ֥הּ לְעוֹלָֽם׃ ‎70 ‏וַ֭יִּבְחַר בְּדָוִ֣ד עַבְדּ֑וֹ וַ֝יִּקָּחֵ֗הוּ מִֽמִּכְלְאֹ֥ת צֹֽאן׃ ‎71 ‏מֵאַחַ֥ר עָל֗וֹת הֱ֫בִיא֥וֹ לִ֭רְעוֹת בְּיַעֲקֹ֣ב עַמּ֑וֹ וּ֝בְיִשְׂרָאֵ֗ל נַחֲלָתֽוֹ׃ ‎72 ‏וַ֭יִּרְעֵם כְּתֹ֣ם לְבָב֑וֹ וּבִתְבוּנ֖וֹת כַּפָּ֣יו יַנְחֵֽם׃

1 maśəkîl lə’āsāf ha’ăzînâ ‘ammî twōrāṯî haṭṭû ’āzənəḵem lə’imərê-fî: 2 ’efətəḥâ ḇəmāšāl pî ’abî‘â ḥîḏwōṯ minnî-qeḏem: 3 ’ăšer šāma‘ənû wannēḏā‘ēm wa’ăḇwōṯênû sipərû-lānû: 4 lō’ nəḵaḥēḏ| mibənêhem ləḏwōr ’aḥărwōn məsapərîm təhillwōṯ yəhwâ we‘ĕzûzwō wənifələ’wōṯāyw ’ăšer ‘āśâ: 5 wayyāqem ‘ēḏûṯ| bəya‘ăqōḇ wəṯwōrâ śām bəyiśərā’ēl ’ăšer ṣiûâ ’eṯ-’ăḇwōṯênû ləhwōḏî‘ām liḇənêhem: 6 ləma‘an yēḏə‘û| dwōr ’aḥărwōn bānîm yiûālēḏû yāqumû wîsapərû liḇənêhem: 7 wəyāśîmû ḇē’lōhîm kisəlām wəlō’ yišəkəḥû ma‘aləlê-’ēl ûmiṣəwōṯāyw yinəṣōrû: 8 wəlō’ yihəyû| ka’ăḇwōṯām dwōr swōrēr ûmōreh dwōr lō’-hēḵîn libwō wəlō’-ne’emənâ ’eṯ-’ēl rûḥwō: 9 bənê-’efərayim nwōšəqê rwōmê-qāšeṯ hāfəḵû bəywōm qərāḇ: 10 lō’ šāmərû bərîṯ ’ĕlōhîm ûḇəṯwōrāṯwō mē’ănû lāleḵeṯ: 11 wayyišəkəḥû ‘ălîlwōṯāyw wənifələ’wōṯāyw ’ăšer herə’ām: 12 neḡeḏ ’ăḇwōṯām ‘āśâ fele’ bə’ereṣ miṣərayim śəḏēh-ṣō‘an: 13 bāqa‘ yām wayya‘ăḇîrēm wayyaṣṣeḇ-mayim kəmwō-nēḏ: 14 wayyanəḥēm be‘ānān ywōmām wəḵāl-hallayəlâ bə’wōr ’ēš: 15 yəḇaqqa‘ ṣurîm bammiḏəbār wayyašəqə kiṯəhōmwōṯ rabâ: 16 wayywōṣi’ nwōzəlîm missāla‘ wayywōreḏ kannəhārwōṯ māyim: 17 wayywōsîfû ‘wōḏ laḥăṭō’-lwō lamərwōṯ ‘eləywōn baṣṣîyâ: 18 wayənassû-’ēl biləḇāḇām lišə’āl-’ōḵel lənafəšām: 19 wayəḏabərû bē’lōhîm ’āmərû hăyûḵal ’ēl la‘ărōḵə šuləḥān bammiḏəbār: 20 hēn hikâ-ṣûr| wayyāzûḇû mayim ûnəḥālîm yišəṭōfû hăḡam-leḥem yûḵal tēṯ ’im-yāḵîn šə’ēr lə‘ammwō: 21 lāḵēn| šāma‘ yəhwâ wayyiṯə‘abār wə’ēš niśśəqâ ḇəya‘ăqōḇ wəḡam-’af ‘ālâ ḇəyiśərā’ēl: 22 kî lō’ he’ĕmînû bē’lōhîm wəlō’ ḇāṭəḥû bîšû‘āṯwō: 23 wayəṣaw šəḥāqîm mimmā‘al wəḏaləṯê šāmayim pāṯāḥ: 24 wayyaməṭēr ‘ălêhem mān le’ĕḵōl ûḏəḡan-šāmayim nāṯan lāmwō: 25 leḥem ’abîrîm ’āḵal ’îš ṣêḏâ šālaḥ lâem lāśōḇa‘: 26 yassa‘ qāḏîm baššāmāyim wayənahēḡ bə‘uzzwō ṯêmān: 27 wayyaməṭēr ‘ălêhem ke‘āfār šə’ēr ûḵəḥwōl yammîm ‘wōf kānāf: 28 wayyapēl bəqereḇ maḥănēhû sāḇîḇ ləmišəkənōṯāyw: 29 wayyō’ḵəlû wayyiśəbə‘û mə’ōḏ wəṯa’ăwāṯām yāḇi’ lâem: 30 lō’-zārû mita’ăwāṯām ‘wōḏ ’āḵəlām bəfîhem: 31 wə’af ’ĕlōhîm| ‘ālâ ḇâem wayyahărōḡ bəmišəmannêhem ûḇaḥûrê yiśərā’ēl hiḵərî‘a: 32 bəḵāl-zō’ṯ ḥāṭə’û-‘wōḏ wəlō’-he’ĕmînû bənifələ’wōṯāyw: 33 wayəḵal-baheḇel yəmêhem ûšənwōṯām babehālâ: 34 ’im-hărāḡām ûḏərāšûhû wəšāḇû wəšiḥărû-’ēl: 35 wayyizəkərû kî-’ĕlōhîm ṣûrām wə’ēl ‘eləywōn gō’ălām: 36 wayəfatûhû bəfîhem ûḇiləšwōnām yəḵazzəḇû-lwō: 37 wəlibām lō’-nāḵwōn ‘immwō wəlō’ ne’emənû biḇərîṯwō: 38 wəhû’ raḥûm| yəḵapēr ‘āwōn wəlō’-yašəḥîṯ wəhirəbâ ləhāšîḇ ’apwō wəlō’-yā‘îr kāl-ḥămāṯwō: 39 wayyizəkōr kî-ḇāśār hēmmâ rûḥa hwōlēḵə wəlō’ yāšûḇ: 40 kammâ yamərûhû ḇammiḏəbār ya‘ăṣîḇûhû bîšîmwōn: 41 wayyāšûḇû wayənassû ’ēl ûqəḏwōš yiśərā’ēl hiṯəwû: 42 lō’-zāḵərû ’eṯ-yāḏwō ywōm ’ă‍šer-pāḏām minnî-ṣār: 43 ’ăšer-śām bəmiṣərayim ’ōṯwōṯāyw ûmwōfəṯāyw biśəḏēh-ṣō‘an: 44 wayyahăfōḵə ləḏām yə’ōrêhem wənōzəlêhem bal-yišətāyûn: 45 yəšallaḥ bâem ‘ārōḇ wayyō’ḵəlēm ûṣəfarədē‘a watašəḥîṯēm: 46 wayyitēn leḥāsîl yəḇûlām wîḡî‘ām lā’arəbeh: 47 yahărōḡ babārāḏ gafənām wəšiqəmwōṯām baḥănāmal: 48 wayyasəgēr labārāḏ bə‘îrām ûmiqənêhem lārəšāfîm: 49 yəšallaḥ-bām| ḥărwōn ’apwō ‘eḇərâ wāza‘am wəṣārâ mišəlaḥaṯ malə’ăḵê rā‘îm: 50 yəfallēs nāṯîḇ lə’apwō lō’-ḥāśaḵə mimmāweṯ nafəšām wəḥayyāṯām ladeḇer hisəgîr: 51 wayyaḵə kāl-bəḵwōr bəmiṣərāyim rē’šîṯ ’wōnîm bə’âŏlê-ḥām: 52 wayyassa‘ kaṣṣō’n ‘ammwō wayənahăḡēm ka‘ēḏer bammiḏəbār: 53 wayyanəḥēm lāḇeṭaḥ wəlō’ fāḥāḏû wə’eṯ-’wōyəḇêhem kissâ hayyām: 54 wayəḇî’ēm ’el-gəḇûl qāḏəšwō har-zeh qānəṯâ yəmînwō: 55 wayəḡāreš mipənêhem| gwōyim wayyapîlēm bəḥeḇel naḥălâ wayyašəkēn bə’âŏlêhem šiḇəṭê yiśərā’ēl: 56 wayənassû wayyamərû ’eṯ-’ĕlōhîm ‘eləywōn wə‘ēḏwōṯāyw lō’ šāmārû: 57 wayyissōḡû wayyiḇəgəḏû ka’ăḇwōṯām nehəpəḵû kəqešeṯ rəmîyâ: 58 wayyaḵə‘îsûhû bəḇāmwōṯām ûḇifəsîlêhem yaqənî’ûhû: 59 šāma‘ ’ĕlōhîm wayyiṯə‘abār wayyimə’as mə’ōḏ bəyiśərā’ēl: 60 wayyiṭṭōš mišəkan šilwō ’ōhel šikēn bā’āḏām: 61 wayyitēn laššəḇî ‘uzzwō wəṯifə’arətwō ḇəyaḏ-ṣār: 62 wayyasəgēr laḥereḇ ‘ammwō ûḇənaḥălāṯwō hiṯə‘abār: 63 baḥûrāyw ’āḵəlâ-’ēš ûḇəṯûlōṯāyw lō’ hûllālû: 64 kōhănāyw baḥereḇ nāfālû wə’aləmənōṯāyw lō’ ṯiḇəkeynâ: 65 wayyiqaṣ kəyāšēn| ’ăḏōnāy kəḡibwōr miṯərwōnēn mîyāyin: 66 wayyaḵə-ṣārāyw ’āḥwōr ḥerəpaṯ ‘wōlām nāṯan lāmwō: 67 wayyimə’as bə’ōhel ywōsēf ûḇəšēḇeṭ ’efərayim lō’ ḇāḥār: 68 wayyiḇəḥar ’eṯ-šēḇeṭ yəhûḏâ ’eṯ-har ṣîywōn ’ăšer ’âēḇ: 69 wayyiḇen kəmwō-rāmîm miqədāšwō kə’ereṣ yəsāḏāh lə‘wōlām: 70 wayyiḇəḥar bəḏāwiḏ ‘aḇədwō wayyiqqāḥēhû mimmiḵələ’ōṯ ṣō’n: 71 mē’aḥar ‘ālwōṯ hĕḇî’wō lirə‘wōṯ bəya‘ăqōḇ ‘ammwō ûḇəyiśərā’ēl naḥălāṯwō: 72 wayyirə‘ēm kəṯōm ləḇāḇwō ûḇiṯəḇûnwōṯ kapāyw yanəḥēm: