Psalms (Tehilim): Psalms (Tehilim) Chapter 148

Tanach (Hebrew): Psalms (Tehilim) Chapter 148

‎1 ‏הַ֥לְלוּ יָ֨הּ׀ הַֽלְל֣וּ אֶת־יְ֭הוָה מִן־הַשָּׁמַ֑יִם הַֽ֝לְל֗וּהוּ בַּמְּרוֹמִֽים׃ ‎2 ‏הַֽלְל֥וּהוּ כָל־מַלְאָכָ֑יו הַֽ֝לְל֗וּהוּ כָּל־צבאו צְבָאָֽיו׃ ‎3 ‏הַֽ֭לְלוּהוּ שֶׁ֣מֶשׁ וְיָרֵ֑חַ הַ֝לְל֗וּהוּ כָּל־כּ֥וֹכְבֵי אֽוֹר׃ ‎4 ‏הַֽ֭לְלוּהוּ שְׁמֵ֣י הַשָּׁמָ֑יִם וְ֝הַמַּ֗יִם אֲשֶׁ֤ר׀ מֵעַ֬ל הַשָּׁמָֽיִם׃ ‎5 ‏יְֽ֭הַֽלְלוּ אֶת־שֵׁ֣ם יְהוָ֑ה כִּ֤י ה֭וּא צִוָּ֣ה וְנִבְרָֽאוּ׃ ‎6 ‏וַיַּעֲמִידֵ֣ם לָעַ֣ד לְעוֹלָ֑ם חָק־נָ֝תַ֗ן וְלֹ֣א יַעֲבֽוֹר׃ ‎7 ‏הַֽלְל֣וּ אֶת־יְ֭הוָה מִן־הָאָ֑רֶץ תַּ֝נִּינִ֗ים וְכָל־תְּהֹמֽוֹת׃ ‎8 ‏אֵ֣שׁ וּ֭בָרָד שֶׁ֣לֶג וְקִיט֑וֹר ר֥וּחַ סְ֝עָרָ֗ה עֹשָׂ֥ה דְבָרֽוֹ׃ ‎9 ‏הֶהָרִ֥ים וְכָל־גְּבָע֑וֹת עֵ֥ץ פְּ֝רִ֗י וְכָל־אֲרָזִֽים׃ ‎10 ‏הַֽחַיָּ֥ה וְכָל־בְּהֵמָ֑ה רֶ֝֗מֶשׂ וְצִפּ֥וֹר כָּנָֽף׃ ‎11 ‏מַלְכֵי־אֶ֭רֶץ וְכָל־לְאֻמִּ֑ים שָׂ֝רִ֗ים וְכָל־שֹׁ֥פְטֵי אָֽרֶץ׃ ‎12 ‏בַּחוּרִ֥ים וְגַם־בְּתוּל֑וֹת זְ֝קֵנִ֗ים עִם־נְעָרִֽים׃ ‎13 ‏יְהַלְל֤וּ׀ אֶת־שֵׁ֬ם יְהוָ֗ה כִּֽי־נִשְׂגָּ֣ב שְׁמ֣וֹ לְבַדּ֑וֹ ה֝וֹד֗וֹ עַל־אֶ֥רֶץ וְשָׁמָֽיִם׃ ‎14 ‏וַיָּ֤רֶם קֶ֨רֶן׀ לְעַמּ֡וֹ תְּהִלָּ֤ה לְֽכָל־חֲסִידָ֗יו לִבְנֵ֣י יִ֭שְׂרָאֵל עַֽם־קְרֹב֗וֹ הַֽלְלוּ־יָֽהּ׃

1 haləlû yāh| haləlû ’eṯ-yəhwâ min-haššāmayim haləlûhû bammərwōmîm: 2 haləlûhû ḵāl-malə’āḵāyw haləlûhû kāl-ṣəḇā’wō ṣəḇā’āyw: 3 haləlûhû šemeš wəyārēḥa haləlûhû kāl-kwōḵəḇê ’wōr: 4 haləlûhû šəmê haššāmāyim wəhammayim ’ăšer| mē‘al haššāmāyim: 5 yəhaləlû ’eṯ-šēm yəhwâ kî hû’ ṣiûâ wəniḇərā’û: 6 wayya‘ămîḏēm lā‘aḏ lə‘wōlām ḥāq-nāṯan wəlō’ ya‘ăḇwōr: 7 haləlû ’eṯ-yəhwâ min-hā’āreṣ tannînîm wəḵāl-təhōmwōṯ: 8 ’ēš ûḇārāḏ šeleḡ wəqîṭwōr rûḥa sə‘ārâ ‘ōśâ ḏəḇārwō: 9 hehārîm wəḵāl-gəḇā‘wōṯ ‘ēṣ pərî wəḵāl-’ărāzîm: 10 haḥayyâ wəḵāl-bəhēmâ remeś wəṣipwōr kānāf: 11 maləḵê-’ereṣ wəḵāl-lə’ummîm śārîm wəḵāl-šōfəṭê ’āreṣ: 12 baḥûrîm wəḡam-bəṯûlwōṯ zəqēnîm ‘im-nə‘ārîm: 13 yəhaləlû| ’eṯ-šēm yəhwâ kî-niśəgāḇ šəmwō ləḇadwō hwōḏwō ‘al-’ereṣ wəšāmāyim: 14 wayyārem qeren| lə‘ammwō təhillâ ləḵāl-ḥăsîḏāyw liḇənê yiśərā’ēl ‘am-qərōḇwō haləlû-yāh: