Judges (Shoftim): Judges (Shoftim) Chapter 5

Tanach (Hebrew): Judges (Shoftim) Chapter 5

‎1 ‏וַתָּ֣שַׁר דְּבוֹרָ֔ה וּבָרָ֖ק בֶּן־אֲבִינֹ֑עַם בַּיּ֥וֹם הַה֖וּא לֵאמֹֽר׃ ‎2 ‏בִּפְרֹ֤עַ פְּרָעוֹת֙ בְּיִשְׂרָאֵ֔ל בְּהִתְנַדֵּ֖ב עָ֑ם בָּרֲכ֖וּ יְהוָֽה׃ ‎3 ‏שִׁמְע֣וּ מְלָכִ֔ים הַאֲזִ֖ינוּ רֹֽזְנִ֑ים אָֽנֹכִ֗י לַֽיהוָה֙ אָנֹכִ֣י אָשִׁ֔ירָה אֲזַמֵּ֕ר לַֽיהוָ֖ה אֱלֹהֵ֥י יִשְׂרָאֵֽל׃ ‎4 ‏יְהוָ֗ה בְּצֵאתְךָ֤ מִשֵּׂעִיר֙ בְּצַעְדְּךָ֙ מִשְּׂדֵ֣ה אֱד֔וֹם אֶ֣רֶץ רָעָ֔שָׁה גַּם־שָׁמַ֖יִם נָטָ֑פוּ גַּם־עָבִ֖ים נָ֥טְפוּ מָֽיִם׃ ‎5 ‏הָרִ֥ים נָזְל֖וּ מִפְּנֵ֣י יְהוָ֑ה זֶ֣ה סִינַ֔י מִפְּנֵ֕י יְהוָ֖ה אֱלֹהֵ֥י יִשְׂרָאֵֽל׃ ‎6 ‏בִּימֵ֞י שַׁמְגַּ֤ר בֶּן־עֲנָת֙ בִּימֵ֣י יָעֵ֔ל חָדְל֖וּ אֳרָח֑וֹת וְהֹלְכֵ֣י נְתִיב֔וֹת יֵלְכ֕וּ אֳרָח֖וֹת עֲקַלְקַלּֽוֹת׃ ‎7 ‏חָדְל֧וּ פְרָז֛וֹן בְּיִשְׂרָאֵ֖ל חָדֵ֑לּוּ עַ֤ד שַׁקַּ֙מְתִּי֙ דְּבוֹרָ֔ה שַׁקַּ֥מְתִּי אֵ֖ם בְּיִשְׂרָאֵֽל׃ ‎8 ‏יִבְחַר֙ אֱלֹהִ֣ים חֲדָשִׁ֔ים אָ֖ז לָחֶ֣ם שְׁעָרִ֑ים מָגֵ֤ן אִם־יֵֽרָאֶה֙ וָרֹ֔מַח בְּאַרְבָּעִ֥ים אֶ֖לֶף בְּיִשְׂרָאֵֽל׃ ‎9 ‏לִבִּי֙ לְחוֹקְקֵ֣י יִשְׂרָאֵ֔ל הַמִּֽתְנַדְּבִ֖ים בָּעָ֑ם בָּרֲכ֖וּ יְהוָֽה׃ ‎10 ‏רֹכְבֵי֩ אֲתֹנ֨וֹת צְחֹר֜וֹת יֹשְׁבֵ֧י עַל־מִדִּ֛ין וְהֹלְכֵ֥י עַל־דֶּ֖רֶךְ שִֽׂיחוּ׃ ‎11 ‏מִקּ֣וֹל מְחַֽצְצִ֗ים בֵּ֚ין מַשְׁאַבִּ֔ים שָׁ֤ם יְתַנּוּ֙ צִדְק֣וֹת יְהוָ֔ה צִדְקֹ֥ת פִּרְזֹנ֖וֹ בְּיִשְׂרָאֵ֑ל אָ֛ז יָרְד֥וּ לַשְּׁעָרִ֖ים עַם־יְהוָֽה׃ ‎12 ‏עוּרִ֤י עוּרִי֙ דְּבוֹרָ֔ה ע֥וּרִי ע֖וּרִי דַּבְּרִי־שִׁ֑יר ק֥וּם בָּרָ֛ק וּֽשֲׁבֵ֥ה שֶׁבְיְךָ֖ בֶּן־אֲבִינֹֽעַם׃ ‎13 ‏אָ֚ז יְרַ֣ד שָׂרִ֔יד לְאַדִּירִ֖ים עָ֑ם יְהוָ֕ה יְרַד־לִ֖י בַּגִּבּוֹרִֽים׃ ‎14 ‏מִנִּ֣י אֶפְרַ֗יִם שָׁרְשָׁם֙ בַּעֲמָלֵ֔ק אַחֲרֶ֥יךָ בִנְיָמִ֖ין בַּֽעֲמָמֶ֑יךָ מִנִּ֣י מָכִ֗יר יָֽרְדוּ֙ מְחֹ֣קְקִ֔ים וּמִ֨זְּבוּלֻ֔ן