Psalms (Tehilim): Psalms (Tehilim) Chapter 63

Tanach (Hebrew): Psalms (Tehilim) Chapter 63

‎1 ‏מִזְמ֥וֹר לְדָוִ֑ד בִּ֝הְיוֹת֗וֹ בְּמִדְבַּ֥ר יְהוּדָֽה׃ ‎2 ‏אֱלֹהִ֤ים׀ אֵלִ֥י אַתָּ֗ה אֲ‍ֽשַׁחֲ֫רֶ֥ךָּ צָמְאָ֬ה לְךָ֨׀ נַפְשִׁ֗י כָּמַ֣הּ לְךָ֣ בְשָׂרִ֑י בְּאֶֽרֶץ־צִיָּ֖ה וְעָיֵ֣ף בְּלִי־מָֽיִם׃ ‎3 ‏כֵּ֭ן בַּקֹּ֣דֶשׁ חֲזִיתִ֑יךָ לִרְא֥וֹת עֻ֝זְּךָ֗ וּכְבוֹדֶֽךָ׃ ‎4 ‏כִּי־ט֣וֹב חַ֭סְדְּךָ מֵֽחַיִּ֗ים שְׂפָתַ֥י יְשַׁבְּחֽוּנְךָ׃ ‎5 ‏כֵּ֣ן אֲבָרֶכְךָ֣ בְחַיָּ֑י בְּ֝שִׁמְךָ אֶשָּׂ֥א כַפָּֽי׃ ‎6 ‏כְּמ֤וֹ חֵ֣לֶב וָ֭דֶשֶׁן תִּשְׂבַּ֣ע נַפְשִׁ֑י וְשִׂפְתֵ֥י רְ֝נָנ֗וֹת יְהַלֶּל־פִּֽי׃ ‎7 ‏אִם־זְכַרְתִּ֥יךָ עַל־יְצוּעָ֑י בְּ֝אַשְׁמֻר֗וֹת אֶהְגֶּה־בָּֽךְ׃ ‎8 ‏כִּֽי־הָיִ֣יתָ עֶזְרָ֣תָה לִּ֑י וּבְצֵ֖ל כְּנָפֶ֣יךָ אֲרַנֵּֽן׃ ‎9 ‏דָּבְקָ֣ה נַפְשִׁ֣י אַחֲרֶ֑יךָ בִּ֝֗י תָּמְכָ֥ה יְמִינֶֽךָ׃ ‎10 ‏וְהֵ֗מָּה לְ֭שׁוֹאָה יְבַקְשׁ֣וּ נַפְשִׁ֑י יָ֝בֹ֗אוּ בְּֽתַחְתִּיּ֥וֹת הָאָֽרֶץ׃ ‎11 ‏יַגִּירֻ֥הוּ עַל־יְדֵי־חָ֑רֶב מְנָ֖ת שֻׁעָלִ֣ים יִהְיֽוּ׃ ‎12 ‏וְהַמֶּלֶךְ֮ יִשְׂמַ֪ח בֵּאלֹ֫הִ֥ים יִ֭תְהַלֵּל כָּל־הַנִּשְׁבָּ֣ע בּ֑וֹ כִּ֥י יִ֝סָּכֵ֗ר פִּ֣י דֽוֹבְרֵי־שָֽׁקֶר׃

1 mizəmwōr ləḏāwiḏ bihəywōṯwō bəmiḏəbar yəhûḏâ: 2 ’ĕlōhîm| ’ēlî ’atâ ’ă‍šaḥăreḵḵā ṣāmə’â ləḵā| nafəšî kāmah ləḵā ḇəśārî bə’ereṣ-ṣîyâ wə‘āyēf bəlî-māyim: 3 kēn baqqōḏeš ḥăzîṯîḵā lirə’wōṯ ‘uzzəḵā ûḵəḇwōḏeḵā: 4 kî-ṭwōḇ ḥasədəḵā mēḥayyîm śəfāṯay yəšabəḥûnəḵā: 5 kēn ’ăḇāreḵəḵā ḇəḥayyāy bəšiməḵā ’eśśā’ ḵapāy: 6 kəmwō ḥēleḇ wāḏešen tiśəba‘ nafəšî wəśifəṯê rənānwōṯ yəhallel-pî: 7 ’im-zəḵarətîḵā ‘al-yəṣû‘āy bə’ašəmurwōṯ ’ehəgeh-bāḵə: 8 kî-hāyîṯā ‘ezərāṯâ llî ûḇəṣēl kənāfeyḵā ’ărannēn: 9 dāḇəqâ nafəšî ’aḥăreyḵā bî tāməḵâ yəmîneḵā: 10 wəhēmmâ ləšwō’â yəḇaqəšû nafəšî yāḇō’û bəṯaḥətîywōṯ hā’āreṣ: 11 yagîruhû ‘al-yəḏê-ḥāreḇ mənāṯ šu‘ālîm yihəyû: 12 wəhammeleḵə yiśəmaḥ bē’lōhîm yiṯəhallēl kāl-hannišəbā‘ bwō kî yissāḵēr pî ḏwōḇərê-šāqer: