Psalms (Tehilim): Psalms (Tehilim) Chapter 103

Tanach (Hebrew): Psalms (Tehilim) Chapter 103

‎1 ‏לְדָוִ֙ד׀ בָּרֲכִ֣י נַ֭פְשִׁי אֶת־יְהוָ֑ה וְכָל־קְ֝רָבַ֗י אֶת־שֵׁ֥ם קָדְשֽׁוֹ׃ ‎2 ‏בָּרֲכִ֣י נַ֭פְשִׁי אֶת־יְהוָ֑ה וְאַל־תִּ֝שְׁכְּחִ֗י כָּל־גְּמוּלָֽיו׃ ‎3 ‏הַסֹּלֵ֥חַ לְכָל־עֲוֹנֵ֑כִי הָ֝רֹפֵ֗א לְכָל־תַּחֲלֻאָֽיְכִי׃ ‎4 ‏הַגּוֹאֵ֣ל מִשַּׁ֣חַת חַיָּ֑יְכִי הַֽ֝מְעַטְּרֵ֗כִי חֶ֣סֶד וְרַחֲמִֽים׃ ‎5 ‏הַמַּשְׂבִּ֣יַע בַּטּ֣וֹב עֶדְיֵ֑ךְ תִּתְחַדֵּ֖שׁ כַּנֶּ֣שֶׁר נְעוּרָֽיְכִי׃ ‎6 ‏עֹשֵׂ֣ה צְדָק֣וֹת יְהוָ֑ה וּ֝מִשְׁפָּטִ֗ים לְכָל־עֲשׁוּקִֽים׃ ‎7 ‏יוֹדִ֣יעַ דְּרָכָ֣יו לְמֹשֶׁ֑ה לִבְנֵ֥י יִ֝שְׂרָאֵ֗ל עֲלִילֽוֹתָיו׃ ‎8 ‏רַח֣וּם וְחַנּ֣וּן יְהוָ֑ה אֶ֖רֶךְ אַפַּ֣יִם וְרַב־חָֽסֶד׃ ‎9 ‏לֹֽא־לָנֶ֥צַח יָרִ֑יב וְלֹ֖א לְעוֹלָ֣ם יִטּֽוֹר׃ ‎10 ‏לֹ֣א כַ֭חֲטָאֵינוּ עָ֣שָׂה לָ֑נוּ וְלֹ֥א כַ֝עֲוֹנֹתֵ֗ינוּ גָּמַ֥ל עָלֵֽינוּ׃ ‎11 ‏כִּ֤י כִגְבֹ֣הַּ שָׁ֭מַיִם עַל־הָאָ֑רֶץ גָּבַ֥ר חַ֝סְדּ֗וֹ עַל־יְרֵאָֽיו׃ ‎12 ‏כִּרְחֹ֣ק מִ֭זְרָח מִֽמַּֽעֲרָ֑ב הִֽרְחִ֥יק מִ֝מֶּ֗נּוּ אֶת־פְּשָׁעֵֽינוּ׃ ‎13 ‏כְּרַחֵ֣ם אָ֭ב עַל־בָּנִ֑ים רִחַ֥ם יְ֝הוָ֗ה עַל־יְרֵאָֽיו׃ ‎14 ‏כִּי־ה֖וּא יָדַ֣ע יִצְרֵ֑נוּ זָ֝כ֗וּר כִּי־עָפָ֥ר אֲנָֽחְנוּ׃ ‎15 ‏אֱ֭נוֹשׁ כֶּחָצִ֣יר יָמָ֑יו כְּצִ֥יץ הַ֝שָּׂדֶ֗ה כֵּ֣ן יָצִֽיץ׃ ‎16 ‏כִּ֤י ר֣וּחַ עָֽבְרָה־בּ֣וֹ וְאֵינֶ֑נּוּ וְלֹא־יַכִּירֶ֖נּוּ ע֣וֹד מְקוֹמֽוֹ׃ ‎17 ‏וְחֶ֤סֶד יְהוָ֙ה׀ מֵעוֹלָ֣ם וְעַד־ע֭וֹלָם עַל־יְרֵאָ֑יו וְ֝צִדְקָת֗וֹ לִבְנֵ֥י בָנִֽים׃ ‎18 ‏לְשֹׁמְרֵ֥י בְרִית֑וֹ וּלְזֹכְרֵ֥י פִ֝קֻּדָ֗יו לַעֲשׂוֹתָֽם׃ ‎19 ‏יְֽהוָ֗ה בַּ֭שָּׁמַיִם הֵכִ֣ין כִּסְא֑וֹ וּ֝מַלְכוּת֗וֹ בַּכֹּ֥ל מָשָֽׁלָה׃ ‎20 ‏בָּרֲכ֥וּ יְהוָ֗ה מַלְאָ֫כָ֥יו גִּבֹּ֣רֵי כֹ֭חַ עֹשֵׂ֣י דְבָר֑וֹ לִ֝שְׁמֹ֗עַ בְּק֣וֹל דְּבָרֽוֹ׃ ‎21 ‏בָּרֲכ֣וּ יְ֭הוָה כָּל־צְבָאָ֑יו מְ֝שָׁרְתָ֗יו עֹשֵׂ֥י רְצוֹנֽוֹ׃ ‎22 ‏בָּרֲכ֤וּ יְהוָ֙ה׀ כָּֽל־מַעֲשָׂ֗יו בְּכָל־מְקֹמ֥וֹת מֶמְשַׁלְתּ֑וֹ בָּרֲכִ֥י נַ֝פְשִׁ֗י אֶת־יְהוָֽה׃

1 ləḏāwiḏ| bārăḵî nafəšî ’eṯ-yəhwâ wəḵāl-qərāḇay ’eṯ-šēm qāḏəšwō: 2 bārăḵî nafəšî ’eṯ-yəhwâ wə’al-tišəkəḥî kāl-gəmûlāyw: 3 hassōlēḥa ləḵāl-‘ăwōnēḵî hārōfē’ ləḵāl-taḥălu’āyəḵî: 4 hagwō’ēl miššaḥaṯ ḥayyāyəḵî hamə‘aṭṭərēḵî ḥeseḏ wəraḥămîm: 5 hammaśəbîa‘ baṭṭwōḇ ‘eḏəyēḵə tiṯəḥadēš kannešer nə‘ûrāyəḵî: 6 ‘ōśēh ṣəḏāqwōṯ yəhwâ ûmišəpāṭîm ləḵāl-‘ăšûqîm: 7 ywōḏî‘a dərāḵāyw ləmōšeh liḇənê yiśərā’ēl ‘ălîlwōṯāyw: 8 raḥûm wəḥannûn yəhwâ ’ereḵə ’apayim wəraḇ-ḥāseḏ: 9 lō’-lāneṣaḥ yārîḇ wəlō’ lə‘wōlām yiṭṭwōr: 10 lō’ ḵaḥăṭā’ênû ‘āśâ lānû wəlō’ ḵa‘ăwōnōṯênû gāmal ‘ālênû: 11 kî ḵiḡəḇōhha šāmayim ‘al-hā’āreṣ gāḇar ḥasədwō ‘al-yərē’āyw: 12 kirəḥōq mizərāḥ mimma‘ărāḇ hirəḥîq mimmennû ’eṯ-pəšā‘ênû: 13 kəraḥēm ’āḇ ‘al-bānîm riḥam yəhwâ ‘al-yərē’āyw: 14 kî-hû’ yāḏa‘ yiṣərēnû zāḵûr kî-‘āfār ’ănāḥənû: 15 ’ĕnwōš keḥāṣîr yāmāyw kəṣîṣ haśśāḏeh kēn yāṣîṣ: 16 kî rûḥa ‘āḇərâ-bwō wə’ênennû wəlō’-yakîrennû ‘wōḏ məqwōmwō: 17 wəḥeseḏ yəhwâ| mē‘wōlām wə‘aḏ-‘wōlām ‘al-yərē’āyw wəṣiḏəqāṯwō liḇənê ḇānîm: 18 ləšōmərê ḇərîṯwō ûləzōḵərê fiqquḏāyw la‘ăśwōṯām: 19 yəhwâ baššāmayim hēḵîn kisə’wō ûmaləḵûṯwō bakōl māšālâ: 20 bārăḵû yəhwâ malə’āḵāyw gibōrê ḵōḥa ‘ōśê ḏəḇārwō lišəmō‘a bəqwōl dəḇārwō: 21 bārăḵû yəhwâ kāl-ṣəḇā’āyw məšārəṯāyw ‘ōśê rəṣwōnwō: 22 bārăḵû yəhwâ| kāl-ma‘ăśāyw bəḵāl-məqōmwōṯ meməšalətwō bārăḵî nafəšî ’eṯ-yəhwâ: