Psalms (Tehilim): Psalms (Tehilim) Chapter 57

Tanach (Hebrew): Psalms (Tehilim) Chapter 57

‎1 ‏לַמְנַצֵּ֣חַ אַל־תַּ֭שְׁחֵת לְדָוִ֣ד מִכְתָּ֑ם בְּבָרְח֥וֹ מִפְּנֵי־שָׁ֝א֗וּל בַּמְּעָרָֽה׃ ‎2 ‏חָנֵּ֤נִי אֱלֹהִ֨ים׀ חָנֵּ֗נִי כִּ֥י בְךָ֮ חָסָ֪יָה נַ֫פְשִׁ֥י וּבְצֵֽל־כְּנָפֶ֥יךָ אֶחְסֶ֑ה עַ֝֗ד יַעֲבֹ֥ר הַוּֽוֹת׃ ‎3 ‏אֶ֭קְרָא לֵֽאלֹהִ֣ים עֶלְי֑וֹן לָ֝אֵ֗ל גֹּמֵ֥ר עָלָֽי׃ ‎4 ‏יִשְׁלַ֤ח מִשָּׁמַ֨יִם׀ וְֽיוֹשִׁיעֵ֗נִי חֵרֵ֣ף שֹׁאֲפִ֣י סֶ֑לָה יִשְׁלַ֥ח אֱ֝לֹהִ֗ים חַסְדּ֥וֹ וַאֲמִתּֽוֹ׃ ‎5 ‏נַפְשִׁ֤י׀ בְּת֥וֹךְ לְבָאִם֮ אֶשְׁכְּבָ֪ה לֹ֫הֲטִ֥ים בְּֽנֵי־אָדָ֗ם שִׁ֭נֵּיהֶם חֲנִ֣ית וְחִצִּ֑ים וּ֝לְשׁוֹנָ֗ם חֶ֣רֶב חַדָּֽה׃ ‎6 ‏ר֣וּמָה עַל־הַשָּׁמַ֣יִם אֱלֹהִ֑ים עַ֖ל כָּל־הָאָ֣רֶץ כְּבוֹדֶֽךָ׃ ‎7 ‏רֶ֤שֶׁת׀ הֵכִ֣ינוּ לִפְעָמַי֮ כָּפַ֪ף נַ֫פְשִׁ֥י כָּר֣וּ לְפָנַ֣י שִׁיחָ֑ה נָפְל֖וּ בְתוֹכָ֣הּ סֶֽלָה׃ ‎8 ‏נָ֘כ֤וֹן לִבִּ֣י אֱ֭לֹהִים נָכ֣וֹן לִבִּ֑י אָ֝שִׁ֗ירָה וַאֲזַמֵּֽרָה׃ ‎9 ‏ע֤וּרָה כְבוֹדִ֗י ע֭וּרָֽה הַנֵּ֥בֶל וְכִנּ֗וֹר אָעִ֥ירָה שָּֽׁחַר׃ ‎10 ‏אוֹדְךָ֖ בָעַמִּ֥ים׀ אֲדֹנָ֑י אֲ֝זַמֶּרְךָ֗ בַּל־אֻמִּֽים׃ ‎11 ‏כִּֽי־גָדֹ֣ל עַד־שָׁמַ֣יִם חַסְדֶּ֑ךָ וְֽעַד־שְׁחָקִ֥ים אֲמִתֶּֽךָ׃ ‎12 ‏ר֣וּמָה עַל־שָׁמַ֣יִם אֱלֹהִ֑ים עַ֖ל כָּל־הָאָ֣רֶץ כְּבוֹדֶֽךָ׃

1 lamənaṣṣēḥa ’al-tašəḥēṯ ləḏāwiḏ miḵətām bəḇārəḥwō mipənê-šā’ûl bammə‘ārâ: 2 ḥānnēnî ’ĕlōhîm| ḥānnēnî kî ḇəḵā ḥāsāyâ nafəšî ûḇəṣēl-kənāfeyḵā ’eḥəseh ‘aḏ ya‘ăḇōr haûwōṯ: 3 ’eqərā’ lē’lōhîm ‘eləywōn lā’ēl gōmēr ‘ālāy: 4 yišəlaḥ miššāmayim| wəywōšî‘ēnî ḥērēf šō’ăfî selâ yišəlaḥ ’ĕlōhîm ḥasədwō wa’ămitwō: 5 nafəšî| bəṯwōḵə ləḇā’im ’ešəkəḇâ lōhăṭîm bənê-’āḏām šinnêhem ḥănîṯ wəḥiṣṣîm ûləšwōnām ḥereḇ ḥadâ: 6 rûmâ ‘al-haššāmayim ’ĕlōhîm ‘al kāl-hā’āreṣ kəḇwōḏeḵā: 7 rešeṯ| hēḵînû lifə‘āmay kāfaf nafəšî kārû ləfānay šîḥâ nāfəlû ḇəṯwōḵāh selâ: 8 nāḵwōn libî ’ĕlōhîm nāḵwōn libî ’āšîrâ wa’ăzammērâ: 9 ‘ûrâ ḵəḇwōḏî ‘ûrâ hannēḇel wəḵinnwōr ’ā‘îrâ ššāḥar: 10 ’wōḏəḵā ḇā‘ammîm| ’ăḏōnāy ’ăzammerəḵā bal-’ummîm: 11 kî-ḡāḏōl ‘aḏ-šāmayim ḥasədeḵā wə‘aḏ-šəḥāqîm ’ămiteḵā: 12 rûmâ ‘al-šāmayim ’ĕlōhîm ‘al kāl-hā’āreṣ kəḇwōḏeḵā: