Psalms (Tehilim): Psalms (Tehilim) Chapter 73

Tanach (Hebrew): Psalms (Tehilim) Chapter 73

‎1 ‏מִזְמ֗וֹר לְאָ֫סָ֥ף אַ֤ךְ ט֭וֹב לְיִשְׂרָאֵ֥ל אֱלֹהִ֗ים לְבָרֵ֥י לֵבָֽב׃ ‎2 ‏וַאֲנִ֗י כִּ֭מְעַט נטוי נָטָ֣יוּ רַגְלָ֑י כְּ֝אַ֗יִן שפכה שֻׁפְּכ֥וּ אֲשֻׁרָֽי׃ ‎3 ‏כִּֽי־קִ֭נֵּאתִי בַּֽהוֹלְלִ֑ים שְׁל֖וֹם רְשָׁעִ֣ים אֶרְאֶֽה׃ ‎4 ‏כִּ֤י אֵ֖ין חַרְצֻבּ֥וֹת לְמוֹתָ֗ם וּבָרִ֥יא אוּלָֽם׃ ‎5 ‏בַּעֲמַ֣ל אֱנ֣וֹשׁ אֵינֵ֑מוֹ וְעִם־אָ֝דָ֗ם לֹ֣א יְנֻגָּֽעוּ׃ ‎6 ‏לָ֭כֵן עֲנָקַ֣תְמוֹ גַאֲוָ֑ה יַעֲטָף־שִׁ֝֗ית חָמָ֥ס לָֽמוֹ׃ ‎7 ‏יָ֭צָא מֵחֵ֣לֶב עֵינֵ֑מוֹ עָ֝בְר֗וּ מַשְׂכִּיּ֥וֹת לֵבָֽב׃ ‎8 ‏יָמִ֤יקוּ׀ וִידַבְּר֣וּ בְרָ֣ע עֹ֑שֶׁק מִמָּר֥וֹם יְדַבֵּֽרוּ׃ ‎9 ‏שַׁתּ֣וּ בַשָּׁמַ֣יִם פִּיהֶ֑ם וּ֝לְשׁוֹנָ֗ם תִּֽהֲלַ֥ךְ בָּאָֽרֶץ׃ ‎10 ‏לָכֵ֤ן׀ ישיב יָשׁ֣וּב עַמּ֣וֹ הֲלֹ֑ם וּמֵ֥י מָ֝לֵ֗א יִמָּ֥צוּ לָֽמוֹ׃ ‎11 ‏וְֽאָמְר֗וּ אֵיכָ֥ה יָדַֽע־אֵ֑ל וְיֵ֖שׁ דֵּעָ֣ה בְעֶלְיֽוֹן׃ ‎12 ‏הִנֵּה־אֵ֥לֶּה רְשָׁעִ֑ים וְשַׁלְוֵ֥י ע֝וֹלָ֗ם הִשְׂגּוּ־חָֽיִל׃ ‎13 ‏אַךְ־רִ֭יק זִכִּ֣יתִי לְבָבִ֑י וָאֶרְחַ֖ץ בְּנִקָּי֣וֹן כַּפָּֽי׃ ‎14 ‏וָאֱהִ֣י נָ֭גוּעַ כָּל־הַיּ֑וֹם וְ֝תוֹכַחְתִּ֗י לַבְּקָרִֽים׃ ‎15 ‏אִם־אָ֭מַרְתִּי אֲסַפְּרָ֥ה כְמ֑וֹ הִנֵּ֤ה ד֭וֹר בָּנֶ֣יךָ בָגָֽדְתִּי׃ ‎16 ‏וָֽ֭אֲחַשְּׁבָה לָדַ֣עַת זֹ֑את עָמָ֖ל היא ה֣וּא בְעֵינָֽי׃ ‎17 ‏עַד־אָ֭בוֹא אֶל־מִקְדְּשֵׁי־אֵ֑ל אָ֝בִ֗ינָה לְאַחֲרִיתָֽם׃ ‎18 ‏אַ֣ךְ בַּ֭חֲלָקוֹת תָּשִׁ֣ית לָ֑מוֹ הִ֝פַּלְתָּ֗ם לְמַשּׁוּאֽוֹת׃ ‎19 ‏אֵ֤יךְ הָי֣וּ לְשַׁמָּ֣ה כְרָ֑גַע סָ֥פוּ תַ֝֗מּוּ מִן־בַּלָּהֽוֹת׃ ‎20 ‏כַּחֲל֥וֹם מֵהָקִ֑יץ אֲ֝דֹנָי בָּעִ֤יר׀ צַלְמָ֬ם תִּבְזֶֽה׃ ‎21 ‏כִּ֭י יִתְחַמֵּ֣ץ לְבָבִ֑י וְ֝כִלְיוֹתַ֗י אֶשְׁתּוֹנָֽן׃ ‎22 ‏וַאֲנִי־בַ֭עַר וְלֹ֣א אֵדָ֑ע בְּ֝הֵמ֗וֹת הָיִ֥יתִי עִמָּֽךְ׃ ‎23 ‏וַאֲנִ֣י תָמִ֣יד עִמָּ֑ךְ אָ֝חַ֗זְתָּ בְּיַד־יְמִינִֽי׃ ‎24 ‏בַּעֲצָתְךָ֥ תַנְחֵ֑נִי וְ֝אַחַ֗ר כָּב֥וֹד תִּקָּחֵֽנִי׃ ‎25 ‏מִי־לִ֥י בַשָּׁמָ֑יִם וְ֝עִמְּךָ֗ לֹא־חָפַ֥צְתִּי בָאָֽרֶץ׃ ‎26 ‏כָּלָ֥ה שְׁאֵרִ֗י וּלְבָ֫בִ֥י צוּר־לְבָבִ֥י וְחֶלְקִ֗י אֱלֹהִ֥ים לְעוֹלָֽם׃ ‎27 ‏כִּֽי־הִנֵּ֣ה רְחֵקֶ֣יךָ יֹאבֵ֑דוּ הִ֝צְמַ֗תָּה כָּל־זוֹנֶ֥ה מִמֶּֽךָּ׃ ‎28 ‏וַאֲנִ֤י׀ קִֽרֲבַ֥ת אֱלֹהִ֗ים לִ֫י־ט֥וֹב שַׁתִּ֤י׀ בַּאדֹנָ֣י יְהוִֹ֣ה מַחְסִ֑י לְ֝סַפֵּ֗ר כָּל־מַלְאֲכוֹתֶֽיךָ׃

1 mizəmwōr lə’āsāf ’aḵə ṭwōḇ ləyiśərā’ēl ’ĕlōhîm ləḇārê lēḇāḇ: 2 wa’ănî kimə‘aṭ nāṭûy nāṭāyû raḡəlāy kə’ayin šupəḵâ šupəḵû ’ăšurāy: 3 kî-qinnē’ṯî bahwōləlîm šəlwōm rəšā‘îm ’erə’eh: 4 kî ’ên ḥarəṣubwōṯ ləmwōṯām ûḇārî’ ’ûlām: 5 ba‘ămal ’ĕnwōš ’ênēmwō wə‘im-’āḏām lō’ yənugā‘û: 6 lāḵēn ‘ănāqaṯəmwō ḡa’ăwâ ya‘ăṭāf-šîṯ ḥāmās lāmwō: 7 yāṣā’ mēḥēleḇ ‘ênēmwō ‘āḇərû maśəkîywōṯ lēḇāḇ: 8 yāmîqû| wîḏabərû ḇərā‘ ‘ōšeq mimmārwōm yəḏabērû: 9 šatû ḇaššāmayim pîhem ûləšwōnām tihălaḵə bā’āreṣ: 10 lāḵēn| yāšîḇ yāšûḇ ‘ammwō hălōm ûmê mālē’ yimmāṣû lāmwō: 11 wə’āmərû ’êḵâ yāḏa‘-’ēl wəyēš dē‘â ḇə‘eləywōn: 12 hinnēh-’ēlleh rəšā‘îm wəšaləwê ‘wōlām hiśəgû-ḥāyil: 13 ’aḵə-rîq zikîṯî ləḇāḇî wā’erəḥaṣ bəniqqāywōn kapāy: 14 wā’ĕhî nāḡû‘a kāl-hayywōm wəṯwōḵaḥətî labəqārîm: 15 ’im-’āmarətî ’ăsapərâ ḵəmwō hinnēh ḏwōr bāneyḵā ḇāḡāḏətî: 16 wā’ăḥaššəḇâ lāḏa‘aṯ zō’ṯ ‘āmāl hî’ hû’ ḇə‘ênāy: 17 ‘aḏ-’āḇwō’ ’el-miqədəšê-’ēl ’āḇînâ lə’aḥărîṯām: 18 ’aḵə baḥălāqwōṯ tāšîṯ lāmwō hipalətām ləmaššû’wōṯ: 19 ’êḵə hāyû ləšammâ ḵərāḡa‘ sāfû ṯammû min-ballâwōṯ: 20 kaḥălwōm mēhāqîṣ ’ăḏōnāy bā‘îr| ṣaləmām tiḇəzeh: 21 kî yiṯəḥammēṣ ləḇāḇî wəḵiləywōṯay ’ešətwōnān: 22 wa’ănî-ḇa‘ar wəlō’ ’ēḏā‘ bəhēmwōṯ hāyîṯî ‘immāḵə: 23 wa’ănî ṯāmîḏ ‘immāḵə ’āḥazətā bəyaḏ-yəmînî: 24 ba‘ăṣāṯəḵā ṯanəḥēnî wə’aḥar kāḇwōḏ tiqqāḥēnî: 25 mî-lî ḇaššāmāyim wə‘imməḵā lō’-ḥāfaṣətî ḇā’āreṣ: 26 kālâ šə’ērî ûləḇāḇî ṣûr-ləḇāḇî wəḥeləqî ’ĕlōhîm lə‘wōlām: 27 kî-hinnēh rəḥēqeyḵā yō’ḇēḏû hiṣəmatâ kāl-zwōneh mimmeḵḵā: 28 wa’ănî| qirăḇaṯ ’ĕlōhîm lî-ṭwōḇ šatî| ba’ḏōnāy yəhwōih maḥəsî ləsapēr kāl-malə’ăḵwōṯeyḵā: