Psalms (Tehilim): Psalms (Tehilim) Chapter 41

Tanach (Hebrew): Psalms (Tehilim) Chapter 41

‎1 ‏לַמְנַצֵּ֗חַ מִזְמ֥וֹר לְדָוִֽד׃ ‎2 ‏אַ֭שְׁרֵי מַשְׂכִּ֣יל אֶל־דָּ֑ל בְּי֥וֹם רָ֝עָ֗ה יְֽמַלְּטֵ֥הוּ יְהוָֽה׃ ‎3 ‏יְהוָ֤ה׀ יִשְׁמְרֵ֣הוּ וִֽ֭יחַיֵּהוּ יאשר וְאֻשַּׁ֣ר בָּאָ֑רֶץ וְאַֽל־תִּ֝תְּנֵ֗הוּ בְּנֶ֣פֶשׁ אֹיְבָֽיו׃ ‎4 ‏יְֽהוָ֗ה יִ֭סְעָדֶנּוּ עַל־עֶ֣רֶשׂ דְּוָ֑י כָּל־מִ֝שְׁכָּב֗וֹ הָפַ֥כְתָּ בְחָלְיֽוֹ׃ ‎5 ‏אֲ‍ֽנִי־אָ֭מַרְתִּי יְהוָ֣ה חָנֵּ֑נִי רְפָאָ֥ה נַ֝פְשִׁ֗י כִּי־חָטָ֥אתִי לָֽךְ׃ ‎6 ‏אוֹיְבַ֗י יֹאמְר֣וּ רַ֣ע לִ֑י מָתַ֥י יָ֝מ֗וּת וְאָבַ֥ד שְׁמֽוֹ׃ ‎7 ‏וְאִם־בָּ֤א לִרְא֨וֹת׀ שָׁ֤וְא יְדַבֵּ֗ר לִבּ֗וֹ יִקְבָּץ־אָ֥וֶן ל֑וֹ יֵצֵ֖א לַח֣וּץ יְדַבֵּֽר׃ ‎8 ‏יַ֗חַד עָלַ֣י יִ֭תְלַחֲשׁוּ כָּל־שֹׂנְאָ֑י עָלַ֓י׀ יַחְשְׁב֖וּ רָעָ֣ה לִֽי׃ ‎9 ‏דְּֽבַר־בְּ֭לִיַּעַל יָצ֣וּק בּ֑וֹ וַאֲשֶׁ֥ר שָׁ֝כַ֗ב לֹא־יוֹסִ֥יף לָקֽוּם׃ ‎10 ‏גַּם־אִ֤ישׁ שְׁלוֹמִ֨י׀ אֲשֶׁר־בָּטַ֣חְתִּי ב֖וֹ אוֹכֵ֣ל לַחְמִ֑י הִגְדִּ֖יל עָלַ֣י עָקֵֽב׃ ‎11 ‏וְאַתָּ֤ה יְהוָ֗ה חָנֵּ֥נִי וַהֲקִימֵ֑נִי וַֽאֲשַׁלְּמָ֥ה לָהֶֽם׃ ‎12 ‏בְּזֹ֣את יָ֭דַעְתִּי כִּֽי־חָפַ֣צְתָּ בִּ֑י כִּ֤י לֹֽא־יָרִ֖יעַ אֹיְבִ֣י עָלָֽי׃ ‎13 ‏וַאֲנִ֗י בְּ֭תֻמִּי תָּמַ֣כְתָּ בִּ֑י וַתַּצִּיבֵ֖נִי לְפָנֶ֣יךָ לְעוֹלָֽם׃ ‎14 ‏בָּ֘ר֤וּךְ יְהוָ֨ה׀ אֱלֹ֘הֵ֤י יִשְׂרָאֵ֗ל מֵֽ֭הָעוֹלָם וְעַ֥ד הָעוֹלָ֗ם אָ֘מֵ֥ן׀ וְאָמֵֽן׃

1 lamənaṣṣēḥa mizəmwōr ləḏāwiḏ: 2 ’ašərê maśəkîl ’el-dāl bəywōm rā‘â yəmalləṭēhû yəhwâ: 3 yəhwâ| yišəmərēhû wîḥayyēhû ye’əššōr wə’uššar bā’āreṣ wə’al-titənēhû bənefeš ’ōyəḇāyw: 4 yəhwâ yisə‘āḏennû ‘al-‘ereś dəwāy kāl-mišəkāḇwō hāfaḵətā ḇəḥāləywō: 5 ’ă‍nî-’āmarətî yəhwâ ḥānnēnî rəfā’â nafəšî kî-ḥāṭā’ṯî lāḵə: 6 ’wōyəḇay yō’mərû ra‘ lî māṯay yāmûṯ wə’āḇaḏ šəmwō: 7 wə’im-bā’ lirə’wōṯ| šāwə’ yəḏabēr libwō yiqəbāṣ-’āwen lwō yēṣē’ laḥûṣ yəḏabēr: 8 yaḥaḏ ‘ālay yiṯəlaḥăšû kāl-śōnə’āy ‘ālay| yaḥəšəḇû rā‘â lî: 9 dəḇar-bəlîya‘al yāṣûq bwō wa’ăšer šāḵaḇ lō’-ywōsîf lāqûm: 10 gam-’îš šəlwōmî| ’ăšer-bāṭaḥətî ḇwō ’wōḵēl laḥəmî hiḡədîl ‘ālay ‘āqēḇ: 11 wə’atâ yəhwâ ḥānnēnî wahăqîmēnî wa’ăšalləmâ lâem: 12 bəzō’ṯ yāḏa‘ətî kî-ḥāfaṣətā bî kî lō’-yārî‘a ’ōyəḇî ‘ālāy: 13 wa’ănî bəṯummî tāmaḵətā bî wataṣṣîḇēnî ləfāneyḵā lə‘wōlām: 14 bārûḵə yəhwâ| ’ĕlōhê yiśərā’ēl mēhā‘wōlām wə‘aḏ hā‘wōlām ’āmēn| wə’āmēn: