Psalms (Tehilim): Psalms (Tehilim) Chapter 7

Tanach (Hebrew): Psalms (Tehilim) Chapter 7

‎1 ‏שִׁגָּי֗וֹן לְדָ֫וִ֥ד אֲשֶׁר־שָׁ֥ר לַיהוָ֑ה עַל־דִּבְרֵי־כ֝֗וּשׁ בֶּן־יְמִינִֽי׃ ‎2 ‏יְהוָ֣ה אֱ֭לֹהַי בְּךָ֣ חָסִ֑יתִי הוֹשִׁיעֵ֥נִי מִכָּל־רֹ֝דְפַ֗י וְהַצִּילֵֽנִי׃ ‎3 ‏פֶּן־יִטְרֹ֣ף כְּאַרְיֵ֣ה נַפְשִׁ֑י פֹּ֝רֵ֗ק וְאֵ֣ין מַצִּֽיל׃ ‎4 ‏יְהוָ֣ה אֱ֭לֹהַי אִם־עָשִׂ֣יתִי זֹ֑את אִֽם־יֶשׁ־עָ֥וֶל בְּכַפָּֽי׃ ‎5 ‏אִם־גָּ֭מַלְתִּי שֽׁוֹלְמִ֥י רָ֑ע וָאֲחַלְּצָ֖ה צוֹרְרִ֣י רֵיקָֽם׃ ‎6 ‏יִֽרַדֹּ֥ף אוֹיֵ֨ב׀ נַפְשִׁ֡י וְיַשֵּׂ֗ג וְיִרְמֹ֣ס לָאָ֣רֶץ חַיָּ֑י וּכְבוֹדִ֓י׀ לֶעָפָ֖ר יַשְׁכֵּ֣ן סֶֽלָה׃ ‎7 ‏ק֘וּמָ֤ה יְהוָ֨ה׀ בְּאַפֶּ֗ךָ הִ֭נָּשֵׂא בְּעַבְר֣וֹת צוֹרְרָ֑י וְע֥וּרָה אֵ֝לַ֗י מִשְׁפָּ֥ט צִוִּֽיתָ׃ ‎8 ‏וַעֲדַ֣ת לְ֭אֻמִּים תְּסוֹבְבֶ֑ךָּ וְ֝עָלֶ֗יהָ לַמָּר֥וֹם שֽׁוּבָה׃ ‎9 ‏יְהוָה֮ יָדִ֪ין עַ֫מִּ֥ים שָׁפְטֵ֥נִי יְהוָ֑ה כְּצִדְקִ֖י וּכְתֻמִּ֣י עָלָֽי׃ ‎10 ‏יִגְמָר־נָ֬א רַ֨ע׀ רְשָׁעִים֮ וּתְכוֹנֵ֪ן צַ֫דִּ֥יק וּבֹחֵ֣ן לִ֭בּ֗וֹת וּכְלָי֗וֹת אֱלֹהִ֥ים צַדִּֽיק׃ ‎11 ‏מָֽגִנִּ֥י עַל־אֱלֹהִ֑ים מ֝וֹשִׁ֗יעַ יִשְׁרֵי־לֵֽב׃ ‎12 ‏אֱ֭לֹהִים שׁוֹפֵ֣ט צַדִּ֑יק וְ֝אֵ֗ל זֹעֵ֥ם בְּכָל־יֽוֹם׃ ‎13 ‏אִם־לֹ֣א יָ֭שׁוּב חַרְבּ֣וֹ יִלְט֑וֹשׁ קַשְׁתּ֥וֹ דָ֝רַ֗ךְ וַֽיְכוֹנְנֶֽהָ׃ ‎14 ‏וְ֭לוֹ הֵכִ֣ין כְּלֵי־מָ֑וֶת חִ֝צָּ֗יו לְֽדֹלְקִ֥ים יִפְעָֽל׃ ‎15 ‏הִנֵּ֥ה יְחַבֶּל־אָ֑וֶן וְהָרָ֥ה עָ֝מָ֗ל וְיָ֣לַד שָֽׁקֶר׃ ‎16 ‏בּ֣וֹר כָּ֭רָֽה וַֽיַּחְפְּרֵ֑הוּ וַ֝יִּפֹּ֗ל בְּשַׁ֣חַת יִפְעָֽל׃ ‎17 ‏יָשׁ֣וּב עֲמָל֣וֹ בְרֹאשׁ֑וֹ וְעַ֥ל קָ֝דְקֳד֗וֹ חֲמָס֥וֹ יֵרֵֽד׃ ‎18 ‏אוֹדֶ֣ה יְהוָ֣ה כְּצִדְק֑וֹ וַ֝אֲזַמְּרָ֗ה שֵֽׁם־יְהוָ֥ה עֶלְיֽוֹן׃

1 šigāywōn ləḏāwiḏ ’ăšer-šār layhwâ ‘al-diḇərê-ḵûš ben-yəmînî: 2 yəhwâ ’ĕlōhay bəḵā ḥāsîṯî hwōšî‘ēnî mikāl-rōḏəfay wəhaṣṣîlēnî: 3 pen-yiṭərōf kə’arəyēh nafəšî pōrēq wə’ên maṣṣîl: 4 yəhwâ ’ĕlōhay ’im-‘āśîṯî zō’ṯ ’im-yeš-‘āwel bəḵapāy: 5 ’im-gāmalətî šwōləmî rā‘ wā’ăḥalləṣâ ṣwōrərî rêqām: 6 yiradōf ’wōyēḇ| nafəšî wəyaśśēḡ wəyirəmōs lā’āreṣ ḥayyāy ûḵəḇwōḏî| le‘āfār yašəkēn selâ: 7 qûmâ yəhwâ| bə’apeḵā hinnāśē’ bə‘aḇərwōṯ ṣwōrərāy wə‘ûrâ ’ēlay mišəpāṭ ṣiûîṯā: 8 wa‘ăḏaṯ lə’ummîm təswōḇəḇeḵḵā wə‘āleyhā lammārwōm šûḇâ: 9 yəhwâ yāḏîn ‘ammîm šāfəṭēnî yəhwâ kəṣiḏəqî ûḵəṯummî ‘ālāy: 10 yiḡəmār-nā’ ra‘| rəšā‘îm ûṯəḵwōnēn ṣadîq ûḇōḥēn libwōṯ ûḵəlāywōṯ ’ĕlōhîm ṣadîq: 11 māḡinnî ‘al-’ĕlōhîm mwōšî‘a yišərê-lēḇ: 12 ’ĕlōhîm šwōfēṭ ṣadîq wə’ēl zō‘ēm bəḵāl-ywōm: 13 ’im-lō’ yāšûḇ ḥarəbwō yiləṭwōš qašətwō ḏāraḵə wayəḵwōnənehā: 14 wəlwō hēḵîn kəlê-māweṯ ḥiṣṣāyw ləḏōləqîm yifə‘āl: 15 hinnēh yəḥabel-’āwen wəhārâ ‘āmāl wəyālaḏ šāqer: 16 bwōr kārâ wayyaḥəpərēhû wayyipōl bəšaḥaṯ yifə‘āl: 17 yāšûḇ ‘ămālwō ḇərō’šwō wə‘al qāḏəqŏḏwō ḥămāswō yērēḏ: 18 ’wōḏeh yəhwâ kəṣiḏəqwō wa’ăzammərâ šēm-yəhwâ ‘eləywōn: