Psalms (Tehilim): Psalms (Tehilim) Chapter 65

Tanach (Hebrew): Psalms (Tehilim) Chapter 65

‎1 ‏לַמְנַצֵּ֥חַ מִזְמ֗וֹר לְדָוִ֥ד שִֽׁיר׃ ‎2 ‏לְךָ֤ דֻֽמִיָּ֬ה תְהִלָּ֓ה אֱלֹ֘הִ֥ים בְּצִיּ֑וֹן וּ֝לְךָ֗ יְשֻׁלַּם־נֶֽדֶר׃ ‎3 ‏שֹׁמֵ֥עַ תְּפִלָּ֑ה עָ֝דֶ֗יךָ כָּל־בָּשָׂ֥ר יָבֹֽאוּ׃ ‎4 ‏דִּבְרֵ֣י עֲ֭וֹנֹת גָּ֣בְרוּ מֶ֑נִּי פְּ֝שָׁעֵ֗ינוּ אַתָּ֥ה תְכַפְּרֵֽם׃ ‎5 ‏אַשְׁרֵ֤י׀ תִּֽבְחַ֣ר וּתְקָרֵב֮ יִשְׁכֹּ֪ן חֲצֵ֫רֶ֥יךָ נִ֭שְׂבְּעָה בְּט֣וּב בֵּיתֶ֑ךָ קְ֝דֹ֗שׁ הֵיכָלֶֽךָ׃ ‎6 ‏נ֤וֹרָא֨וֹת׀ בְּצֶ֣דֶק תַּ֭עֲנֵנוּ אֱלֹהֵ֣י יִשְׁעֵ֑נוּ מִבְטָ֥ח כָּל־קַצְוֵי־אֶ֝֗רֶץ וְיָ֣ם רְחֹקִֽים׃ ‎7 ‏מֵכִ֣ין הָרִ֣ים בְּכֹח֑וֹ נֶ֝אְזָ֗ר בִּגְבוּרָֽה׃ ‎8 ‏מַשְׁבִּ֤יחַ׀ שְׁא֣וֹן יַ֭מִּים שְׁא֥וֹן גַּלֵּיהֶ֗ם וַהֲמ֥וֹן לְאֻמִּֽים׃ ‎9 ‏וַיִּ֤ירְא֨וּ׀ יֹשְׁבֵ֣י קְ֭צָוֹת מֵאוֹתֹתֶ֑יךָ מ֤וֹצָֽאֵי־בֹ֖קֶר וָעֶ֣רֶב תַּרְנִֽין׃ ‎10 ‏פָּקַ֥דְתָּ הָאָ֨רֶץ׀ וַתְּשֹׁ֪קְקֶ֡הָ רַבַּ֬ת תַּעְשְׁרֶ֗נָּה פֶּ֣לֶג אֱ֭לֹהִים מָ֣לֵא מָ֑יִם תָּכִ֥ין דְּ֝גָנָ֗ם כִּי־כֵ֥ן תְּכִינֶֽהָ׃ ‎11 ‏תְּלָמֶ֣יהָ רַ֭וֵּה נַחֵ֣ת גְּדוּדֶ֑יהָ בִּרְבִיבִ֥ים תְּ֝מֹגְגֶ֗נָּה צִמְחָ֥הּ תְּבָרֵֽךְ׃ ‎12 ‏עִ֭טַּרְתָּ שְׁנַ֣ת טוֹבָתֶ֑ךָ וּ֝מַעְגָּלֶ֗יךָ יִרְעֲפ֥וּן דָּֽשֶׁן׃ ‎13 ‏יִ֭רְעֲפוּ נְא֣וֹת מִדְבָּ֑ר וְ֝גִ֗יל גְּבָע֥וֹת תַּחְגֹּֽרְנָה׃ ‎14 ‏לָבְשׁ֬וּ כָרִ֨ים׀ הַצֹּ֗אן וַעֲמָקִ֥ים יַֽעַטְפוּ־בָ֑ר יִ֝תְרוֹעֲע֗וּ אַף־יָשִֽׁירוּ׃

1 lamənaṣṣēḥa mizəmwōr ləḏāwiḏ šîr: 2 ləḵā ḏumîyâ ṯəhillâ ’ĕlōhîm bəṣîywōn ûləḵā yəšullam-neḏer: 3 šōmē‘a təfillâ ‘āḏeyḵā kāl-bāśār yāḇō’û: 4 diḇərê ‘ăwōnōṯ gāḇərû mennî pəšā‘ênû ’atâ ṯəḵapərēm: 5 ’ašərê| tiḇəḥar ûṯəqārēḇ yišəkōn ḥăṣēreyḵā niśəbə‘â bəṭûḇ bêṯeḵā qəḏōš hêḵāleḵā: 6 nwōrā’wōṯ| bəṣeḏeq ta‘ănēnû ’ĕlōhê yišə‘ēnû miḇəṭāḥ kāl-qaṣəwê-’ereṣ wəyām rəḥōqîm: 7 mēḵîn hārîm bəḵōḥwō ne’əzār biḡəḇûrâ: 8 mašəbîḥa| šə’wōn yammîm šə’wōn gallêhem wahămwōn lə’ummîm: 9 wayyîrə’û| yōšəḇê qəṣāwōṯ mē’wōṯōṯeyḵā mwōṣā’ê-ḇōqer wā‘ereḇ tarənîn: 10 pāqaḏətā hā’āreṣ| watəšōqəqehā rabaṯ ta‘əšərennâ peleḡ ’ĕlōhîm mālē’ māyim tāḵîn dəḡānām kî-ḵēn təḵînehā: 11 təlāmeyhā raûēh naḥēṯ gəḏûḏeyhā birəḇîḇîm təmōḡəḡennâ ṣiməḥāh təḇārēḵə: 12 ‘iṭṭarətā šənaṯ ṭwōḇāṯeḵā ûma‘əgāleyḵā yirə‘ăfûn dāšen: 13 yirə‘ăfû nə’wōṯ miḏəbār wəḡîl gəḇā‘wōṯ taḥəgōrənâ: 14 lāḇəšû ḵārîm| haṣṣō’n wa‘ămāqîm ya‘aṭəfû-ḇār yiṯərwō‘ă‘û ’af-yāšîrû: