Numbers (Bemidbar): Numbers (Bemidbar) Chapter 6

Tanach (Hebrew): Numbers (Bemidbar) Chapter 6

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ ‎2 ‏דַּבֵּר֙ אֶל־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם אִ֣ישׁ אֽוֹ־אִשָּׁ֗ה כִּ֤י יַפְלִא֙ לִנְדֹּר֙ נֶ֣דֶר נָזִ֔יר לְהַזִּ֖יר לַֽיהוָֽה׃ ‎3 ‏מִיַּ֤יִן וְשֵׁכָר֙ יַזִּ֔יר חֹ֥מֶץ יַ֛יִן וְחֹ֥מֶץ שֵׁכָ֖ר לֹ֣א יִשְׁתֶּ֑ה וְכָל־מִשְׁרַ֤ת עֲנָבִים֙ לֹ֣א יִשְׁתֶּ֔ה וַעֲנָבִ֛ים לַחִ֥ים וִיבֵשִׁ֖ים לֹ֥א יֹאכֵֽל׃ ‎4 ‏כֹּ֖ל יְמֵ֣י נִזְר֑וֹ מִכֹּל֩ אֲשֶׁ֨ר יֵעָשֶׂ֜ה מִגֶּ֣פֶן הַיַּ֗יִן מֵחַרְצַנִּ֛ים וְעַד־זָ֖ג לֹ֥א יֹאכֵֽל׃ ‎5 ‏כָּל־יְמֵי֙ נֶ֣דֶר נִזְר֔וֹ תַּ֖עַר לֹא־יַעֲבֹ֣ר עַל־רֹאשׁ֑וֹ עַד־מְלֹ֨את הַיָּמִ֜ם אֲשֶׁר־יַזִּ֤יר לַיהוָה֙ קָדֹ֣שׁ יִהְיֶ֔ה גַּדֵּ֥ל פֶּ֖רַע שְׂעַ֥ר רֹאשֽׁוֹ׃ ‎6 ‏כָּל־יְמֵ֥י הַזִּיר֖וֹ לַיהוָ֑ה עַל־נֶ֥פֶשׁ מֵ֖ת לֹ֥א יָבֹֽא׃ ‎7 ‏לְאָבִ֣יו וּלְאִמּ֗וֹ לְאָחִיו֙ וּלְאַ֣חֹת֔וֹ לֹא־יִטַּמָּ֥א לָהֶ֖ם בְּמֹתָ֑ם כִּ֛י נֵ֥זֶר אֱלֹהָ֖יו עַל־רֹאשֽׁוֹ׃ ‎8 ‏כֹּ֖ל יְמֵ֣י נִזְר֑וֹ קָדֹ֥שׁ ה֖וּא לַֽיהוָֽה׃ ‎9 ‏וְכִֽי־יָמ֨וּת מֵ֤ת עָלָיו֙ בְּפֶ֣תַע פִּתְאֹ֔ם וְטִמֵּ֖א רֹ֣אשׁ נִזְר֑וֹ וְגִלַּ֤ח רֹאשׁוֹ֙ בְּי֣וֹם טָהֳרָת֔וֹ בַּיּ֥וֹם הַשְּׁבִיעִ֖י יְגַלְּחֶֽנּוּ׃ ‎10 ‏וּבַיּ֣וֹם הַשְּׁמִינִ֗י יָבִא֙ שְׁתֵּ֣י תֹרִ֔ים א֥וֹ שְׁנֵ֖י בְּנֵ֣י יוֹנָ֑ה אֶל־הַכֹּהֵ֔ן אֶל־פֶּ֖תַח אֹ֥הֶל מוֹעֵֽד׃ ‎11 ‏וְעָשָׂ֣ה הַכֹּהֵ֗ן אֶחָ֤ד לְחַטָּאת֙ וְאֶחָ֣ד לְעֹלָ֔ה וְכִפֶּ֣ר עָלָ֔יו מֵאֲשֶׁ֥ר חָטָ֖א עַל־הַנָּ֑פֶשׁ וְקִדַּ֥שׁ אֶת־רֹאשׁ֖וֹ בַּיּ֥וֹם הַהֽוּא׃ ‎12 ‏וְהִזִּ֤יר לַֽיהוָה֙ אֶת־יְמֵ֣י נִזְר֔וֹ וְהֵבִ֛יא כֶּ֥בֶשׂ בֶּן־שְׁנָת֖וֹ לְאָשָׁ֑ם וְהַיָּמִ֤ים הָרִאשֹׁנִים֙ יִפְּל֔וּ כִּ֥י טָמֵ֖א נִזְרֽוֹ׃ ‎13 ‏וְזֹ֥את תּוֹרַ֖ת הַנָּזִ֑יר בְּי֗וֹם מְלֹאת֙ יְמֵ֣י נִזְר֔וֹ יָבִ֣יא אֹת֔וֹ אֶל־פֶּ֖תַח אֹ֥הֶל מוֹעֵֽד׃ ‎14 ‏וְהִקְרִ֣יב אֶת־קָרְבָּנ֣וֹ לַיהוָ֡ה כֶּבֶשׂ֩ בֶּן־שְׁנָת֨וֹ תָמִ֤ים אֶחָד֙ לְעֹלָ֔ה וְכַבְשָׂ֨ה אַחַ֧ת בַּת־שְׁנָתָ֛הּ תְּמִימָ֖ה לְחַטָּ֑את וְאַֽיִל־אֶחָ֥ד תָּמִ֖ים לִשְׁלָמִֽים׃ ‎15 ‏וְסַ֣ל מַצּ֗וֹת סֹ֤לֶת חַלֹּת֙ בְּלוּלֹ֣ת בַּשֶּׁ֔מֶן וּרְקִיקֵ֥י מַצּ֖וֹת מְשֻׁחִ֣ים בַּשָּׁ֑מֶן וּמִנְחָתָ֖ם וְנִסְכֵּיהֶֽם׃ ‎16 ‏וְהִקְרִ֥יב הַכֹּהֵ֖ן לִפְנֵ֣י יְהוָ֑ה וְעָשָׂ֥ה אֶת־חַטָּאת֖וֹ וְאֶת־עֹלָתֽוֹ׃ ‎17 ‏וְאֶת־הָאַ֜יִל יַעֲשֶׂ֨ה זֶ֤בַח שְׁלָמִים֙ לַֽיהוָ֔ה עַ֖ל סַ֣ל הַמַּצּ֑וֹת וְעָשָׂה֙ הַכֹּהֵ֔ן אֶת־מִנְחָת֖וֹ וְאֶת־נִסְכּֽוֹ׃ ‎18 ‏וְגִלַּ֣ח הַנָּזִ֗יר פֶּ֛תַח אֹ֥הֶל מוֹעֵ֖ד אֶת־רֹ֣אשׁ נִזְר֑וֹ וְלָקַ֗ח אֶת־שְׂעַר֙ רֹ֣אשׁ נִזְר֔וֹ וְנָתַן֙ עַל־הָאֵ֔שׁ אֲשֶׁר־תַּ֖חַת זֶ֥בַח הַשְּׁלָמִֽים׃ ‎19 ‏וְלָקַ֨ח הַכֹּהֵ֜ן אֶת־הַזְּרֹ֣עַ בְּשֵׁלָה֮ מִן־הָאַיִל֒ וְֽחַלַּ֨ת מַצָּ֤ה אַחַת֙ מִן־הַסַּ֔ל וּרְקִ֥יק מַצָּ֖ה אֶחָ֑ד וְנָתַן֙ עַל־כַּפֵּ֣י הַנָּזִ֔יר אַחַ֖ר הִֽתְגַּלְּח֥וֹ אֶת־נִזְרֽוֹ׃ ‎20 ‏וְהֵנִיף֩ אוֹתָ֨ם הַכֹּהֵ֥ן׀ תְּנוּפָה֮ לִפְנֵ֣י יְהוָה֒ קֹ֤דֶשׁ הוּא֙ לַכֹּהֵ֔ן עַ֚ל חֲזֵ֣ה הַתְּנוּפָ֔ה וְעַ֖ל שׁ֣וֹק הַתְּרוּמָ֑ה וְאַחַ֛ר יִשְׁתֶּ֥ה הַנָּזִ֖יר יָֽיִן׃ ‎21 ‏זֹ֣את תּוֹרַ֣ת הַנָּזִיר֮ אֲשֶׁ֣ר יִדֹּר֒ קָרְבָּנ֤וֹ לַֽיהוָה֙ עַל־נִזְר֔וֹ מִלְּבַ֖ד אֲשֶׁר־תַּשִּׂ֣יג יָד֑וֹ כְּפִ֤י נִדְרוֹ֙ אֲשֶׁ֣ר יִדֹּ֔ר כֵּ֣ן יַעֲשֶׂ֔ה עַ֖ל תּוֹרַ֥ת נִזְרֽוֹ׃ פ ‎22 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ ‎23 ‏דַּבֵּ֤ר אֶֽל־אַהֲרֹן֙ וְאֶל־בָּנָ֣יו לֵאמֹ֔ר כֹּ֥ה תְבָרֲכ֖וּ אֶת־בְּנֵ֣י יִשְׂרָאֵ֑ל אָמ֖וֹר לָהֶֽם׃ ס ‎24 ‏יְבָרֶכְךָ֥ יְהוָ֖ה וְיִשְׁמְרֶֽךָ׃ ס ‎25 ‏יָאֵ֨ר יְהוָ֧ה׀ פָּנָ֛יו אֵלֶ֖יךָ וִֽיחֻנֶּֽךָּ׃ ס ‎26 ‏יִשָּׂ֨א יְהוָ֤ה׀ פָּנָיו֙ אֵלֶ֔יךָ וְיָשֵׂ֥ם לְךָ֖ שָׁלֽוֹם׃ ס ‎27 ‏וְשָׂמ֥וּ אֶת־שְׁמִ֖י עַל־בְּנֵ֣י יִשְׂרָאֵ֑ל וַאֲנִ֖י אֲבָרֲכֵֽם׃ פ

1 wayəḏabēr yəhwâ ’el-mōšeh llē’mōr: 2 dabēr ’el-bənê yiśərā’ēl wə’āmarətā ’ălēhem ’îš ’wō-’iššâ kî yafəli’ linədōr neḏer nāzîr ləhazzîr layhwâ: 3 mîyayin wəšēḵār yazzîr ḥōmeṣ yayin wəḥōmeṣ šēḵār lō’ yišəteh wəḵāl-mišəraṯ ‘ănāḇîm lō’ yišəteh wa‘ănāḇîm laḥîm wîḇēšîm lō’ yō’ḵēl: 4 kōl yəmê nizərwō mikōl ’ăšer yē‘āśeh migefen hayyayin mēḥarəṣannîm wə‘aḏ-zāḡ lō’ yō’ḵēl: 5 kāl-yəmê neḏer nizərwō ta‘ar lō’-ya‘ăḇōr ‘al-rō’šwō ‘aḏ-məlō’ṯ hayyāmim ’ăšer-yazzîr layhwâ qāḏōš yihəyeh gadēl pera‘ śə‘ar rō’šwō: 6 kāl-yəmê hazzîrwō layhwâ ‘al-nefeš mēṯ lō’ yāḇō’: 7 lə’āḇîw ûlə’immwō lə’āḥîw ûlə’aḥōṯwō lō’-yiṭṭammā’ lâem bəmōṯām kî nēzer ’ĕlōhāyw ‘al-rō’šwō: 8 kōl yəmê nizərwō qāḏōš hû’ layhwâ: 9 wəḵî-yāmûṯ mēṯ ‘ālāyw bəfeṯa‘ piṯə’ōm wəṭimmē’ rō’š nizərwō wəḡillaḥ rō’šwō bəywōm ṭâŏrāṯwō bayywōm haššəḇî‘î yəḡalləḥennû: 10 ûḇayywōm haššəmînî yāḇi’ šətê ṯōrîm ’wō šənê bənê ywōnâ ’el-hakōhēn ’el-peṯaḥ ’ōhel mwō‘ēḏ: 11 wə‘āśâ hakōhēn ’eḥāḏ ləḥaṭṭā’ṯ wə’eḥāḏ lə‘ōlâ wəḵiper ‘ālāyw mē’ăšer ḥāṭā’ ‘al-hannāfeš wəqidaš ’eṯ-rō’šwō bayywōm hahû’: 12 wəhizzîr layhwâ ’eṯ-yəmê nizərwō wəhēḇî’ keḇeś ben-šənāṯwō lə’āšām wəhayyāmîm hāri’šōnîm yipəlû kî ṭāmē’ nizərwō: 13 wəzō’ṯ twōraṯ hannāzîr bəywōm məlō’ṯ yəmê nizərwō yāḇî’ ’ōṯwō ’el-peṯaḥ ’ōhel mwō‘ēḏ: 14 wəhiqərîḇ ’eṯ-qārəbānwō layhwâ keḇeś ben-šənāṯwō ṯāmîm ’eḥāḏ lə‘ōlâ wəḵaḇəśâ ’aḥaṯ baṯ-šənāṯāh təmîmâ ləḥaṭṭā’ṯ wə’ayil-’eḥāḏ tāmîm lišəlāmîm: 15 wəsal maṣṣwōṯ sōleṯ ḥallōṯ bəlûlōṯ baššemen ûrəqîqê maṣṣwōṯ məšuḥîm baššāmen ûminəḥāṯām wənisəkêhem: 16 wəhiqərîḇ hakōhēn lifənê yəhwâ wə‘āśâ ’eṯ-ḥaṭṭā’ṯwō wə’eṯ-‘ōlāṯwō: 17 wə’eṯ-hā’ayil ya‘ăśeh zeḇaḥ šəlāmîm layhwâ ‘al sal hammaṣṣwōṯ wə‘āśâ hakōhēn ’eṯ-minəḥāṯwō wə’eṯ-nisəkwō: 18 wəḡillaḥ hannāzîr peṯaḥ ’ōhel mwō‘ēḏ ’eṯ-rō’š nizərwō wəlāqaḥ ’eṯ-śə‘ar rō’š nizərwō wənāṯan ‘al-hā’ēš ’ăšer-taḥaṯ zeḇaḥ haššəlāmîm: 19 wəlāqaḥ hakōhēn ’eṯ-hazzərō‘a bəšēlâ min-hā’ayil wəḥallaṯ maṣṣâ ’aḥaṯ min-hassal ûrəqîq maṣṣâ ’eḥāḏ wənāṯan ‘al-kapê hannāzîr ’aḥar hiṯəgalləḥwō ’eṯ-nizərwō: 20 wəhēnîf ’wōṯām hakōhēn| tənûfâ lifənê yəhwâ qōḏeš hû’ lakōhēn ‘al ḥăzēh hatənûfâ wə‘al šwōq hatərûmâ wə’aḥar yišəteh hannāzîr yāyin: 21 zō’ṯ twōraṯ hannāzîr ’ăšer yidōr qārəbānwō layhwâ ‘al-nizərwō milləḇaḏ ’ăšer-taśśîḡ yāḏwō kəfî niḏərwō ’ăšer yidōr kēn ya‘ăśeh ‘al twōraṯ nizərwō: f 22 wayəḏabēr yəhwâ ’el-mōšeh llē’mōr: 23 dabēr ’el-’ahărōn wə’el-bānāyw lē’mōr kōh ṯəḇārăḵû ’eṯ-bənê yiśərā’ēl ’āmwōr lâem: s 24 yəḇāreḵəḵā yəhwâ wəyišəməreḵā: s 25 yā’ēr yəhwâ| pānāyw ’ēleyḵā wîḥunneḵḵā: s 26 yiśśā’ yəhwâ| pānāyw ’ēleyḵā wəyāśēm ləḵā šālwōm: s 27 wəśāmû ’eṯ-šəmî ‘al-bənê yiśərā’ēl wa’ănî ’ăḇārăḵēm: f