Psalms (Tehilim): Psalms (Tehilim) Chapter 146

Tanach (Hebrew): Psalms (Tehilim) Chapter 146

‎1 ‏הַֽלְלוּ־יָ֡הּ הַלְלִ֥י נַ֝פְשִׁ֗י אֶת־יְהוָֽה׃ ‎2 ‏אֲהַלְלָ֣ה יְהוָ֣ה בְּחַיָּ֑י אֲזַמְּרָ֖ה לֵֽאלֹהַ֣י בְּעוֹדִֽי׃ ‎3 ‏אַל־תִּבְטְח֥וּ בִנְדִיבִ֑ים בְּבֶן־אָדָ֓ם׀ שֶׁ֤אֵֽין ל֥וֹ תְשׁוּעָֽה׃ ‎4 ‏תֵּצֵ֣א ר֭וּחוֹ יָשֻׁ֣ב לְאַדְמָת֑וֹ בַּיּ֥וֹם הַ֝ה֗וּא אָבְד֥וּ עֶשְׁתֹּנֹתָֽיו׃ ‎5 ‏אַשְׁרֵ֗י שֶׁ֤אֵ֣ל יַעֲקֹ֣ב בְּעֶזְר֑וֹ שִׂ֝בְר֗וֹ עַל־יְהוָ֥ה אֱלֹהָֽיו׃ ‎6 ‏עֹשֶׂ֤ה׀ שָׁ֘מַ֤יִם וָאָ֗רֶץ אֶת־הַיָּ֥ם וְאֶת־כָּל־אֲשֶׁר־בָּ֑ם הַשֹּׁמֵ֖ר אֱמֶ֣ת לְעוֹלָֽם׃ ‎7 ‏עֹשֶׂ֤ה מִשְׁפָּ֨ט׀ לָעֲשׁוּקִ֗ים נֹתֵ֣ן לֶ֭חֶם לָרְעֵבִ֑ים יְ֝הוָ֗ה מַתִּ֥יר אֲסוּרִֽים׃ ‎8 ‏יְהוָ֤ה׀ פֹּ֘קֵ֤חַ עִוְרִ֗ים יְ֭הוָה זֹקֵ֣ף כְּפוּפִ֑ים יְ֝הוָ֗ה אֹהֵ֥ב צַדִּיקִֽים׃ ‎9 ‏יְהוָ֤ה׀ שֹׁ֘מֵ֤ר אֶת־גֵּרִ֗ים יָת֣וֹם וְאַלְמָנָ֣ה יְעוֹדֵ֑ד וְדֶ֖רֶךְ רְשָׁעִ֣ים יְעַוֵּֽת׃ ‎10 ‏יִמְלֹ֤ךְ יְהוָ֨ה׀ לְעוֹלָ֗ם אֱלֹהַ֣יִךְ צִ֭יּוֹן לְדֹ֥ר וָדֹ֗ר הַֽלְלוּ־יָֽהּ׃

1 haləlû-yāh haləlî nafəšî ’eṯ-yəhwâ: 2 ’ăhaləlâ yəhwâ bəḥayyāy ’ăzammərâ lē’lōhay bə‘wōḏî: 3 ’al-tiḇəṭəḥû ḇinəḏîḇîm bəḇen-’āḏām| še’ên lwō ṯəšû‘â: 4 tēṣē’ rûḥwō yāšuḇ lə’aḏəmāṯwō bayywōm hahû’ ’āḇəḏû ‘ešətōnōṯāyw: 5 ’ašərê še’ēl ya‘ăqōḇ bə‘ezərwō śiḇərwō ‘al-yəhwâ ’ĕlōhāyw: 6 ‘ōśeh| šāmayim wā’āreṣ ’eṯ-hayyām wə’eṯ-kāl-’ăšer-bām haššōmēr ’ĕmeṯ lə‘wōlām: 7 ‘ōśeh mišəpāṭ| lā‘ăšûqîm nōṯēn leḥem lārə‘ēḇîm yəhwâ matîr ’ăsûrîm: 8 yəhwâ| pōqēḥa ‘iwərîm yəhwâ zōqēf kəfûfîm yəhwâ ’ōhēḇ ṣadîqîm: 9 yəhwâ| šōmēr ’eṯ-gērîm yāṯwōm wə’aləmānâ yə‘wōḏēḏ wəḏereḵə rəšā‘îm yə‘aûēṯ: 10 yiməlōḵə yəhwâ| lə‘wōlām ’ĕlōhayiḵə ṣîywōn ləḏōr wāḏōr haləlû-yāh: