Psalms (Tehilim): Psalms (Tehilim) Chapter 48

Tanach (Hebrew): Psalms (Tehilim) Chapter 48

‎1 ‏שִׁ֥יר מִ֝זְמוֹר לִבְנֵי־קֹֽרַח׃ ‎2 ‏גָּ֘ד֤וֹל יְהוָ֣ה וּמְהֻלָּ֣ל מְאֹ֑ד בְּעִ֥יר אֱ֝לֹהֵ֗ינוּ הַר־קָדְשֽׁוֹ׃ ‎3 ‏יְפֵ֥ה נוֹף֮ מְשׂ֪וֹשׂ כָּל־הָ֫אָ֥רֶץ הַר־צִ֭יּוֹן יַרְכְּתֵ֣י צָפ֑וֹן קִ֝רְיַ֗ת מֶ֣לֶךְ רָֽב׃ ‎4 ‏אֱלֹהִ֥ים בְּאַרְמְנוֹתֶ֗יהָ נוֹדַ֥ע לְמִשְׂגָּֽב׃ ‎5 ‏כִּֽי־הִנֵּ֣ה הַ֭מְּלָכִים נֽוֹעֲד֑וּ עָבְר֥וּ יַחְדָּֽו׃ ‎6 ‏הֵ֣מָּה רָ֭אוּ כֵּ֣ן תָּמָ֑הוּ נִבְהֲל֥וּ נֶחְפָּֽזוּ׃ ‎7 ‏רְ֭עָדָה אֲחָזָ֣תַם שָׁ֑ם חִ֝֗יל כַּיּוֹלֵֽדָה׃ ‎8 ‏בְּר֥וּחַ קָדִ֑ים תְּ֝שַׁבֵּ֗ר אֳנִיּ֥וֹת תַּרְשִֽׁישׁ׃ ‎9 ‏כַּאֲשֶׁ֤ר שָׁמַ֨עְנוּ׀ כֵּ֤ן רָאִ֗ינוּ בְּעִיר־יְהוָ֣ה צְ֭בָאוֹת בְּעִ֣יר אֱלֹהֵ֑ינוּ אֱלֹ֘הִ֤ים יְכוֹנְנֶ֖הָ עַד־עוֹלָ֣ם סֶֽלָה׃ ‎10 ‏דִּמִּ֣ינוּ אֱלֹהִ֣ים חַסְדֶּ֑ךָ בְּ֝קֶ֗רֶב הֵיכָלֶֽךָ׃ ‎11 ‏כְּשִׁמְךָ֤ אֱלֹהִ֗ים כֵּ֣ן תְּ֭הִלָּתְךָ עַל־קַצְוֵי־אֶ֑רֶץ צֶ֝֗דֶק מָלְאָ֥ה יְמִינֶֽךָ׃ ‎12 ‏יִשְׂמַ֤ח׀ הַר־צִיּ֗וֹן תָּ֭גֵלְנָה בְּנ֣וֹת יְהוּדָ֑ה לְ֝מַ֗עַן מִשְׁפָּטֶֽיךָ׃ ‎13 ‏סֹ֣בּוּ צִ֭יּוֹן וְהַקִּיפ֑וּהָ סִ֝פְר֗וּ מִגְדָּלֶֽיהָ׃ ‎14 ‏שִׁ֤יתוּ לִבְּכֶ֨ם׀ לְֽחֵילָ֗ה פַּסְּג֥וּ אַרְמְנוֹתֶ֑יהָ לְמַ֥עַן תְּ֝סַפְּר֗וּ לְד֣וֹר אַחֲרֽוֹן׃ ‎15 ‏כִּ֤י זֶ֨ה׀ אֱלֹהִ֣ים אֱ֭לֹהֵינוּ עוֹלָ֣ם וָעֶ֑ד ה֖וּא יְנַהֲגֵ֣נוּ עַל־מֽוּת׃

1 šîr mizəmwōr liḇənê-qōraḥ: 2 gāḏwōl yəhwâ ûməhullāl mə’ōḏ bə‘îr ’ĕlōhênû har-qāḏəšwō: 3 yəfēh nwōf məśwōś kāl-hā’āreṣ har-ṣîywōn yarəkəṯê ṣāfwōn qirəyaṯ meleḵə rāḇ: 4 ’ĕlōhîm bə’arəmənwōṯeyhā nwōḏa‘ ləmiśəgāḇ: 5 kî-hinnēh hamməlāḵîm nwō‘ăḏû ‘āḇərû yaḥədāw: 6 hēmmâ rā’û kēn tāmâû niḇəhălû neḥəpāzû: 7 rə‘āḏâ ’ăḥāzāṯam šām ḥîl kayywōlēḏâ: 8 bərûḥa qāḏîm təšabēr ’ŏnîywōṯ tarəšîš: 9 ka’ăšer šāma‘ənû| kēn rā’înû bə‘îr-yəhwâ ṣəḇā’wōṯ bə‘îr ’ĕlōhênû ’ĕlōhîm yəḵwōnənehā ‘aḏ-‘wōlām selâ: 10 dimmînû ’ĕlōhîm ḥasədeḵā bəqereḇ hêḵāleḵā: 11 kəšiməḵā ’ĕlōhîm kēn təhillāṯəḵā ‘al-qaṣəwê-’ereṣ ṣeḏeq mālə’â yəmîneḵā: 12 yiśəmaḥ| har-ṣîywōn tāḡēlənâ bənwōṯ yəhûḏâ ləma‘an mišəpāṭeyḵā: 13 sōbû ṣîywōn wəhaqqîfûhā sifərû miḡədāleyhā: 14 šîṯû libəḵem| ləḥêlâ passəḡû ’arəmənwōṯeyhā ləma‘an təsapərû ləḏwōr ’aḥărwōn: 15 kî zeh| ’ĕlōhîm ’ĕlōhênû ‘wōlām wā‘eḏ hû’ yənahăḡēnû ‘al-mûṯ: