Psalms (Tehilim): Psalms (Tehilim) Chapter 34

Tanach (Hebrew): Psalms (Tehilim) Chapter 34

‎1 ‏לְדָוִ֗ד בְּשַׁנּוֹת֣וֹ אֶת־טַ֭עְמוֹ לִפְנֵ֣י אֲבִימֶ֑לֶךְ וַֽ֝יְגָרֲשֵׁ֗הוּ וַיֵּלַֽךְ׃ ‎2 ‏אֲבָרֲכָ֣ה אֶת־יְהוָ֣ה בְּכָל־עֵ֑ת תָּ֝מִ֗יד תְּֽהִלָּת֥וֹ בְּפִֽי׃ ‎3 ‏בַּ֭יהוָה תִּתְהַלֵּ֣ל נַפְשִׁ֑י יִשְׁמְע֖וּ עֲנָוִ֣ים וְיִשְׂמָֽחוּ׃ ‎4 ‏גַּדְּל֣וּ לַיהוָ֣ה אִתִּ֑י וּנְרוֹמְמָ֖ה שְׁמ֣וֹ יַחְדָּֽו׃ ‎5 ‏דָּרַ֣שְׁתִּי אֶת־יְהוָ֣ה וְעָנָ֑נִי וּמִכָּל־מְ֝גוּרוֹתַ֗י הִצִּילָֽנִי׃ ‎6 ‏הִבִּ֣יטוּ אֵלָ֣יו וְנָהָ֑רוּ וּ֝פְנֵיהֶ֗ם אַל־יֶחְפָּֽרוּ׃ ‎7 ‏זֶ֤ה עָנִ֣י קָ֭רָא וַיהוָ֣ה שָׁמֵ֑עַ וּמִכָּל־צָ֝רוֹתָ֗יו הוֹשִׁיעֽוֹ׃ ‎8 ‏חֹנֶ֤ה מַלְאַךְ־יְהוָ֓ה סָ֘בִ֤יב לִֽירֵאָ֗יו וַֽיְחַלְּצֵֽם׃ ‎9 ‏טַעֲמ֣וּ וּ֭רְאוּ כִּי־ט֣וֹב יְהוָ֑ה אַֽשְׁרֵ֥י הַ֝גֶּ֗בֶר יֶחֱסֶה־בּֽוֹ׃ ‎10 ‏יְר֣אוּ אֶת־יְהוָ֣ה קְדֹשָׁ֑יו כִּי־אֵ֥ין מַ֝חְס֗וֹר לִירֵאָֽיו׃ ‎11 ‏כְּ֭פִירִים רָשׁ֣וּ וְרָעֵ֑בוּ וְדֹרְשֵׁ֥י יְ֝הוָ֗ה לֹא־יַחְסְר֥וּ כָל־טֽוֹב׃ ‎12 ‏לְֽכוּ־בָ֭נִים שִׁמְעוּ־לִ֑י יִֽרְאַ֥ת יְ֝הוָ֗ה אֲלַמֶּדְכֶֽם׃ ‎13 ‏מִֽי־הָ֭אִישׁ הֶחָפֵ֣ץ חַיִּ֑ים אֹהֵ֥ב יָ֝מִ֗ים לִרְא֥וֹת טֽוֹב׃ ‎14 ‏נְצֹ֣ר לְשׁוֹנְךָ֣ מֵרָ֑ע וּ֝שְׂפָתֶ֗יךָ מִדַּבֵּ֥ר מִרְמָֽה׃ ‎15 ‏ס֣וּר מֵ֭רָע וַעֲשֵׂה־ט֑וֹב בַּקֵּ֖שׁ שָׁל֣וֹם וְרָדְפֵֽהוּ׃ ‎16 ‏עֵינֵ֣י יְ֭הוָה אֶל־צַדִּיקִ֑ים וְ֝אָזְנָ֗יו אֶל־שַׁוְעָתָֽם׃ ‎17 ‏פְּנֵ֣י יְ֭הוָה בְּעֹ֣שֵׂי רָ֑ע לְהַכְרִ֖ית מֵאֶ֣רֶץ זִכְרָֽם׃ ‎18 ‏צָעֲק֣וּ וַיהוָ֣ה שָׁמֵ֑עַ וּמִכָּל־צָ֝רוֹתָ֗ם הִצִּילָֽם׃ ‎19 ‏קָר֣וֹב יְ֭הוָה לְנִשְׁבְּרֵי־לֵ֑ב וְֽאֶת־דַּכְּאֵי־ר֥וּחַ יוֹשִֽׁיעַ׃ ‎20 ‏רַ֭בּוֹת רָע֣וֹת צַדִּ֑יק וּ֝מִכֻּלָּ֗ם יַצִּילֶ֥נּוּ יְהוָֽה׃ ‎21 ‏שֹׁמֵ֥ר כָּל־עַצְמוֹתָ֑יו אַחַ֥ת מֵ֝הֵ֗נָּה לֹ֣א נִשְׁבָּֽרָה׃ ‎22 ‏תְּמוֹתֵ֣ת רָשָׁ֣ע רָעָ֑ה וְשֹׂנְאֵ֖י צַדִּ֣יק יֶאְשָֽׁמוּ׃ ‎23 ‏פּוֹדֶ֣ה יְ֭הוָה נֶ֣פֶשׁ עֲבָדָ֑יו וְלֹ֥א יֶ֝אְשְׁמ֗וּ כָּֽל־הַחֹסִ֥ים בּֽוֹ׃

1 ləḏāwiḏ bəšannwōṯwō ’eṯ-ṭa‘əmwō lifənê ’ăḇîmeleḵə wayəḡārăšēhû wayyēlaḵə: 2 ’ăḇārăḵâ ’eṯ-yəhwâ bəḵāl-‘ēṯ tāmîḏ təhillāṯwō bəfî: 3 bayhwâ tiṯəhallēl nafəšî yišəmə‘û ‘ănāwîm wəyiśəmāḥû: 4 gadəlû layhwâ ’itî ûnərwōməmâ šəmwō yaḥədāw: 5 dārašətî ’eṯ-yəhwâ wə‘ānānî ûmikāl-məḡûrwōṯay hiṣṣîlānî: 6 hibîṭû ’ēlāyw wənâārû ûfənêhem ’al-yeḥəpārû: 7 zeh ‘ānî qārā’ wayhwâ šāmē‘a ûmikāl-ṣārwōṯāyw hwōšî‘wō: 8 ḥōneh malə’aḵə-yəhwâ sāḇîḇ lîrē’āyw wayəḥalləṣēm: 9 ṭa‘ămû ûrə’û kî-ṭwōḇ yəhwâ ’ašərê hageḇer yeḥĕseh-bwō: 10 yər’û ’eṯ-yəhwâ qəḏōšāyw kî-’ên maḥəswōr lîrē’āyw: 11 kəfîrîm rāšû wərā‘ēḇû wəḏōrəšê yəhwâ lō’-yaḥəsərû ḵāl-ṭwōḇ: 12 ləḵû-ḇānîm šimə‘û-lî yirə’aṯ yəhwâ ’ălammeḏəḵem: 13 mî-hā’îš heḥāfēṣ ḥayyîm ’ōhēḇ yāmîm lirə’wōṯ ṭwōḇ: 14 nəṣōr ləšwōnəḵā mērā‘ ûśəfāṯeyḵā midabēr mirəmâ: 15 sûr mērā‘ wa‘ăśēh-ṭwōḇ baqqēš šālwōm wərāḏəfēhû: 16 ‘ênê yəhwâ ’el-ṣadîqîm wə’āzənāyw ’el-šawə‘āṯām: 17 pənê yəhwâ bə‘ōśê rā‘ ləhaḵərîṯ mē’ereṣ ziḵərām: 18 ṣā‘ăqû wayhwâ šāmē‘a ûmikāl-ṣārwōṯām hiṣṣîlām: 19 qārwōḇ yəhwâ lənišəbərê-lēḇ wə’eṯ-dakə’ê-rûḥa ywōšî‘a: 20 rabwōṯ rā‘wōṯ ṣadîq ûmikullām yaṣṣîlennû yəhwâ: 21 šōmēr kāl-‘aṣəmwōṯāyw ’aḥaṯ mēhēnnâ lō’ nišəbārâ: 22 təmwōṯēṯ rāšā‘ rā‘â wəśōnə’ê ṣadîq ye’əšāmû: 23 pwōḏeh yəhwâ nefeš ‘ăḇāḏāyw wəlō’ ye’əšəmû kāl-haḥōsîm bwō: