Proverbs (Mishlei): Proverbs (Mishlei) Chapter 2

Tanach (Hebrew): Proverbs (Mishlei) Chapter 2

‎1 ‏בְּ֭נִי אִם־תִּקַּ֣ח אֲמָרָ֑י וּ֝מִצְוֹתַ֗י תִּצְפֹּ֥ן אִתָּֽךְ׃ ‎2 ‏לְהַקְשִׁ֣יב לַֽחָכְמָ֣ה אָזְנֶ֑ךָ תַּטֶּ֥ה לִ֝בְּךָ֗ לַתְּבוּנָֽה׃ ‎3 ‏כִּ֤י אִ֣ם לַבִּינָ֣ה תִקְרָ֑א לַ֝תְּבוּנָ֗ה תִּתֵּ֥ן קוֹלֶֽךָ׃ ‎4 ‏אִם־תְּבַקְשֶׁ֥נָּה כַכָּ֑סֶף וְֽכַמַּטְמוֹנִ֥ים תַּחְפְּשֶֽׂנָּה׃ ‎5 ‏אָ֗ז תָּ֭בִין יִרְאַ֣ת יְהוָ֑ה וְדַ֖עַת אֱלֹהִ֣ים תִּמְצָֽא׃ ‎6 ‏כִּֽי־יְ֭הוָה יִתֵּ֣ן חָכְמָ֑ה מִ֝פִּ֗יו דַּ֣עַת וּתְבוּנָֽה׃ ‎7 ‏וצפן יִצְפֹּ֣ן לַ֭יְשָׁרִים תּוּשִׁיָּ֑ה מָ֝גֵ֗ן לְהֹ֣לְכֵי תֹֽם׃ ‎8 ‏לִ֭נְצֹר אָרְח֣וֹת מִשְׁפָּ֑ט וְדֶ֖רֶךְ חסידו חֲסִידָ֣יו יִשְׁמֹֽר׃ ‎9 ‏אָ֗ז תָּ֭בִין צֶ֣דֶק וּמִשְׁפָּ֑ט וּ֝מֵישָׁרִ֗ים כָּל־מַעְגַּל־טֽוֹב׃ ‎10 ‏כִּֽי־תָב֣וֹא חָכְמָ֣ה בְלִבֶּ֑ךָ וְ֝דַ֗עַת לְֽנַפְשְׁךָ֥ יִנְעָֽם׃ ‎11 ‏מְ֭זִמָּה תִּשְׁמֹ֥ר עָלֶ֗יךָ תְּבוּנָ֥ה תִנְצְרֶֽכָּה׃ ‎12 ‏לְ֭הַצִּ֣ילְךָ מִדֶּ֣רֶךְ רָ֑ע מֵ֝אִ֗ישׁ מְדַבֵּ֥ר תַּהְפֻּכֽוֹת׃ ‎13 ‏הַ֭עֹ֣זְבִים אָרְח֣וֹת יֹ֑שֶׁר לָ֝לֶ֗כֶת בְּדַרְכֵי־חֹֽשֶׁךְ׃ ‎14 ‏הַ֭שְּׂמֵחִים לַעֲשׂ֥וֹת רָ֑ע יָ֝גִ֗ילוּ בְּֽתַהְפֻּכ֥וֹת רָֽע׃ ‎15 ‏אֲשֶׁ֣ר אָרְחֹתֵיהֶ֣ם עִקְּשִׁ֑ים וּ֝נְלוֹזִ֗ים בְּמַעְגְּלוֹתָֽם׃ ‎16 ‏לְ֭הַצִּ֣ילְךָ מֵאִשָּׁ֣ה זָרָ֑ה מִ֝נָּכְרִיָּ֗ה אֲמָרֶ֥יהָ הֶחֱלִֽיקָה׃ ‎17 ‏הַ֭עֹזֶבֶת אַלּ֣וּף נְעוּרֶ֑יהָ וְאֶת־בְּרִ֖ית אֱלֹהֶ֣יהָ שָׁכֵֽחָה׃ ‎18 ‏כִּ֤י שָׁ֣חָה אֶל־מָ֣וֶת בֵּיתָ֑הּ וְאֶל־רְ֝פָאִ֗ים מַעְגְּלֹתֶֽיהָ׃ ‎19 ‏כָּל־בָּ֭אֶיהָ לֹ֣א יְשׁוּב֑וּן וְלֹֽא־יַ֝שִּׂ֗יגוּ אָרְח֥וֹת חַיִּֽים׃ ‎20 ‏לְמַ֗עַן תֵּ֭לֵךְ בְּדֶ֣רֶךְ טוֹבִ֑ים וְאָרְח֖וֹת צַדִּיקִ֣ים תִּשְׁמֹֽר׃ ‎21 ‏כִּֽי־יְשָׁרִ֥ים יִשְׁכְּנוּ־אָ֑רֶץ וּ֝תְמִימִ֗ים יִוָּ֥תְרוּ בָֽהּ׃ ‎22 ‏וּ֭רְשָׁעִים מֵאֶ֣רֶץ יִכָּרֵ֑תוּ וּ֝בוֹגְדִ֗ים יִסְּח֥וּ מִמֶּֽנָּה׃ פ

1 bənî ’im-tiqqaḥ ’ămārāy ûmiṣəwōṯay tiṣəpōn ’itāḵə: 2 ləhaqəšîḇ laḥāḵəmâ ’āzəneḵā taṭṭeh libəḵā latəḇûnâ: 3 kî ’im labînâ ṯiqərā’ latəḇûnâ titēn qwōleḵā: 4 ’im-təḇaqəšennâ ḵakāsef wəḵammaṭəmwōnîm taḥəpəśennâ: 5 ’āz tāḇîn yirə’aṯ yəhwâ wəḏa‘aṯ ’ĕlōhîm timəṣā’: 6 kî-yəhwâ yitēn ḥāḵəmâ mipîw da‘aṯ ûṯəḇûnâ: 7 wəṣāfan yiṣəpōn layəšārîm tûšîyâ māḡēn ləhōləḵê ṯōm: 8 linəṣōr ’ārəḥwōṯ mišəpāṭ wəḏereḵə ḥăsîḏwō ḥăsîḏāyw yišəmōr: 9 ’āz tāḇîn ṣeḏeq ûmišəpāṭ ûmêšārîm kāl-ma‘əgal-ṭwōḇ: 10 kî-ṯāḇwō’ ḥāḵəmâ ḇəlibeḵā wəḏa‘aṯ lənafəšəḵā yinə‘ām: 11 məzimmâ tišəmōr ‘āleyḵā təḇûnâ ṯinəṣərekâ: 12 ləhaṣṣîləḵā midereḵə rā‘ mē’îš məḏabēr tahəpuḵwōṯ: 13 ha‘ōzəḇîm ’ārəḥwōṯ yōšer lāleḵeṯ bəḏarəḵê-ḥōšeḵə: 14 haśśəmēḥîm la‘ăśwōṯ rā‘ yāḡîlû bəṯahəpuḵwōṯ rā‘: 15 ’ăšer ’ārəḥōṯêhem ‘iqqəšîm ûnəlwōzîm bəma‘əgəlwōṯām: 16 ləhaṣṣîləḵā mē’iššâ zārâ minnāḵərîyâ ’ămāreyhā heḥĕlîqâ: 17 ha‘ōzeḇeṯ ’allûf nə‘ûreyhā wə’eṯ-bərîṯ ’ĕlōheyhā šāḵēḥâ: 18 kî šāḥâ ’el-māweṯ bêṯāh wə’el-rəfā’îm ma‘əgəlōṯeyhā: 19 kāl-bā’eyhā lō’ yəšûḇûn wəlō’-yaśśîḡû ’ārəḥwōṯ ḥayyîm: 20 ləma‘an tēlēḵə bəḏereḵə ṭwōḇîm wə’ārəḥwōṯ ṣadîqîm tišəmōr: 21 kî-yəšārîm yišəkənû-’āreṣ ûṯəmîmîm yiûāṯərû ḇāh: 22 ûrəšā‘îm mē’ereṣ yikārēṯû ûḇwōḡəḏîm yissəḥû mimmennâ: f