Proverbs (Mishlei): Proverbs (Mishlei) Chapter 29

Tanach (Hebrew): Proverbs (Mishlei) Chapter 29

‎1 ‏אִ֣ישׁ תּ֭וֹכָחוֹת מַקְשֶׁה־עֹ֑רֶף פֶּ֥תַע יִ֝שָּׁבֵ֗ר וְאֵ֣ין מַרְפֵּֽא׃ ‎2 ‏בִּרְב֣וֹת צַ֭דִּיקִים יִשְׂמַ֣ח הָעָ֑ם וּבִמְשֹׁ֥ל רָ֝שָׁ֗ע יֵאָ֥נַֽח עָֽם׃ ‎3 ‏אִֽישׁ־אֹהֵ֣ב חָ֭כְמָה יְשַׂמַּ֣ח אָבִ֑יו וְרֹעֶ֥ה ז֝וֹנ֗וֹת יְאַבֶּד־הֽוֹן׃ ‎4 ‏מֶ֗לֶךְ בְּ֭מִשְׁפָּט יַעֲמִ֣יד אָ֑רֶץ וְאִ֖ישׁ תְּרוּמ֣וֹת יֶֽהֶרְסֶֽנָּה׃ ‎5 ‏גֶּ֭בֶר מַחֲלִ֣יק עַל־רֵעֵ֑הוּ רֶ֝֗שֶׁת פּוֹרֵ֥שׂ עַל־פְּעָמָֽיו׃ ‎6 ‏בְּפֶ֤שַֽׁע אִ֣ישׁ רָ֣ע מוֹקֵ֑שׁ וְ֝צַדִּ֗יק יָר֥וּן וְשָׂמֵֽחַ׃ ‎7 ‏יֹדֵ֣עַ צַ֭דִּיק דִּ֣ין דַּלִּ֑ים רָ֝שָׁ֗ע לֹא־יָבִ֥ין דָּֽעַת׃ ‎8 ‏אַנְשֵׁ֣י לָ֭צוֹן יָפִ֣יחוּ קִרְיָ֑ה וַ֝חֲכָמִ֗ים יָשִׁ֥יבוּ אָֽף׃ ‎9 ‏אִֽישׁ־חָכָ֗ם נִ֭שְׁפָּט אֶת־אִ֣ישׁ אֱוִ֑יל וְרָגַ֥ז וְ֝שָׂחַ֗ק וְאֵ֣ין נָֽחַת׃ ‎10 ‏אַנְשֵׁ֣י דָ֭מִים יִשְׂנְאוּ־תָ֑ם וִֽ֝ישָׁרִ֗ים יְבַקְשׁ֥וּ נַפְשֽׁוֹ׃ ‎11 ‏כָּל־ר֭וּחוֹ יוֹצִ֣יא כְסִ֑יל וְ֝חָכָ֗ם בְּאָח֥וֹר יְשַׁבְּחֶֽנָּה׃ ‎12 ‏מֹ֭שֵׁל מַקְשִׁ֣יב עַל־דְּבַר־שָׁ֑קֶר כָּֽל־מְשָׁרְתָ֥יו רְשָׁעִֽים׃ ‎13 ‏רָ֤שׁ וְאִ֣ישׁ תְּכָכִ֣ים נִפְגָּ֑שׁוּ מֵ֤אִיר־עֵינֵ֖י שְׁנֵיהֶ֣ם יְהוָֽה׃ ‎14 ‏מֶ֤לֶךְ שׁוֹפֵ֣ט בֶּֽאֱמֶ֣ת דַּלִּ֑ים כִּ֝סְא֗וֹ לָעַ֥ד יִכּֽוֹן׃ ‎15 ‏שֵׁ֣בֶט וְ֭תוֹכַחַת יִתֵּ֣ן חָכְמָ֑ה וְנַ֥עַר מְ֝שֻׁלָּ֗ח מֵבִ֥ישׁ אִמּֽוֹ׃ ‎16 ‏בִּרְב֣וֹת רְ֭שָׁעִים יִרְבֶּה־פָּ֑שַׁע וְ֝צַדִּיקִ֗ים בְּֽמַפַּלְתָּ֥ם יִרְאֽוּ׃ ‎17 ‏יַסֵּ֣ר בִּ֭נְךָ וִֽינִיחֶ֑ךָ וְיִתֵּ֖ן מַעֲדַנִּ֣ים לְנַפְשֶֽׁךָ׃ פ ‎18 ‏בְּאֵ֣ין חָ֭זוֹן יִפָּ֣רַֽע עָ֑ם וְשֹׁמֵ֖ר תּוֹרָ֣ה אַשְׁרֵֽהוּ׃ ‎19 ‏בִּ֭דְבָרִים לֹא־יִוָּ֣סֶר עָ֑בֶד כִּֽי־יָ֝בִ֗ין וְאֵ֣ין מַעֲנֶֽה׃ ‎20 ‏חָזִ֗יתָ אִ֭ישׁ אָ֣ץ בִּדְבָרָ֑יו תִּקְוָ֖ה לִכְסִ֣יל מִמֶּֽנּוּ׃ ‎21 ‏מְפַנֵּ֣ק מִנֹּ֣עַר עַבְדּ֑וֹ וְ֝אַחֲרִית֗וֹ יִהְיֶ֥ה מָנֽוֹן׃ ‎22 ‏אִֽישׁ־אַ֭ף יְגָרֶ֣ה מָד֑וֹן וּבַ֖עַל חֵמָ֣ה רַב־פָּֽשַׁע׃ ‎23 ‏גַּאֲוַ֣ת אָ֭דָם תַּשְׁפִּילֶ֑נּוּ וּשְׁפַל־ר֝֗וּחַ יִתְמֹ֥ךְ כָּבֽוֹד׃ ‎24 ‏חוֹלֵ֣ק עִם־גַּ֭נָּב שׂוֹנֵ֣א נַפְשׁ֑וֹ אָלָ֥ה יִ֝שְׁמַ֗ע וְלֹ֣א יַגִּֽיד׃ ‎25 ‏חֶרְדַּ֣ת אָ֭דָם יִתֵּ֣ן מוֹקֵ֑שׁ וּבוֹטֵ֖חַ בַּיהוָ֣ה יְשֻׂגָּֽב׃ ‎26 ‏רַ֭בִּים מְבַקְשִׁ֣ים פְּנֵי־מוֹשֵׁ֑ל וּ֝מֵיְהוָ֗ה מִשְׁפַּט־אִֽישׁ׃ ‎27 ‏תּוֹעֲבַ֣ת צַ֭דִּיקִים אִ֣ישׁ עָ֑וֶל וְתוֹעֲבַ֖ת רָשָׁ֣ע יְשַׁר־דָּֽרֶךְ׃ פ

1 ’îš twōḵāḥwōṯ maqəšeh-‘ōref peṯa‘ yiššāḇēr wə’ên marəpē’: 2 birəḇwōṯ ṣadîqîm yiśəmaḥ hā‘ām ûḇiməšōl rāšā‘ yē’ānaḥ ‘ām: 3 ’îš-’ōhēḇ ḥāḵəmâ yəśammaḥ ’āḇîw wərō‘eh zwōnwōṯ yə’abeḏ-hwōn: 4 meleḵə bəmišəpāṭ ya‘ămîḏ ’āreṣ wə’îš tərûmwōṯ yeherəsennâ: 5 geḇer maḥălîq ‘al-rē‘ēhû rešeṯ pwōrēś ‘al-pə‘āmāyw: 6 bəfeša‘ ’îš rā‘ mwōqēš wəṣadîq yārûn wəśāmēḥa: 7 yōḏē‘a ṣadîq dîn dallîm rāšā‘ lō’-yāḇîn dā‘aṯ: 8 ’anəšê lāṣwōn yāfîḥû qirəyâ waḥăḵāmîm yāšîḇû ’āf: 9 ’îš-ḥāḵām nišəpāṭ ’eṯ-’îš ’ĕwîl wərāḡaz wəśāḥaq wə’ên nāḥaṯ: 10 ’anəšê ḏāmîm yiśənə’û-ṯām wîšārîm yəḇaqəšû nafəšwō: 11 kāl-rûḥwō ywōṣî’ ḵəsîl wəḥāḵām bə’āḥwōr yəšabəḥennâ: 12 mōšēl maqəšîḇ ‘al-dəḇar-šāqer kāl-məšārəṯāyw rəšā‘îm: 13 rāš wə’îš təḵāḵîm nifəgāšû mē’îr-‘ênê šənêhem yəhwâ: 14 meleḵə šwōfēṭ be’ĕmeṯ dallîm kisə’wō lā‘aḏ yikwōn: 15 šēḇeṭ wəṯwōḵaḥaṯ yitēn ḥāḵəmâ wəna‘ar məšullāḥ mēḇîš ’immwō: 16 birəḇwōṯ rəšā‘îm yirəbeh-pāša‘ wəṣadîqîm bəmapalətām yirə’û: 17 yassēr binəḵā wînîḥeḵā wəyitēn ma‘ăḏannîm lənafəšeḵā: f 18 bə’ên ḥāzwōn yipāra‘ ‘ām wəšōmēr twōrâ ’ašərēhû: 19 biḏəḇārîm lō’-yiûāser ‘āḇeḏ kî-yāḇîn wə’ên ma‘ăneh: 20 ḥāzîṯā ’îš ’āṣ biḏəḇārāyw tiqəwâ liḵəsîl mimmennû: 21 məfannēq minnō‘ar ‘aḇədwō wə’aḥărîṯwō yihəyeh mānwōn: 22 ’îš-’af yəḡāreh māḏwōn ûḇa‘al ḥēmâ raḇ-pāša‘: 23 ga’ăwaṯ ’āḏām tašəpîlennû ûšəfal-rûḥa yiṯəmōḵə kāḇwōḏ: 24 ḥwōlēq ‘im-gannāḇ śwōnē’ nafəšwō ’ālâ yišəma‘ wəlō’ yagîḏ: 25 ḥerədaṯ ’āḏām yitēn mwōqēš ûḇwōṭēḥa bayhwâ yəśugāḇ: 26 rabîm məḇaqəšîm pənê-mwōšēl ûmêəhwâ mišəpaṭ-’îš: 27 twō‘ăḇaṯ ṣadîqîm ’îš ‘āwel wəṯwō‘ăḇaṯ rāšā‘ yəšar-dāreḵə: f