מֹשְׁכִ֖ים בְּשֵׁ֥בֶט סֹפֵֽר׃ ‎15 ‏וְשָׂרַ֤י בְּיִשָּׂשכָר֙ עִם־דְּבֹרָ֔ה וְיִשָּׂשכָר֙ כֵּ֣ן בָּרָ֔ק בָּעֵ֖מֶק שֻׁלַּ֣ח בְּרַגְלָ֑יו בִּפְלַגּ֣וֹת רְאוּבֵ֔ן גְּדֹלִ֖ים חִקְקֵי־לֵֽב׃ ‎16 ‏לָ֣מָּה יָשַׁ֗בְתָּ בֵּ֚ין הַֽמִּשְׁפְּתַ֔יִם לִשְׁמֹ֖עַ שְׁרִק֣וֹת עֲדָרִ֑ים לִפְלַגּ֣וֹת רְאוּבֵ֔ן גְּדוֹלִ֖ים חִקְרֵי־לֵֽב׃ ‎17 ‏גִּלְעָ֗ד בְּעֵ֤בֶר הַיַּרְדֵּן֙ שָׁכֵ֔ן וְדָ֕ן לָ֥מָּה יָג֖וּר אֳנִיּ֑וֹת אָשֵׁ֗ר יָשַׁב֙ לְח֣וֹף יַמִּ֔ים וְעַ֥ל מִפְרָצָ֖יו יִשְׁכּֽוֹן׃ ‎18 ‏זְבֻל֗וּן עַ֣ם חֵרֵ֥ף נַפְשׁ֛וֹ לָמ֖וּת וְנַפְתָּלִ֑י עַ֖ל מְרוֹמֵ֥י שָׂדֶֽה׃ ‎19 ‏בָּ֤אוּ מְלָכִים֙ נִלְחָ֔מוּ אָ֤ז נִלְחֲמוּ֙ מַלְכֵ֣י כְנַ֔עַן בְּתַעְנַ֖ךְ עַל־מֵ֣י מְגִדּ֑וֹ בֶּ֥צַע כֶּ֖סֶף לֹ֥א לָקָֽחוּ׃ ‎20 ‏מִן־שָׁמַ֖יִם נִלְחָ֑מוּ הַכּֽוֹכָבִים֙ מִמְּסִלּוֹתָ֔ם נִלְחֲמ֖וּ עִם־סִיסְרָֽא׃ ‎21 ‏נַ֤חַל קִישׁוֹן֙ גְּרָפָ֔ם נַ֥חַל קְדוּמִ֖ים נַ֣חַל קִישׁ֑וֹן תִּדְרְכִ֥י נַפְשִׁ֖י עֹֽז׃ ‎22 ‏אָ֥ז הָלְמ֖וּ עִקְּבֵי־ס֑וּס מִֽדַּהֲר֖וֹת דַּהֲר֥וֹת אַבִּירָֽיו׃ ‎23 ‏א֣וֹרוּ מֵר֗וֹז אָמַר֙ מַלְאַ֣ךְ יְהוָ֔ה אֹ֥רוּ אָר֖וֹר יֹשְׁבֶ֑יהָ כִּ֤י לֹֽא־בָ֙אוּ֙ לְעֶזְרַ֣ת יְהוָ֔ה לְעֶזְרַ֥ת יְהוָ֖ה בַּגִּבּוֹרִֽים׃ ‎24 ‏תְּבֹרַךְ֙ מִנָּשִׁ֔ים יָעֵ֕ל אֵ֖שֶׁת חֶ֣בֶר הַקֵּינִ֑י מִנָּשִׁ֥ים בָּאֹ֖הֶל תְּבֹרָֽךְ׃ ‎25 ‏מַ֥יִם שָׁאַ֖ל חָלָ֣ב נָתָ֑נָה בְּסֵ֥פֶל אַדִּירִ֖ים הִקְרִ֥יבָה חֶמְאָֽה׃ ‎26 ‏יָדָהּ֙ לַיָּתֵ֣ד תִּשְׁלַ֔חְנָה וִֽימִינָ֖הּ לְהַלְמ֣וּת עֲמֵלִ֑ים וְהָלְמָ֤ה סִֽיסְרָא֙ מָחֲקָ֣ה רֹאשׁ֔וֹ וּמָחֲצָ֥ה וְחָלְפָ֖ה רַקָּתֽוֹ׃ ‎27 ‏בֵּ֣ין רַגְלֶ֔יהָ כָּרַ֥ע נָפַ֖ל שָׁכָ֑ב בֵּ֤ין רַגְלֶ֙יהָ֙ כָּרַ֣ע נָפָ֔ל בַּאֲשֶׁ֣ר כָּרַ֔ע שָׁ֖ם נָפַ֥ל שָׁדֽוּד׃ ‎28 ‏בְּעַד֩ הַחַלּ֨וֹן נִשְׁקְפָ֧ה וַתְּיַבֵּ֛ב אֵ֥ם סִֽיסְרָ֖א בְּעַ֣ד הָֽאֶשְׁנָ֑ב מַדּ֗וּעַ בֹּשֵׁ֤שׁ רִכְבּוֹ֙ לָב֔וֹא מַדּ֣וּעַ אֶֽחֱר֔וּ פַּעֲמֵ֖י מַרְכְּבוֹתָֽיו׃ ‎29 ‏חַכְמ֥וֹת שָׂרוֹתֶ֖יהָ תַּעֲנֶ֑ינָּה אַף־הִ֕יא תָּשִׁ֥יב אֲמָרֶ֖יהָ לָֽהּ׃ ‎30 ‏הֲלֹ֨א יִמְצְא֜וּ יְחַלְּק֣וּ שָׁלָ֗ל רַ֤חַם רַחֲמָתַ֙יִם֙ לְרֹ֣אשׁ גֶּ֔בֶר שְׁלַ֤ל צְבָעִים֙ לְסִ֣יסְרָ֔א שְׁלַ֥ל צְבָעִ֖ים רִקְמָ֑ה צֶ֥בַע רִקְמָתַ֖יִם לְצַוְּארֵ֥י שָׁלָֽל׃ ‎31 ‏כֵּ֠ן יֹאבְד֤וּ כָל־אוֹיְבֶ֙יךָ֙ יְהוָ֔ה וְאֹ֣הֲבָ֔יו כְּצֵ֥את הַשֶּׁ֖מֶשׁ בִּגְבֻרָת֑וֹ וַתִּשְׁקֹ֥ט הָאָ֖רֶץ אַרְבָּעִ֥ים שָׁנָֽה׃ פ

1 watāšar dəḇwōrâ ûḇārāq ben-’ăḇînō‘am bayywōm hahû’ lē’mōr: 2 bifərō‘a pərā‘wōṯ bəyiśərā’ēl bəhiṯənadēḇ ‘ām bārăḵû yəhwâ: 3 šimə‘û məlāḵîm ha’ăzînû rōzənîm ’ānōḵî layhwâ ’ānōḵî ’āšîrâ ’ăzammēr layhwâ ’ĕlōhê yiśərā’ēl: 4 yəhwâ bəṣē’ṯəḵā miśśē‘îr bəṣa‘ədəḵā miśśəḏēh ’ĕḏwōm ’ereṣ rā‘āšâ gam-šāmayim nāṭāfû gam-‘āḇîm nāṭəfû māyim: 5 hārîm nāzəlû mipənê yəhwâ zeh sînay mipənê yəhwâ ’ĕlōhê yiśərā’ēl: 6 bîmê šaməgar ben-‘ănāṯ bîmê yā‘ēl ḥāḏəlû ’ŏrāḥwōṯ wəhōləḵê nəṯîḇwōṯ yēləḵû ’ŏrāḥwōṯ ‘ăqaləqallwōṯ: 7 ḥāḏəlû fərāzwōn bəyiśərā’ēl ḥāḏēllû ‘aḏ šaqqamətî dəḇwōrâ šaqqamətî ’ēm bəyiśərā’ēl: 8 yiḇəḥar ’ĕlōhîm ḥăḏāšîm ’āz lāḥem šə‘ārîm māḡēn ’im-yērā’eh wārōmaḥ bə’arəbā‘îm ’elef bəyiśərā’ēl: 9 libî ləḥwōqəqê yiśərā’ēl hammiṯənadəḇîm bā‘ām bārăḵû yəhwâ: 10 rōḵəḇê ’ăṯōnwōṯ ṣəḥōrwōṯ yōšəḇê ‘al-midîn wəhōləḵê ‘al-dereḵə śîḥû: 11 miqqwōl məḥaṣəṣîm bên mašə’abîm šām yəṯannû ṣiḏəqwōṯ yəhwâ ṣiḏəqōṯ pirəzōnwō bəyiśərā’ēl ’āz yārəḏû laššə‘ārîm ‘am-yəhwâ: 12 ‘ûrî ‘ûrî dəḇwōrâ ‘ûrî ‘ûrî dabərî-šîr qûm bārāq ûšăḇēh šeḇəyəḵā ben-’ăḇînō‘am: 13 ’āz yəraḏ śārîḏ lə’adîrîm ‘ām yəhwâ yəraḏ-lî bagibwōrîm: 14 minnî ’efərayim šārəšām ba‘ămālēq ’aḥăreyḵā ḇinəyāmîn ba‘ămāmeyḵā minnî māḵîr yārəḏû məḥōqəqîm ûmizzəḇûlun mōšəḵîm bəšēḇeṭ sōfēr: 15 wəśāray bəyiśśāsḵār ‘im-dəḇōrâ wəyiśśāsḵār kēn bārāq bā‘ēmeq šullaḥ bəraḡəlāyw bifəlagwōṯ rə’ûḇēn gəḏōlîm ḥiqəqê-lēḇ: 16 lāmmâ yāšaḇətā bên hammišəpəṯayim lišəmō‘a šəriqwōṯ ‘ăḏārîm lifəlagwōṯ rə’ûḇēn gəḏwōlîm ḥiqərê-lēḇ: 17 gilə‘āḏ bə‘ēḇer hayyarədēn šāḵēn wəḏān lāmmâ yāḡûr ’ŏnîywōṯ ’āšēr yāšaḇ ləḥwōf yammîm wə‘al mifərāṣāyw yišəkwōn: 18 zəḇulûn ‘am ḥērēf nafəšwō lāmûṯ wənafətālî ‘al mərwōmê śāḏeh: 19 bā’û məlāḵîm niləḥāmû ’āz niləḥămû maləḵê ḵəna‘an bəṯa‘ənaḵə ‘al-mê məḡidwō beṣa‘ kesef lō’ lāqāḥû: 20 min-šāmayim niləḥāmû hakwōḵāḇîm mimməsillwōṯām niləḥămû ‘im-sîsərā’: 21 naḥal qîšwōn gərāfām naḥal qəḏûmîm naḥal qîšwōn tiḏərəḵî nafəšî ‘ōz: 22 ’āz hāləmû ‘iqqəḇê-sûs midahărwōṯ dahărwōṯ ’abîrāyw: 23 ’wōrû mērwōz ’āmar malə’aḵə yəhwâ ’ōrû ’ārwōr yōšəḇeyhā kî lō’-ḇā’û lə‘ezəraṯ yəhwâ lə‘ezəraṯ yəhwâ bagibwōrîm: 24 təḇōraḵə minnāšîm yā‘ēl ’ēšeṯ ḥeḇer haqqênî minnāšîm bā’ōhel təḇōrāḵə: 25 mayim šā’al ḥālāḇ nāṯānâ bəsēfel ’adîrîm hiqərîḇâ ḥemə’â: 26 yāḏāh layyāṯēḏ tišəlaḥənâ wîmînāh ləhaləmûṯ ‘ămēlîm wəhāləmâ sîsərā’ māḥăqâ rō’šwō ûmāḥăṣâ wəḥāləfâ raqqāṯwō: 27 bên raḡəleyhā kāra‘ nāfal šāḵāḇ bên raḡəleyhā kāra‘ nāfāl ba’ăšer kāra‘ šām nāfal šāḏûḏ: 28 bə‘aḏ haḥallwōn nišəqəfâ watəyabēḇ ’ēm sîsərā’ bə‘aḏ hā’ešənāḇ madû‘a bōšēš riḵəbwō lāḇwō’ madû‘a ’eḥĕrû pa‘ămê marəkəḇwōṯāyw: 29 ḥaḵəmwōṯ śārwōṯeyhā ta‘ăneynnâ ’af-hî’ tāšîḇ ’ămāreyhā lāh: 30 hălō’ yiməṣə’û yəḥalləqû šālāl raḥam raḥămāṯayim lərō’š geḇer šəlal ṣəḇā‘îm ləsîsərā’ šəlal ṣəḇā‘îm riqəmâ ṣeḇa‘ riqəmāṯayim ləṣaûə’rê šālāl: 31 kēn yō’ḇəḏû ḵāl-’wōyəḇeyḵā yəhwâ wə’ōhăḇāyw kəṣē’ṯ haššemeš biḡəḇurāṯwō watišəqōṭ hā’āreṣ ’arəbā‘îm šānâ: f