Proverbs (Mishlei): Proverbs (Mishlei) Chapter 25

Tanach (Hebrew): Proverbs (Mishlei) Chapter 25

‎1 ‏גַּם־אֵ֭לֶּה מִשְׁלֵ֣י שְׁלֹמֹ֑ה אֲשֶׁ֥ר הֶ֝עְתִּ֗יקוּ אַנְשֵׁ֤י׀ חִזְקִיָּ֬ה מֶֽלֶךְ־יְהוּדָֽה׃ ‎2 ‏כְּבֹ֣ד אֱ֭לֹהִים הַסְתֵּ֣ר דָּבָ֑ר וּכְבֹ֥ד מְ֝לָכִ֗ים חֲקֹ֣ר דָּבָֽר׃ ‎3 ‏שָׁמַ֣יִם לָ֭רוּם וָאָ֣רֶץ לָעֹ֑מֶק וְלֵ֥ב מְ֝לָכִ֗ים אֵ֣ין חֵֽקֶר׃ ‎4 ‏הָג֣וֹ סִיגִ֣ים מִכָּ֑סֶף וַיֵּצֵ֖א לַצֹּרֵ֣ף כֶּֽלִי׃ ‎5 ‏הָג֣וֹ רָ֭שָׁע לִפְנֵי־מֶ֑לֶךְ וְיִכּ֖וֹן בַּצֶּ֣דֶק כִּסְאֽוֹ׃ ‎6 ‏אַל־תִּתְהַדַּ֥ר לִפְנֵי־מֶ֑לֶךְ וּבִמְק֥וֹם גְּ֝דֹלִ֗ים אַֽל־תַּעֲמֹֽד׃ ‎7 ‏כִּ֤י ט֥וֹב אֲמָר־לְךָ֗ עֲ‍ֽלֵ֫ה הֵ֥נָּה מֵֽ֭הַשְׁפִּ֣ילְךָ לִפְנֵ֣י נָדִ֑יב אֲשֶׁ֖ר רָא֣וּ עֵינֶֽיךָ׃ ‎8 ‏אַל־תֵּצֵ֥א לָרִ֗ב מַ֫הֵ֥ר פֶּ֣ן מַה־תַּ֭עֲשֶׂה בְּאַחֲרִיתָ֑הּ בְּהַכְלִ֖ים אֹתְךָ֣ רֵעֶֽךָ׃ ‎9 ‏רִֽ֭יבְךָ רִ֣יב אֶת־רֵעֶ֑ךָ וְס֖וֹד אַחֵ֣ר אַל־תְּגָֽל׃ ‎10 ‏פֶּֽן־יְחַסֶּדְךָ֥ שֹׁמֵ֑עַ וְ֝דִבָּתְךָ֗ לֹ֣א תָשֽׁוּב׃ ‎11 ‏תַּפּוּחֵ֣י זָ֭הָב בְּמַשְׂכִּיּ֥וֹת כָּ֑סֶף דָּ֝בָ֗ר דָּבֻ֥ר עַל־אָפְנָֽיו׃ ‎12 ‏נֶ֣זֶם זָ֭הָב וַחֲלִי־כָ֑תֶם מוֹכִ֥יחַ חָ֝כָ֗ם עַל־אֹ֥זֶן שֹׁמָֽעַת׃ ‎13 ‏כְּצִנַּת־שֶׁ֨לֶג׀ בְּי֬וֹם קָצִ֗יר צִ֣יר נֶ֭אֱמָן לְשֹׁלְחָ֑יו וְנֶ֖פֶשׁ אֲדֹנָ֣יו יָשִֽׁיב׃ פ ‎14 ‏נְשִׂיאִ֣ים וְ֭רוּחַ וְגֶ֣שֶׁם אָ֑יִן אִ֥ישׁ מִ֝תְהַלֵּ֗ל בְּמַתַּת־שָֽׁקֶר׃ ‎15 ‏בְּאֹ֣רֶךְ אַ֭פַּיִם יְפֻתֶּ֣ה קָצִ֑ין וְלָשׁ֥וֹן רַ֝כָּ֗ה תִּשְׁבָּר־גָּֽרֶם׃ ‎16 ‏דְּבַ֣שׁ מָ֭צָאתָ אֱכֹ֣ל דַּיֶּ֑ךָּ פֶּן־תִּ֝שְׂבָּעֶ֗נּוּ וַהֲקֵֽאתֽוֹ׃ ‎17 ‏הֹקַ֣ר רַ֭גְלְךָ מִבֵּ֣ית רֵעֶ֑ךָ פֶּן־יִ֝שְׂבָּעֲךָ֗ וּשְׂנֵאֶֽךָ׃ ‎18 ‏מֵפִ֣יץ וְ֭חֶרֶב וְחֵ֣ץ שָׁנ֑וּן אִ֥ישׁ עֹנֶ֥ה בְ֝רֵעֵ֗הוּ עֵ֣ד שָֽׁקֶר׃ ‎19 ‏שֵׁ֣ן רֹ֭עָה וְרֶ֣גֶל מוּעָ֑דֶת מִבְטָ֥ח בּ֝וֹגֵ֗ד בְּי֣וֹם צָרָֽה׃ ‎20 ‏מַ֥עֲדֶה בֶּ֨גֶד׀ בְּי֣וֹם קָ֭רָה חֹ֣מֶץ עַל־נָ֑תֶר וְשָׁ֥ר בַּ֝שִּׁרִ֗ים עַ֣ל לֶב־רָֽע׃ פ ‎21 ‏אִם־רָעֵ֣ב שֹׂ֭נַאֲךָ הַאֲכִלֵ֣הוּ לָ֑חֶם וְאִם־צָ֝מֵ֗א הַשְׁקֵ֥הוּ מָֽיִם׃ ‎22 ‏כִּ֤י גֶֽחָלִ֗ים אַ֭תָּה חֹתֶ֣ה עַל־רֹאשׁ֑וֹ וַֽ֝יהוָ֗ה יְשַׁלֶּם־לָֽךְ׃ ‎23 ‏ר֣וּחַ צָ֭פוֹן תְּח֣וֹלֵֽל גָּ֑שֶׁם וּפָנִ֥ים נִ֝זְעָמִ֗ים לְשׁ֣וֹן סָֽתֶר׃ ‎24 ‏ט֗וֹב שֶׁ֥בֶת עַל־פִּנַּת־גָּ֑ג מֵאֵ֥שֶׁת מדונים מִ֝דְיָנִ֗ים וּבֵ֥ית חָֽבֶר׃ ‎25 ‏מַ֣יִם קָ֭רִים עַל־נֶ֣פֶשׁ עֲיֵפָ֑ה וּשְׁמוּעָ֥ה ט֝וֹבָ֗ה מֵאֶ֥רֶץ מֶרְחָֽק׃ ‎26 ‏מַעְיָ֣ן נִ֭רְפָּשׂ וּמָק֣וֹר מָשְׁחָ֑ת צַ֝דִּ֗יק מָ֣ט לִפְנֵֽי־רָשָֽׁע׃ ‎27 ‏אָ֘כֹ֤ל דְּבַ֣שׁ הַרְבּ֣וֹת לֹא־ט֑וֹב וְחֵ֖קֶר כְּבֹדָ֣ם כָּבֽוֹד׃ ‎28 ‏עִ֣יר פְּ֭רוּצָה אֵ֣ין חוֹמָ֑ה אִ֝֗ישׁ אֲשֶׁ֤ר אֵ֖ין מַעְצָ֣ר לְרוּחֽוֹ׃

1 gam-’ēlleh mišəlê šəlōmōh ’ăšer he‘ətîqû ’anəšê| ḥizəqîyâ meleḵə-yəhûḏâ: 2 kəḇōḏ ’ĕlōhîm hasətēr dāḇār ûḵəḇōḏ məlāḵîm ḥăqōr dāḇār: 3 šāmayim lārûm wā’āreṣ lā‘ōmeq wəlēḇ məlāḵîm ’ên ḥēqer: 4 hāḡwō sîḡîm mikāsef wayyēṣē’ laṣṣōrēf kelî: 5 hāḡwō rāšā‘ lifənê-meleḵə wəyikwōn baṣṣeḏeq kisə’wō: 6 ’al-tiṯəhadar lifənê-meleḵə ûḇiməqwōm gəḏōlîm ’al-ta‘ămōḏ: 7 kî ṭwōḇ ’ămār-ləḵā ‘ă‍lēh hēnnâ mēhašəpîləḵā lifənê nāḏîḇ ’ăšer rā’û ‘êneyḵā: 8 ’al-tēṣē’ lāriḇ mahēr pen mah-ta‘ăśeh bə’aḥărîṯāh bəhaḵəlîm ’ōṯəḵā rē‘eḵā: 9 rîḇəḵā rîḇ ’eṯ-rē‘eḵā wəswōḏ ’aḥēr ’al-təḡāl: 10 pen-yəḥasseḏəḵā šōmē‘a wəḏibāṯəḵā lō’ ṯāšûḇ: 11 tapûḥê zâāḇ bəmaśəkîywōṯ kāsef dāḇār dāḇur ‘al-’āfənāyw: 12 nezem zâāḇ waḥălî-ḵāṯem mwōḵîḥa ḥāḵām ‘al-’ōzen šōmā‘aṯ: 13 kəṣinnaṯ-šeleḡ| bəywōm qāṣîr ṣîr ne’ĕmān ləšōləḥāyw wənefeš ’ăḏōnāyw yāšîḇ: f 14 nəśî’îm wərûḥa wəḡešem ’āyin ’îš miṯəhallēl bəmataṯ-šāqer: 15 bə’ōreḵə ’apayim yəfuteh qāṣîn wəlāšwōn rakâ tišəbār-gārem: 16 dəḇaš māṣā’ṯā ’ĕḵōl dayyeḵḵā pen-tiśəbā‘ennû wahăqē’ṯwō: 17 hōqar raḡələḵā mibêṯ rē‘eḵā pen-yiśəbā‘ăḵā ûśənē’eḵā: 18 mēfîṣ wəḥereḇ wəḥēṣ šānûn ’îš ‘ōneh ḇərē‘ēhû ‘ēḏ šāqer: 19 šēn rō‘â wəreḡel mû‘āḏeṯ miḇəṭāḥ bwōḡēḏ bəywōm ṣārâ: 20 ma‘ăḏeh beḡeḏ| bəywōm qārâ ḥōmeṣ ‘al-nāṯer wəšār bašširîm ‘al leḇ-rā‘: f 21 ’im-rā‘ēḇ śōna’ăḵā ha’ăḵilēhû lāḥem wə’im-ṣāmē’ hašəqēhû māyim: 22 kî ḡeḥālîm ’atâ ḥōṯeh ‘al-rō’šwō wayhwâ yəšallem-lāḵə: 23 rûḥa ṣāfwōn təḥwōlēl gāšem ûfānîm nizə‘āmîm ləšwōn sāṯer: 24 ṭwōḇ šeḇeṯ ‘al-pinnaṯ-gāḡ mē’ēšeṯ məḏwōnîm miḏəyānîm ûḇêṯ ḥāḇer: 25 mayim qārîm ‘al-nefeš ‘ăyēfâ ûšəmû‘â ṭwōḇâ mē’ereṣ merəḥāq: 26 ma‘əyān nirəpāś ûmāqwōr māšəḥāṯ ṣadîq māṭ lifənê-rāšā‘: 27 ’āḵōl dəḇaš harəbwōṯ lō’-ṭwōḇ wəḥēqer kəḇōḏām kāḇwōḏ: 28 ‘îr pərûṣâ ’ên ḥwōmâ ’îš ’ăšer ’ên ma‘əṣār lərûḥwō: