Psalms (Tehilim): Psalms (Tehilim) Chapter 46

Tanach (Hebrew): Psalms (Tehilim) Chapter 46

‎1 ‏לַמְנַצֵּ֥חַ לִבְנֵי־קֹ֑רַח עַֽל־עֲלָמ֥וֹת שִֽׁיר׃ ‎2 ‏אֱלֹהִ֣ים לָ֭נוּ מַחֲסֶ֣ה וָעֹ֑ז עֶזְרָ֥ה בְ֝צָר֗וֹת נִמְצָ֥א מְאֹֽד׃ ‎3 ‏עַל־כֵּ֣ן לֹא־נִ֭ירָא בְּהָמִ֣יר אָ֑רֶץ וּבְמ֥וֹט הָ֝רִ֗ים בְּלֵ֣ב יַמִּֽים׃ ‎4 ‏יֶהֱמ֣וּ יֶחְמְר֣וּ מֵימָ֑יו יִֽרְעֲשֽׁוּ־הָרִ֖ים בְּגַאֲוָת֣וֹ סֶֽלָה׃ ‎5 ‏נָהָ֗ר פְּלָגָ֗יו יְשַׂמְּח֥וּ עִיר־אֱלֹהִ֑ים קְ֝דֹ֗שׁ מִשְׁכְּנֵ֥י עֶלְיֽוֹן׃ ‎6 ‏אֱלֹהִ֣ים בְּ֭קִרְבָּהּ בַּל־תִּמּ֑וֹט יַעְזְרֶ֥הָ אֱ֝לֹהִ֗ים לִפְנ֥וֹת בֹּֽקֶר׃ ‎7 ‏הָמ֣וּ ג֖וֹיִם מָ֣טוּ מַמְלָכ֑וֹת נָתַ֥ן בְּ֝קוֹל֗וֹ תָּמ֥וּג אָֽרֶץ׃ ‎8 ‏יְהוָ֣ה צְבָא֣וֹת עִמָּ֑נוּ מִשְׂגָּֽב־לָ֝נוּ אֱלֹהֵ֖י יַעֲקֹ֣ב סֶֽלָה׃ ‎9 ‏לְֽכוּ־חֲ֭זוּ מִפְעֲל֣וֹת יְהוָ֑ה אֲשֶׁר־שָׂ֖ם שַׁמּ֣וֹת בָּאָֽרֶץ׃ ‎10 ‏מַשְׁבִּ֥ית מִלְחָמוֹת֮ עַד־קְצֵ֪ה הָ֫אָ֥רֶץ קֶ֣שֶׁת יְ֭שַׁבֵּר וְקִצֵּ֣ץ חֲנִ֑ית עֲ֝גָל֗וֹת יִשְׂרֹ֥ף בָּאֵֽשׁ׃ ‎11 ‏הַרְפּ֣וּ וּ֭דְעוּ כִּי־אָנֹכִ֣י אֱלֹהִ֑ים אָר֥וּם בַּ֝גּוֹיִ֗ם אָר֥וּם בָּאָֽרֶץ׃ ‎12 ‏יְהוָ֣ה צְבָא֣וֹת עִמָּ֑נוּ מִשְׂגָּֽב־לָ֝נוּ אֱלֹהֵ֖י יַעֲקֹ֣ב סֶֽלָה׃

1 lamənaṣṣēḥa liḇənê-qōraḥ ‘al-‘ălāmwōṯ šîr: 2 ’ĕlōhîm lānû maḥăseh wā‘ōz ‘ezərâ ḇəṣārwōṯ niməṣā’ mə’ōḏ: 3 ‘al-kēn lō’-nîrā’ bəhāmîr ’āreṣ ûḇəmwōṭ hārîm bəlēḇ yammîm: 4 yehĕmû yeḥəmərû mêmāyw yirə‘ăšû-hārîm bəḡa’ăwāṯwō selâ: 5 nâār pəlāḡāyw yəśamməḥû ‘îr-’ĕlōhîm qəḏōš mišəkənê ‘eləywōn: 6 ’ĕlōhîm bəqirəbāh bal-timmwōṭ ya‘əzərehā ’ĕlōhîm lifənwōṯ bōqer: 7 hāmû ḡwōyim māṭû maməlāḵwōṯ nāṯan bəqwōlwō tāmûḡ ’āreṣ: 8 yəhwâ ṣəḇā’wōṯ ‘immānû miśəgāḇ-lānû ’ĕlōhê ya‘ăqōḇ selâ: 9 ləḵû-ḥăzû mifə‘ălwōṯ yəhwâ ’ăšer-śām šammwōṯ bā’āreṣ: 10 mašəbîṯ miləḥāmwōṯ ‘aḏ-qəṣēh hā’āreṣ qešeṯ yəšabēr wəqiṣṣēṣ ḥănîṯ ‘ăḡālwōṯ yiśərōf bā’ēš: 11 harəpû ûḏə‘û kî-’ānōḵî ’ĕlōhîm ’ārûm bagwōyim ’ārûm bā’āreṣ: 12 yəhwâ ṣəḇā’wōṯ ‘immānû miśəgāḇ-lānû ’ĕlōhê ya‘ăqōḇ selâ: