Leviticus (Vayikra): Leviticus (Vayikra) Chapter 22

Tanach (Hebrew): Leviticus (Vayikra) Chapter 22

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ ‎2 ‏דַּבֵּ֨ר אֶֽל־אַהֲרֹ֜ן וְאֶל־בָּנָ֗יו וְיִנָּֽזְרוּ֙ מִקָּדְשֵׁ֣י בְנֵֽי־יִשְׂרָאֵ֔ל וְלֹ֥א יְחַלְּל֖וּ אֶת־שֵׁ֣ם קָדְשִׁ֑י אֲשֶׁ֨ר הֵ֧ם מַקְדִּשִׁ֛ים לִ֖י אֲנִ֥י יְהוָֽה׃ ‎3 ‏אֱמֹ֣ר אֲלֵהֶ֗ם לְדֹרֹ֨תֵיכֶ֜ם כָּל־אִ֣ישׁ׀ אֲשֶׁר־יִקְרַ֣ב מִכָּל־זַרְעֲכֶ֗ם אֶל־הַקֳּדָשִׁים֙ אֲשֶׁ֨ר יַקְדִּ֤ישׁוּ בְנֵֽי־יִשְׂרָאֵל֙ לַֽיהוָ֔ה וְטֻמְאָת֖וֹ עָלָ֑יו וְנִכְרְתָ֞ה הַנֶּ֧פֶשׁ הַהִ֛וא מִלְּפָנַ֖י אֲנִ֥י יְהוָֽה׃ ‎4 ‏אִ֣ישׁ אִ֞ישׁ מִזֶּ֣רַע אַהֲרֹ֗ן וְה֤וּא צָר֙וּעַ֙ א֣וֹ זָ֔ב בַּקֳּדָשִׁים֙ לֹ֣א יֹאכַ֔ל עַ֖ד אֲשֶׁ֣ר יִטְהָ֑ר וְהַנֹּגֵ֙עַ֙ בְּכָל־טְמֵא־נֶ֔פֶשׁ א֣וֹ אִ֔ישׁ אֲשֶׁר־תֵּצֵ֥א מִמֶּ֖נּוּ שִׁכְבַת־זָֽרַע׃ ‎5 ‏אוֹ־אִישׁ֙ אֲשֶׁ֣ר יִגַּ֔ע בְּכָל־שֶׁ֖רֶץ אֲשֶׁ֣ר יִטְמָא־ל֑וֹ א֤וֹ בְאָדָם֙ אֲשֶׁ֣ר יִטְמָא־ל֔וֹ לְכֹ֖ל טֻמְאָתֽוֹ׃ ‎6 ‏נֶ֚פֶשׁ אֲשֶׁ֣ר תִּגַּע־בּ֔וֹ וְטָמְאָ֖ה עַד־הָעָ֑רֶב וְלֹ֤א יֹאכַל֙ מִן־הַקֳּדָשִׁ֔ים כִּ֛י אִם־רָחַ֥ץ בְּשָׂר֖וֹ בַּמָּֽיִם׃ ‎7 ‏וּבָ֥א הַשֶּׁ֖מֶשׁ וְטָהֵ֑ר וְאַחַר֙ יֹאכַ֣ל מִן־הַקֳּדָשִׁ֔ים כִּ֥י לַחְמ֖וֹ הֽוּא׃ ‎8 ‏נְבֵלָ֧ה וּטְרֵפָ֛ה לֹ֥א יֹאכַ֖ל לְטָמְאָה־בָ֑הּ אֲנִ֖י יְהוָֽה׃ ‎9 ‏וְשָׁמְר֣וּ אֶת־מִשְׁמַרְתִּ֗י וְלֹֽא־יִשְׂא֤וּ עָלָיו֙ חֵ֔טְא וּמֵ֥תוּ ב֖וֹ כִּ֣י יְחַלְּלֻ֑הוּ אֲנִ֥י יְהוָ֖ה מְקַדְּשָֽׁם׃ ‎10 ‏וְכָל־זָ֖ר לֹא־יֹ֣אכַל קֹ֑דֶשׁ תּוֹשַׁ֥ב כֹּהֵ֛ן וְשָׂכִ֖יר לֹא־יֹ֥אכַל קֹֽדֶשׁ׃ ‎11 ‏וְכֹהֵ֗ן כִּֽי־יִקְנֶ֥ה נֶ֙פֶשׁ֙ קִנְיַ֣ן כַּסְפּ֔וֹ ה֖וּא יֹ֣אכַל בּ֑וֹ וִילִ֣יד בֵּית֔וֹ הֵ֖ם יֹאכְל֥וּ בְלַחְמֽוֹ׃ ‎12 ‏וּבַת־כֹּהֵ֔ן כִּ֥י תִהְיֶ֖ה לְאִ֣ישׁ זָ֑ר הִ֕וא בִּתְרוּמַ֥ת הַקֳּדָשִׁ֖ים לֹ֥א תֹאכֵֽל׃ ‎13 ‏וּבַת־כֹּהֵן֩ כִּ֨י תִהְיֶ֜ה אַלְמָנָ֣ה וּגְרוּשָׁ֗ה וְזֶרַע֮ אֵ֣ין לָהּ֒ וְשָׁבָ֞ה אֶל־בֵּ֤ית אָבִ֙יהָ֙ כִּנְעוּרֶ֔יהָ מִלֶּ֥חֶם אָבִ֖יהָ תֹּאכֵ֑ל וְכָל־זָ֖ר לֹא־יֹ֥אכַל בּֽוֹ׃ ס ‎14 ‏וְאִ֕ישׁ כִּֽי־יֹאכַ֥ל קֹ֖דֶשׁ בִּשְׁגָגָ֑ה וְיָסַ֤ף חֲמִֽשִׁיתוֹ֙ עָלָ֔יו וְנָתַ֥ן לַכֹּהֵ֖ן אֶת־הַקֹּֽדֶשׁ׃ ‎15 ‏וְלֹ֣א יְחַלְּל֔וּ אֶת־קָדְשֵׁ֖י בְּנֵ֣י יִשְׂרָאֵ֑ל אֵ֥ת אֲשֶׁר־יָרִ֖ימוּ לַיהוָֽה׃ ‎16 ‏וְהִשִּׂ֤יאוּ אוֹתָם֙ עֲוֹ֣ן אַשְׁמָ֔ה בְּאָכְלָ֖ם אֶת־קָדְשֵׁיהֶ֑ם כִּ֛י אֲנִ֥י יְהוָ֖ה מְקַדְּשָֽׁם׃ פ ‎17 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ ‎18 ‏דַּבֵּ֨ר אֶֽל־אַהֲרֹ֜ן וְאֶל־בָּנָ֗יו וְאֶל֙ כָּל־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם אִ֣ישׁ אִישׁ֩ מִבֵּ֨ית יִשְׂרָאֵ֜ל וּמִן־הַגֵּ֣ר בְּיִשְׂרָאֵ֗ל אֲשֶׁ֨ר יַקְרִ֤יב קָרְבָּנוֹ֙ לְכָל־נִדְרֵיהֶם֙ וּלְכָל־נִדְבוֹתָ֔ם אֲשֶׁר־יַקְרִ֥יבוּ לַיהוָ֖ה לְעֹלָֽה׃ ‎19 ‏לִֽרְצֹנְכֶ֑ם תָּמִ֣ים זָכָ֔ר בַּבָּקָ֕ר בַּכְּשָׂבִ֖ים וּבָֽעִזִּֽים׃ ‎20 ‏כֹּ֛ל אֲשֶׁר־בּ֥וֹ מ֖וּם לֹ֣א תַקְרִ֑יבוּ כִּי־לֹ֥א לְרָצ֖וֹן יִהְיֶ֥ה לָכֶֽם׃ ‎21 ‏וְאִ֗ישׁ כִּֽי־יַקְרִ֤יב זֶֽבַח־שְׁלָמִים֙ לַיהוָ֔ה לְפַלֵּא־נֶ֙דֶר֙ א֣וֹ לִנְדָבָ֔ה בַּבָּקָ֖ר א֣וֹ בַצֹּ֑אן תָּמִ֤ים יִֽהְיֶה֙ לְרָצ֔וֹן כָּל־מ֖וּם לֹ֥א יִהְיֶה־בּֽוֹ׃ ‎22 ‏עַוֶּרֶת֩ א֨וֹ שָׁב֜וּר אוֹ־חָר֣וּץ אֽוֹ־יַבֶּ֗לֶת א֤וֹ גָרָב֙ א֣וֹ יַלֶּ֔פֶת לֹא־תַקְרִ֥יבוּ אֵ֖לֶּה לַיהוָ֑ה וְאִשֶּׁ֗ה לֹא־תִתְּנ֥וּ מֵהֶ֛ם עַל־הַמִּזְבֵּ֖חַ לַיהוָֽה׃ ‎23 ‏וְשׁ֥וֹר וָשֶׂ֖ה שָׂר֣וּעַ וְקָל֑וּט נְדָבָה֙ תַּעֲשֶׂ֣ה אֹת֔וֹ וּלְנֵ֖דֶר לֹ֥א יֵרָצֶֽה׃ ‎24 ‏וּמָע֤וּךְ וְכָתוּת֙ וְנָת֣וּק וְכָר֔וּת לֹ֥א תַקְרִ֖יבוּ לַֽיהוָ֑ה וּֽבְאַרְצְכֶ֖ם לֹ֥א תַעֲשֽׂוּ׃ ‎25 ‏וּמִיַּ֣ד בֶּן־נֵכָ֗ר לֹ֥א תַקְרִ֛יבוּ אֶת־לֶ֥חֶם אֱלֹהֵיכֶ֖ם מִכָּל־אֵ֑לֶּה כִּ֣י מָשְׁחָתָ֤ם בָּהֶם֙ מ֣וּם בָּ֔ם לֹ֥א יֵרָצ֖וּ לָכֶֽם׃ פ ‎26 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ ‎27 ‏שׁ֣וֹר אוֹ־כֶ֤שֶׂב אוֹ־עֵז֙ כִּ֣י יִוָּלֵ֔ד וְהָיָ֛ה שִׁבְעַ֥ת יָמִ֖ים תַּ֣חַת אִמּ֑וֹ וּמִיּ֤וֹם הַשְּׁמִינִי֙ וָהָ֔לְאָה יֵרָצֶ֕ה לְקָרְבַּ֥ן אִשֶּׁ֖ה לַיהוָֽה׃ ‎28 ‏וְשׁ֖וֹר אוֹ־שֶׂ֑ה אֹת֣וֹ וְאֶת־בְּנ֔וֹ לֹ֥א תִשְׁחֲט֖וּ בְּי֥וֹם אֶחָֽד׃ ‎29 ‏וְכִֽי־תִזְבְּח֥וּ זֶֽבַח־תּוֹדָ֖ה לַיהוָ֑ה לִֽרְצֹנְכֶ֖ם תִּזְבָּֽחוּ׃ ‎30 ‏בַּיּ֤וֹם הַהוּא֙ יֵאָכֵ֔ל לֹֽא־תוֹתִ֥ירוּ מִמֶּ֖נּוּ עַד־בֹּ֑קֶר אֲנִ֖י יְהוָֽה׃ ‎31 ‏וּשְׁמַרְתֶּם֙ מִצְוֹתַ֔י וַעֲשִׂיתֶ֖ם אֹתָ֑ם אֲנִ֖י יְהוָֽה׃ ‎32 ‏וְלֹ֤א תְחַלְּלוּ֙ אֶת־שֵׁ֣ם קָדְשִׁ֔י וְנִ֨קְדַּשְׁתִּ֔י בְּת֖וֹךְ בְּנֵ֣י יִשְׂרָאֵ֑ל אֲנִ֥י יְהוָ֖ה מְקַדִּשְׁכֶֽם׃ ‎33 ‏הַמּוֹצִ֤יא אֶתְכֶם֙ מֵאֶ֣רֶץ מִצְרַ֔יִם לִהְי֥וֹת לָכֶ֖ם לֵאלֹהִ֑ים אֲנִ֖י יְהוָֽה׃ פ

1 wayəḏabēr yəhwâ ’el-mōšeh llē’mōr: 2 dabēr ’el-’ahărōn wə’el-bānāyw wəyinnāzərû miqqāḏəšê ḇənê-yiśərā’ēl wəlō’ yəḥalləlû ’eṯ-šēm qāḏəšî ’ăšer hēm maqədišîm lî ’ănî yəhwâ: 3 ’ĕmōr ’ălēhem ləḏōrōṯêḵem kāl-’îš| ’ăšer-yiqəraḇ mikāl-zarə‘ăḵem ’el-haqqŏḏāšîm ’ăšer yaqədîšû ḇənê-yiśərā’ēl layhwâ wəṭumə’āṯwō ‘ālāyw wəniḵərəṯâ hannefeš hahiw’ milləfānay ’ănî yəhwâ: 4 ’îš ’îš mizzera‘ ’ahărōn wəhû’ ṣārû‘a ’wō zāḇ baqqŏḏāšîm lō’ yō’ḵal ‘aḏ ’ăšer yiṭəhār wəhannōḡē‘a bəḵāl-ṭəmē’-nefeš ’wō ’îš ’ăšer-tēṣē’ mimmennû šiḵəḇaṯ-zāra‘: 5 ’wō-’îš ’ăšer yiga‘ bəḵāl-šereṣ ’ăšer yiṭəmā’-lwō ’wō ḇə’āḏām ’ăšer yiṭəmā’-lwō ləḵōl ṭumə’āṯwō: 6 nefeš ’ăšer tiga‘-bwō wəṭāmə’â ‘aḏ-hā‘āreḇ wəlō’ yō’ḵal min-haqqŏḏāšîm kî ’im-rāḥaṣ bəśārwō bammāyim: 7 ûḇā’ haššemeš wəṭâēr wə’aḥar yō’ḵal min-haqqŏḏāšîm kî laḥəmwō hû’: 8 nəḇēlâ ûṭərēfâ lō’ yō’ḵal ləṭāmə’â-ḇāh ’ănî yəhwâ: 9 wəšāmərû ’eṯ-mišəmarətî wəlō’-yiśə’û ‘ālāyw ḥēṭə’ ûmēṯû ḇwō kî yəḥalləluhû ’ănî yəhwâ məqadəšām: 10 wəḵāl-zār lō’-yō’ḵal qōḏeš twōšaḇ kōhēn wəśāḵîr lō’-yō’ḵal qōḏeš: 11 wəḵōhēn kî-yiqəneh nefeš qinəyan kasəpwō hû’ yō’ḵal bwō wîlîḏ bêṯwō hēm yō’ḵəlû ḇəlaḥəmwō: 12 ûḇaṯ-kōhēn kî ṯihəyeh lə’îš zār hiw’ biṯərûmaṯ haqqŏḏāšîm lō’ ṯō’ḵēl: 13 ûḇaṯ-kōhēn kî ṯihəyeh ’aləmānâ ûḡərûšâ wəzera‘ ’ên lāh wəšāḇâ ’el-bêṯ ’āḇîhā kinə‘ûreyhā milleḥem ’āḇîhā tō’ḵēl wəḵāl-zār lō’-yō’ḵal bwō: s 14 wə’îš kî-yō’ḵal qōḏeš bišəḡāḡâ wəyāsaf ḥămišîṯwō ‘ālāyw wənāṯan lakōhēn ’eṯ-haqqōḏeš: 15 wəlō’ yəḥalləlû ’eṯ-qāḏəšê bənê yiśərā’ēl ’ēṯ ’ăšer-yārîmû layhwâ: 16 wəhiśśî’û ’wōṯām ‘ăwōn ’ašəmâ bə’āḵəlām ’eṯ-qāḏəšêhem kî ’ănî yəhwâ məqadəšām: f 17 wayəḏabēr yəhwâ ’el-mōšeh llē’mōr: 18 dabēr ’el-’ahărōn wə’el-bānāyw wə’el kāl-bənê yiśərā’ēl wə’āmarətā ’ălēhem ’îš ’îš mibêṯ yiśərā’ēl ûmin-hagēr bəyiśərā’ēl ’ăšer yaqərîḇ qārəbānwō ləḵāl-niḏərêhem ûləḵāl-niḏəḇwōṯām ’ăšer-yaqərîḇû layhwâ lə‘ōlâ: 19 lirəṣōnəḵem tāmîm zāḵār babāqār bakəśāḇîm ûḇā‘izzîm: 20 kōl ’ăšer-bwō mûm lō’ ṯaqərîḇû kî-lō’ lərāṣwōn yihəyeh lāḵem: 21 wə’îš kî-yaqərîḇ zeḇaḥ-šəlāmîm layhwâ ləfallē’-neḏer ’wō linəḏāḇâ babāqār ’wō ḇaṣṣō’n tāmîm yihəyeh lərāṣwōn kāl-mûm lō’ yihəyeh-bwō: 22 ‘aûereṯ ’wō šāḇûr ’wō-ḥārûṣ ’wō-yabeleṯ ’wō ḡārāḇ ’wō yallefeṯ lō’-ṯaqərîḇû ’ēlleh layhwâ wə’iššeh lō’-ṯitənû mēhem ‘al-hammizəbēḥa layhwâ: 23 wəšwōr wāśeh śārû‘a wəqālûṭ nəḏāḇâ ta‘ăśeh ’ōṯwō ûlənēḏer lō’ yērāṣeh: 24 ûmā‘ûḵə wəḵāṯûṯ wənāṯûq wəḵārûṯ lō’ ṯaqərîḇû layhwâ ûḇə’arəṣəḵem lō’ ṯa‘ăśû: 25 ûmîyaḏ ben-nēḵār lō’ ṯaqərîḇû ’eṯ-leḥem ’ĕlōhêḵem mikāl-’ēlleh kî māšəḥāṯām bâem mûm bām lō’ yērāṣû lāḵem: f 26 wayəḏabēr yəhwâ ’el-mōšeh llē’mōr: 27 šwōr ’wō-ḵeśeḇ ’wō-‘ēz kî yiûālēḏ wəhāyâ šiḇə‘aṯ yāmîm taḥaṯ ’immwō ûmîywōm haššəmînî wâālə’â yērāṣeh ləqārəban ’iššeh layhwâ: 28 wəšwōr ’wō-śeh ’ōṯwō wə’eṯ-bənwō lō’ ṯišəḥăṭû bəywōm ’eḥāḏ: 29 wəḵî-ṯizəbəḥû zeḇaḥ-twōḏâ layhwâ lirəṣōnəḵem tizəbāḥû: 30 bayywōm hahû’ yē’āḵēl lō’-ṯwōṯîrû mimmennû ‘aḏ-bōqer ’ănî yəhwâ: 31 ûšəmarətem miṣəwōṯay wa‘ăśîṯem ’ōṯām ’ănî yəhwâ: 32 wəlō’ ṯəḥalləlû ’eṯ-šēm qāḏəšî wəniqədašətî bəṯwōḵə bənê yiśərā’ēl ’ănî yəhwâ məqadišəḵem: 33 hammwōṣî’ ’eṯəḵem mē’ereṣ miṣərayim lihəywōṯ lāḵem lē’lōhîm ’ănî yəhwâ: f