Psalms (Tehilim): Psalms (Tehilim) Chapter 12

Tanach (Hebrew): Psalms (Tehilim) Chapter 12

‎1 ‏לַמְנַצֵּ֥חַ עַֽל־הַשְּׁמִינִ֗ית מִזְמ֥וֹר לְדָוִֽד׃ ‎2 ‏הוֹשִׁ֣יעָה יְ֭הוָה כִּי־גָמַ֣ר חָסִ֑יד כִּי־פַ֥סּוּ אֱ֝מוּנִ֗ים מִבְּנֵ֥י אָדָֽם׃ ‎3 ‏שָׁ֤וְא׀ יְֽדַבְּרוּ֮ אִ֤ישׁ אֶת־רֵ֫עֵ֥הוּ שְׂפַ֥ת חֲלָק֑וֹת בְּלֵ֖ב וָלֵ֣ב יְדַבֵּֽרוּ׃ ‎4 ‏יַכְרֵ֣ת יְ֭הוָה כָּל־שִׂפְתֵ֣י חֲלָק֑וֹת לָ֝שׁ֗וֹן מְדַבֶּ֥רֶת גְּדֹלֽוֹת׃ ‎5 ‏אֲשֶׁ֤ר אָֽמְר֨וּ׀ לִלְשֹׁנֵ֣נוּ נַ֭גְבִּיר שְׂפָתֵ֣ינוּ אִתָּ֑נוּ מִ֖י אָד֣וֹן לָֽנוּ׃ ‎6 ‏מִשֹּׁ֥ד עֲנִיִּים֮ מֵאַנְקַ֪ת אֶבְי֫וֹנִ֥ים עַתָּ֣ה אָ֭קוּם יֹאמַ֣ר יְהוָ֑ה אָשִׁ֥ית בְּ֝יֵ֗שַׁע יָפִ֥יחַֽ לֽוֹ׃ ‎7 ‏אִֽמֲר֣וֹת יְהוָה֮ אֲמָר֪וֹת טְהֹ֫ר֥וֹת כֶּ֣סֶף צָ֭רוּף בַּעֲלִ֣יל לָאָ֑רֶץ מְ֝זֻקָּ֗ק שִׁבְעָתָֽיִם׃ ‎8 ‏אַתָּֽה־יְהוָ֥ה תִּשְׁמְרֵ֑ם תִּצְּרֶ֓נּוּ׀ מִן־הַדּ֖וֹר ז֣וּ לְעוֹלָֽם׃ ‎9 ‏סָבִ֗יב רְשָׁעִ֥ים יִתְהַלָּכ֑וּן כְּרֻ֥ם זֻ֝לּ֗וּת לִבְנֵ֥י אָדָֽם׃

1 lamənaṣṣēḥa ‘al-haššəmînîṯ mizəmwōr ləḏāwiḏ: 2 hwōšî‘â yəhwâ kî-ḡāmar ḥāsîḏ kî-fassû ’ĕmûnîm mibənê ’āḏām: 3 šāwə’| yəḏabərû ’îš ’eṯ-rē‘ēhû śəfaṯ ḥălāqwōṯ bəlēḇ wālēḇ yəḏabērû: 4 yaḵərēṯ yəhwâ kāl-śifəṯê ḥălāqwōṯ lāšwōn məḏabereṯ gəḏōlwōṯ: 5 ’ăšer ’āmərû| liləšōnēnû naḡəbîr śəfāṯênû ’itānû mî ’āḏwōn lānû: 6 miššōḏ ‘ănîyîm mē’anəqaṯ ’eḇəywōnîm ‘atâ ’āqûm yō’mar yəhwâ ’āšîṯ bəyēša‘ yāfîḥa lwō: 7 ’imărwōṯ yəhwâ ’ămārwōṯ ṭəhōrwōṯ kesef ṣārûf ba‘ălîl lā’āreṣ məzuqqāq šiḇə‘āṯāyim: 8 ’atâ-yəhwâ tišəmərēm tiṣṣərennû| min-hadwōr zû lə‘wōlām: 9 sāḇîḇ rəšā‘îm yiṯəhallāḵûn kərum zullûṯ liḇənê ’āḏām: