Psalms (Tehilim): Psalms (Tehilim) Chapter 59

Tanach (Hebrew): Psalms (Tehilim) Chapter 59

‎1 ‏לַמְנַצֵּ֣חַ אַל־תַּשְׁחֵת֮ לְדָוִ֪ד מִ֫כְתָּ֥ם בִּשְׁלֹ֥חַ שָׁא֑וּל וַֽיִּשְׁמְר֥וּ אֶת־הַ֝בַּ֗יִת לַהֲמִיתֽוֹ׃ ‎2 ‏הַצִּילֵ֖נִי מֵאֹיְבַ֥י׀ אֱלֹהָ֑י מִּמִתְקוֹמְמַ֥י תְּשַׂגְּבֵֽנִי׃ ‎3 ‏הַ֭צִּילֵנִי מִפֹּ֣עֲלֵי אָ֑וֶן וּֽמֵאַנְשֵׁ֥י דָ֝מִ֗ים הוֹשִׁיעֵֽנִי׃ ‎4 ‏כִּ֤י הִנֵּ֪ה אָֽרְב֡וּ לְנַפְשִׁ֗י יָג֣וּרוּ עָלַ֣י עַזִ֑ים לֹא־פִשְׁעִ֖י וְלֹא־חַטָּאתִ֣י יְהוָֽה׃ ‎5 ‏בְּֽלִי־עָ֭וֹן יְרוּצ֣וּן וְיִכּוֹנָ֑נוּ ע֖וּרָה לִקְרָאתִ֣י וּרְאֵה׃ ‎6 ‏וְאַתָּ֤ה יְהוָֽה־אֱלֹהִ֥ים׀ צְבָא֡וֹת אֱלֹ֘הֵ֤י יִשְׂרָאֵ֗ל הָקִ֗יצָה לִפְקֹ֥ד כָּֽל־הַגּוֹיִ֑ם אַל־תָּחֹ֨ן כָּל־בֹּ֖גְדֵי אָ֣וֶן סֶֽלָה׃ ‎7 ‏יָשׁ֣וּבוּ לָ֭עֶרֶב יֶהֱמ֥וּ כַכָּ֗לֶב וִיס֥וֹבְבוּ עִֽיר׃ ‎8 ‏הִנֵּ֤ה׀ יַבִּ֘יע֤וּן בְּפִיהֶ֗ם חֲ֭רָבוֹת בְּשִׂפְתוֹתֵיהֶ֑ם כִּי־מִ֥י שֹׁמֵֽעַ׃ ‎9 ‏וְאַתָּ֣ה יְ֭הוָה תִּשְׂחַק־לָ֑מוֹ תִּ֝לְעַ֗ג לְכָל־גּוֹיִֽם׃ ‎10 ‏עֻ֭זּוֹ אֵלֶ֣יךָ אֶשְׁמֹ֑רָה כִּֽי־אֱ֝לֹהִ֗ים מִשְׂגַּבִּֽי׃ ‎11 ‏אֱלֹהֵ֣י חסדו חַסְדִּ֣י יְקַדְּמֵ֑נִי אֱ֝לֹהִ֗ים יַרְאֵ֥נִי בְשֹׁרְרָֽי׃ ‎12 ‏אַל־תַּהַרְגֵ֤ם׀ פֶּֽן־יִשְׁכְּח֬וּ עַמִּ֗י הֲנִיעֵ֣מוֹ בְ֭חֵילְךָ וְהוֹרִידֵ֑מוֹ מָֽגִנֵּ֣נוּ אֲדֹנָֽי׃ ‎13 ‏חַטַּאת־פִּ֗ימוֹ דְּֽבַר־שְׂפָ֫תֵ֥ימוֹ וְיִלָּכְד֥וּ בִגְאוֹנָ֑ם וּמֵאָלָ֖ה וּמִכַּ֣חַשׁ יְסַפֵּֽרוּ׃ ‎14 ‏כַּלֵּ֥ה בְחֵמָה֮ כַּלֵּ֪ה וְֽאֵ֫ינֵ֥מוֹ וְֽיֵדְע֗וּ כִּֽי־אֱ֭לֹהִים מֹשֵׁ֣ל בְּיַעֲקֹ֑ב לְאַפְסֵ֖י הָאָ֣רֶץ סֶֽלָה׃ ‎15 ‏וְיָשׁ֣וּבוּ לָ֭עֶרֶב יֶהֱמ֥וּ כַכָּ֗לֶב וִיס֥וֹבְבוּ עִֽיר׃ ‎16 ‏הֵ֭מָּה ינועון יְנִיע֣וּן לֶאֱכֹ֑ל אִם־לֹ֥א יִ֝שְׂבְּע֗וּ וַיָּלִֽינוּ׃ ‎17 ‏וַאֲנִ֤י׀ אָשִׁ֣יר עֻזֶּךָ֮ וַאֲרַנֵּ֥ן לַבֹּ֗קֶר חַ֫סְדֶּ֥ךָ כִּֽי־הָיִ֣יתָ מִשְׂגָּ֣ב לִ֑י וּ֝מָנ֗וֹס בְּי֣וֹם צַר־לִֽי׃ ‎18 ‏עֻ֭זִּי אֵלֶ֣יךָ אֲזַמֵּ֑רָה כִּֽי־אֱלֹהִ֥ים מִ֝שְׂגַּבִּ֗י אֱלֹהֵ֥י חַסְדִּֽי׃

1 lamənaṣṣēḥa ’al-tašəḥēṯ ləḏāwiḏ miḵətām bišəlōḥa šā’ûl wayyišəmərû ’eṯ-habayiṯ lahămîṯwō: 2 haṣṣîlēnî mē’ōyəḇay| ’ĕlōhāy mmimiṯəqwōməmay təśagəḇēnî: 3 haṣṣîlēnî mipō‘ălê ’āwen ûmē’anəšê ḏāmîm hwōšî‘ēnî: 4 kî hinnēh ’ārəḇû lənafəšî yāḡûrû ‘ālay ‘azîm lō’-fišə‘î wəlō’-ḥaṭṭā’ṯî yəhwâ: 5 bəlî-‘āwōn yərûṣûn wəyikwōnānû ‘ûrâ liqərā’ṯî ûrə’ēh: 6 wə’atâ yəhwâ-’ĕlōhîm| ṣəḇā’wōṯ ’ĕlōhê yiśərā’ēl hāqîṣâ lifəqōḏ kāl-hagwōyim ’al-tāḥōn kāl-bōḡəḏê ’āwen selâ: 7 yāšûḇû lā‘ereḇ yehĕmû ḵakāleḇ wîswōḇəḇû ‘îr: 8 hinnēh| yabî‘ûn bəfîhem ḥărāḇwōṯ bəśifəṯwōṯêhem kî-mî šōmē‘a: 9 wə’atâ yəhwâ tiśəḥaq-lāmwō tilə‘aḡ ləḵāl-gwōyim: 10 ‘uzzwō ’ēleyḵā ’ešəmōrâ kî-’ĕlōhîm miśəgabî: 11 ’ĕlōhê ḥasədwō ḥasədî yəqadəmēnî ’ĕlōhîm yarə’ēnî ḇəšōrərāy: 12 ’al-taharəḡēm| pen-yišəkəḥû ‘ammî hănî‘ēmwō ḇəḥêləḵā wəhwōrîḏēmwō māḡinnēnû ’ăḏōnāy: 13 ḥaṭṭa’ṯ-pîmwō dəḇar-śəfāṯêmwō wəyillāḵəḏû ḇiḡə’wōnām ûmē’ālâ ûmikaḥaš yəsapērû: 14 kallēh ḇəḥēmâ kallēh wə’ênēmwō wəyēḏə‘û kî-’ĕlōhîm mōšēl bəya‘ăqōḇ lə’afəsê hā’āreṣ selâ: 15 wəyāšûḇû lā‘ereḇ yehĕmû ḵakāleḇ wîswōḇəḇû ‘îr: 16 hēmmâ yənû‘ûn yənî‘ûn le’ĕḵōl ’im-lō’ yiśəbə‘û wayyālînû: 17 wa’ănî| ’āšîr ‘uzzeḵā wa’ărannēn labōqer ḥasədeḵā kî-hāyîṯā miśəgāḇ lî ûmānwōs bəywōm ṣar-lî: 18 ‘uzzî ’ēleyḵā ’ăzammērâ kî-’ĕlōhîm miśəgabî ’ĕlōhê ḥasədî: