Psalms (Tehilim): Psalms (Tehilim) Chapter 116

Tanach (Hebrew): Psalms (Tehilim) Chapter 116

‎1 ‏אָ֭הַבְתִּי כִּֽי־יִשְׁמַ֥ע׀ יְהוָ֑ה אֶת־ק֝וֹלִ֗י תַּחֲנוּנָֽי׃ ‎2 ‏כִּֽי־הִטָּ֣ה אָזְנ֣וֹ לִ֑י וּבְיָמַ֥י אֶקְרָֽא׃ ‎3 ‏אֲפָפ֤וּנִי׀ חֶבְלֵי־מָ֗וֶת וּמְצָרֵ֣י שְׁא֣וֹל מְצָא֑וּנִי צָרָ֖ה וְיָג֣וֹן אֶמְצָֽא׃ ‎4 ‏וּבְשֵֽׁם־יְהוָ֥ה אֶקְרָ֑א אָנָּ֥ה יְ֝הוָ֗ה מַלְּטָ֥ה נַפְשִֽׁי׃ ‎5 ‏חַנּ֣וּן יְהוָֹ֣ה וְצַדִּ֑יק וֵ֖אלֹהֵ֣ינוּ מְרַחֵֽם׃ ‎6 ‏שֹׁמֵ֣ר פְּתָאיִ֣ם יְהוָֹ֑ה דַּ֝לּוֹתִ֗י וְלִ֣י יְהוֹשִֽׁיעַ׃ ‎7 ‏שׁוּבִ֣י נַ֭פְשִׁי לִמְנוּחָ֑יְכִי כִּֽי־יְ֝הוָ֗ה גָּמַ֥ל עָלָֽיְכִי׃ ‎8 ‏כִּ֤י חִלַּ֥צְתָּ נַפְשִׁ֗י מִ֫מָּ֥וֶת אֶת־עֵינִ֥י מִן־דִּמְעָ֑ה אֶת־רַגְלִ֥י מִדֶּֽחִי׃ ‎9 ‏אֶ֭תְהַלֵּךְ לִפְנֵ֣י יְהוָ֑ה בְּ֝אַרְצ֗וֹת הַֽחַיִּֽים׃ ‎10 ‏הֶ֭אֱמַנְתִּי כִּ֣י אֲדַבֵּ֑ר אֲ֝נִ֗י עָנִ֥יתִי מְאֹֽד׃ ‎11 ‏אֲ֭נִי אָמַ֣רְתִּי בְחָפְזִ֑י כָּֽל־הָאָדָ֥ם כֹּזֵֽב׃ ‎12 ‏מָֽה־אָשִׁ֥יב לַיהוָ֑ה כָּֽל־תַּגְמוּל֥וֹהִי עָלָֽי׃ ‎13 ‏כּוֹס־יְשׁוּע֥וֹת אֶשָּׂ֑א וּבְשֵׁ֖ם יְהוָ֣ה אֶקְרָֽא׃ ‎14 ‏נְ֭דָרַי לַיהוָ֣ה אֲשַׁלֵּ֑ם נֶגְדָה־נָּ֝֗א לְכָל־עַמּֽוֹ׃ ‎15 ‏יָ֭קָר בְּעֵינֵ֣י יְהוָ֑ה הַ֝מָּ֗וְתָה לַחֲסִידָֽיו׃ ‎16 ‏אָֽנָּ֣ה יְהוָה֮ כִּֽי־אֲנִ֪י עַ֫בְדֶּ֥ךָ אֲ‍ֽנִי־עַ֭בְדְּךָ בֶּן־אֲמָתֶ֑ךָ פִּ֝תַּ֗חְתָּ לְמוֹסֵרָֽי׃ ‎17 ‏לְֽךָ־אֶ֭זְבַּח זֶ֣בַח תּוֹדָ֑ה וּבְשֵׁ֖ם יְהוָ֣ה אֶקְרָֽא׃ ‎18 ‏נְ֭דָרַי לַיהוָ֣ה אֲשַׁלֵּ֑ם נֶגְדָה־נָּ֝֗א לְכָל־עַמּֽוֹ׃ ‎19 ‏בְּחַצְר֤וֹת׀ בֵּ֤ית יְהוָ֗ה בְּֽת֘וֹכֵ֤כִי יְֽרוּשָׁלִָ֗ם הַֽלְלוּ־יָֽהּ׃

1 ’âaḇətî kî-yišəma‘| yəhwâ ’eṯ-qwōlî taḥănûnāy: 2 kî-hiṭṭâ ’āzənwō lî ûḇəyāmay ’eqərā’: 3 ’ăfāfûnî| ḥeḇəlê-māweṯ ûməṣārê šə’wōl məṣā’ûnî ṣārâ wəyāḡwōn ’eməṣā’: 4 ûḇəšēm-yəhwâ ’eqərā’ ’ānnâ yəhwâ malləṭâ nafəšî: 5 ḥannûn yəhwōâ wəṣadîq wē’lōhênû məraḥēm: 6 šōmēr pəṯā’yim yəhwōâ dallwōṯî wəlî yəhwōšî‘a: 7 šûḇî nafəšî limənûḥāyəḵî kî-yəhwâ gāmal ‘ālāyəḵî: 8 kî ḥillaṣətā nafəšî mimmāweṯ ’eṯ-‘ênî min-dimə‘â ’eṯ-raḡəlî mideḥî: 9 ’eṯəhallēḵə lifənê yəhwâ bə’arəṣwōṯ haḥayyîm: 10 he’ĕmanətî kî ’ăḏabēr ’ănî ‘ānîṯî mə’ōḏ: 11 ’ănî ’āmarətî ḇəḥāfəzî kāl-hā’āḏām kōzēḇ: 12 mâ-’āšîḇ layhwâ kāl-taḡəmûlwōhî ‘ālāy: 13 kwōs-yəšû‘wōṯ ’eśśā’ ûḇəšēm yəhwâ ’eqərā’: 14 nəḏāray layhwâ ’ăšallēm neḡəḏâ-nnā’ ləḵāl-‘ammwō: 15 yāqār bə‘ênê yəhwâ hammāwəṯâ laḥăsîḏāyw: 16 ’ānnâ yəhwâ kî-’ănî ‘aḇədeḵā ’ă‍nî-‘aḇədəḵā ben-’ămāṯeḵā pitaḥətā ləmwōsērāy: 17 ləḵā-’ezəbaḥ zeḇaḥ twōḏâ ûḇəšēm yəhwâ ’eqərā’: 18 nəḏāray layhwâ ’ăšallēm neḡəḏâ-nnā’ ləḵāl-‘ammwō: 19 bəḥaṣərwōṯ| bêṯ yəhwâ bəṯwōḵēḵî yərûšālāim haləlû-yāh: